9-15 ni Me

Na Tiko Voli Mai na Lekutu 11–14; 20–24

“Ni Kakua ni Talaidredre vei Jiova, Ni Kakua tale ga ni Rere”

Na ituvatuva oqo e sega ni kena inaki me muri sara vakamatailalai. Ia, vakayagataka me rawati kina na vakasama kei na veivakauqeti me vulici kina na itaviqaravi ka na vakalougatataki ira na gone ena nomu kalasi.

Vola na Veika o Vakauqeti Kina

Sureta na Veiwasei

Vakaraitaka vei ira na gone e dua nai yaloyalo ena ituvatuva oqo se ena ituvatuva ena macawa oqo ena Lako Mai, Mo Muri Au—Me Baleta na Tamata Yadua kei na Matavuvale. Me ra wasea vei iko na veika era kila ka yaco tiko ena iyaloyalo.

Vakavulica na iVunau: Gone Sobu

Na Tiko Voli Mai na Lekutu 11:4–10

Au sa rawa ni vakavinavinakataka na veika sa solia vei au na Kalou.

E dina ga ni a cakava na Turaga na veika talei vei ira na luvei Isireli, ia era sa dau vakanamata tu ga ki na veika e sega ni tu vei ira. Vukei ira na gone me ra vulica me ra vakavinavinakataka na veika sa solia vei ira na Kalou.

iTaviqaravi e Rawa ni Caka

• Tarogi ira na gone kevaka era nanuma eso na cakamana a vakayacora na Turaga me vakalougatataki ira kina na Isireli ena loma ni lekutu. (Kevaka era gadreva na veivuke na gone, vakaraitaka vei ira na iyaloyalo mai na ituvatuva ni i ka 4–10 Epereli ena Lako Mai, Mo Muri au—Me Baleta na Tamata Yadua kei na Matavuvale; raica talega Na Lako Yani 14:21–22; 15:23–25; 16:4.) Qai vakalekalekataka vei ira Na Tiko Voli Mai na Lekutu 11:4–10, ka vakabibitaka ni a sega ni marau na Turaga baleta ni ra a vosakudrukudru na Isireli. Vukei ira na gone mera vakasamataka eso na sala era rawa ni vakaraitaka kina na nodra vakavinavinavinaka vua na Turaga.

• Lagata vata e dua na sere me baleta na vakavinavinaka, me vaka na “Wilika Nomu Kalougata” (Sere ni Lotu, naba 144). Sureti ira yadua na gone me ra droinitaka na iyaloyalo ni veivakalougatataki sa solia vei ira se ki na nodra matavuvale na Turaga. Vakayaloqaqataki ira me ra vakasamataka se raica na nodra iyaloyalo ena gauna era temaki kina me ra kudruvaka e dua na ka e sega ni tiko vei ira.

Na Tiko Voli Mai na Lekutu 13:17–33; 14:6–9

Na Vakabauta e rawa ni vukei au meu kakua ni rere.

Ena gauna sa tala kina o Mosese e 12 na tagane me ra raica na vanua yalataki, e 10 vei ira era lesu tale mai ena rere baleti ira na tamata kaukauwa era a bula tiko e kea. E rua vei rau, o Kelepi kei Josua, erau a sega ni rere, baleta ni rau a vakabauta na Turaga.

iTaviqaravi e Rawa ni Caka

• Vakayagataka na iyaloyalo se droini ni vua ni vaini, oni, tuwawa, kei na vodre me tukuni vakalekaleka kina vei ira na gone baleti iratou na 12 na tagane a talai iratou o Mosese me ratou dikeva na vanua yalataki (raica Na Tiko Voli Mai na Lekutu 13:17–33; raica talega na “Vasagavulu na Yabaki ena Lekutu” ena iTalanoa ni Veiyalayalati Makawa). Vakamacalataka ni ra a kunea e levu na vuata kei na kakana tale eso (sureti ira na gone me ra matanataka na nodra kania tiko na kakana), ia era a rere talega baleta ni o ira na tamata e kea, era tamata levu ka kaukauwa (sureti ira na gone me ra matanataka ni ra rere). Vakaraitaka e dua na iyaloyalo kei Jisu, ka dusia ni rua na Isireli, o Kelepi kei Josua erau a sega ni rere baleta ni rau a vakabauti Jisu Karisito.

• Wilika Na Tiko Voli Mai na Lekutu 14:9 vei ira na gone, ka veivosakitaka e dua na gauna o a rere kina ia a vukei iko na nomu vakabauti Jisu Karisito mo yaloqaqa. Vukei ira na gone mera vakananuma na veika vakaoqori era sa sotava oti.

  

  E tini vei iratou na yamata vuni ni Isireli eratou a rere; o Josua kei Kelepi erau a vakabauta © Lifeway Collection/laiseni mai na goodsalt.com

Na Tiko Voli Mai na Lekutu 21:6–9

Au rawa ni rai yani vei Jisu Karisito.

Me vaka ga ni ra a vakabulai na luvei Isireli ena nodra raica na gata parasa, o ira na gone ena nomu kalasi era na ciqoma na veivakabulai ena nodra rai yani vua na iVakabula.

iTaviqaravi e Rawa ni Caka

• Ena vakayagataki ni tabana ni itaviqaravi ni macawa oqo se na iyaloyalo ena ituvatuva ni macawa oqo ena Lako Mai, Mo Muri au—Me Baleta na Tamata Yadua kei na Matavuvale, tukuna vei ira na gone na ka a yaco ena nodra yaco mai “na gata vakabukawaqa” ki na nodra keba na Isireli (raica Na Tiko Voli Mai na Lekutu 21:6–9). Vukei ira mera raica na sala e tautauvata kina kei Jisu Karisito na gata parasa (raica na Joni 3:14–15). Me ra qai veivukevuke na gone ena kena vakayagataki na iyaloyalo me ra talanoa vei ira vakai ira.

• Kerei ira me ra bobo ni o biuta e dua na iyaloyalo kei Jisu ena dua na vanua ena loma ni rumu. Mo qai sureti ira na gone me ra dolava na matadra, vaqara na iyaloyalo, ka sarava. Me ra qai veivukevuke ena biuta na iyaloyalo. Ena veigauna yadua era kunea kina na gone na iyaloyalo, vukei ira me ra vakasamataka e dua na ka e rawa ni ra cakava me ra rai yani kina vua na iVakabula.

Vakavulica na iVunau: Gone Qase Cake

Na Tiko Voli Mai na Lekutu 12

E vinakata na Turaga meu muria na Nona parofita.

Na Tiko Voli Mai na Lekutu 12 e tiko kina eso na lesoni bibi ka rawa ni vukei ira na gone era rogoci ira na tamata ni ra tukuna tiko eso na veika e sega ni vinaka me baleti ira na parofita ni Turaga se iliuliu ni Lotu tale eso.

iTaviqaravi e Rawa ni Caka

• Tukuna vei ira na gone ni dua na gauna, na Turaga a rarawataki Eroni na taci Mosese, kei Miriama na ganena. Sureta mera wilika Na Tiko Voli Mai na Lekutu 12:1–2 me kunei na vuna. Me vaka na tikina e 5–8, a vakacava na nanuma ni Turaga me baleti Eroni kei Miriama ena nodrau vosa saqata na Nona parofita?

• Vukei ira na gone me ra vakasamataka eso na ivakaraitaki ni tamata ena ivolanikalou ka ra a muria na parofita ka ra vakalougatataki kina (me kena ivakaraitaki, raica Nai Vakatekivu 7:7; 1 Nifai 3:7). Na cava eso na ka sa vakavulica oti vei keda na noda parofita bula? Eda na vakalougatataki vakacava ni da talairawarawa ki na nona ivakavuvuli?

Na Tiko Voli Mai na Lekutu 21:4–9

E tu vei Jisu Karisito na kaukauwa me vakabulai au vakayalo.

E vuqa na Isireli era mate baleta ni ra a sega ni vakabauta ni na vakabulai ira na Turaga kevaka era raica na gata parasa (raica na Alama 33:18–20). O na vukei ira vakacava na gone o vakavulica mera vakabauta na kaukauwa ni veivakabulai i Jisu Karisito?

iTaviqaravi e Rawa ni Caka

• Sureti ira na gone me ra droinitaka na iyaloyalo ni veika era wilika e Na Tiko Voli Mai na Lekutu 21:4–9. Vakatara vei ira mera vakayagataka na nodra iyaloyalo mera talanoataka kina na italanoa. Kerei ira yadua na gone me ra digitaka e dua vei ira na ivolanikalou oqo ka wasea na veika e vakaikuritaka na noda kila vinaka na italanoa: Joni 3:14–15; 1 Nifai 17:41; Alama 33:18–20; Ilamani 8:13–15; Vunau kei na Veiyalayalati 6:36.

• Vola ena vava ni volavola e dua na taro me vaka Na cava eda rawa ni cakava meda “rai yani kina vua na Luve ni Kalou ena vakabauta”? (Ilamani 8:15). Solia vei ira yadua na gone e dua na tiki ni pepa, ka sureti ira mera vola na levu ga ni isau ni taro era rawa ni vakasamataka. Soqona na pepa, wilika e cake e vica na isau ni taro, ka sureti ira na gone me ra veivosakitaka na sala e rawa ni vukei keda kina na noda cakava na veika oqo ni da gadreva na kaukauwa ni veivakabulai ni iVakabula.

Na Tiko Voli Mai na Lekutu 22–24

Au rawa ni muria na loma ni Kalou, kevaka sara mada ga era tovolea na tani mera uqeti au meu kakua ni muria.

A tovolea o Pelaki me vakauqeti Pelami me vatonaki ira na Isireli, ia a kila o Pelami ni oqo e sa saqata tiko na loma ni Kalou. Na ivakaraitaki nei Pelami e rawa ni vukei ira na gone ena gauna era vakasaurarataki kina me ra talaidredre vua na Kalou.

iTaviqaravi e Rawa ni Caka

• Vakalekalekataka Na Tiko Voli Mai na Lekutu 22:1–18 vei ira na gone, ka vakabibitaka na nona sega ni vinakata o Pelami me vatonaki ira na tamata ni Kalou, e dina ga ni o Pelaki, na tui Moapi, ena vakalevulevui koya ka solia vua na iyau. Kerei ira na gone me ra vakasaqara na vei malanivosa ena veitikina oqo ka ra nanuma ni vakaraitaka na yalodina nei Pelami me muria na Kalou: Na Tiko Voli Mai na Lekutu 22:18; 23:26; 24:13. Sureti ira na gone me ra tomika e dua na malanivosa era taleitaka ka vola ena dua na kadi me vukei ira me ra nanuma tiko me ra talairawarawa vua na Turaga.

• Veivosakitaka vata kei ira na gone na ituvaki eso era na tovolea kina na itokani se so tale mera vakauqeti ira mera cakava e dua na ka cala, me vaka a cakava o Pelaki vei Pelami. E vukei Pelami vakacava na nona yalodina vua na Turaga me vorata rawa kina na veivakasaurarataki mai vei Pelaki? Sureti ira na gone me ra vakatovotovotaka na kena sotavi na vei ituvaki vakaoqo ena kena vakayagataki na veivosa eso me vaka a cavuta o Pelami.

Vakauqeta na Vuli e Vale

Sureti ira na gone me ra wasea vata e dua na ka kei na nodra matavuvale, me vaka e dua na iyaloyalo, e dua na ivolanikalou, se dua na sere, ka vakaraitaka na veika era vulica ena Lalai.

Vakatorocaketaki ni Noda Veivakavulici

Mo dolavi iko tu ki na veiuqeti mai vua na Yalo. “Dau vakawasoma me gauna vinaka duadua ni veivakavulici e sega ni dau namaki—me ivakaraitaki, ni dua e wasea mai na ka e sotava se taroga e dua na taro ka muataki ki na dua na veitalanoa e vakaibalebale. … Tuvakarau mo veisautaka na nomu ituvatuva ke gadrevi mo muria kina na veivakauqeti o ciqoma” (Veivakavulici ena iVakarau ni iVakabula, 10).