E dua na ulunivanua mai Ijipita e vakabauti me Ulunivanua o Sainai.

18–24 ni Epereli

Na Lako Yani 18–20

“Veika Kece Sara sa Tukuna na Turaga meda na Cakava”

E vakavulica o Sisita Michelle Craig, “Ni da tisaipeli yalodina i [Jisu Karisito] e rawa mo ciqoma na veivakauqeti kei na ivakatakila vakatamata yadua, salavata kei na Nona ivakaro, ka caka me baleti iko” (“Kaukauwa Vakayalo,” Liaona, Nove. 2019, 21). Vola ka cakacakataka na veivakauqeti o ciqoma ena nomu sa wilika na Lako Yani 18–20.

Vola na Veika o Uqeti Kina

Na nodra ilakolako na Isireli mai Ijipita ki na boto ni Ulunivanua ko Sainai a vakasinaiti ena cakacaka mana—na ivakaraitaki sega ni cakitaki rawa ni nona kaukauwa sega ni vakatauvatani rawa, loloma kei na loloma uasivi. Ia, sa vakarautaka tu vei ira na Turaga na veivakalougatataki ka uabaleta na nodra sereki mai Ijipita ka sotavi na nodra waloloi kei na karamaca vakayago. E vinakata me ra yaco me Nona tamata ni veiyalayalati, na Nona “iyau talei,” ka dua na “vanua tabu” (Na Lako Yani 19:5–6). Nikua, na veivakalougatataki ni veiyalayalati oqo sa tete yani mai na dua ga na matanitu se matatamata. E vinakata na Kalou o ira kece na Luvena me ra yaco me nona tamata ni veiyalayalati, me ra “vakarorogo vakaidina ki na [Domona], ka vakabauta na [Nona] vosa ni veiyalayalati” (Na Lako Yani 19:5), ni sa vakaraitaka na Nona loloma veivueti “vei ira na udolu era sa lomani [Koya], ka muria na [Nona] vunau” (Na Lako Yani 20:6).

Vakasama ni Vuli iVolanikalou ni Tamata Yadua

Na Lako Yani 18:13–26

Au rawa ni veivuke meu “colata na nodra icolacola” ni cakava tiko na cakacaka ni Turaga.

Ni o wilika na ivakasala a ciqoma o Mosese mai vei vugona, ko Jecoro, vakasamataka vakatitobu na sala e rawa ni o vaka kina na “tamata dina” (ena so na gauna dau vakadewataki me vaka na “tamata rawa ni vakabauti”) e vakamacalataki ena tikina e 21. Ko na veivuke vakacava me “colata na nodra icolacola,” na nomuni iliuliu ni Lotu? (tikina e 22). Me kena ivakaraitaki, ena yaga vakacava beka na ivakasala oqo ki na nomu sasaga ni veiqaravi?

De rawa ni o vakasamataka talega se so na gauna o dau vakataki Mosese, dau tovolea me sivia na ka e cakava. Ena yaga beka vakacava vei iko na ivakasala oqo nei Jecoro?

Raica talega na Mosaia 4:27; Henry B. Eyring, “Na Dauveikaroni,” Liaona, Nove. 2012, 121–24.

Na veiqaravi vei ira na tamata e dua na sala eda rawa ni vakaitavi kina ena cakacaka ni Turaga.

Na Lako Yani 19:3–6

O ira na nona tamata ni veiyalayalati na Turaga era iyau vakamareqeti vua.

Vakasamataka na kena ibalebale vei iko mo “iyau talei” ni Turaga (Na Lako Yani 19:5). A solia o Peresitedi Russell M. Nelson e dua na ivakamacala ni malanivosa oqo: “ena Veiyalayalati Makawa, na vosa vaka-Iperiu ka vakadewataki mai kina na peculiar (matalia) na segullah, ka kena ibalebale ‘na iyauqaqa yaga dina’, se ‘na iyau.’ Vei keda me da cavuti ni da tamata matalia mai vei ira na italai ni Turaga e dua na veivakacaucautaki ena ivakarau cecere duadua” (“Gone ni Veiyalayalati,” Ensign, Me 1995, 34). Ena vakaimawe vakacava beka ki na nomu bula na nomu kila ni nomu maroroya na nomu veiyalayalati ena vakavuna mo “iyau matalia.”?

Raica talega na Gerrit W. Gong, “Ciqomi ni Veiyalayalati,” Liaona, Nove. 2019, 80–83.

Lako Yani 19:10–11, 17

Na veika bibi ena gadrevi kina na vakavakarau.

A kaya na Turaga vei Mosese o ira na luvei Isireli e gadrevi me ra vakavakarau ni se bera ni ra “sota vata kei na Kalou” (Lako Yani 19:10–11, 17) ka maroroya e dua na veiyalayalati vata kei Koya (raica na Lako Yani 19:5). Na cava mo na cakava mo vakavakarau kina me baleta na veika bibi o sotava ena nomu bula, me vaka na lako ki na valetabu, se vakaivotavota ena sakaramede? Na cava o rawa ni cakava mo vakavakarau vakavinaka kina ki na veituvaki vakaoqo? Vakasamataka eso tale na itaviqaravi vakayalo e gadrevi kina na vakavakarau, ka vakasamataka vakatitobu se na laki manata vakacava na veika e sotava na nomu vakavakarau.

Na Lako Yani 20

Sa dau loloma na Kalou.

Ni o wilika Na Lako Yani 20, vakasamataka mo raica na ivakaro e Tini o nanuma ni o sa muria tiko kei na kena o nanuma ni o rawa ni muria ena yalodina. Sa rawa mo digia e dua na ivakaro me cakacakataki ka vulica vakamatailalai ena kena wiliki na ivolanikalou veisemati (raica na iDusidusi ki na iVolanikalou ena scriptures. ChurchofJesusChrist.org) se na itukutuku ni koniferedi (raica na iwasewase ni iulutaga ena conference.ChurchofJesusChrist.org). Vakasamataka mo okata ena nomu vuli na veivakalougatataki e dau yaco mai vei ira era talairawarawa ki na ivakaro. E vakaraitaki vakacava ena veivakalougatataki na loloma uasivi kei na loloma ni Kalou vei iko?

Raica talega Carole M. Stephens, “Kevaka Dou sa Lomani Au, Dou Talairawarawa ki na Noqu Vunau,” Liaona Nove. 2015, 118–20

Na Lako Yani 20:1–7

Sa ka bibi me vakaliuci na Turaga ena noqu bula.

Ni wiliki Na Lako Yani 20:1–7 e rawa ni vakauqeti kemuni mo ni vakasamataka na veika me vakaliuci ena nomu bula—e rawa mada ga ni o vola toka e dua na lisi. Na cava soti eso na ka e rawa me “kalou” se “matakau ceuceu” (Na Lako Yani 20:3–4) e rawa ni o temaki mo vakaliuca mai vua na Kalou? E rawa ni vukei iko vakacava ena veika bibi tale eso ni nomu bula na nomu vakaliuca na Turaga? Na cava soti o sa vakauqeti kina mo cakava me vakalevutaka na nomu vakanamata vua na Tamada Vakalomalagi kei Jisu Karisito?

Raica talega na Dallin H. Oaks, “Sega Tale ni Dua na Kalou,” Liaona, Nove. 2013, 72–75.

Vakasama baleta na Vuli iVolanikalou Vakamatavuvale kei na Lotu Vakamatavuvale

Na Lako Yani 18:8–12.Na cava na revurevu ni ivakadinadina nei Mosese ena veisereki ni veivakabulai ni Kalou vei Jecoro? Na veika lelevu cava sa cakava na Turaga me baleta na noda matavuvale? O cei e rawa ni da wasea vua na veika eda sa sotava? Eda na maroroya vakacava na veika oya me baleta na itabatamata ni mataka?

Na Lako Yani 18:13–26.Na veitikina oqo e rawa ni vakauqeti ira nomu matavuvale mera vakasamataka na nodra veiqaravi na nomu iliuliu ni Lotu, me vaka na bisopi, iliuliu ni itabagone, se qasenivuli ni Lalai. Na itavi cava beka e nodra e rawa ni “e bibi cake” (Na Lako Yani 18:18) me colata duadua e dua na tamata? Na cava e rawa ni da cakava meda veivuke kina ena colata na nodra icolacola?

Na Lako Yani 20:3–17Vakasamataka e dua na sala vakaibalebale me veivosakitaki kina vakamatavuvale na iVunau e Tini. Me kena ivakaraitaki, o na vola beka na ivakaro ena Lako Yani 20:3–17 ena tini na tiki ni pepa. Oti me ra qai wasea na leweni matavuvale ki na rua na iwasewase: (1) rokova na Kalou ka (2) lomani ira na tani (raica talega na Maciu 22:36–40). Vakasamataka mo digitaka e dua na ivakaro se rua ena veisiga ena macawa oqo ka veivosakitaka vakamatailalai. Me kena ivakaraitaki, ena vaqaqacotaka vakacava na noda matavuvale na vakamuri ni ivunau oqo? A muria vakacava na iVakabula?

Na Lako Yani 20:12Me kilai vakavinaka cake Na Lako Yani 20:12, ena rawa ni veivuke kevaka era vaqara na nomu matavuvale na ibalebale ni vosa “rokova.” Me ra qai cakava na lewe ni matavuvale e dua na lisi ni veika e rawa ni da cakava me ra rokovi na noda itubutubu. E rawa ni o lagata na sere me baleta na rokovi ira na itubutubu, me vaka na “Meu sa Totolo” (iVolanisere ni Gonelalai, 71), ka vakayagataka eso na vakasama ena nomu lisi me volai kina eso na tikina vou ni sere.

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Baleta na Lalai.

Na sere vakaturi: “Talairawarawa ki na iVunau” Nodra iVolanisere na Lalai, 68.

Vakavinakataki ni Vuli Yadudua

Raica na gauna e ganiti iko. E dau rawarawa sara na vuli ni o rawa ni vulica na ivolanikalou ka sega ni vakaosoosotaki. Raica na gauna e veiganiti vei iko, ka qai cakava ena nomu vinaka taucoko mo na vuli tiko ena gauna vata oqori e veisiga yadua.

Droini kei Mosese ni taura tu na Vunau e tini, mai vei Sam Lawlor