Sa rairai o Jiova vei Mosese kei ira na qase ni Isireli

iYaloyalo ni nona rairai o Jiova vei Mosese kei na 70 na qase ni Isireli, mai vei Jerry Harston

25 ni Epereli–1 ni Me

Na Lako Yani 24; 31–34

“Au na Lako Dina Vata kei Iko”

Ni sa vakarau o Mosese me liutaki ira na luvei Isireli ki na vanua yalataki, a kaya na Turaga, “Au na lako dina vata kei iko” (Na Lako Yani 33:14). Ni o vakavakarau mo vakavulici ira na gone ena nomu kalasi, vakasamataka na sala o rawa ni sureta kina na iserau ni Turaga me “lako vata kei [iko].”

Vola na Veika o Vakauqeti Kina

ivakatakilakila ni veiwasei

Sureta na Veiwasei

Kerei ira yadua na gone me ra digitaka e dua ga na tiki ni pepa nabataki e rawa. Vakayagataka na naba oqo me vakadeitaki kina na ituvatuva e rawa ni ra wasea kina na gone e dua na ka era sa vulica tiko mai na ivolanikalou, e vale se ena Lalai.

ivakatakilakila ni veivakavulici

Vakavulica na iVunau: Gone Sobu

Na Lako Yani 31:13, 17

Na Rokovi ni Siga ni Vakacecegu sa ivakatakilakila ni noqu lomana na Turaga.

A tukuna na Turaga vei Mosese ni gauna era vakatabuya kina na luvei Isireli na Siga ni Vakacecegu, era vakaraitaka vua ni ra vinakata mera Nona tamata.

iTaviqaravi e Rawa ni Caka

• Droinitaka e dua na uto ena papa, ka taroga vei ira na gone na ibalebale ni ivakatakarakara oqo. Vukei ira me ra vakasamataka eso tale na ka e rawa ni ivakatakilakila ni loloma, me vaka na veimoko se dua na cakacaka ni veiqaravi. Wilika vei ira Na Lako Yani 31:13. Vukei ira me ra kila ni gauna eda vakatabuya kina na Siga ni Vakacecegu, e vakatakila vua Turaga ni da sa lomani koya.

• Tukuna vei ira na gone me baleta eso na sala o dau tovolea kina mo vakaraitaka na nomu lomana na Turaga ena Siga ni Vakacecegu. Me ra wasea na sala era cakava kina na ka oqo o ira kei na nodra matavuvale. Sureti ira mera vakayagataka na tabana ni itaviqaravi ni macawa oqo mera wasea kina eso tale na vakasama.

  gone kei na itubutubu e vale

  Ena noda rokova na Siga ni Vakacecegu, eda vakaraitaka na noda loloma vua na Turaga.

Na Lako Yani 32:1–8, 19–24

Au rawa ni vakaliuca na Turaga ena noqu bula.

Ena gauna a tiko kina o Mosese ena Ulunivanua o Saineai ni rau a veivosaki tiko kei na Turaga, era a digitaka na luvei Isireli me ra sokalou ki na dua na matakau koula ka sega ki vei Koya. Na italanoa oqo e rawa ni vakananuma vei ira na gone o vakavulica ni sega ni dodonu meda vakalaiva me bibi cake vei keda na veika tale eso mai vua na Turaga.

iTaviqaravi e Rawa ni Caka

• Railesuva vakalekaleka na Vunau e Tini vata kei ira na gone, ka vakabibitaka na imatai ni rua (raica Na Lako Yani 20:3–6). Vakayagataka na “Na iVunau e Tini” (ena iTalanoa ni Veiyalayalati Makawa) me wasei vata kei ira na italanoa mai Na Lako Yani 32:1–8, 19–24. Kevaka e rawa, vakatarai ira na gone me ra vukei iko mo talanoataka na italanoa. Vukei ira na gone me ra raica na veika era a cakava cala na Isireli ena italanoa oqo (o na vinakata beka mo vakananuma vei ira na gone na imatai ni rua na iVunau e Tini). Na cava e a dodonu me ra cakava na Isireli?

• Vakaraitaka e dua na iyaloyalo kei Jisu Karisito, vata kei na iyaloyalo ni veika tale eso e rawa ni ra vakayagataka kina na gone na nodra gauna, me vaka na iyaya ni vakatatalo, qito, kei na so tale. Kerei ira na gone me ra vakaraica na iyaloyalo e vakaraitaka na veika e dodonu me bibi duadua vei keda. Wasea vata kei ira na gone na sala o sa vakalougatataki kina ena nomu vakaliuca na Turaga mai na veika sara mada ga era talei—ena nomu bula.

Na Lako Yani 33:11

A vosa na Turaga vei Mosese ni rau veirai mata.

Ni sa vakarusa oti o Mosese na bulumakau koula, “sa qai vosa vei Mosese na Turaga ni rau veirai mata, me vaka na nodrau veivosaki na tamata kei na wekana.” Na kila oqo e rawa ni tara cake na nodra vakabauta na gone ni Turaga e dua na tamata dina ka lomani ira.

iTaviqaravi e Rawa ni Caka

• Tukuna vei ira na gone na veika o vakila ni o veivosaki kei na dua na itokani vinaka, ka taroga na veika era vakila. Wilika vei ira na imatai ni yatuvosa e Na Lako Yani 33:11. Tarogi ira na gone ena nodra nanuma me baleta na veika a rawa ni vakila na parofita o Mosese. Tukuna vei ira na gone na veigauna o a vakila ni o voleka kina vua na Turaga, ka dina mada ga ni o a sega ni raici Koya e matamu.

• Lagata vata e dua na sere e vakamacalataka na ituvaki ni nodrau nanumi keda na Tamada Vakalomalagi kei Jisu, me vaka na “Jisu Sa Wekada Ga” (iVolanisere ni Gonelalai, 37). Vakaraitaka na iyaloyalo ni iVakabula ni vakaraitaka tiko na nona loloma vei ira na tani (raica na iVola ni iYaloyalo Vakosipeli, naba 36, 41–43, 46–47). Vakayaloqaqataki ira na gone me ra wasea na veika era vakila me baleta na Tamada Vakalomalagi kei Jisu.

ivakatakilakila ni veivakavulici

Vakavulica na iVunau: Gone Qase Cake

Na Lako Yani 31:12–17

Na Rokovi ni Siga ni Vakacecegu sa ivakatakilakila ni noqu lomana na Turaga.

Na kena vakatabui na Siga ni Vakacecegu e rawa ni rawarawa—ka marautaki vakalevu cake—vei ira na gone ni ra qai kila ni sa ivakatakilakila ni nodra yalodina vua na Turaga.

iTaviqaravi e Rawa ni Caka

• Tarogi ira na gone e vica na taro me vukei ira me ra kila na cava na ivakatakilakila—me ivakaraitaki, “Na ivakatakilakila cava e rawa mo kila kina ni sa roro tiko mai na vula itubutubu se o sa tauvi matetaka tiko?” Sureti ira mera wilika Na Lako Yani 31:13, 16–17 ka raica na vosa “ivakatakilakila.” Na cava e kaya na Turaga ni sai ivakatakilakila vei keda kei Koya tale ga? Na cava e sa rui bibi kina na ivakatakilakila oqo?

• Sureti ira na gone me ra veivukevuke ena nodra vakamacalataka na vuna era digitaka kina me ra rokova na Siga ni Vakacecegu. Na vidio “The Sabbath Is for You” se “Upon My Holy Day—Honoring the Sabbath” (ChurchofJesusChrist.org) ena rawa ni veivuke.

• Sureti ira na gone me ra vola na veika kece sara e rawa ni ra vakasamataka ka rawa ni ra cakava ena Sigatabu me ra vakaraitaka vua na Turaga ni ra lomani Koya. Vakayaloqaqataki ira mera wasea e vica na ka mai na nodra lisi. Sureti ira me ra kauta na nodra lisi ki vale, wasea vei ira na nodra matavuvale, ka lesuvi ira ena gauna era gadreva kina na veivakasama eso me baleta na ka me vakayacori ena siga ni Vakacecegu.

Na Lako Yaini 32:1–8, 19–24

Au rawa ni vakaliuca na Turaga ena noqu bula.

E dua na itukutuku mai na italanoa e Na Lako Yani 32 sai koya na bibi ni kena maroroi na imatai ni rua na iVunau e Tini—mo kakua ni qarava e dua se dua tale na ka, na Turaga duadua ga.

iTaviqaravi e Rawa ni Caka

• Kerei ira na gone me ra wasea na veika era kila me baleta na italanoa kei Eroni ni a cakava e dua na bulumakau koula me ra sokaloutaka na Isireli. Kevaka era gadreva na veivuke, vagolei ira ki Na Lako yani 32:1–8, 19–24, se wasea vata kei ira “na iVunau e Tini” (ena iTalanoa ni Veiyalayalati Makawa). Na cava e cala kina vei ira na Isireli me ra sokalou ki na dua na matakau? (Sa rawa mo vagolei ira na gone ki na imatai ni rua na iVunau e Tini e Na Lako Yani 20:3–6.)

• Vukei ira na gone me ra vakasamataka na ivakaraitaki eso ni veika era rawa ni temaki kina na tamata mera sokalou ka sega ki vua na Turaga—na veika ena vakavuna na noda rai tani mai vua. Qai kerei ira me ra wasea na ivakaraitaki eso ni veika ena vukei ira me ra vakanamata vua na iVakabula ka qaravi koya.

Na Lako Yani 32:1–5, 21–24

Au rawa ni tutaka na buladodonu.

Ni ra tukuna na Isireli vei Eroni me bulia e dua na matakau koula, a vakadonuya me cakava, e dina ga ni a cala o ya (raica Nai Vakarua 9:20). Vakasamataka na sala e rawa ni o vakauqeti ira kina na gone me ra tutaka na ivalavala dodonu, ena gauna mada ga era vakasaurarataki kina mai vei ira na tani me ra kakua ni cakava vakakina.

iTaviqaravi e Rawa ni Caka

• Sureti ira na gone me ra wilika Na Lako Yani 32:1–5, 21–24, vakayadudua se veisasa, ka wasea na veika era nanuma ni a dodonu me cakava o Eroni ena gauna era a kerei koya kina na Isireli me cakava e dua na bulumakau koula. E a rawa beka vakacava vei Eroni me vukei ira na tamata?

• Vukei ira na gone me ra vakasamataka na ituvaki eso e rawa ni ra sotava, ni ra kerei mai vei ira eso tale na tamata, mera cakava e dua na ka era kila ni cala. Kerei ira na gone me ra veiwaseitaka na nodra vakasama, ena veika me ra cakava ena veigauna vakaoqori.

ivakatakilakila ni vuli

Vakauqeta na Vuli e Vale

Sureti ira na gone me ra wasea vata kei na nodra matavuvale na vakasama eso era rogoca nikua me vakatabui kina na Siga ni Vakacecegu.

Vakatorocaketaki ni Noda Veivakavulici

Sureti ira na gone me ra wasea na nodra ivakadinadina. Na taro o taroga e rawa ni vakayaloqaqataki ira na gone me ra wasea na nodra nanuma baleta na iVakabula, kei na sala sa vakalougatataki ira kina na bulataki ni kosipeli. Ni ra vakayacora oqo, era sa tukuna tiko kina na nodra ivakadinadina. (Raica na Veivakavulici ena iVakarau ni iVakabula, 11, 32.)

tabana ni itaviqaravi: Na Rokovi ni Siga ni Vakacecegu e ivakatakilakila ni noqu lomana na Turaga