iVakaraitaki kei Tepora ena liutaki ni mataivalu i Isireli, © Lifeway ni ikumuni/vakalaiseni mai na goodsalt.com

30 ni Me–5 ni Jiune

Na Dauveilewai 2–4; 6–8; 13–16

“Sa Vakatubura na Turaga e Dua na Dauveisereki”

Na ivolanikalou e vakadinadinataki Jisu Karisito. Vakasamataka vakatitobu na kena vukei iko na italanoa o wilika ena Dauveilewai mo toro voleka yani kina Vua.

Vola na Veika o Uqeti Kina

Eda kila kece na cava na caka cala, vakila na kena ca, ka veivutuni ka yalataka me veisautaka na noda sala. Ia ena so na gauna eda guilecava na noda yalayala taumada, ia ni da sotava na veitemaki, eda na raica ni da sa cakava tale na cala vata ga. Na ivakarau rerevaki oqo e vaka na veika era sotava na Isireli ka vakamacalataki tiko ena ivola ni Dauveilewai. Ni ra vakayarayataki mai na nodra vakabauta kei na nodra ivalavala ni sokalou na kai Kenani—ka a dodonu me ra vakasavi ira tani mai na vanua — era sa voroka na Isireli na nodra veiyalayalati kei na Turaga ka ra vuki tani mai na nodra qaravi Koya. Sa yaco kina, mera vakayalia na Nona veitaqomaki ka lutu ki na tiko vakavesu. Ia ena veigauna kece e yaco kina na veika oqo, a solia vei ira na Turaga na madigi me ra veivutuni ka vakatubura e dua na dauveisereki, e dua na iliuliu ni mataivalu ka vakatokai me “dauveilewai.” Era sega ni buladodonu na turaganilewa ena ivola ni Dauveilewai, ia eso vei ira era vakaraitaka na vakabauta cecere ena nodra vakabulai ira na luvei Isireli ka vakalesui ira yani ki na nodra veiwekani kei na veiyalayalati vata kei na Kalou. Na italanoa eso oqo e vakananuma vei keda ni veitalia na veika sa kauti keda tani mai vei Jisu Karisito, o koya na Dauveivueti kei Isireli ka dau tu vakarau me sereki keda ka kidavaki keda lesu mai Vua.

Me laurai raraba na ivola ni Dauveilewai, raica “Judges, book of” ena iDusidusi ki na iVolanikalou.

Vakasama ni Vuli iVolanikalou ni Tamata Yadua

NaDauveilewai 2:1–19; 4:1–16

Sa dau solia na Turaga na veisereki niu sa lako sese.

Na ivola ni Dauveilewai e rawa me ivakaro vei keda: ni oti sara mada ga noda sotava na kaukauwa ni Turaga ena noda bula, sa rawa ni dau yaco na lutu tani. Sa rawa talega ni veivakayaloqaqataki vei ira era na lutu tani, ni sa solia mai na Turaga e dua na sala lesu mai. Me vakataka, ni o wilika na Dauveilewai 2:1–19, vakaraica na ivalavala ka vakavuna me ra lako tani kina na Isireli mai vua na Turaga kei na sala sa vueti ira kina na Turaga. Na cava e vakavulica vei keda na veitikina eso oqo me baleta na Turaga? Na cava o rawa ni cakava mo yalodina tikoga kina Vua?

Ko na kunea na ivakarau ni noda vakauyaloda, na rarawa, kei na veisereki ka ra tokaruataki tu ena Dauveilewai (raica na wase 3, 4, 6, kei na13). Ni o wilika na ivola ni Dauveilewai, vakasamataka vakatitobu na veika era cakava na dauveilewai me ra sereki Isireli kina kei na sala e vukei iko kina na iVakabula ni ko gadreva na veisereki.

E dua na ivakaraitaki e ganita me da kila ka a vukea na nodra vakabulai na Isireli e Tepora. Wilika na veika e baleti koya ena Dauveilewai 4:1–16, ka raica na veivakauqeti e tiko vei ira na tamata era tu wavoliti koya. Na vosa se ivalavala cava i Tepora e vakaraitaka vei iko ni vakabauta na Turaga? Na cava o vakila ni vakaibalebaletaka o Tepora ena nona taro ena tikina e 14: “Sa sgea li ni liutaki iko ko Jiova?”

Raica talega na Alama 7:33; Vunau kei na Veiyalayalati 84:87–88

Na Dauveilewai 2:13

O cei beka o Peali kei Aseteroci?

O Peali na kalou ni cava mai Kenani, kei Aseteroci na kalou yalewa ni vuavuaivinaka kei Kenani. Na nodrau qaravi na kalou e rua oqo e vakaraitaka na bibi ni vuavuaivinaka ni qele kei na tamata vei ira na kai Kenani. Na sala era sokalou kina na tamata ki na kalou e rua oqo kei na veikalou lasu tale eso—oka kina, ena so na gauna, na itovo ni veiyacovi tawasavasava kei na nodra solibulataki na gonelalai—era sa ka ca sara ga vua na Turaga.

Na Dauveilewai 6–8

E rawa ni cakacaka mana na Turaga niu vakabauta na Nona sala.

Me da ciqoma na cakamana ni Turaga ena noda bula, sa dodonu me da vakabauta na Nona sala, ena gauna mada ga e sega ni matau kina na Nona sala. Na italanoa kei Kitioni, e tiko ena Dauveilewai 6–8, sa ivakaraitaki vinaka ni ka oqo. A cakacakataka vakacava na Turaga e dua na cakamana matalia ena gauna era a vakadrukai kina na Mitiani ena mataivalu nei Kitioni? Na cava o nanuma ni vinakata tiko na Turaga me vakavulica vei iko? O sa raica vakacava ni sa cakava tiko na Turaga na Nona cakacaka ena sala matalia?

Raica talega na Russell M. Nelson, “Vua na Kalou e Sega ni Dua na ka e Dredre,” Ensign, Me, 1988, 33–35.

Na Dauveilewai 13–16

Na kaukauwa e yaco mai ena yalodina ki na noqu veiyalayalati kei na Kalou.

Sa vakayalia ruarua o Samisoni na nona kaukauwa vakayago kei na nona kaukauwa vakayalo baleta ni sa voroka na nona veiyalayalati kei na Kalou, oka kina na kena e baleti ira vakatabakidua na Nasaraiti (ena itukutuku me baleti ira na Nasaraiti, raica na Tiko Voli mai na Lekutu 6:1–6; Na Dauveilewai 13:7). Ni o wilika na italanoa kei Samisoni ena Dauveilewai 13–16, vakasamataka vakatitobu na veiyalayalati yadua o sa vakayacora. O sa vakalougatataki vakacava ena kaukauwa baleta ni o sa maroroya tiko na veiyalayalati oqori? Na cava o vulica mai na italanoa kei Samisoni ka vakauqeti iko mo tudei tikoga ena nomu veiyalayalati kei na Kalou?

Sa Vakadavora na Duru o Samisoni, mai vei James Tissot kei ira tale eso

Vakasama baleta na Vuli iVolanikalou Vakamatavuvale kei na Lotu Vakamatavuvale

Na Dauveilewai 2:10.Ni sa mate o Josua, o ira na itabatamata ni Isireli ka tarava era sa “sega ni kila na Turaga.” Veivosaki vata kei na nomu matavuvale me baleta na ivakarau ni nodra kila na Turaga kei na “cakacaka [sa] cakava o koya ena vukudra.” O na vakadeitaka vakacava ni kila-ka oqo ena maroroi tu vei ira na itabatamata mai muri?

NaDauveilewai 3:7–10.Na veitikina oqo e umana vata e dua na ivakarau e dau vakayacori wasoma ena ivola ni Dauveilewai. Ni ra wilika na lewe ni nomu matavuvale na veitikina oqo, e rawa ni ra kila na veika era cakava na Isireli me ra gole tani kina mai vua na Turaga kei na ka e a cakava na Turaga me sereki ira kina. Na vakatulewa cava e vakavuna me ra guilecava kina na tamata na Turaga? Ena vakabulai keda vakacava o Koya? Ena rawa vakacava meda yalodina tikoga Vua?

NaDauveilewai 6:13–16, 25–30.Sa vakaraitaka o Kitioni na yaloqaqa cecere ena nona talairawarawa vua na Turaga, e dina ga ni sega ni taleitaki na nona cakacaka. Na cava e kerea vei keda na Turaga me da cakava era na sega beka ni duavata kina na tani? E vakauqeti keda vakacava na vosa ni Turaga vei Kitioni ena tikina e 13–16 me da cakava na ka dodonu?

Na Dauveilewai 7.E rawa beka ni o vakayagataka e dua na itavi ni veiqaravi se itaviqaravi vovou tale eso me vukea na nomu matavuvale me ra vuli mai na veika a sotava na mataivalu nei Kitioni ka vakamacalataki ena iwase oqo? Ena rawa vakacava ki na vosa ni Turaga ena wase oqo (raica, me ivakaraitaki, na tikina e 2 kei na 15) me vakayagataki ki na noda bula?

Na Dauveilewai 13:5.A vakaukauwataki Samisoni na nona veiyalayalati kei na Turaga, me vaka ga na kena dau vakaukauwataki keda na noda veiyalayalati. Ena rawa ni marautaka na nomu matavuvale eso na cakacaka vakayago ka veivosakitaka na sala e rawa ni vakavuna kina me da kaukauwa na kena icakacaka oqori. Na cava e rawa ni da cakava me da vukei kina me da kaukauwa vakayalo? Me baleta eso na vakasama, e rawa ni ra wilika na lewe ni matavuvale na Mosaia 18:8–10; Vunau kei na veiyalayalati 20:77, 79. E solia vakacava vei keda na kaukauwa vakayalo na noda maroroya tiko na noda veiyalayalati?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Na Noda iVakabula,” Sere ni Lotu, naba 5.

Vakavinakataki ni Vuli Yadudua

Cakacakataka na ka o sa vulica. Ni o vuli tiko, tarogi iko ena sala o rawa ni vakayagataka kina na veika o sa vulica tiko, ka qai vakadeitaka mo cakava. Laiva me liutaki iko na Yalo. (Raica na Veivakavulici ena iVakarau ni iVakabula,35

Mataivalu nei Kitioni, mai vei Daniel A. Lewis