Droini kei Mosese kei Eroni e lomanibai nei Fero, mai vei Robert T. Barrett

28 ni Maji–3 ni Epereli

Na Lako Yani 7–13

“Dou Nanuma na Siga Oqo, Dou a Lako mai kina mai Ijipita”

Ni o wilika na Lako Yani 7–13, vakasamataka na sala e vaqaqacotaka kina na nomu vakabauti Jisu Karisito na dina e tiko ena wase eso oqo. O na vukei ira vakacava na gone o vakavulica me tu na nodra kasotavi tautauvata?

Vola na Veika o Vakauqeti Kina

Sureta na Veiwasei

Biuta na iyaloyalo eso e matataka na veika e Na Lako Yani 7–13 (me vaka e dua na boto, na lago, kei na dua na lami) ena ruku ni dua na tiki ni sulu ena dua na teveli. Sureta e vica na gone mera taura e dua na iyaloyalo mai na ruku ni isulu, ka sureti ira mera wasea ki na kalasi na veika era sa vulica me baleta na iyaloyalo oqo e vale ena macawa oqo.

Vakavulica na iVunau: Gone Sobu

Na Lako Yani 7–11

Na Turaga e tu Nona kaukauwa ena veika kece.

Era a vesuki tu na Isireli ka sega ni rawa ni ra sereki ira vakai ira, ia na Turaga ea vakaraitaka na Nona kaukauwa ka sereki ira. E rawa vakacava mo vakayagataka na italanoa oqo me vukei ira na gone mera vakabauta na Turaga kei na Nona kaukauwa?

iTaviqaravi e Rawa ni Caka

• Wilika na veitikina digitaki mai na Na Lako Yani 7–11 , me vakavulici ira na gone me baleta na na mate veitauvi e tini ea tala mai na Turaga vei ira na kai Ijipita (raica talega na “Mosese na Parofita,” ena ITukuni ni Veiyalayalati Makawa). Sureti ira na gone me ra droinitaka na iyaloyalo e vakaraitaka eso na mate veitauvi. Kerei ira na gone me ra dulaka cake na nodra iyaloyalo ni ko railesuva tale na mate veitauvi. Wilika na matavosa eso mai Na Lako Yani 7:5 kei na 9:14 me vakamacalataka na vuna ea tala kina na Turaga na mate veitauvi ki Ijipita.

• Wasea vata kei ira na gone na sala cava sa vakaraitaka kina vei iko na Turaga “ni sa sega e dua me tautauvata [Kaya] e vuravura taucoko” (Na Lako Yani 9:14). Mera wasea na gone era kila vakacava ni sa kaukauwa sara na Turaga.

Na Lako Yani 12:1–13; 13:10

Na sakaramede e rawa ni vukea meu nanumi Jisu.

Na Lakosivia e vakavulica vei ira na Isireli me baleta na iVakabula kei na solibula ena cakava oKoya ena dua na siga me baleti keda. Nikua, eda sa taura na sakaramede meda nanuma na solibula i Jisu.

Sa vukei au na sakaramede meu nanumi Jisu Karisito.

iTaviqaravi e Rawa ni Caka

• Vakayagataka na Na Lako Yani 12:1–13, mo tukuna vei ira na gone na cava e tukuna na Turaga vei ira na Isireli mera vakayacora mera vakabulai kina mai na iotioti ni mate (raica talega na “Na Lako Sivia,” ena ITukuni ni Veiyalayalati Makawa). Vakaraitaka na iyaloyalo Ko Jisu ni Kauta tiko na Lami Lakosese (Gospel Art Book, naba 64), ka dusia na veika e tautauvata ena lami ea vakayagataki ena Lakosivia kei Jisu Karisito, na Lami ni Kalou.

• Kerei ira na gone mera cavuta na veika eda cakava me da nanuma kina na veika bibi me vaka na veisiga ni sucu kei na gauna ni vakacagicagi. Wilika Na Lako Yani 13:10, ka vakamacalataka ni Turaga ea kerei ira na luve i Isireli me marautaka na Lakosivia ena veiyabaki me vukea mera nanuma tiko ni a vakabulai ira oKoya mai vei ira na kai Ijipita. Na cava soti na sala eda rawa ni nanuma kina ni o Jisu e vakabulai keda mai na ivalavala ca kei na mate?

• Kevaka e rawa, sikova na teveli ni sakaramede vata kei ira na gone, ka veivosakitaka ena vukei keda vakacava na sakaramede meda nanumi Jisu Karisito. Lagata vata na “The Sacrament” (iVolanisere ni Lalai, 72) se dua tale na sere ni vakarokoroko me baleti Jisu Karisito. Vukei ira na gone mera vakila na vakacegu e nodra ni ra vakasamataka na iVakabula, ka sureti ira mera vakasaqara na yalo oqori ni ra kania na sakaramede.

• Solia vei ira na gone na vei tiki ni pepa e tiko kina na vosa “Au rawa ni nanumi Jisu Karisito ena gauna ni sakaramede ena…” volai toka e cake. Sureti ira na gone mera droinitaka e dua na iyaloyalo era rawa ni raica ena gauna ni sakaramede me vukei ira mera nanumi Jisu.

Vakavulica na iVunau: Gone Qase Cake

Na Lako Yani 7–11

Na Turaga e tu vua na kaukauwa me sereki au.

Era dau sotava na gone na dredre ka ra gadreva na Turaga me vukei ira. Na italanoa ni mate veitauvi e tini ka a tala mai na Turaga me sereki ira na Isireli ena rawa ni vukei ira na gone mera kilamatata ni tu talega Vua na kaukauwa me vukei ira.

iTaviqaravi e Rawa ni Caka

• Solia vei ira na gone yadudua e dua na pepa e wasei ki na tini na iwasewase, ka sureti ira na gone mera droinitaka na iyaloyalo ni mate veitauvi e tukuni tiko ena veitikina oqo: Na Lako Yani 7:17–18; 8:1–4; 8:16–17; 8:20–22; 9:1–6; 9:8–9; 9:22–23; 10:4–5; 10:21–22; 11:4–7. Na cava e vakavulica vei keda na mate veitauvi me baleta na kaukauwa ni Kalou? Na cava na vuna e bibi kina meda kila baleta na Nona kaukauwa?

• Tarogi ira na gone me baleta na gauna era a vakila kina ni ra gadreva na veivuke ni Turaga. E rawa ni vukei keda vakacava o Koya ena ituvaki vakaoqo? Vakayaloqaqataki ira mera veivosakitaka na gauna ni ra sotava se nodra matavuvale na kaukauwa ni Turaga ena nodra bula. Wasea na nomu ivakadinadina ni sa tu vua na Turaga na kaukauwa me vukei keda.

Na Lako Yani 8:28–32; 9: 7.

Na Turaga e rawa ni vukei au me malumu na lomaqu.

Ea digia o Fero me vakaukauwataka na lomana ni kaya vua na Turaga me sereki ira na luvei Isireli. O na vakauqeti ira vakacava na gone o vakatavulica mera digitaka me nodra na loma malumu me rawa ni ra yalorawarawa me qarava na Turaga ka vakayacora na Nona lewa?

iTaviqaravi e Rawa ni Caka

• Kauta mai ki na kalasi e dua na iyaya kaukauwa, me vaka e dua na vatu, kei na dua tale e malumu, me vaka na sipaji. Wilika vata kei ira na gone e vica na tikina ka vakamacalataki kina na ivukivuki i Fero ki na mate veitauvi e tala mai na Turaga (raica na Lako Yani 8:28–32; 9:7), ka tarogi ira na gone na iyaya cava e matataka vinaka duadua na lomai Fero kei na nona itutuniyalo. Na cava na kena ibalebale me nomu na loma malumu? (raica na Mosaia 3:17).

• Cakava vata kei na kalasi e dua na lisi ni so na ivalavala ka rawa ni vakaraitaka e tiko e dua na loma kaukauwa (me kena ivakaraitaki, na veivala vakaveitacini se na yalodredre me masu). Eda na vakaraitaka vakacava vua na Turaga ni da vinakata me malumu na lomada?

Na Lako Yani 11:5–6; 12:1–13

Na Lakosivia e vakatakarakarataka tiko na kaukauwa ni Veisorovaki i Jisu Karisito.

E vakavulici ira na luvei Isireli na Lakosivia ni sa vakabulai ira na Turaga mai Ijipita. Na Lakosivia sa vakatakilakilataka talega na isoro veivakaduavatataki i Jisu Karisito, ka sereki keda mai na ivalavala ca kei na mate. Nikua, na sakaramede e vukei keda meda nanuma na solibula i Jisu Karisito me baleti keda. Na nodra vakavulici na gone me baleta na Lakosivia e rawa me vukei ira me vakaibalebale vakalevu cake vei ira na sakaramede.

iTaviqaravi e Rawa ni Caka

• Kerea eso na gone me ra wilika na Lako Yani 11:5–6 mera vulica na iotioti ni mate veitauvi ea tala na Turaga vei ira na kai Ijipita. Kerei ira na gone mera wilika na Lako Yani 12:3, 5–7, 13 mera vulica era a vakabulai vakacava luvei Isireli mai na mate veitauvi.

• Me vukei ira na gone mera kilamatata ni na iVakabula e sa Lami ka vakabulai keda, vakaraitaka e dua na iyaloyalo ni dua na lami. Sureti ira na gone mera wilika na Na Lako Yani 12:3–7 me kunea se na mataqali lami vakacava e vinakata na Kalou mera vakayagataka na tamata me kakana ni Lakosivia. E tautauvata vakacava na lami oqo kei Jisu Karisito? (Me kena ivakaraitaki, o Jisu e uasivi sara, ka vakadavea na Nona dra o Jisu me vakabulai keda.) Na ivakatakilakila cava tale eso ena vukei keda meda nanumi Jisu Karisito?

• Wilika vata na masu ni sakaramede (raica na Vunau kei na Veiyalayalati 20: 77, 79), ka sarava na vidio “Always Remember Him” (ChurchofJesusChrist.org). E tautauvata vakacava na sakaramede kei na Lakosivia? Na cava e rawa ni da cakava me vakasamataki Jisu kina ena gauna ni sakaramede?

• Wasea vei ira na gone e dua na nomu sere talei ni sakaramede (raica na Serenilotu, naba 97–113), ka veitalanoataka e vukei keda vakacava meda nanuma tiko na isoro ni iVakabula. Sureti ira na gone mera wasea e dua na sere ka sa vakayacora vakakina vei ira.

Vakauqeta na Vuli e Vale

Sureti ira na gone me ra wasea ki na nodra matavuvale na ka era sa vulica me baleti Jisu Karisito ena Lalai nikua.

Vakatorocaketaki Noda Veivakavulici

Vukei ira na gone mera raitayaloyalotaka na italanoa. Ni tiko vei ira na gone e dua na irairai vakaiyaloyalo ni veika era sa vulica, e sa na rawarawa cake na nodra nanuma tiko. Kunea na sala mera vukei kina na gone me ra raitayaloyalotaka na italanoa mai na ivolanikalou ena vakayagataki ni ivukevuke laurai me vaka na iyaloyalo, droini, vidio, matakau, se vakatasuasua.