Droini kei Mosese ena ulunivanua ko Nipo, © Providence Collection/laiseni mai na goodsalt.com

16–22 ni Me

Nai Vakarua 6–8; 15; 18; 29–30; 34

“Mo ni Qarauni Kemuni De Ko ni Guilecavi Jiova”

Vakasamataka vakatitobu na sala o rawa ni moica kina na ituvatuva oqo ni itaviqaravi ki na nodra gagadre na gone o vakavulica. Me ivakaraitaki, kevaka o vakavulici ira na gonelalai, e rawa ni o vukei ira me ra vakavakarau ki na papitaiso ena kena moici na itaviqaravi ena “Noqu maroroya na noqu veiyalayalati e kauta mai na veivakalougatataki cecere” ena iwasewase me baleti ira na gone qase cake.

Vola na Veika o Vakauqeti Kina

Sureta na Veiwasei

Sureti ira na gone me ra wasea na veika era sa vulica me baleti Mosese ena Lalai se e vale ena loma ni vica na macawa sa oti. Kevaka e gadrevi, vakaraitaka na iyaloyalo ni veika a yaco ena bula nei Mosese me vukei ira me ra nanuma. Tukuna vei ira ni nikua o na tukuna tiko na veika a vakavulica o Mosese ena mua ni nona bula e vuravura.

Vakavulica na iVunau: Gone Sobu

Nai Vakarua 6:5

Au rawa ni lomana na Turaga ena lomaqu taucoko.

A vakavulici ira na luvei Isireli o Mosese me ra lomana na Turaga ena lomadra taucoko, kei na yalodra taucoko, kei na nodra kaukauwa taucoko. Vakasamataka na sala eso o rawa ni vukei ira kina na gone o vakavulica me ra vakalevutaka na nodra loloma vua na Tamada Vakalomalagi kei na iVakabula.

iTaviqaravi e Rawa ni Caka

• Droinitaka ena papa e dua na uto, na sauka ni dua na yago, kei na dua na liga qaqa. Wilika Nai Vakarua 6:5, ka dusia na iyaloyalo ni o wilika na vosa “loma,” “yalo,” kei na “kaukauwa.” Sureti ira na gone me ra veivukevuke ena kena dusi na iyaloyalo ni ra wilika vata kei iko na kalasi na tiki ni ivolanikalou.

• Lagata vata e dua na sere ka vakavulica na loloma ni Kalou, me vaka na “My Heavenly Father Loves Me” (Children’s Songbook, 228-29). Vukei ira na gone me ra vaqara na vosa ena sere ka vakaraitaka ni lomani keda na Tamada Vakalomalagi. Vukei ira me ra vakasamataka na veisala eso eda rawa ni vakaraitaka kina Vua ni da lomani Koya talega.

Nai Vakarua 6:6-9

Na ivolanikalou era sa vosa ni Kalou.

Na ivakasala e Nai Vakarua 6:6–9 e kena inaki me vukei ira na Isireli me ra “qarauna [me ra] kakua ni guilecava na Turaga” kei na Nona vosa (tikina e 12). O na vukei ira vakacava na gone me vakayacori na vulici ni ivolanikalou me tiki ni nodra bula e veisiga?

iTaviqaravi e Rawa ni Caka

• Sureta e dua na gone me vunitaka e dua na ilavelave ni ivolanikalou ena loma ni rumu ni ra bobo tiko na vo ni gone. Mo qai sureti ira na gone me ra dolava na matadra ka tovolea me ra kunea na ivolanikalou. Ena kena vakayagataki na veimalanivosa bibi mai Nai Vakarua 6:6–9, wasea vei ira na gone ni a tukuna vei ira na Isireli o Mosese mera biuta na veitiki ni ivolanikalou ena vanua era na laurai ka vuli mai kina ena veisiga. Vukei ira na gone me ra vakasamataka na veivanua eso ena nodra veivale ka rawa ni ra biuta kina na ivolanikalou me rawa ni ra raici ira kina ena veisiga.

• Lagata e dua na sere me baleta na ivolanikalou, me vaka na “Vaqaqara ka Masu” (iVolanisere ni Gonelalai, 66). Wasea na nomu ivakadinadina ni ivolanikalou sa vosa ni Kalou, ka tukuna vei ira na gone na sala era sa vakalougatataka kina na nomu bula.

O Jisu Karisito na parofita me vakataki Mosese.

Nai Vakarua 18:15–18

O ira na parofita era vakatavulica vei keda na veika baleti Jisu Karisito.

A parofisaitaka o Mosese ni na lako mai o Jisu Karisito ka dodonu meda vakarorogo ki na vosa ena vakatavulica o Jisu.

iTaviqaravi e Rawa ni Caka

• Vukea e dua na gone me wilika Nai Vakarua 18:18, ka tukuna vei ira na gone ni Parofita e vakataki Mosese ka na vakatubura cake na Kalou sai Jisu Karisito. Me vukei ira na gone me ra raica na sala eso e tautauvata kina o Mosese kei Jisu, kauta mai na iyaloyalo eso ni veika a cakava o Mosese kei na veika a cakava o Jisu Karisito, ka me ra qai vakasotara vata na gone. Me vakaoqo, e rawa ni o kauta mai na iyaloyalo kei Mosese kei Jisu ni rau tabaki ira na tani ka veivakavulici (raica na iVola ni iYaloyalo Vakosipeli, naba. 15, 16, 38, 39).

• Vakaraitaka vei ira na gone e dua na iyaloyalo ni noda parofita ni kua, ka wasea e dua na ka sa vakavulica oti me baleta na iVakabula. Sureti ira na gone me ra droinitaka e dua na kena iyaloyalo na parofita me ra wasea vata kei na nodra matavuvale.

Vakavulica na iVunau: Gone Qase Cake

Nai Vakarua 6:6-9

Au rawa ni maroroya na vosa ni Kalou e lomaqu.

E vakavulica o Mosese ni dodonu me da maroroya na vosa ni Kalou e lomada, ka solia vei ira na Isireli na ivakasala me ra biuta tikoga na vosa ni Kalou e matadra e veisiga. O na vakauqeti ira vakacava na gone me ra vuli mai na vosa ni Kalou ena veisiga?

iTaviqaravi e Rawa ni Caka

• Ena papa ni volavola, vola kina na vosa kei na malanivosa mai Nai Vakarua 6:6–9 ka vakaraitaka na gauna kei na sala me ra nanuma kina na Isireli na vosa ni Kalou (me vaka na tiko, lako voli, koto sobu, ligamuni, kei na vale). Sureti ira na gone me ra vaqara na veivosa oqo ena veitiki ni ivolanikalou oqo. Na cava e vakavulica na veivosa oqo me baleta na kena vakayacori na ivolanikalou me tiki ni noda bula ena veisiga? Tarogi ira na gone se cava e rawa ni ra cakava me ra daunanuma kina na vosa ni Kalou ena nodra bula e veisiga.

• Solia vei ira yadua na gone e dua na tiki ni pepa, ka sureti ira me ra vola e dua na malanivosa mai Nai Vakarua 6 ka vakaibalebale vei ira. Kerei ira me ra wasea na vuna era sa digitaka kina na veitikina oqori. Vakatututaka me ra ukutaka na nodra pepa ka vakabira ena nodra dui itikotiko me ra na daunanuma tiko kina. Vakayaloqaqataki ira na gone me ra vola ka vakabira eso tale na malanivosa era kunea ena ivolanikalou.

Nai Vakarua 15:7–11

Au rawa ni veiqaravi ena marau vei ira era gagadre tu.

Na ivakavuvuli e Nai Vakarua 15:7–11 e rawa ni vukei ira na gone o vakavulica me ra kila ni nodra vukea na tani e sega ni okati ga kina na ka e caka. E dodonu me caka ena yalo e lomasoli.

iTaviqaravi e Rawa ni Caka

• Vola o cei, baleta, kei na vakacava ena papa. Sureti ira na gone me ra wilika Nai Vakarua 15:7–11 me ra kila se o cei e dodonu me da vukea, na vuna e dodonu me da vukei ira kina, ka vakacava na ituvaki e dodonu me da vakila e lomada ni da veivuke. Sureti ira me ra vola ena papa na ka era kunea. Lagata e dua na sere ka vaqaqacotaka na itukutuku ena veitikina oqo, me vaka “Na Cakavinaka?” (Sere ni Lotu, naba 131).

• Kerei ira na gone me ra vakasamataka e dua e rawa ni ra vukea—vakabibi ena nodra dui matavuvale. Solia na gauna vei ira me ra vola na veika era na cakava ena macawa oqo me vukea na tamata oya. Kevaka e rawa, cakava na ituvatuva mo ni dolele yani vakalasi vua e dua e gagadre tu.

Nai Vakarua 30:8–10

Na maroroi ni noqu veiyalayalati ena kauta mai na veivakalougatataki cecere.

Me vakataki ira na luvei Isireli, eda na gadreva e veigauna na noda dauvakananumi me da bulataka na noda veiyalayalati. Na wiliki ni Nai Vakarua 30:8–10 e rawa ni vukei ira na gone me ra kila vakavinaka cake na cava na veiyalayalati ka vakauqeti ira me ra maroroya na nodra veiyalayalati.

iTaviqaravi e Rawa ni Caka

• Taroga vei ira na gone na cava na veiyalayalati (kevaka era gadreva na veivuke, vakatura me ra raica e dua na kena i balebale ena “Veiyalayalati” ena iDusidusi ki na iVolanikalou [scriptures.ChurchofJesusChrist.org]). Droinitaka e dua na ivolakabi ka rua na kena iyatu ena papa ni volavola vata kei na vei ulutaga oqo: na nodra yalayala na Isireli kei na yalayala ni Kalou. Sureti ira na gone me ra vakasaqaqara e Nai Vakarua 30:8–10 ka vakalewena na ivolakabi. (Kevaka e ganita, vukei ira na gone me ra kila na ibalebale ni malanivosa ena tikina e 9.) Vakadinadinataka na veivakalougatataki sa yaco mai vei iko ena nomu maroroya na nomu veiyalayalati.

• Sureti ira na gone me ra vola ena papa na yalayala eda vakayacora ena papitaiso kei na yalayala e vakayacora vei keda na Tamada Vakalomalagi (raica na Vunau kei na Veiyalayalati 20:37, 77). Na cava eda rawa ni cakava meda daunanuma tikoga kina na iVakabula ka maroroya na noda veiyalayalati?

Vakauqeta na Vuli e Vale

Sureti ira na gone me ra raitayaloyalotaka ni o lewe ni nodra matavuvale, ka kerei ira me ra tukuna vei iko e dua na ka era sa vulica ena kalasi nikua. Vakayaloqaqataki ira me ra wasea na veika era tukuna vei iko vata kei na dua na lewe ni matavuvale ni ra sa yaco ki vale.

Vakatorocaketaki Noda Veivakavulici

Taroga na taro eso e veivakauqeti. Taroga na taro ka na sureti ira na gone me ra kakua walega ni tukuna mai e dua na ka sa vakadinati ni dina ia me ra wasea na nodra ivakadinadina ni dina ni kosipeli. Me ivakaraitaki, kevaka o ni veivosakitaka na ivunau, e rawa ni o kerei ira na gone me ra wasea na sala e sa vakalougatataki ira kina na ivunau.