Na Wasa Damudamu

4–10 ni Epereli

Na Lako Yani 14–17

“Ni Tu Vakadua, ka Raica na Veivakabulai i Jiova.”

A vakaroti Mosese na Kalou me vola na veika a sotava “me baleta e dua na ivakananumi ena dua na ivola, ka vakatovotovotaka” vei Josua (Na Lako Yani 17:14). Sa vakakina, nomu vola na veika vakayalo ena vukei iko kei ira na nomu daulomani mo ni nanuma na vinaka ni Turaga.

Vola na Veika o Uqeti Kina

Era a tao tu na Isireli. Na Wasa Damudamu ena dua na yasana, kei na mataivalu nei Fero sa tosovi ira tiko mai na yasana kadua. Nodra dro mai Ijipita, e vaka, ni na lekaleka wale. Ia na Kalou e dua na nona itukutuku vei ira na Isireli ni vinakati ira me ra dau nanuma tu ena veitabatamata: “Mo ni kakua ni rere. … Ena vala ena vukumudou ko Jiova” (Na Lako Yani 14:13–14).

Me tekivu mai na gauna o ya, ni ra gadreva na tamata ni Kalou na vakabauta kei na yaloqaqa, era dau goleva na itukutuku oqo ni veivakabulai veivakurabuitaki vei ira na Isireli. Ni vinakata o Nifai me vakauqeti iratou na tacina, a kaya, “me datou kaukauwa vakataki Mosese; ni a vosa vakaidina ki na wai e vuqa ni Wasa Damudamu a ra sa tawase vaka ka vaka, era sa lako yani ena vanua mamaca na noda qase” (1 Nifai 4:2). Ni vinakata na Tui ko Limiai me ra “laveta cake na [uludra], ka vakacegu,” a vakananuma vei ira na italanoa vata oqo (Mosaia 7:19). Ni vinakata o Alama me vakadinadinataka vua na luvena na kaukauwa ni Kalou, a dau goleva talega na italanoa oqo (raica na Alama 36:28). Kei na gauna eda gadreva kina na veisereki—gauna eda gadreva kina me levu cake vakalailai na vakabauta, ni da gadreva meda “tuvakadua, ka raica na veivakabulai ni Turaga”—eda rawa ni nanuma na ivakarau “sa vakabula [kina] na Isireli ko Jiova ena siga ko ya mai na ligadra na Ijipita” (Na Lako Yani 14:13, 30).

Vakasama ni Vuli iVolanikalou ni Tamata Yadua

Na Lako Yani 14

E tiko vua na Kalou na kaukauwa me vakabulai au.

Ni o wilika Na Lako Yani 14:1–10, vakasamataka mada na veika era na nanuma na Isireli ni ra raica ni sa toro voleka mai na mataivalu nei Fero. De rairai o vakila ni o na gadreva e dua na cakamana mo uabaleta kina e dua na bolebole dredre o sotava tiko. Na cava o vulica mai Na Lako Yani 14:13–31 ka na rawa ni veivuke mo vakasaqara na veivakabulai ni Kalou ena nomu bula? Na cava o sa vulica me baleta na sala sa vakarautaka kina na Kalou na veisereki mai na veika dredre? Vakasamataka mada vakatitobu na sala ni Nona kaukauwa ni veisereki ena nomu bula.

Raica talega na Vunau kei na Veiyalayalati 8:2–3; L. Tom Perry, “Na Kaukauwa ni Veivueti,” Liaona, Me 2012, 94–97; Mape ni iVolatabu, naba 2, “Nodra lako yani na Isireli mai Ijipita kei na Nodra Curu Yani ki Kenani.”

Na Lako Yani 15:22–27

Na Turaga e rawa ni vakamikamicataka na ka gaga.

Ni o wilika na ilakolako nei Isireli ki na vanua yalataki e Na Lako Yani 15:22–27 vakasamataka na veika ena nomu bula ka sa vaka “na wiwi” ni wai mai Mara. Vakasamataka na veitaro oqo ni ko vakasamataka vakatitobu na veitikina oqo: Ena vakamikamicataka beka vakacava na Turaga na veika wiwi ena nomu bula? Sa yaga beka vakacava ki na nomu bula na veika o sotava oqo? Cava erau vakatura na tikina e 26 kei na 27 ena ivakarau e vakalougatataki keda kina na Turaga ni da rogoca na Domona?

Na Lako Yani 15:23–27; 16:1–15; 17:1–7.

Au rawa ni vakabauta na Turaga, ena gauna dredre mada ga.

Eda temaki me da dusi ira na Isireli baleta ni ra a vosaminimini se kudrukudruiramo ni sa dredre mai na nodra ituvaki ni bula, ni oti sara mada ga na veika kece e cakava vei ira na Kalou. Ia ni o wilika Na Lako Yani 15:23–27; 16:1–15; 17:1–7, vakasamataka tiko se o ni sa cakava na ka vata oqo. Na cava o sa vulica mai na veika era sa sotava na Isireli ka rawa ni veivuke mo kakua soti ni vosaminimini ka me taucoko na nomu vakabauta na Kalou? Me kena ivakaraitaki, na duidui cava soti o raica me baleta na sala era sotava kina na Isireli na dredre kei na sala e sotava kina o Mosese? Na cava beka e vakatavulica vei iko na veitikina oqo me baleta na Kalou?

Raica talega na 1 Nifai 2:11–12; “Sin of Murmuring” (vidio), ChurchofJesusChrist.org.

Na mana mai vua na Kalou era vakani kina vakayago na Isireli; eda gadreva talega na veivakani vakayalo e veisiga. Fresco mai vei Leopold Bruckner

Na Lako Yani 16

E dodonu meu vakasaqara e veisiga na veivakani vakayalo.

E vuqa tu na lesoni vakayalo eda rawa ni vulica mai na cakacaka veivakurabuitaki ni mana, ka kunei e Na Lako Yani 16. Raica na idusidusi matailalai a soli vei ira na Isireli ena ivakarau me ra kumuna, vakayagataka, ka maroroya kina na mana (raica Na Lako Yani 16:16, 19, 22–26). Na cava o kunea ena idusidusi oqo ka yaco vei iko ena nomu vakasaqara e veisiga na veivakani vakayalo?

Raica talega na Joni 6:31–35, 48–58 kei na vidio “Daily Bread: Pattern,” “Daily Bread: Experience” kei na “Daily Bread: Change” (ChurchofJesusChrist.org).

Na Lako Yani 17:1–7

O Jisu Karisito sa noqu iuluvatu vakayalo ka wai ni bula.

Vakasamataka me baleta na iVakabula ni ko wilika na Lako Yani 17:1–7. E tautauvata vakacava kei na vatu vei iko o Jisu Karisito? (raica Same: 62:6–7; Ilamani 5:12). E tautauvata vakacava kei na wai o Koya? (raica na Joni 4:10–14; 1 Korinica 10:1–4; 1 Nifai 11:25).

Vakasama baleta na Vuli iVolanikalou Vakamatavuvale kei na Lotu Vakamatavuvale

Na Lako Yani 14:13–22.Era na marautaka beka na lewe ni nomu matavuvale na nodra tovolea me ra “wasea” na wai ena dua na bilo se tavu ni sisili me vaka nona wasea o Mosese na Wasa Damudamu. Vukei ira mera kila ni Wasa Damudamu e sega ni rawa ni tawasei kevaka e sega na kaukauwa ni Kalou. Eda sa raica beka vakacava na kaukauwa ni Kalou ena noda bula kei na nodra bula na noda qase e liu?

Na Lako Yani 15:1–21.Ni oti nodra kosova na Wasa Damudamu ena cakamana, era a lagata na Isireli e dua na sere ni veivakacaucautaki ka kilai tu me sere i Mosese, ka kunei ena Lako Yani 15:1–21. Dou vakasaqara vakamatavuvale ena veitikina oqo na veimalanivosa e vakadinadinataka na veika a cakava na Kalou vei ira na Isireli kei na veimalanivosa vakaibalebale tale eso. Oti dou qai lagata e dua na serenilotu e vakananuma ki na nomu matavuvale na veika sa cakava vei kemudou na Kalou.

Na Lako Yani 16:1–5; 17:1–7.Ni wiliki Na Lako Yani 16:1–5 kei na 17:1–7 e rawa ni vakavuna e dua na veivosaki me baleta na iVakabula ni Madrai ni Bula, ni Wai ni Bula, ka noda Uluvatu. E vakananuma vakacava vei keda na italanoa eso oqo na veika sa cakava vei keda o Jisu Karisito? Me tiki ni nomuni veivosaki, o na rawa ni wilika na Joni 4:10–14; 6:29–35, 48–51; Ilamani 5:12; Vunau kei na Veiyalayalati 20: 77, 79.

Na Lako Yani 17:8–16.O rawa ni matanataka na kedrau italanoa o Eroni kei Uri ena nodrau taura cake tu na ligai Mosese ka veivosakitaka na ivakarau e rawa ni vakatakarakataka kina oqo na ivakarau eda tokoni ira kina sa kaciva na Kalou. E rawa talega ni o veidutaitaka na ivakaraitaki nei Eroni kei Uri vata kei ira na Isireli ena nodra vosa kudrukudrutaki Mosese (e vakamacalataki tiko ena wase 15–17). Na cava eso na sala eda rawa ni vukei ira ka tokoni ira kina na noda iliuliu? Na veivakalougatataki cava e lako mai vei keda kei ira na noda iliuliu ni da kitaka vakakina?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Na Noda iVakabula,” Sere ni Lotu, naba 5.

Vakavinakataki ni Vuli Yadudua

Vakasaqara ena nomu veivakasama titobu vakayalo. Ena nomu vuli yadua, ka vakakina kei na nomu vuvale, kakua ni yalana na nomudou vuli ena veitiki ni volanikalou era tiko ena idusidusi oqo. E tiko beka eso na nona itukutuku na Turaga vei iko ena veiwase oqo ka sega ni vulici eke. Vakasaqara ena masumasu na veivakauqeti.

Droini ni nona wasea o Mosese na Wasa Damudamu, mai vei Robert T. Barrett.