King David Enthroned, mai vei Jerry Miles Harston

20–26 ni Jiune

2 Samuela 5–7; 11–12; 1 Tui 3; 8; 11

“Na Nomu Matanitu ena Vakataudeitaki me Tawamudu”

“Sai koya na Kalou sa vakavuna na iVolatabu kecega, a sa yaga oqo me ivakavuvuli, me vunauca na ca, me ia kina na vakadodonutaki, me ia kina na vakatavuvuli ena ka e dodonu” (2 Timoci 3:16).

Vola na Veika o Vakauqeti Kina

A tekivu na nona veiliutaki na Tui o Tevita ena yalayala levu. Na nona vakabauta sega ni guce me vakadrukai Koliaci sa dau idivi tu. Me vaka ni tui, sa rawati Jerusalemi me nona koroturaga ka vakaduavatataki Isireli (raica na 2 Samuela 5). A sega ni se kaukauwa vinaka na matanitu. Ia a qai soli koya o Tevita ki na veitemaki ka vakayalia na nona kaukauwa vakayalo.

Na nona veiliutaki o Solomoni na luvei Tevita a tekivu ena levu ni yalayala. Na nona vuku vakalou kei na yalo ni ivakatakila a kena idivi tu. Me vaka ni tui, a vakarabailevutaka na iyalayala kei Isireli ka tara e dua na valetabu vakasakiti vua na Turaga. A sega mada ni se bau qaqaco vinaka na matanitu. Ia a vakatara vakayalowai o Solomoni me vagolei tani na yalona vei ira na kalou tani.

Na cava e rawa ni da vulica mai na italanoa rerevaki eso oqo? E dua beka na lesoni o ya ni veitalia na veika eda sa sotava oti, na noda kaukauwa vakayalo ena vakatau ki na digidigi eda cakava nikua. Eda rawa talega ni raica ena itukutuku oqo ni sega ni noda kaukauwa se yaloqaqa se vuku ka na vakabulai keda—e nona na Turaga. Na italanoa oqo e vakaraitaka vei keda ni inuinui dina nei Isireli—kei na noda—e sega ni o Tevita, Solomoni, se dua tale na tui vakayago, ia ena dua tale na “luvei Tevita”: ko Jisu Karisito (Maciu 1:1), na Tui Tawamudu o Koya ena “vosota na nodra ivalavala ca na [Nona] tamata” Kevaka meda “vuki tale [Vua]” (1 Tui 8:33–34).

Me baleta na raici raraba ni ivola ni 2 Samuela kei na 1 Tui, raica na “Samuel, books of” kei na “Kings, books of” ena Bible Dictionary.

Vakasama ni Vuli iVolanikalou ni Tamata Yadua

2 Samuela 5:17–25

E rawa ni dusimaki au na Turaga

Ena gauna a rawa kina vei Tevita me vakaduavatataki Isireli (raica na 2 Samuela 5:1–5), e dodonu me taqomaki ira na nona tamata mai vei ira na kai Filisitia. Ni o wilika na 2 Samuela 5:17–25, vakasamataka na kena rawa ni vukei iko na ivakaraitaki nei Tevita ena bolebole o sotava (raica talega na 1 Samuela 23:2, 10–11; 30:8; 2 Samuela 2:1). O sa vakasaqara tiko vakacava na veidusimaki ni Turaga ena nomu bula? O sa vakalougatataki vakacava ena nomu cakacakataka na ivakatakila o ciqoma?

Raica talega na 1 Veigauna 12; Richard G. Scott, “Na Sala mo Rawata Kina na iVakatakila kei na Veivakauqeti ni Nomu Bula,” Liaona, Me 2012, 45–47.

2 Samuela 7

Na cava na “vale” a yalataka na Turaga vei Tevita?

Ni sa tukuna o Tevita me tara e dua na vale, e kena ibalebale e dua na valetabu, vua na Turaga (raica na 2 Samuela 7:1–3), a sauma na Turaga ni na tara na luvei Tevita tagane (raica na tikina e 12–15; raica talega na 1 Veigauna 17:1–15). A kaya talega na Turaga ni na tara o Koya e dua na “vale” vei Tevita, kena ibalebale e dua na kawa, ka ni na tawamudu na nona itikotiko vakaturaga (raica na 2 Samuela 7:11, 16, 25–29; Same 89:3–4, 35–37). A vakayacori na yalayala oqo vei Jisu Karisito, na noda Tui Tawamudu, ka a kawa i Tevita (raica na Maciu 1:1; Luke 1:32–33; Joni 18:33–37).

2 Samuela 11; 12:1–14

Sa dodonu meu dau qarauna na ivalavala ca.

Na nona yalodina o Tevita vua na Turaga ena gauna e liu e sega ni vakavuna me sega ni dau temaki ena nona “taubale ena dela ni vale ni tui” ka “raica e dua na yalewa ni sili tiko” (2 Samuela 11:2). Vakasamataka na lesoni cava o rawa ni vulica mai na veika a sotava o koya. Na taro vakaoqo e rawa ni vukei iko mo vulica na itukutuku oqo:

• Na digidigi cava a cakava o Tevita ka a kauti koya sobu ena dua na sala levu cake tikoga kina na ivalavala ca? Na digidigi dodonu cava ena rawa ni cakava o koya?

• Ena rawa vakacava vua na vuni ca me liutaki iko sobu ki na salatu ni ivalavala ca ena nomu bula? Na digidigi cava o rawa ni cakava ena gauna oqo mo lesu tale ki na veitaqomaki?

Raica talega na 2 Nifai 28:20–24; “To Look Upon” (vidio), ChurchofJesusChrist.org.

1 Tui 3:1–15

Na isolisoli ni yalo e vukea na noqu kila na dina kei na cala.

Kevaka e kaya vei iko na Turaga, “kerea na ka meu na solia vei iko” (1 tui 3:5), na cava o na kerea? Na cava e vakauqeti iko me baleta na kerekere nei Solomoni? Vakasamataka vakatitobu na cava na vuna e dua kina na isolisoli yaga sara “na yalo sa vuku” me “kilai na ka vinaka kei na ka ca” (tikina e 9). Na cava o na cakava mo vakasaqara kina na isolisoli oqo?

Raica talega na 2 Veigauna 1; Moronai 7:12–19; David A. Bednar, “Quick to Observe,” Ensign, Tise. 2006, 30–36.

1 Tui 8:12–61

Na valetabu e vale ni Turaga

E drau na yabaki, ni kena dau matataki na iserau ni Kalou ena vale vakacevaceva dau veikauyakia a tara cake o Mosese. E dina ga ni a vinakata ko Tevita me tara cake vua na Kalou e dua na vanua tudei, ia a qai digitaki Solomoni na luvei Tevita na Kalou me tara na valetabu ni Turaga. Ni o wilika na masu nei Solomoni kei na vosa a tukuna vei ira na nona tamata ni sa vakacavari na valetabu, raica na nona nanuma baleta na Turaga kei na Nona vale. E rawa talega ni o cakava e dua na lisi ni veivakalougatataki a kerea o Solomoni ena nona masu. Na cava o raica me baleta na veivakalougatataki oqo? O sa vakalougatataki vakacava mai na vale ni Turaga ena noda gauna oqo?

Raica talega na 2 Veigauna 6.

Valetabu e Barranquilla Colombia

Vakasama baleta na Vuli iVolanikalou Vakamatavuvale kei na Lotu Vakamatavuvale

2 Samuela 5:19, 23.Na gauna cava eda sa “kerea kina vua na Turaga” na veituberi kei na veidusimaki? E sa vukei keda vakacava o Koya?

2 Samuela 7:16Ena gauna e tukuna kina na Turaga vei Tevita, “na nomu itikotiko vakaturaga ena vakataudeitaki me tawamudu,” a vosa tiko o Koya me baleta e dua na tui mai na matavuvale nei Tevita ka na veiliutaki me tawamudu: ko Jisu Karisito. De na marautaka beka na nomu matavuvale na nomudou bulia eso na isala vakatui buli e vale ni veivosakitaki tiko na vuna o vakavinavinakataka kina ni nomu Tui Tawamudu o Jisu Karisito.

2 Samuela 11.Na wiliki ni ivalavala ca nei Tevita e rawa ni dua na madigi vinaka me veivosakitaki kina na rerevaki ni iyaloyalo vakasisila, na vakanananu dukadukali, kei na ivalavala dukadukali. Na ivurevure eso oqo ena rawa ni yaga ena nomu veivosaki: na ilavelave ni Okotova 2019 ni Liaona, na iTukutuku ni Lotu me baleta na ivurevure ni Veika Vakasisila (ChurchofJesusChrist.org/addressing-Pornography), kei na vidio “What Should I Do When I See Pornography?” kei na “Watch Your Step”(ChurchofJesusChrist.org). Sa rawa mera tuvanaka na lewe ni matavuvale na veika era na cakava ni ra sotava na iyaloyalo vakasisila.

1 Tui 11:9–11.Na cava eso na “kalou tani” (tikina e 10) e rawa ni vagolea tani na yaloda mai vua na Turaga? E rawa vakacava ni da maroroya na yaloda me itakele ni Tamada Vakalomalagi kei Jisu Karisito?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Raica na “More Holiness Give Me,” Serenilotu, naba 131.

Vakatorocaketaki Noda Veivakavulici

Vakanamata ki na ivakavuvuli ena vakalougatataki ira nomu vuvale. Ni o vulica ena masumasu na vosa ni Kalou, tarogi iko, “Na cava au kunea eke ena rawa ni vakaibalebale vakabibi ki na noqu vuvale?” (raica na Veivakavulici ena iVakarau ni iVakabula, 17).

Droini ni Valetabu i Solomoni, mai vei Sam Lawlor