gone o Tevita kei na irabo

Tevita kei Koliaci, mai vei Steve Nethercott

13–19 ni June

1 Samuela 8–10; 13; 15–18

“Sa nei Jiova na iValu”

Na vakasama ni vuli eso e tiko ena idusidusi oqo ena rawa ni vukei iko mo dusia eso na ivakavuvuli bibi ena wase eso oqo. E rawa ni o kunea eso tale na ivakavuvuli ni o vuli tiko.

Vola na Veika o Vakauqeti Kina

Me tekivu mai na gauna era sa laki tikora kina na vanua yalataki na yavusa i Isireli, era sa ivakarere tikoga ni nodra tiko vinaka na kai Filisitia. Ena vuqa na gauna e liu, sa dau vakabulai ira na Isireli mai na ligadra na kedra meca na Turaga. Ia oqo era sa vakarota na italatala qase kei Isireli, “Me dua na noda tui [me] lako yani vei keimami, ka vala ena neimami ivalu” (1 Samuela 8:19–20). Sa vakadonua na Turaga, ka lumuti ko Saula me tui. Ia ni bolei ira na mataivalu ni Isireli na tuwawa rerevaki ko Koliaci, sa qai “rere vakalevu ko Saula—me vakataki ira na vo ni nona mataivalu” (1 Samuela 17:11). Ena siga o ya, a sega ni vakabulai Isireli na Tui o Saula ia e dua na cauravou dau vakatawa sipi na yacana o Tevita, ka a sega ni daramaka tu e dua na isasabai ia sa vakaisulu ena vakabauta sega curubasikati rawa. E vakadinadinataka vei ira na Isireli na ivalu oqo, ka vakakina vua e dua e tu vua na ivalu vakayalo me valuta, ni “sa sega ni veivakabulai na Turaga ena seleiwau kei na moto” ka ni “sa lewa na ivalu ko Jiova” (1 Samuela 17:47).

ivakatakilakila ni vuli ni tamata yadua

Vakasama ni Vuli iVolanikalou ni Tamata Yadua

1 Samuela 8

O Jisu Karisito sa noqu Tui.

Ni o wilika na 1 Samuela 8, raica na nona nanuma na Turaga me baleta na nodra gagadre na Isireli me dua na tui duatani mai Vua. Na cava na kena ibalebale me da digitaka na Turaga me “lewai [iko]”? (1 Samuela 8:7). Sa rawa talega mo vakasamataka na sala eso o temaki kina mo muria na itovo tawadodonu ni vuravura ka sega ni muria na Turaga. O na vakaraitaka vakacava ni o vinakati Jisu Karisito me nomu Tui Tawamudu?

Raica talega na Dauveilewai 8:22–23; Mosaia 29:1–36; Neil L. Andersen, “Vakamalumalumutaki Vuravura,” Liaona, Me 2017, 58–62.

1 Samuela 9:15–17; 10:1–12; 16:1–13

Na Kalou e kacivi ira na tamata ena parofisai me ra veiqaravi ena Nona matanitu.

A digitaki Saula kei Tevita na Kalou me rau tui ena parofisai kei na ivakatakila (raica na 1 Samuela 9:15–17; 10:1–12; 16:1–13). Oqo talega na sala e kacivi ira kina na turaga kei na marama me ra veiqaravi ena Nona Lotu nikua. Na cava o vulica mai na itukutuku oqo me baleta na ibalebale ni “kacivi mai vua na Kalou, ena parofisai”Yavu ni Vakabauta 1:5). Na veivakalougatataki cava e lako mai ena noda kacivi ka vakatikori mai vei ira na nona italai vakadonui na Turaga?

Lumuti Saula tiko ko Samuela

Na ivakaraitaki nei Samuela ni lumuti Saula, © Lifeway Collection/licensed from goodsalt.com

1 Samuela 13:5–14; 15

“Na talairawarawa e vinaka cake mai na solibula.”

E dina ga ni tamata balavu vakayago o Saula, e vakila ni “ka lailai ga e [matana]” ni sa yaco me tui (1 Samuela 15:17). Ia, ni sa vakalougatataki ena qaqa, sa tekivu me vakadinati Koya vakalevu cake ka vakalailai na Turaga. Na ivakadinadina cava o raica rawa ena 1 Samuela 13:5–14; 15? Kevaka o a tiko vata kei Saula ena gauna oya, na cava beka o na tukuna vua me a rawa ni vukei koya me uabaleta kina na nona “talaidredre” kei na “yalo kaukauwa”? (1 Samuela 15:23).

Raica talega na 2 Nifai 9:28–29; Ilamani 12:4–5; Vunau kei na Veiyalayalati 121:39–40; Thomas S. Monson, “Mo Lewa Deivaki na iLakolako ni Yavamu,” Liaona, Nove. 2014, 86–88.

1 Samuela 16:7

“Sa Raica na Yalo ko Jiova.”

Na cava eso na sala era vakalewai ira kina eso tale na tamata oo ira eso “ena irairai e tuba”? Na cava na kena ibalebale me da raica “na yalo,” me vaka dau kitaka na Turaga? (1 Samuela 16:7). Vakasamataka na sala o rawa ni vakayagataka kina na ivakavuvuli oqo ki na nomu raici ira na tani—vakakina o iko. Ena rawa ni manata vakacava na nomu veimaliwai se na kemu isema vei ira na tani na nomu kitaka vakakina?

1 Samuela 17

Ena veivuke ni Turaga, au rawa ni vorata na bolebole cava ga.

Ni o wilika na 1 Samuela 17, vakasamataka na nodra vosa eso na tamata ena iwase oqo (raica na lisi e ra). Na cava e vakatakila na nodra vosa me baleti ira? E vakaraitaka vakacava na vosa nei Tevita na nona yaloqaqa kei na vakabauta na Turaga?

• Koliaci: tikina e 8–10, 43–44

• Iliapi: tikina e 28

• Saula: tikina e 33

• Tevita: tikina 26, 32, 34–37, 39, 45–47

Vakasamataka vakatitobu na ivalu yadua o sotava tiko. Na cava o rawa ni kunea ena 1 Samuela 17 ka na vaqaqacotaka na nomu vakabauta ni na rawa ni vukei iko na Turaga?

Raica talega na Gordon B. Hinckley, “Vakadruka na Koliaci ena Noda Bula,” Ensign, Me 1983, 46, 51–52.

ivakatakilakila ni vuli vakamatavuvale

Vakasama baleta na Vuli iVolanikalou Vakamatavuvale kei na Lotu Vakamatavuvale

1 Samuela 9:15–21; 16:7.Ni wiliki na veitikina oqo vata kei na vosa oqo mai vei Elder Dieter F. Uchtdorf e rawa ni vakauqeta na veivosaki me baleta na vuna a digitaki Saula kei Tevita kina na Turaga: “Kevaka eda raici keda ga vakaikeda ena mata ni bula vakayago, eda na sega beka ni raica ni da sa vinaka sara. Ia na Tamada Vakalomalagi e raici keda ena keda ituvaki dina kei na vanua eda rawa ni yacova” (“E Totoka Dina!” Liaona, Nove. 2015, 23). Sa rawa vei ira na lewe ni matavuvale me ra veivukevuke ena nodra tukuna na veika vinaka era raica ena yalodra na tamata yadua (raica na 1 Samuela 16:7).

1 Samuela 10:6–12.Na gauna cava eda a raica kina na Kalou ni sa vakalougatataka e dua ena kaukauwa vakayalo me vakayacora e dua na ilesilesi se veikacivi me vaka na Nona a vakalougatataki Saula? Na veika cava soti eda sa sotava e rawa ni da wasea ni “sa solia [vei keda] na Kalou e dua tale na Yalo” se “sa lako mai vei [keda] na Yalo ni Kalou” ni da veiqaravi ena Vukuna? (tikina e 9–10).

1 Samuela 17:20–54.Ena rawa ni marautaka na nomu matavuvale na nodra wilika vata na italanoa kei Tevita kei Koliaci (“Tevita kei Koliaci” ena italanoa ni Veiyalayalati Makawa e rawa ni veivuke) se sarava na vidio “na Turaga ena sereki au” (ChurchofJesusChrist.org). Oqo e rawa ni veimuataki ki na dua na veivosaki me baleta na bolebole eda sotava ka vaka me “Koliaci” vei keda. E rawa talega ni o vola eso na bolebole vakaoqo ena dua na takete se dua na droini kei Koliaci ka qai veivukevuke me viritaki kina eso na ka (me vaka na polo pepa).

E rawa talega ni taleitaki me wiliki na isasabai kei na iyaragi e tu vei Koliaci (raica na tikina e 4–7). Na cava e tu vei Tevita? (raica na tikina e 38–40, 45–47). Na cava sa vakarautaka na Turaga me vukei keda meda vakadrukai ira na noda Koliaci?

1 Samuela 18:1–4.Erau a itokani vinaka vakacava o Tevita kei Jonacani? Era sa vakalougatataki keda vakacava na itokani vinaka? Na cava eda rawa ni cakava meda itokani vinaka kina—oka kina vei ira na lewe ni noda matavuvale?

Me ikuri ni itukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Meu Dina Tu,” iVolanisere ni Gonelalai, 85.

Vakatorocaketaki Noda Veivakavulici

Cavuta vakawasoma na nomu ivakadinadina. Na nomu ivakadinadina, rawarawa ka dina baleta na dina vakayalo sa rawa me veivakauqeti kaukauwa vei ira o vakavulica. Ena kaukauwa sara na nomu ivakadinadina ke cavuti vakadodonu ka veilauti. E sega ni ganita me ukutaki se me balavu” (Veivakavulici ena iVakarau ni iVakabula,11

Tevita

Droini kei Repeka, mai vei Dilleen Marsh