Droini ni tabaki Josua ko Mosese, mai vei Darrell Thomas.

23–29 ni Me

Josua 1–8; 23–24

“Mo Kaukauwa ka Qaqa”

Ni o vulica na iVola i Josua, vakasamataka na veika o vulica me baleti ira na Isireli e rawa ni vakalevutaka na nomu vakabauti Jisu Karisito.

Vola na Veika o Vakauqeti Kina

A taura e vica na itabatamata, ia sa vakarau me vakayacori na nona yalayala na Turaga: sa vakarau sara toka ga me ra sa taura na Isireli na vanua yalataki me nodra ivotavota vakawa. Ia sa tu e matadra na Uciwai na Joritani, na bai kei Jeriko, kei na dua na matatamata ca ka qaqa era sa cata na Turaga (raica na 1 Nifai 17:35). Qai kena ilutua ni sa yali na nodra iliuliu lomani o Mosese. Na ituvaki ni bula oya ena vakamalumalumutaki ira ka vakarerei ira eso na Isireli, ia sa kaya na Turaga, “mo kaukauwa ka qaqa.” Na cava beka me ra vaka kina oqo? Sega ni baleta na nodra kaukauwa ga—se na nei Mosese se o Josua—ia baleta “sa tiko vata kei iko ko Jiova na nomu Kalou ena veiyasana kecega ko sa lako kina” (Josua 1:9). Ni sa tiko na noda uciwai me da takosova na lalaga me da vakadavora, e rawa ni yaco na veika talei ena noda bula, baleta na “Turaga [sai koya] ena vakayacora na veika e veivakurabuitaki vei [keda]” (Josua 3:5).

Me laurai raraba na ivola nei Josua, raica “Joshua, book of” ena Bible Dictionary.

Vakasama ni Vuli iVolanikalou ni Tamata Yadua

Josua 1:1–9.

Ena tiko vata kei au na Kalou kevaka au yalodina Vua.

Vakasamataka mada se na vakaivei beka me kacivi o Josua me sosomitaki Mosese. Raica na ka e kaya na Turaga ena Josua 1:1–9 mo vakayaloqaqataki koya. Vakasamataka mada na dredre o sotava tiko; na tikina cava e vakayaloqaqa taki iko?

Ena rairai taleitaki me kilai ni yaca oqo o Josua (Iosua se Iesua ena vosa vaka-Iperiu) e kena ibalebale “ni bula o Jiova.” Na yaca Jisu e lako mai na Iesua. Ni o wilika na veika baleti Josua, vakasamataka na sala e vakananumi iko kina na nona ilesilesi me liutaki ira na luvei Isireli ki na vanua yalataki na nona itavi na iVakabula.

Raica talega na Ann M. Dibb, “Mo Yaloqaqa,” Liaona, Me 2010, 114–16.

Josua 2

Na vakabauta kei na cakacaka erau gadrevi ruarua ena noda vakabulai.

Era a raici Reapi na Lotu Vakarisito taumada me ivakaraitaki ni kaukauwa ruarua ni vakabauta kei na cakacaka (raica Iperiu 11:31; Jemesa 2:25). Ni o wilika na Josua 2, vakasamataka na itavi ni vakabauta kei na cakacaka nei Reapi ena nona vakabulai koya, nona matavuvale, kei na yamata ni Isireli. Na cava e vakavulica vei iko na ka oqo ena sala e rawa ni vakayarayarataki iko kina kei ira tale eso na nomu vakabauta na Karisito kei na nomu ivalavala?

O na rairai vinakata beka mo kila ni o Reapi e tubudrau ruarua na Tui o Tevita kei Jisu Karisito (raica na Maciu 1:5). Na lesoni cava e rawa ni da vulica mai na ka oqo?

Reapi ena nona katubaleka. Waraka na Yalayala, mai vei Elspeth Young.

Josua 3–4

Au rawa ni vakila na “ka e veivakurabuitaki” ni Kalou kevaka meu vakabauti Jisu Karisito.

Sa gadreva na Turaga me ra “kila na lewe ni veivanua kecega, ni sa kaukauwa na liga i Jiova” (Josua 4:24). Ni o wilika na Josua 3–4, vakasamataka vakatitobu se o kila vakacava ni sa kaukauwa na liga ni Turaga. E cakava vakacava na Turaga na “veivakurabuitaki” ena nomu bulaJosua 3:5). O na rawa vakacava ni sotava— se kila—vakawasoma na veika veivakurabuitaki oqori? (me kena ivakaraitaki, raica na Josua 3:17).

Na cava na vuna o nanuma ni ra gadreva kina na Isireli me ra vakasavasavataki ira ni bera ni ra takosova na Uciwai na Joritani? Cava na veika o vulica e vakadinadinataka ni tawase na uciwai ni oti “na yavana na bete e toni ena bati ni wai”Josua 3:13, 15).

Me baleta na veika bibi tale eso e yaco ena uciwai na Joritani, raica na 2 Tui 2:6 – 15; 5:1 – 14; kei na Marika 1:9 – 11. Ni ko vakasamataka vakatitobu na ivolanikalou oqo, na isema cava o raica ena veika oqo?

Raica talega na Gérald Caussé, “E se Totoka Tiko Beka Ga Vei Kemuni?” Liaona, Me 2015, 98–100; “Cakacakataka na Vakabauti Karisito” (vidio), ChurchofJesusChrist.org.

Josua 6–8

Na talairawarawa e kauta mai na kaukauwa ni Kalou ki na noqu bula.

Na wase oqo e tukuna na ivalu ni vanua o Jeriko kei Ai. Ni o wilika, vakasamataka na nomu rawa ni valuta na veitemaki ena nomu bula (me ivakaraitaki, raica na Josua 7:10–13). Na cava o vulica me baleta na sala e rawa ni vukei iko kina na Kalou kei na veika e gadrevi mo cakava mo rawata kina na Nona kaukauwa? Me kena ivakaraitaki, na cava e sa vakauqeti iko me baleta na ivakasala ni Turaga me rawai kina o Jeriko? (raica na Josua 6:1–5). De na vakauqeti iko na itukutuku ena Josua 7 mo kila kina kevaka “e tiko e dua na ka sa lesi me vakarusai” ena nomu bula o gadreva mo kauta tani (Josua 7:13).

Josua 23–24

“Ia mo ni kabiti Jiova ga na nomuni Kalou.”

Ni ra sa wasea na vanua yalataki ena kedra maliwa na yavusa i Isireli (raica na Josua 13–21), a solia vei ira o Josua na iotioti ni nona ivakavuvuli. Ni o wilika na ivakavuvuli oqo ena Josua 23–24, e rawa ni o maroroya e dua na lisi ni ivakasala ni qaqarauni, ivakasala, kei na veivakalougatataki yalataki o kunea. Ni vakasamataki na veika kece era a sotava na Isireli, na cava na vuna o nanuma kina ni a digitaka o Josua me tukuna vei ira na veika oqo ena mua ni nona bula? Na cava beka o raica e vakauqeti iko mo “kabita na Turaga”Josua 23:8).

Vakasama baleta na Vuli iVolanikalou Vakamatavuvale kei na Lotu Vakamatavuvale

Josua 1:8.Na cava e vakatura na tikina oqo me baleta na ivakarau me da goleva kina na noda vuli ivolanikalou, vakayadua ka vakamatavuvale? E sa “vakasaututaka na noda sala” ka kauta mai vei keda vakacava na “qaqa” na ivolanikalou?

Josua 4:3, 6–9.Ni wiliki oti na veika e vinakata na Turaga vei ira na Isireli me ra cakava ena vatu mai na Uciwai na Joritani, e rawa ni ra tukuna na nomu matavuvale me baleta eso na ka cecere sa cakava vei iko na Turaga. Sa rawa mo solia ki na lewe ni matavuvale yadua e dua na vatu ka sureti ira mera vola se droinitaka e dua na ka sa cakava vei ira na Turaga.

Josua 6:2–5Ena marautaka beka na nomu matavuvale me ra matanataka na ivakaro a solia na Turaga vei ira na Isireli me rawa ni rawai o Jeriko. Na cava e vinakata na Turaga meu vulica mai na italanoa eso oqo?

Josua 24:15Ni wiliki oti na tikina oqo, e rawa ni ra wasea na lewe ni matavuvale na veika era sotava ka ra digitaka kina me ra qarava na Turaga e dina ga ni a dredre. Na cava e bibi kina me da digitaka me da qaravi Koya “ena siga nikua” ka sega ni waraka me qai vakataulewa ni sa yaco e dua na ka? E rawa vakacava ni da tokoni ira na lewe ni noda “vale” ni da segata me da “qarava na Turaga”?

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Baleti Ira na Lalai.

E vakaturi tiko kina na sere: “Digitaka na Dodonu,” Sere ni Lotu, naba 142.

Vakatorocaketaki Noda Veivakavulici

Cavuta vakawasoma na nomu ivakadinadina. Na nomu ivakadinadina yalodina ni dina e rawa ni vakayarayarataka vakaukauwa na nomu matavuvale. E sega ni gadrevi me tuvai vakamaqosa se balavu. Ena kaukauwa sara na nomu ivakadinadina ke cavuti vakadodonu ka veilauti. (Raica na Veivakavulici ena iVakarau ni iVakabula,11

Sa lewa na Turaga me kasuru na bai kei Jeriko. © Dauveivakarautaki ni ikumuni/vakalaiseni mai na goodsalt.com