ulunivanua

E dua na ulunivanua mai Ijipita e dau vakabauti me Ulunivanua o Saineai.

18–11 ni Epereli

Na Lako Yani 18–20

“A Ka Kecega sa Kaya ko Jiova Keimami na Cakava”

Ni o wilika na Lako Yani 18–20, vakasamataka na ivakavuvuli ena vakaibalebale duadua vei ira na gone. Sa rawa mo na vakauqeti mo vakamatatataka e dua na ivakavuvuli ka sega ni kena ka vakaturi tiko e ra.

Vola na Veika o Vakauqeti Kina

ivakatakilakila ni veiwasei

Sureta na Veiwasei

Sureti ira na gone mera wasea e dua na iVunau e Tini (se railesuva na ivakaro e vica vata kei ira) kei na vuna era nanuma ni sa ka bibi me ra talairawarawa ki na ivakaro oqori.

ivakatakilakila ni veivakavulici

Vakavulica na iVunau: Gone Sobu

Na Lako Yani 18:8–12

Na wasei ni noqu ivakadinadina e rawa me vakalougatataki ira na tani.

E marautaka o Jecoro ni a wasea o Mosese na veika e sa vakayacora na Turaga vei ira na luvei Isireli. Na italanoa oqo ena rawa ni vakauqeti ira na gone o vakavulica me ra wasea vata kei ira tale eso na ka era kila ni sa dina.

iTaviqaravi e Rawa ni Caka

• Wilika vei ira na gone na vosa mai na Lako Yani 18:8: “A tukuna vua na vugona o Mosese kecega ka kitaka ko Jiova.” Tarogi ira na gone ke ra nanuma ni veika e cakava na Turaga me vukei kina na luvei Isireli mera dro mai Ijipita. (Me vukea mera nanuma, vakaraitaka na iyaloyalo se na tabana ni itaviqaravi mai na lesoni sa oti). Na cava soti sa cakava na Kalou me vukei keda? Vukei ira na gone mera kila me vakataki Mosese, eda rawa ni tukuna vei ira tale eso na veika lelevu sa kitaka na Turaga e vukuda.

• Na kalasi ni Lalai e rawa ni dua na vanua vinaka mera vakatovotovo kina na gone ena wasei ni dua na ivakadinadina rawarawa. Wasea na nomu ivakadinadina vei ira, ka vukei ira mera veiwaseitaka vakai ira na dina ni kosipeli ka ra sa vakabauta.

Na Lako Yani 20:3–17

E solia na Kalou na ivakaro baleta ni vinakata meu bula marau.

Na ivakaro sai koya na idusidusi nei Tamada Vakalomalagi me kunei kina na vakacegu ena bula oqo kei na marau ena veigauna tawamudu. E rawa vakacava ni o vakayaloqaqataki ira na gone mera talairawarawa ki na ivakaro ni Kalou?

iTaviqaravi e Rawa ni Caka

• Vakaraitaka na iyaloyalo eso mai “na Vunau e Tini” (ena iTukuni ni Veiyalayalati Makawa), ka sureti ira na gone me ra wasea na veika era kila me baleta na italanoa. Vukei mera kilamatata e dua na tiki ni italanoa era sega ni kila vakavinaka tu.

• Ni ko wilika e vica na ivakaro mai na Lako Yani 20:3–17 vei ira na gone (se moica vakalailai na vosa mera na rawa ni kilamatata), sureti ira mera lave idovidovi kevaka na ivunau e baleta e dua na ka me da cakava ka dulaka sobu kevaka e dua na ka sega ni dodonu me da cakava. Wasea na nomu ivakadinadina me baleta na marau e yaco mai ena talairawarawa ki na ivakaro ni Kalou (raica na Mosaia 2:41).

• Lagata vata kei ira na gone e dua na sere me baleta na sala e vakalougatataki keda kina na Tamada Vakalomalagi ni da talairawarawa ki na ivakaro, me vaka na “Muria na iVakaro” (Children‘s Songbook, 146–47). Sureti ira na gone mera vakarorogo ki na vosa me vaqara na veivakalougatataki cava soti eda rawa ni ciqoma ni da sa talairawarawa.

Na Lako Yani 20:12

Au rawa ni dokai rau na noqu itubutubu.

Na rokovi rau na itubutubu e sivia cake na talairawarawa walega vei rau. Vukei ira na gone mera kilamatata na sala tale eso era rawa ni rokovi rau kina na itubutubu.

iTaviqaravi e Rawa ni Caka

• Vukei ira na gone mera vulica na matavosa “Mo vakarokorokotaki rau na tamamu kei na tinamu” (Na Lako Yani 20:12). Ke gadrevi, vakamacalataka ni “dokai” e rawa ni kena ibalebale mera rokovi ira se me kauta mai vei ira na marau. Na cava a cakava o Jisu me dokai Tamana Vakalomalagi kina? E dau doka beka vakacava oKoya na Tinana? (raica na Luke 2:48–51; Joni 19:26–27). Vukei na gone mera vakasamataka na veika era rawa ni cakava mera rokovi ira kina na nodra itubutubu, ka sureta mera matanataka na nodra vakasama.

• Sureti ira na gone mera cakava e dua na kadi ni vakavinavinaka vei ira na nodra itubutubu. Era na rawa ni vola se droinitaka ena loma ni kadi e dua na ka era na cakava mera rokovi ira kina na nodra itubutubu.

ivakatakilakila ni veivakavulici

Vakavulica na iVunau: Gone Qase Cake

Na Lako Yani 18:13–26

Au rawa ni veivuke “ena cakacaka bibi” ni cakava tiko na cakacaka ni Turaga.

A vulica o Mosese ni nona tovolea tiko me liutaki ira na luvei Isireli vakataki koya ga e “sega ni vinaka” (Na Lako Yani 18:17). Na veilomani ka veiqaravi vakataki keda e rawa ni vakaceguya na nodra icolacola ni noda iliuliu.

iTaviqaravi e Rawa ni Caka

• Sureti ira na gone mera droinitaka e vuqa na iwirini ena papa mera matataka na lewe ni tabanalevu. Droinitaka e dua na iwirini ka vakayacana na bisopi. Na cava na vuna ena dua kina na leqa kevaka me bisopi duadua ga e vukea tiko na tamata kecega? Wilika vata na Lako Yani 18:13–26 me vaqara na ivakasala cava ea solia ko Jecoro ni a tovolea tiko o Mosese me cakava vakataki koya na ka kecega. Kerei ira na gone mera vola ena iwirini tale eso me matataki ira na iliuliu tale eso ni tabanalevu kei ira na lewenilotu era vukei bisopi ena nodra qaravi na tani. Era cakava vakacava na iliuliu kei ira na lewenilotu oqo me mamada cake na icolacola nei bisopi? Eda cakava vakakina vakacava vei ira na iliuliu ni noda tabanalevu? me baleti ira na noda itubutubu mai vale?

• Vukei ira na gone mera vola na iliuliu ena nomu tabanalevu. Ni digitaka vaka kalasi, e dua ka veitalanoataka na ka e cakava na tamata oqo me rawati kina na cakacaka ni Turaga kei na cava era rawa ni cakava na gone mera veivuke.

  erau lululu e dua na tagane kei na dua yalewa

  Na qaravi ira na tani e dua na sala e rawa ni da veivuke kina ki na cakacaka ni Turaga.

Na Lako Yani 20:1–7

Sa ka bibi meu biuta me liu na Turaga ena noqu bula.

E dui tu na veika e rawa ni da temaki meda biuta me liu vua na Kalou ena noda bula. O rawa ni vukei ira vakacava na gone mera kilamatata na ibalebale ni biuti Tamada Vakalomalagi me liu?

iTaviqaravi e Rawa ni Caka

• Wilika vata na Lako Yani 20:1–7, ka vakamacalataka ni ka ga eda sa biuta me liu vua na Kalou ena noda bula e rawa me vaka na “kalou tani” kei na “na matakau ceuceu [eso]” e tukuni tiko ena tikina e 3–4. Tarogo ira na gone na cava na vuna e vinakata kina na Tamada Vakalomalagi meda vakaliuci Koya. Na veivakalougatataki cava e yalataka vei keda oKoya kevaka eda sa cakava? Tarogi ira na gone eda na vakaraitaka vakacava vei Tamada Vakalomalagi ni bibi cake oKoya mai na veika tale eso ena noda bula.

• Vakasamataka mada e dua na itavi e sa bibi kina na imatai ni ikalawa, me vaka na sava ni liga ni bera na kana se na daramaki ni sitokini ni bera na daramaka na ivava. Na cava e rawa ni yaco kevaka eda a sega ni cakava na veika bibi taumada? E tautauvata vakacava oqo kei na vakaliuca nei Tamada Vakalomalagi ena noda bula? Wasea na nomu ivakadinadina e sa vakalougatataki iko vakacava na vakaliuca na Kalou, ka sureti ira na gone mera wasea talega na nodra ivakadinadina.

• Lagata vata e dua na sere baleti Tamada Vakalomalagi, vaka na “My Heavenly Father Loves Me” (Children’s Songbook, 228–29). Na cava eda vulica mai na sere oqo me baleta na vuna e bibi kina meda vakaliuca na Tamada Vakalomalagi ena noda bula?

Na Lako Yani 20:3–17

E solia na Kalou na ivakaro baleta ni vinakata meu bula marau.

Ena rawarawa cake mera muria na ivakaro na gone kevaka era raica ni sa ivakaraitaki ni loloma ni Kalou ka madigi eso mera vakaraitaka kina na nodra lomani Koya.

iTaviqaravi e Rawa ni Caka

• Vakarautaka na tikitiki ni pepa e tiko kina na ivakaro ena Lako Yani 20:3–17 vei ira. Vola ena papa na naba dua ki na tini, ka sureti ira na gone me biuta na tikitikinipepa ena kena ituvatuva dodonu ena papa. Veitalanoataka na sala e rawa ni da muria na kina na vei ivakaro oqo. Me kune vakasama, sa rawa mera raica na itukutuku ni Gospel Topics “Na Vunau e Tini” (na ulutaga. ChurchofJesusChrist.org).

• Sureti ira na gone mera droinitaka na iyaloyalo ni veivosa bibi mai na ivakaro me vukea na nodra nanumi ira.

• Talanoataka na italanoa kei Chloe mai na itukutuku nei Sister Carole M. Stephens “Kevaka Dou sa Lomani Au, Muria na Noqu iVakaro” (Liaona, Nove. 2015, 118–20). Ena vukei keda vakacava na italanoa meda kilamatata na cava e solia kina vei keda na Turaga na ivakaro? E vakaraitaka vakacava na noda lomana na Kalou na noda talairawarawa?

ivakatakilakila ni vuli

Vakauqeta na Vuli e Vale

Sureti ira na gone mera vakasamataka eso na ka era vinakata mera cakava ena vuku ni veika era sa vulica ena kalasi. Vukei ira mera cakava e dua na ivakananumi rawarawa ni ka era na cakava me rawa ni ra kauta i vale.

Vakatorocaketaki ni Noda Veivakavulici

Vukei ira na gone mera kidava ni sa tiko na Yalo. Era rawa ni kidava na gone na veivakatakatai ni Yalo. Vakavulica vei ira na gone ni vakilai ni vakacegu, loloma, kei na yalovinaka e tiko vei ira ni ra tukuni se lagati Jisu Karisito kei na Nona kosipeli e sa vu mai na Yalo Tabu.

tabana ni itaviqaravi: au rawa ni muria na ivakaro