iVakaraitaki kei Mosese kei Eroni ena igadigadi nei Fero, mai vei Robert T. Barrett

28 ni Maji–3 ni Epereli

Na Lako Yani 7–13

“Nanuma Tiko na Siga Oqo, Dou a Lako Tani Kina mai Ijipita”

Ni o wilika ka vakananuma titobu Na Lako Yani 7–3, vola na veika e yaco mai vei iko. Ni ko sa vakayacora vakawasoma, ena tubu na nomu kaukauwa mo kila na vakasolokakana ni Yalo Tabu.

Vola na Veika o Uqeti Kina

A vakararawataki o Ijipita ena matetaka veitaravi, ia a sega ni via sereki ira na Isireli o Fero. Ia a tomana tikoga na Kalou na nona vakaraitaka na Nona kaukauwa ka solia vei Fero na madigi me ciqoma “ni sai au ko Jiova” ka “ni sa sega e dua me tautauvata kei au e vuravura taucoko” (Na Lako Yani 7:5; 9:14). Ia, e rairai ni ra a sarava tu ena qoroqoro o Mosese kei ira na Isireli na kena vakatakilai mai na kaukauwa ni Kalou oqo ena vukudra. E ka dina sara na ivakatakilakila tomani tiko oqo e vakadeitaka na nodra vakabauta na Kalou ka vaqaqacotaka na nodra sa tuvakarau me ra muria na parofita ni Kalou. Oti o ya, ni sa sega ni rawa ni sereki ira rawa na Isireli e ciwa na mate veitauvi rerevaki, sai koya na ikatini ni mate veitauvi—na nodra mate na ulumatua, ka oka kina na ulumatua nei Fero—sa qai tinia na tiko vakavesu. E kena irairai ni sa qai rauta vinaka oqo baleta ena veigauna kece ni tiko vakavesu vakayalo, e dua ga na sala ni dro bula. Veitalia na cava tale eda a tovolea ena veigauna e liu, e sa tiko vata kei keda me vakataki ira na luvei Isireli. Na isoro duadua ga i Jisu Karisito, na Ulumatua—na dra ni Lami sega na kena ca—ena vakabulai keda.

Vakasama ni Vuli iVolanikalou ni Tamata Yadua

Na Lako Yani 7–11

Au rawa ni digitaka meu vakamalumalumutaka na yaloqu.

Sa nuitaki ni na sega ni veisaqasaqa sara vakalevu kei na loma ni Kalou me vakataki Fero na lomamu. Ia, ena so ga na gauna e sega ni dau malumalumu sara na yaloda me vaka na kena dodonu, o koya e tiko kina e dua na ka me da vulica mai na ivalavala nei Fero ka volai tu e Na Lako Yani 7–10. Ni o wilika me baleta na mate veitauvi ena veiwase ni ivola oqo, na cava e votu levu vei iko baleta na isau ni taro nei Fero? O raica beka e dua na ivakarau ni yalokaukauwa e tautauvata kaya vei iko? Vakasamataka vakatitobu na veika o sa vulica mai na veiwase oqo baleta na kena ibalebale me malumalumu na yalo.

Kila ni iVakadewa nei Josefa Simici ni Na Lako Yani 7:3, 13; 9:12; 10:1, 20, 27; 11:10 e vakamatatataka ni a sega ni vakaukauwataka na yaloi Fero na Turaga—a vakaukauwataka ga o Fero na yalona (raica na ivakamacala e ra me baleta na veitiki ni ivolanikalou yadua).

Na cava o vulica mai na ivolanikalou oqo me baleta na kena tarai cake e dua na yalo malumalumu? 1 Nifai 2:16; Mosaia 3:19; Alama 24:7–8; 62:41; Ica 12:27.

Raica talega na Michael T. Ringwood, “E Dua na Yalorawarawa ka Tuvakarau me Vakadinata,” Liaona, Nove. 2009, 100–102.

Na Lako Yani 12:1–42

Na Lakosivia e vakatakarakarataka na Veisorovaki i Jisu Karisito.

Na sala duadua ga vei ira na Isireli me ra vakabulai mai na ikatini ni mate veitauvi, ka vakamacalataki ena Na Lako Yani 11:4–5, me vakamuria vakamatailalai na idusidusi a solia na Turaga vei Mosese e Na Lako Yani 12, e dua na soqo vakalotu ka vakatokai na Lakosivia. Na Lakosivia e vakavulica vei keda ena ivakatakarakara ni, me vaka ga na nona a sereki ira na Isireli na Turaga mai na nodra vakabobulataki mai Ijipita, sa rawa talega me sereki keda mai na veivakabobulataki ni ivalavala ca. Na cava o rawa ni kunea ena idusidusi kei na ivakatakarakara ni Lakosivia ka vakananumi Jisu Karisito kei na nona Veisorovaki vei iko? Na cava e vakatura vei iko na ivakatakarakara kei na idusidusi ena ivakarau me ciqomi kina na veivakalougatataki ni Nona Veisorovaki? Me kena ivakaraitaki, na cava e rawa ni matataka na boro ni duru ni katuba ena dra ni lami? (tikina e 7). Na cava na kena ibalebale vei iko me “vakaivava na yavamudou, ka me taura na ititoko na ligamudou”? (tikina e 11).

Raica talega na Vunau kei na Veiyalayalati 89:21

E vukei keda na sakaramede me da nanuma na noda Dauveivueti o Jisu Karisito

Na Lako Yani 12:14–17, 24–27; 13:1–16

E vukei au na sakaramede meu nanuma na noqu sereki mai vei Jisu Karisito.

E gadreva na iVakabula me ra dau nanumi koya tikoga na Isireli ni a sereki ira ko Koya, ena gauna sara mada ga sa oti kina e dua na gauna balavu. Oqo na vuna sa vakaroti ira kina me ra dau vakananuma na Lakosivia ena veiyabaki. Ni o wilika tiko na Nona ivakaro e Na Lako Yani 12:14–17, 24–27; 13:1–16, vakasamataka mada na veika o sa cakava mo nanuma tiko kina na veivakalougatataki ni Kalou vei iko. Mo na maroroya vakacava na ivakananumi oqori “ena taucoko ni nomudou itabatamata”? (raica Na Lako Yani 12:14, 26–27).

Na cava soti e tautauvata me baleta na inaki ni kanavata ni Lakosivia kei na sakaramede o raica rawa? E vakananuma vakacava vei iko na saramede na nomu wilika na Lakosivia ka vakaibalebale vakalevu cake kina na cakacaka vakalotu oya? Vakasamataka na cava o rawa ni cakava mo “dau nanumi” Jisu Karisito tikoga (Moronai 4:3; 5:2; raica talega na Luke 22:7–8, 19–20).

O rawa talega ni vakasamataka na veika tale eso e vinakata na Turaga mo dau nanuma; raica, me kena ivakaraitaki, na Ilamani 5:6–12; Moronai 10:3; Vunau kei na Veiyalayalati 3:3–5, 10; 18:10; : 52: 40.

Raica talega na Joni 6:54; “Always Remember Him” (vidio), ChurchofJesusChrist.org; “Na sakaramede ni Vakayakavi ni Turaga,” ena Nodra iVakavuvuli na Peresitedi ni Lotu: Howard W. Hunter (2015), 197–206.

Vakasama baleta na Vuli iVolanikalou Vakamatavuvale kei na Lotu Vakamatavuvale

Na Lako Yani 7–12.E rairai ni oti na kena wiliki na mate veitauvi a tala na Turaga vei ira na kai Ijipita me ivakatakilakila ni nona kaukauwa, e rawa ni ra wasea na lewe ni nomu matavuvale na sala sa vakaraitaka tiko kina na Turaga na Nona kaukauwa ena gauna oqo.

Na Lako Yani 8:28,32; 9:27–28, 34–35.E rawa ni vakayagataki na veitikina oqo me tekivutaki kina na veivosaki me baleta na bibi ni kena maroroi na noda vosa. De rawa ni ra wasea na lewe ni matavuvale na veika a yaco vei ira ena nodra raici ira na tani ni ra cakava tiko na veika era sa vakadonuya me ra cakava.

Na Lako Yani 12:1–42.Ni wiliki vata oti Na Lako Yani 12:1–42 e rawa mo vola ena veitiki ni pepa na veika e rawa ni dou cakava vakamatavuvale me nanumi kina na Veisorovaki nei Jisu Karisito. Baleta ni dra ni Lami ena duru ni katuba (raica na tikina e 23) e matataka na iVakabula, sa rawa mo biuta na veitiki ni pepa wavolita e dua na katuba ena nomu vale. E rawa talega ni o kania eso na kakana mai na Lakosivia, me vakataka na madrai sega ni vakaleveni (bisikete se na totila) se na co gaga (pasili se oseretisi [horseradish]), ka veitalanoataka se vukei keda vakacava na Lakosivia me da nanuma tiko na nona sereki ira na nona tamata na Kalou. Me kena ivakaraitaki, na madrai sega ni vakaleveni e vakananuma vei ira ni sa sega na gauna me tubu kina na kedra madrai ni se bera ni ra qai dro tani mai na tiko vakavesu. E vakananuma vei ira na co gaga na mosimosi ni tiko vakavesu.

Na Lako Yani 12:14, 24–27.De rawa ni dou railesuva vakamatavuvale na veitikina oqo ni bera na soqoni ni sakaramede e tarava. E semati vakacava na veitikina oqo ki na sakaramede? Ena rawa beka vakacava me da kitaka vakataucoko na sakaramede me dua na “ivakananumi” ni veika sa cakava ena vukuda na iVakabula?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Nanumi Nona Rube,” Sere ni Lotu, naba. 109.

Vakatorocaketaki ni Noda Veivakavulici

Wasea nai naki ni lesoni e vakaibalebale. Sureti ira na lewe ni matavuvale me ra raica na iyaya eso ka na vukei ira mera kila vakavinaka na ivakavuvuli ena ivolanikalou dou wilika tiko. Me kena ivakaraitaki, na iyaya malumu kei na iyaya kaukauwa e rawa ni vukei ira na lewe ni matavuvale me ra veivosakitaka na kedrau duidui e dua na yalo malumalumu kei na dua na yalokaukauwa.

Droini ni dua na ivakayakavi ni Lakosivia, mai vei Brian Call