Valetabu e São Paulo Brazil

2-8 ni Me

Na Lako Yani 35–40; Na Vunau ni Soro 1; 16; 19

“Sa Tabu Me Nei Jiova”

Ni o vulica na ivolanikalou ena masumasu na macawa oqo, vakasamataki ira na gone o vakavulica. Na Yalo Tabu e rawa ni vukei iko mo kila na dina cava e gadrevi me ra vulica kei na sala e rawa ni o vakavulica kina vei ira na vei dina oqori.

Vola na Veika o Vakauqeti Kina

ivakatakilakila ni veiwasei

Sureta na Veiwasei

Biuta na yaca ni gone yadua ena dua na koniteina. Kerea e dua na gone me digitaka e dua na yaca, ka mera sureti na gone e digitaki na yacana me wasea e dua na ka se qai vulica walega oqo mai na Veiyalayalati Makawa. Veivosakitaka vata kei ira na gone na sala e vukei ira kina na veika era sa vulica mera toro voleka kina vei Jisu Karisito. Tomana tiko me yacova ni ra sa rawata kece na tamata na madigi me ra veiwasei.

ivakatakilakila ni veivakavulici

Vakavulica na iVunau: Gone Sobu

Na Lako Yani 36:1

Au rawa ni veivuke ena cakacaka ni Turaga.

E tiko vei ira na gone lalai na isolisoli era rawa ni vakayagataka me ra cau ki na cakacaka ni Turaga e vuravura. O na vukei ira vakacava na gone me ra vakila na gagadre me ra wasea na veika sa solia vei ira na Turaga?

iTaviqaravi e Rawa ni Caka

• Wilika Na Lako Yani 36:1 vei ira na gone, ka kerei ira mera vakarogoca na veika a solia na Turaga vei Pisalieli kei Aoliapi me vukei ira ena kena tarai cake na “ivakaruru” (valecavu). Tukuna vei ira yadua na gone me baleta e dua na isolisoli e tiko vua (e rawa ni veivuke mera tarogi na nodra itubutubu). Vakadinadinataka ni Kalou sa “solia” na isolisoli vei ira vakayadua na luvena.

• Tukuna vei ira na gone na vuna o vinakata kina mo veivuke ena cakacaka ni Turaga. Vukei ira me ra vakasamataka na sala eso e rawa ni ra vakaitavi kina (me vaka na vulici ni dua na qase e liu, na kena tukuni vua e dua me baleti Jisu, se qaravi e dua na lewe ni matavuvale). Vola na nodra vakasama ena tiki ni pepa eso, biuti ira ena dua na koniteina, ka sureti ira na gone me ra digitaka e dua, ka matanataka na ka e volai tiko ena tiki ni pepa o ya.

Na Lako Yani 40:17–34

Au rawa ni vakila na iserau ni Kalou ena veivanua tabu.

A vakarota na Turaga vei ira na luvei Isireli me ra tara na valecavu me rawa ni “tiko kina ena kedra maliwai” (Na Lako Yani 25:8). E rawa ni o vukei ira na gone me ra vulica na veivanua tabu sa solia vei keda nikua na Kalou me vukea noda vakila na Nona iserau.

iTaviqaravi e Rawa ni Caka

• Vakaraitaka e dua na iyaloyalo ni valecavu makawa (raica na ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale). Kerei ira na gone me ra vaqara eso tale na tiki ni valecavu ena iyaloyalo, me vaka na itutu ni cina se na icabocabo ni soro, ka vakamacalataka ni sa nakiti na veika oqo me vukei ira na Isireli me ra daunanuma na Turaga (me ikuri ni ivakamacala me baleta na valecavu, raica Na Lako Yani 40:17–34). Na vanua tabu cava e tu vei keda nikua e vukei keda me da vakasamataka na Turaga?

• Vakaraitaka e dua na iyaloyalo ni valetabu, ka wilika Na Lako Yani 25:8 vei ira na gone. Vakamacalataka ni gauna oqo, sa solia vei keda na Kalou na veivanua tabu me rawa ni da voleka yani kina Vua. Vukei ira na gone me ra lisitaka eso na veivanua vakaoqo. Tarogi ira na gone ena cava era vakila ni ra vakasamataka na veivanua tabu vakaoqo. Wasea vei ira ni sa rawa talega meda vakila ni da sa voleka cake vua na Kalou ni da masu, se vanua cava ga eda tiko kina.

• Vakacavara na tabana ni itaviqaravi vata kei ira na gone. Ni vakayacori tiko vakakina, lagata vata kei ira e dua na sere baleta na valetabu, me vaka na “Raica Na Valetabu” (iVolanisere ni Gonelalai, 99).

  Valetabu e Roma Itali

  Me vaka na valecavu makawa, e dusimaki keda tiko na valetabu vua na iVakabula.

ivakatakilakila ni veivakavulici

Vakavulica na iVunau: Gone Qase Cake

Na Lako Yani 35:20–29; 36:1

Sa solia vei au na Kalou na isolisoli meu veivuke ena Nona cakacaka.

O ira kece na luvena na Tamada Vakalomalagi e tiko e dua na ka me ra cau kina ki na Nona cakacaka. O ira na gone o vakavulica era na rawa ni gadreva na nomu veivuke me ra kila na sala e rawa ni ra vakayagataka kina na nodra isolisoli me ra veivuke ena cakacaka ni Kalou.

iTaviqaravi e Rawa ni Caka

• Vakaraitaka e dua na iyaloyalo ni valecavu (raica na ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale). Tarogi ira na gone ena mataqali iyaya cava soti e sa gadrevi me rawa ni tara kina na valecavu. Wilika vata kei ira na gone Na Lako Yani 35:20–29, ka kerei ira mera raica na sala a vakarautaki kina na iyaya e gadrevi. Vakadinadinataka ni o ira yadua na gone e tiko e dua na ka me ra cau kina ki na cakacaka ni Turaga.

• Kerei ira na gone me ra wilika Na Lako Yani 36:1 me ra raica kina na veika a solia na Turaga vei ira era sa kacivi me ra veivuke ena kena tarai cake na valecavu. Sureti ira na gone me ra wasea na veika era vakila ni solia vei ira na Turaga me ra veivuke ena kena tarai cake na nona matanitu (solia eso na vakatutu kevaka e gadrevi). E rawa vakacava ni da vakayagataka na veika oqo me da vakalougatataki ira kina na tani?

Na Lako Yani 40:17–33

E rawa meu vakataki Jisu Karisito vakalevu cake kei na Tamada Vakalomalagi.

Na valecavu e sega walega ni vakatara vei ira na luvei Isireli me tiko vata kina kei ira na iserau ni Kalou, ia e vakavulica talega vei ira na veika e rawa ni ra cakava me ra vakataka vakalevu cake kina na Kalou.

iTaviqaravi e Rawa ni Caka

• Sureti ira na gone me ra vakayagataka Na Lako Yani 40:17–33 me ra vaqara na veika a tiki ni valecavu ka vaqara eso ena dua na iyaloyalo ni valecavu makawa (raica na ituvatuva ni macawa oqo ena Lako mai, Mo Muri au—Me Baleta na Tamata Yadua kei na Matavuvale). Sureti ira na gone me ra droinitaka na nodra iyaloyalo ni valecavu. Veivosakitaka na sala e rawa ni vakavulica kina na veitiki ni valecavu yadua na veika me baleta na iVakabula se Tamada Vakalomalagi. Me ivakaraitaki, na kato ni veiyalayalati e rawa ni vakananuma vei keda na ivakaro ni Kalou, na icabocabo ni soro e rawa ni vakananuma vei keda na solibula nei Jisu Karisito, na itutu ni cina e rawa ni vakananuma vei keda ni iVakabula sai koya na Rarama kei Vuravura, kei na veika vakakina.

• Kerei ira na gone me ra wilika Na Lako Yani 25:8 me ra raica kina na vuna e vinakati ira kina na luvei Isireli na Turaga me ra tara e dua na “ivakaruru” (se valecavu). Vukei ira na gone me ra vola na veivanua kei na ituvaki eso e rawa ni da vakila kina na nona iserau na Turaga. E rawa vakacava me vukei keda na veivanua vakaoqo meda vakataki koya vakalevu cake sara kina na Tamada Vakalomalagi kei Jisu Karisito?

Na Vunau ni Soro 1:1–4

Ena vuku ni Veisorovaki i Jisu Karisito, au sa rawa ni vosoti kina.

Na vakacabori ni manumanu a vakayacori ena Veiyalayalati Makawa a kena inaki me vakavulica vei ira na luvei Isireli me baleta na veivosoti e rawati ena vuku ni Veisorovaki i Jisu Karisito.

iTaviqaravi e Rawa ni Caka

• Vakaraitaka na iyaloyalo eso kei Jisu Karisito e Kecisemani kei na kauveilatai (raica na iVola ni iYaloyalo Vakosipeli, naba. 56, 57). Vakamacalataka ni a vakarota na Turaga vei ira na luvei Isireli me ra vakacabo isoro me ra vakavulici kina ni sa rawa me ra vosoti mai na nodra ivalavala ca ena vuku ni Veisorovaki i Jisu Karisito. Wilika vata kei ira na gone Na Vunau ni Soro 1:1–4, ka sureti ira me ra vaqara na vosa se malanivosa e vakavotuya vei ira na solibula i Jisu Karisito.

• Vakaraitaka e dua na iyaloyalo kei Jisu Karisito ni sikovi ira tiko na tamata e Amerika (me vaka na iVola ni iYaloyalo Vakosipel, naba 82). Vakamacalataka ni oti na nona vakamatei o Jisu Karisito ka tucaketale, a vakavulica vei ira na tamata e Amerika na vuna era sega ni gadrevi tale kina me ra vakacabo manumanu. Wilika vata na 3 Nifai 9:19–20, ka tarogi ira na gone ena veika eda sa vakaroti meda solibula kina. Na cava na kena ibalebale me cabori na isoro ni yalo sa raramusumusu kei na yalo bibivoro? Vakatura me ra vakasaqara na “Yalo Raramusumusu” ena iDusidusi ki na iVolanikalou (scriptures.ChurchofJesusChrist.org) me vukea na kena saumi na taro oqo. Sureti ira me ra vakasamataka vakatitobu na sala e rawa ni ra cabora kina na yalo raramusumusu kei na yalo bibivoro vua na Turaga.

ivakatakilakila ni vuli

Vakauqeta na Vuli e Vale

Sureti ira na gone me ra kerea vua na Tamada Vakalomalagi ena macawa oqo, na sala ena vinakata o koya me ra cau kina ki na Nona cakacaka ena nodra matavuvale.

Vakatorocaketaki ni Noda Veivakavulici

Dusimaki ira na gone vei Tamada Vakalomalagi kei Jisu Karisito. Na nomu inaki bibi mo vukei ira na gone o vakavulica me ra vaqaqacotaka na nodra vakabauta na Tamada Vakalomalagi kei Jisu Karisito. Na cava e rawa ni o cakava mo vukei ira kina me ra kila ni nodra bulataka na dina ni kosipeli ena vukei ira me ra vakataka vakalevu cake kina na Tamada kei na Luvena?

tabana ni itaviqaravi: Au rawa ni vakila na iserau ni Kalou ena veivanua tabu