Sa Lewa na Tui o Tevita, mai vei Jerry Miles Harston

20–26 ni June

2 Samuela 5–7; 11–12; 1 Tui 3; 8; 11

“Na Nomu Matanitu Ena Vakataudeitaki ka Sega ni Oti”

Ni o wilika na ivolanikalou, ena rawa ni solia vei iko na Yalo Tabu na vakasama eso ka vakauqeti iko mo kila na cava ena vakaibalebale vakalevu sara vei ira na gone o vakavulica.

Vola na Veika o Vakauqeti Kina

Sureta na Veiwasei

Kerea e vica na gone me ra tukuna na veika era sotava ena nodra wilika na ivolanikalou (vakayadudua, kei na nodra matavuvale, se ena Lotu). Na gauna cava kei na vanua cava era a wilika kina na ivolanikalou? Na cava era vakila ni ra wilika na ivolanikalou? Na veivakalougatataki cava era sa ciqoma ni ra talairawarawa tiko ki na ivakaro oqo?

Vakavulica na iVunau: Gone Sobu

2 Samuela 5:19, 23

Kevaka au gadreva na veituberi, au rawa ni kerea na Tamada Vakalomalagi.

Na veitikina oqo e vakamacalataka na nona masulaka o Tevita na veituberi kei na veidusimaki vaka tui Isireli. O na vakauqeti ira vakacava na gone me ra gole vua na Turaga ena masu ni ra gadreva na veivuke?

iTaviqaravi e Rawa ni Caka

• Vakamacalataka vei ira na gone ni gauna a gadreva kina o Tevita na veivuke, a “taroga,” se masulaka, me saumi na vakatataro. Ni o wilika na 2 Samuela 5:19, 23, sureti ira na gone me ra vakarogoca na vosa a sa “tarogi” ka me ra roqota na ligadra ni ra sa rogoca. Vakadinadinataka ni rawa ni da masu e veigauna vua na Tamada Vakalomalagi ena gauna eda gadreva kina na veivuke.

• Me vukei ira na gone me ra vakasamataka na veika e rawa ni ra tukuna ni ra masu, e rawa ni o tarogi ira ena sala me ra vakaotia kina na iyatuvosa vakaoqo: “Keimami vakavinavinaka vei kemuni …” ka “Keimami sa kerei kemuni mo ni …” Me ra droinitaka na gone na iyaloyalo eso ni veika e rawa ni ra vakavinavinakataka se kerea ni ra masu.

  

  E rawa ni da masu me kerea na veivuke kei na veituberi ni Tamada Vakalomalagi.

• Tukuna vei ira na gone na gauna o a masulaka kina na veivuke ni Tamada Vakalomalagi. A sauma vakacava o Koya na nomu masu? Na duidui cava soti a yaco ni a vukei iko o Koya? Sureti ira na gone mera wasea na veika era dui sotava.

2 Samuela 7:16

Ko Jisu Karisito e noda Tui.

Ni a tui Isireli tiko o Tevita, na Turaga a tukuna vua “ena vakataudeitaki na nona itikotiko vakaturaga ka tawa mudu” (2 Samuela 7:16). Na yalayala oqo a cavu tiko vei Jisu Karisito, na noda Tui Tawamudu, ka a sucu mai na kawa i Tevita.

iTaviqaravi e Rawa ni Caka

• Sureta e dua na gone me vakatotomuria e dua na tui se ranadi. Kevaka e rawa, solia vua na gone eso na iyaya vakatui rawarawa sara me taura tu. Na cava na tui se ranadi? Na cava era dau cakava? Tukuna vei ira na gone ni o Tevita e a dua na tui, ka dua o koya na tubui Jisu Karisito, o koya ka da vakatoka me “Tui ni tui” (Vakatakila 19:16). Vukei ira na gone me ra vakasamataka na sala eso eda rawa ni vakaraitaka kina ni da vakabauta ni ko Jisu Karisito sa ikoya na noda Tui Tawamudu.

• Ni ra vakacavara na gone na tabana ni itaviqaravi ena macawa oqo, lagata se vakatagitaka na katokatoni ni veisere e cavuti Karisito me noda Tui, me vaka na “He Died That We Might Live Again,” “Kacivi mo Veiqaravi,” “Marau na Tui Sau.” se “Au Kilai Jisu” (Children’s Songbook, 65,iVolanisere ni Gonelalai, 94; Sere ni Lotu, naba 35, 74). Kerei ira na gone me ra vakarogoca na vosa “Tui” ka taura cake e dua na iyaloyalo kei Jisu ni ra rogoca. E vakacava nai tovo i yaloda ni da seretaki Jisu?

1 Tui 8:57–58

Au rawa ni lako ena nona sala kecega na Kalou.

Vei ira na Isireli, na tarai kei na vakatabui ni valetabu a dua na madigi me ra vagolea kina na lomadra vua na Turaga ka yalataka tale me ra “lako kina ena nona sala kecega” (1 Tui 8:58). O na vukei ira vakacava na gone o vakavulica me ra “lako kina ena nona sala kecega”?

iTaviqaravi e Rawa ni Caka

• Vakaraitaka vei ira na gone e dua na iyaloyalo ni valetabu ni gauna oqo kei na valetabu a tara o Solomoni (raica na ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale). Vakamacalataka ni gauna a tara kina o Solomoni e dua na valetabu me baleti ira na Isireli, a vakauqeti ira o koya me ra “lako kina ena nona sala kecega [na Turaga]” (1 Tui 8:58). Tukuna vei ira na gone na sala e vukei iko kina na valetabu mo lako kina ena nona sala kecega na Turaga. Sureti ira na gone me ra wasea na nodra nanuma baleta na valetabu. Lagata vata kei ira na gone e dua na sere baleta na valetabu, me vaka na “Raica na Valetabu” (iVolanisere ni Gonelalai, 99).

• Solia vei ira eso na gone na uto pepa kei na so tale na mawe ni yava pepa. Wilika na 1 Tui 8:58, ka kerei ira na gone me ra taura cake na uto ni o cavuta na vosa “lomada” kei na mawe ni yava ni o cavuta na malanivosa “lako kina ena nona sala kecega.” Vukei ira na gone me ra kila ni da lako ena nona sala kecega na Turaga ni da muri Jisu ka tovolea me da vakataki koya. Tarogi ira na gone na cava era sa cakava mera lako kina ena sala kecega ni iVakabula. Lagata vata e dua na sere me baleta na muria na iVakabula, me vaka na “Meu Na Muri Jisu Tu” (iVolanisere ni Gonelalai, 40).

Vakavulica na iVunau: Gone Qase Cake

2 Samuela 7:16–17

Ko Jisu Karisito e noda Tui.

O ira na tui eda wilika ena Veiyalayalati Makawa a tiko na nodra malumalumu kei na caka cala—ka oka kina o ira sara mada ga na tui vinaka. Ia na Tui ka a parofisaitaki me lako mai ena kawa i Tevita, e taucoko sara ka na veiliutaki me tawamudu.

iTaviqaravi e Rawa ni Caka

• Sureti ira na gone me ra wilika na ka a tukuna na parofita o Necani vua na Tui o Tevita ena 2 Samuela 7:16–17, ka tarogi ira se cava era nanuma ni ibalebale ni parofisai oqo. E rawa vakacava me na sega ni oti rawa na matanitu nei Tevita? Vukei ira na gone me ra vaqara ka wilika na tiki ni ivolanikalou ka vakavuvulitaka ni o Jisu Karisito, e kawa i Tevita, e tui, me vaka na Luke 1:32–33; Joni 18:33–37; kei nai Vakatakila 19:16. E tautauvata vakacava kei na dua na tui o Jisu Karisito? Na cava eso na sala eda rawa ni vakaraitaka kina ni o Jisu Karisito e noda Tui Tawamudu?

• Lagata vata kei ira na gone eso na serenilotu e dusia na Karisito me noda tui, me vaka na “Bau Mai Na Tui Ni Tui,” “Marau Na Tui Sau,” se “Nona Sucu ko Jisu” (Sere ni Lotu, naba. 30, 35, 113). Na cava e vakavulica vei keda na serenilotu oqo me baleta na cava na kena ibalebale me noda tui o Jisu Karisito?

2 Samuela 11

Au rawa ni vorata na veitemaki.

O ira na gone o vakavulica era cakava eso na vakatulewa lalai ia e bibi ena veisiga. E rawa vakacava mo vukei ira me ra kila na bibi ni kena digitaki na veika dodonu ena gauna mada ga e dredre kina?

iTaviqaravi e Rawa ni Caka

• Railesuva na 2 Samuela 11 vata kei ira na gone, ka dusia na digidigi a vakayacora o Tevita. Tarogi ira na gone se na digidigi vinaka cava a cakava o Tevita. Na cava eso na ka eda rawa ni cakava ni da sa temaki ka rawa ni vukei keda meda digitaka na dodonu?

• Me wasei e dua na ivakaraitaki ni dua e a vorata na veitemaki me vakataki Josefa ka sega ni vakataki Tevita, tarogi ira na gone kevaka era nanuma na italanoa kei Josefa kei na wati Potifa (raica nai Vakatekivu 39:7–12). Sa rawa mo raicalesu na italanoa oqo vata kei ira na gone ka vukei ira me ra vakatauvatana vata kei na italanoa kei Tevita. Na cava eda rawa ni vulica mai na italanoa kei Tevita kei Josefa ena sala meda vorata kina na veitemaki?

Vakauqeta na Vuli e Vale

Vukei ira na gone me ra vakasamataka e dua na ka e rawa ni ra cakava me ra vakatovotovotaka kina na ka era vulica ni kua. Qai vakayaloqaqataki ira mera cakacakataka na nodra ituvatuva.

Vakatorocaketaki Noda Veivakavulici

Vakamuria na veisureti me cakacaka. Ni o sureti ira na gone me ra cakava na ka era sa vulica tiko, vakamuria na nomu veisureti ena kalasi ka tarava. Oqo e vakaraitaka vei ira na gone ni o kauwaitaka na kena sa vakalougatataka tiko vakacava na nodra bula na kosipeli. Ni ra wasea na veika era sotava, era na vaqaqacotaki ka ra na veivukei vaka i ira me ra bulataka na kosipeli.