iVakaraitaki ni nona rairai o Jiova vei Mosese kei na 70 na qase ni Isireli, mai vei Jerry Harston

25 ni Epereli–1 ni Me

Na Lako Yani 24; 31–34

“Ena Lako Vata kei iko na Noqu iSerau”

Na ibalebale ni vakavuvuli ena ivolanikalou e sega ni vakamacalataki kece ena ituvatuva oqo. Vakarorogo ki na Yalo me vukei iko mo vakanamata ki na dina o gadreva.

Vola na Veika o Vakauqeti kina

E namaki ka nuitaki ni ra na dina tikoga vua na Kalou na luvei Isireli ni oti na Nona vakatakila vei ira na Nona lawa (raica na Lako Yani 20–23). E dina ni ra dau vosakudrukudru ka yavalati, na gauna a wilika kina o Mosese na lawa ena Uluunivanua o Sainai, era veiyalayalati: “Na ka kece e tukuna o Jiova keimami na cakava, ka talairawarawa” (Lako Yani 24:7). E kacivi Mosese na Kalou ki na ulunivanua, ka tukuna me tara e dua na valecavu me “rawa niu tiko kina ena kedra maliwa” (Lako Yani 25:8; raica wase 25–30).

Na gauna e tiko kina o Mosese ena ulunivanua me vulica na ivakarau me ra namaka ni maliwai ira tiko na Isireli na iserau ni Kalou,era tiko na kai Isireli ena ruku ni ulunivanua ka cakava tiko na matakau koula me ra qarava. Era se qai yalataka ga ni na “sega tale ni dua na nodra kalou,” Ia era “sa biuta vakatotolo” na ivakaro ni Kalou (Lako Yani 20:3; 32:8; raica talega na Lako Yani 24:3). Sa dua na ka veivakurabuitaki, ia eda kila mai na veika e sotavi ni vakabauta kei na yalodina e rawa ni rawai ena so na gauna ena yalototolo, rere, se vakatitiqa. Ni da vakasaqara na iserau ni Turaga ena noda bula, e veivakauqeti ni da kila ni sega ni biuti ira na Isireli makawa na Turaga ka sega ni biuti keda o Koya—ni sa “yalololoma ka daulomasoli, vosota vakadede, ka sinai ena yalovinaka kei na dina” (Lako Yani 34:6).

Vakasama ni Vuli iVolanikalou ni Tamata Yadua

Na Lako Yani 24:1–11

Na noqu veiyalayalati e vakaraitaka niu gadreva meu talairawarawa ki na lawa ni Kalou.

Ni o wilika na Lako Yani 24:3–8 me baleta na veiyalayalati era cakava na Isireli me ra muria na lawa ni Kalou, vakasamataka na veiyalayalati iko cakava kei na Kalou. Na veiyalayalati e okata na Kalou vei Isireli eduidui mai na veika e gadreva na Kalou nikua, ona kila ma bibi kei na tautauvata ni dina tawamudu ka vakatakilai ena kena cakacaka.

Kena ivakaraitaki tikina 4, 5, kei na 8 na icabocabo ni soro, na isoro manumanu, kei na dra. Na cava na kena ibalebale, e semati keda vakacava kina noda veiyalayalati? E vukei iko vakacava na nomu veiyalayalati mo cakava “na ka kecega sa tukuna na Turaga”? (tikina e 7).

Raica talega na Mosese 5:4 – 9; Becky Craven, “Na Qaqarauni kei na Vakawelewele,” Liaona, Me 2019, 9 – 11.

Na Lako Yani 32–34

Na valavala ca na vuki tani mai vua na Kalou, ia e vakarautaka Okoya na sala me da lesu Vua.

Ena nona vakasamataka na ivakarau era dau “vakasisilataki ira” kina o ira na Isireli “(Lako Yani 32:7) ena nodra voroka na nodra veiyalayalati, sa rawa ni da levea na cala vata oqori. Ni o wilika na Lako Yani 32:1 – 8, vakatauvatani iko kei ira na Isireli—ni o tiko ena lekutu, e lako tu o Mosese me 40 na siga, o sega ni kila kevaka ena lesu mai se na gauna e lesu mai kina, era na veilecalecavi kei ira na kai Kenani ena siga mai muri (raica talega na Lako Yani 23:22 – 31). Na cava o nanuma era vinakata kina na Isireli e dua na matakau koula? Na cava e bibi kina na nodra ivalavala ca na Isireli? Na veitikina oqo ena vakauqeti iko mo vakasamataka vakatitobu na sala o rawa ni temaki kina mo biuta na nomu veivakabauti vua e dua se dua tale na ka, ka sega vua na iVakabula. E tiko beka e dua na ka o vakauqeti kina mo cakava me rawa ni taucoko nomu vakaliuca na Kalou ena nomu bula? Na cava e vakauqeti iko baleta na kerekere nei Mosese vua na Turaga ena Lako Yani 33:11 – 17?

Ni sa bibi na nodra ivalavala ca na Isireli, na italanoa oqo e e tukuna tiko na Loloma ni Kalou kei na veivosoti. Na cava o vulica ena Lako Yani 34:1–10 me baleta na iVakabula? Na ivalavala cava iMosese e vakananumi iko baleti ira na Isireli kei na veika e cakava o Jisu Karisito me baleta na tamata kecega? (raica na Lako Yani 32:30 – 32; Mosaia 14:4–8; 15:9; Vunau kei na Veiyalayalati 45:3–5).

A iVakadewa i Josefa Simici, ni Lako Yani 34:1–2 (ena ikuri ni ivakamacala ni iVola Tabu)

Cava na duidui ni rua na vatu ceuti e cakava o Mosese?

Ni sa lako sobu mai na ulunivanua o Mosese, a kauta mai na lawa ka volai toka ena vatu ceuti. Ni rsa raica ni ra voroka na nodra veiyalayalati, e voroka na vatu ceuti o Mosese (raica Lako Yani 31:18; 32:19). A qai vakaroti Mosese na Kalou me cakava e so tale na vatu ceuti ka kauti ira lesu ki na ulunivanua (raica Lako Yani 34:1 – 4). iVakadewa nei Josefa Simici ni Lako Yani 34:1 – 2 ( ikuri ni ivakamacala ni iVola Tabu) e vakamatatataka ni imatai ni wasewase ni vatu ceutie oka kina na veicakacaka vakalotu ni Kalou “ivakarau tabu,” se Matabete i Melikiseteki. Na ikarua ni wasewasee oka kina na “lawa ni ivakaro vakayago.” E lawa lailai ka qarava na matabete lailai” (raica Vunau kei na Veiyalayalati 84:17 – 27), na kena inaki me vakarautaki ira na Isireli baleta na lawa kei na matabete cecere, me rawa ni ra curuma taucoko kina na iserau ni Kalou.

Vakasama baleta na Vuli iVolanikalou Vakamatavuvale kei na Lotu Vakamatavuvale

NaLako Yani 31:12–13, 16–17.Ni wiliki oti na veitikina oqo, de na rawa ni veivosakitaka na nomu matavuvale na taro nei Peresitedi Russell M. Nelson me baleta na noda itovo ena siga ni Vakacecegu: “na ivakatakilakila cava o na solia vua na Turaga mo vakaraitaka kina na nomu lomani koya?” (“Me ka Rekitaki na Siga ni Vakacecegu,” Liaona, Me 2015, 130). E rawa ni cakava na nomu matavuvale eso na ivakatakilakila me biuta wavoki na nomu vale me vakananuma vei iko na sala mo vakaraitaka kina na loloma vua na Turaga ena siga ni Vakacecegu. (Raica talega na vidio ni “Sabbath Day—At Home” [ChurchofJesusChrist.org].)

Ni da rokova na siga ni Vakacecegu, eda vakaraitaka na noda lomana na Turaga.

Na Lako Yani 32:1–8.Me vukea na nomu matavuvale me veivosakitaki na sala era a gole tani kina na Isireli mai vua na Kalou, vakasamataka mo droinitaka e dua na sala ena vuloa (se vakaraica e dua e volekata na nomu itikotiko). Ni da lako ena salatu oqo, meda da veitalanoataka vakavuvale baleta na veitemaki eda sotava me da vuki tani kina “mai na sala sa vakarota [na Turaga].” E rawa vakacava ni da tikoga ena salatu? Kevaka eda sa lakosese, ena rawa vakacava meda lesu kina? E vukei keda vakacava na iVakabula?

Na Lako Yani 32:26.Ni ra sa kunei na Isireli ni ra qarava tiko na kalou matakau, a taroga o Mosese, “ko cei sa tiko ena yasana ni Turaga?” Eda vakaraitaka vakacava ni da sa tiko ena yasana ni Turaga?

Na Lako Yani 33:14–15.E rawa ni ra wasea na lewe ni matavuvale na veika era sotava ena gauna era vakila kina na ka a yalataka na Kalou vei Mosese: “Au na lako dina vata kei iko, ka na vakacegui iko.” E rawa ni o lagata e dua na sere me baleta na noda vakararavi vua na Kalou, me vaka na “Ni Tu ga Vei Au!” (Sere ni Lotu, naba 94.

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Who’s on the Lord’s Side?” Hymns, no. 260.

Vakatorocaketaki ni Noda Veivakavulici

Sureta na Yalotabu. Vakasamataka na kena veivakauqeti na sere kei na ivakatagi, kei na ivakaraitaki ni loloma ena nomu itikotiko ena nomu vakavulica na nomu matavuvale (raica Na Veivakavulici ena iVakarau ni iVakabula, 15).

Qaravi Bulumakau, mai vei W. C. Simmonds