iYaloyalo kei Mosese ni tabaki Josua tiko, mai vei Darrell Thomas

23–29 ni Me

Josua 1–8; 23–24

“Mo Kaukauwa ka Qaqa”

Ni o wilika na Josua 1–8 kei na 23–24, vola na veivakauqeti vakayalo o ciqoma. Na cava o na cakava mo kunea kina na veika era gadreva na gone o vakavulica mai na veiwase oqo?

Vola na Veika o Vakauqeti Kina

Sureta na Veiwasei

Droinitaka e dua na iyaloyalo ena papa ni volavola me baleta e dua na ka mai na dua na italanoa ena Josua 1–8; 23–24, ka raica se ra na kila rawa na gone na italanoa e lako mai kina. Me kena ivakaraitaki, e rawa ni o droinitaka e dua na uciwai se dua na bai ni koro levu.

Vakavulica na iVunau: Gone Sobu

Josua 1:8

Au rawa ni vakanananu na ivolanikalou ena siga kei na bogi.

A tukuna vei Josua na Turaga ni kevaka me na vakanananu ena ivolanikalou ka vakamuria na ivakasala e tiko kina, ena rawa ni qaqa ena nodra liutaki na Isireli ki na vanua yalataki. Na cava o rawa ni cakava mo vakavulica kina vei ira na gone na veivakalougatataki cecere e lako mai na ivolanikalou?

iTaviqaravi e Rawa ni Caka

• Solia vei ira yadua na gone e dua na iyaloyalo se droini ni matanisiga kei na vula. Wiliwili vei ira mai na Josua 1:8: “Vakanananu [ena ivolanikalou] ena siga kei na bogi.” Vakamacalataka ni vakanananu e kena ibalebale me da vakasamataka vakatitobu e dua na ka. Cavuta vakavica na malanivosa oqo, ka sureti ira na gone me ra taura cake na matanisiga ni o cavuta na “siga” kei na vula ni o cavuta na “bogi.” Vukei ira na gone mo ni tokaruataka vata na malanivosa.

• Kerei ira na gone me ra tukuna na veika era dau cakava ena siga kei na bogi tale ga. Tukuna vei ira ni a tukuni vei Josua me vakanananu ena ivolanikalou ena siga kei na bogi. Vukei ira me ra vakasamataka na italanoa eso kei na ivakavuvuli mai na ivolanikalou ka rawa ni ra vakanananu kina ena siga kei na bogi. Sureti ira me ra droinitaka e dua na kedra iyaloyalo se nodra matavuvale ena nodra vulica tiko na ivolanikalou. Na cava era taleitaka kina na vulica na ivolanikalou? Era vakalougatataki vakacava ni ra cakava?

Josua 3

E dodonu meu na papitaisotaki meu curu kina ki na matanitu vakalomalagi.

Na italanoa kei Josua ena nona liutaki ira na Isireli me ra kosova na Uciwai na Joritani ki na vanua yalataki, e vakarautaka e dua na madigi me ra vakavulici kina na gone, ni sa dodonu me da papitaisotaki me da na curu ki na matanitu vakalomalagi.

iTaviqaravi e Rawa ni Caka

• Railesuva eso na vakamatailalai ni kedra italanoa na luve i Isireli ni ra takosova tiko na uciwai na Joritani me ra curuma na vanua yalataki (raica na “Josua na Parofita” ena iTalanoa ni Veiyalayalati Makawa). Qai vakaraitaka e dua na iyaloyalo ni nona papitaiso ko Jisu, ka tukuna vei ira na gone ni a papitaisotaki ko Jisu ena uciwai vata o ya. Sureti ira na gone me ra veiwaseitaka na veika tale eso era kila tu me baleta na papitaiso nei Jisu.

• Lagata e dua na sere me baleta na papitaiso vata kei ira na gone, me vaka na “Baptism” (Children’s Songbook, 100-110). Vukei ira me ra kila na cava e vakavulica vei keda na sere oqo me baleta na vuna a papitaiso kina o Jisu kei na vuna e dodonu kina meda muria na nona ivakaraitaki. Sureti ira na gone mera wasea na nodra nanuma me baleta nodra papitaiso. Veivosakitaka na veika era rawa ni cakava na gone ena gauna oqo me ra vakavakarau kina me ra papitaiso ni ra sa yabaki walu.

  

  E dodonu meda papitaisotaki meda curu kina ki na matanitu vakalomalagi.

Josua 24:15

Au rawa ni digitaka meu qaravi Jisu Karisito.

Na iotioti ni itukutuku nei Josua vei ira na nona tamata sai koya ni tiko na digidigi vei ira me ra tomana tikoga me qarava na Turaga se me ra biuti Koya. Ena loloma vata ga nei Josua vei ira na nona tamata, sa rawa mo vakauqeti ira na gone o vakavulica me ra digitaka me ra qarava na Turaga “ena siga oqo.”

iTaviqaravi e Rawa ni Caka

• Kerei ira na gone me ra veivosakitaka eso na digidigi era sa cakava nikua. Wiliwili vei ira na gone mai na Josua 24:15: “Mo ni digitaki koya edaidai kemuni na qarava; … ia koi au kei ira na noqu lewe ni vale, keitou na qaravi Jiova.” Era sa digitaka vakacava na gone me ra qarava na Turaga ni kua? Na cava eso na sala eda rawa ni digitaka kina me da qaravi Koya ena veisiga?

• Lagata vata e dua na sere ni caka digidigi dodonu, me vaka na “Digitaka na Dodonu” (iVolanisere ni Gonelalai, 82). Na cava eda na vakila ni da digitaka me da qaravi Jisu Karisito? Sureti ira na gone me ra droinitaka na kedra iyaloyalo ni ra vakayacora tiko e dua na ka me ra qarava na Turaga. Wasea e dua na italanoa mai na nomu bula se mai na dua na mekasini ni Lotu me baleta na digidigi me qarava na Turaga.

Vakavulica na iVunau: Gone Qase Cake

Josua 1–4; 6

“Mo kaukauwa ka qaqa”

Ni sa yaco o Josua me nodra iliuliu na Isireli, a vakayaloqaqataki koya na Turaga ena nona kaya, “Mo kaukauwa ka qaqa” (Josua 1:6). Na cava e rawa ni ra vulica na gone mai vei Josua me baleta na sala me ra kaukauwa ka qaqa kina vei Karisito?

iTaviqaravi e Rawa ni Caka

• Sureti ira na gone me ra vakasaqara na malanivosa ka cavuti vakavica tiko ena Josua 1:6, 9, kei na 18, ka vola ena vava ni volavola (raica talega na tikina e 7). Vukei ira na gone me ra vakasamataka na vuna eda na gadreva kina na itukutuku oqo, me vakataki Josua. Railesuva vakalasi eso na italanoa ena Josua 1–4; 6 (raica talega na “Josua na Parofita” kei “Reapi kei ira na Yamata vuni” ena iTalanoa ni Veiyalayalati Makawa), ka kerei ira na gone me ra vakaraica se ra vakaraitaka vakacava na tamata ena italanoa oqo na yaloqaqa kei na kaukauwa.

• Sureti ira na gone me ra veivosakitaka e dua era kila ni kaukauwa ka yaloqaqa vei Jisu Karisito. Vakayaloqaqataki ira mera vola e dua na ka era na vinakata mera cakava mera kaukauwa ka yaloqaqa cake kina vei Karisito.

Josua 1:8

Au rawa ni vakanananu na ivolanikalou ena siga kei na bogi.

E dua na sala a vukei Josua kina na Turaga me vakavakarau ki na bolebole a sotava o ya ena nona vakayaloqaqataki koya me “vakanananu” ena ivolanikalou “ena siga kei na bogi.” Ena vakalougatataki ira vakacava na gone o vakavulica na ivakasala oqo?

iTaviqaravi e Rawa ni Caka

• Sureti ira na gone me ra vola vakacaca na levu ni gauna era vakayagataka ena vica vata na itaviqaravi ena dua na siga. Qai sureti ira mera wilika na Josua 1:8, ka vaqara e dua na ka eda gadreva taucoko meda cakava ena veisiga kei na veibogi. Kerei ira mera vaqara na vosa kei na malanivosa ena tikina oqo e vakavulica vei keda na veivakalougatataki ni kena vulici na ivolanikalou. Ena vukei keda vakacava na vakanananu ena ivolanikalou meda tamata yaco ena veika tale eso eda cakava ena veisiga yadua?

• Sureti ira na gone me ra wilika vata na ivolanikalou oqo: Josua 1:8; 1 Nifai 15:23–24; 2 Nifai 31:20; 32:3; Jekope 4:6; Ilamani 3:29–30. Kerei ira na gone me ra vaqara e dua na vosa se malanivosa ena veitikina yadua e vakavulica vei ira na kaukauwa ni kena vulici na ivolanikalou. Na lalawa cava e rawa ni ra vakotora me baleta na nodra vuli ivolanikalou vakayadudua?

Josua 24:15

Au rawa ni digitaka meu qaravi Jisu Karisito.

E dua vei ira na iotioti ni vosa nei Josua vei ira na Isireli o ya e dua na vakamamasu me ra “digitaka … edaidai o cei kemuni na qarava.” Navuca na sala e rawa ni vakalougatataki ira kina na gone o vakavulica na ivakasala oqo.

iTaviqaravi e Rawa ni Caka

• Sureti ira na gone me ra bulia e dua na ivolakabi ena kena vakayagataki eso na vosa bibi kei na malanivosa ena Josua 24:15. Me ra wasea na nodra ivolakabi ka vakamacalataka na vuna era digitaka kina na veivosa o ya. E rawa vakacava ni da vakaraitaka vua na Kalou ni da sa digitaka me da qaravi koya?

• Sureti ira na gone me ra vakatututaka na gauna eso e rawa ni ra vakatulewa kina me ra digitaka na Kalou mai na veika tale eso. Kerei ira mera vakasamataka na cava era na cakava. Na cava e bibi kina me da “digitaka … edaidai” ka sega ni waraka na ituvaki me yaco mai? Eda na vakalougatataki vakacava ni da vakayacora na digidigi dodonu?

Vakauqeta na Vuli e Vale

Sureti ira na gone me ra digitaka e dua na ka o ni a veitalanoataka ka ra vinakata me ra na wasea vata kei na nodra matavuvale. Vakayaloqaqataki ira mera vakasamataka e dua na sala era rawa ni wasea kina ena macawa mai oqo.

Vakatorocaketaki Noda Veivakavulici

Vukea na gone mera daunivuli vinaka sara. Na nomu inaki ni vakavulici ira na gone e sega walega ni kena wasei na dina vei ira. Sa dodonu talega mo vukei ira me yaco me ra bularawati ira ena vakasaqarai ni dina.