Ruci kei Neomai

Na Vanua Ga Ko Sa Lako Kina, mai vei Sandy Freckleton Gagon

6–12 ni June

Ruci; 1 Samuela 1–3

“Sa Reki na Yaloqu e na vuku i Jiova”

Ni o wilika na Ruci kei na 1 Samuela 1–3, kerea vua na Tamada Vakalomalagi na sala mo na vukei ira kina na gone me ra vuli mai na dina ena iwase eso oqo. Vola na veivakasama o ciqoma.

Vola na Veika o Vakauqeti Kina

ivakatakilakila ni veiwasei

Sureta na Veiwasei

Kerei ira na gone me ra wasea na veika era kila baleti Ruci, Neomai, Ana, se o Samuela. Ena veivuke talega me vakaraitaki vei ira na iyaloyalo, me vaka e tiko ena ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale.

ivakatakilakila ni veivakavulici

Vakavulica na iVunau: Gone Sobu

Ruci

Au rawa ni vakaraitaka na loloma kei na yalovinaka vei ira era tu wavoliti au.

Ni mate na wati Ruci, a rawa vua me tiko ga ena nona vanua, ia a digitaka me lako vata kei koya na tinai watina yada, o Neomai, me karoni koya. Vakasamataka na sala e rawa ni veivakauqeti kina vei ira na gone o vakavulica na ivakaraitaki Vakarisito nei Ruci, me ra dau yalovinaka vei ira era tiko voliti ira.

iTaviqaravi e Rawa ni Caka

• Sureti ira na gone me ra matataki Neomai, Ruci, Poasa, se so tale ni o talanoataka na kedra italanoa mai nai vola kei Ruci (raica talega na “Ruci kei Neomai” ena iTalanoa mai na Veiyalayalati Makawa). Sureti ira na gone me ra laveta na ligadra ena veigauna kece era rogoca kina e dua na cakacaka vaka yalovinaka ena italanoa. Na cava eda vakila ni dua e yalovinaka vei keda? Na cava eda vakila ni da yalovinaka vei ira na tani?

• Lagata e dua na sere baleta na yalovinaka, me vaka na “Na Caka Vinaka” (Sere ni Lotu, 131). Vukea na gone me ra vakasamataka na sala eso era rawa ni ra yalovinaka kina vei ira na nodra matavuvale kei ira na nodra itokani. Kevaka era gadreva na veivuke, vakaraitaka vei ira na kedra iyaloyalo na tamata era vakaraitaka tiko na nodra yalovinaka. Ena veivakasama kece e tukuni mai, sureti ira na gone me ra qai droinitaka e dua na uto ena papa.

1 Samuela 1:1–18

Sa dau rogoca ka sauma na Tamada Vakalomalagi na noqu masu.

Ni sa rarawa o Ana baleta ni sega ni rawa me vakaluveni, a gole vua na Turaga ena vakabauta ka sauma mai na Turaga na nona masu. Vukei ira na gone me ra raica ni rawa me ra dau masu tikoga vei Tamada Vakalomalagi, vakauasivi kevaka era rarawa tiko.

iTaviqaravi e Rawa ni Caka

• Ena nomu vosa ga, tukuna vei ira na gone na vuna e rarawa kina o Ana (raica na 1 Samuela 1:2–8; raica talega na “Hannah” ena iTalanoa ena Veiyalayalati Makawa). Na cava e rawa ni da cakava ni da rarawa? Wilika vei ira na gone na 1 Samuela 1:10, ka sureti ira na gone me ra vakarogoca na veika a cakava o Ana. Kerei ira na gone me ra tukuna na veika era dau vakila ni ra masu. Wilika na tikina e 18 me vakamacalataka ni oti na nona masu o Ana, “a sa sega tale ni vakaveveku mata.”

  Ana kei Samuela

  Ena Vuku ni Gone oqo Au a Masu Kina, mai vei Elspeth Young

• Vakayagataka na tabana ni itaviqaravi ni macawa oqo mo vakavulica kina vei ira na gone ni rawa ni ra masuta na Tamada Vakalomalagi ka na vukei ira o Koya. Ni ra rokarokataki tiko na gone, lagata se vakatagitaka e dua na sere e vakavulica na masu, me vaka na “A Child’s Prayer” (Children’s Songbook, 12–13).

1 Samuela 2:1–10

Na Turaga sa vakayacora oti e vuqa na veika talei vei au.

E vakaraitaka o Ana na nona vakavinavinaka vua na Turaga ena dua na serekali totoka ni veivakacaucautaki. Na nona ivakaraitaki e rawa ni vukei ira na gone me ra vakasamataka na veika e vuqa e rawa ni ra vakavinavinakataka kina na Tamada Vakalomalagi.

iTaviqaravi e Rawa ni Caka

• Wilika vei ira na gone eso na ka a kaya o Ana ni oti na nona vakalougatataki koya na Turaga ena nona solia vua e dua na gonetagane (raica na 1 Samuela 2:1–2). Wasea vei ira na gone e dua na veivakalougatataki o sa ciqoma mai vua na Turaga vata kei na cava o vakila e yalomu. Mo qai sureti ira na gone me ra veitalanoataka na veivakalougatataki sa solia vei ira na Turaga. E rawa vakacava ni da vakaraitaka na noda vakavinavinaka ki Vua?

• Lagata vata e dua na sere ka vakamacalataki kina eso na veivakalougatataki e solia vei keda na Turaga, me vaka na “Rogoca na Sere ni Manumanu” (iVolanisere ni Gonelalai, 16). Sureti ira na gone me ra droinitaka na iyaloyalo ni veivakalougatataki era sa ciqoma mai vua na Turaga.

ivakatakilakila ni veivakavulici

Vakavulica na iVunau: Gone Qase Cake

Ruci

Au rawa ni vakabauta na Turaga.

A solibula o Ruci me yalodina vua na Turaga ka yalodina tikoga vei Neomai. O na rawa ni vukei ira vakacava na gone me ra vuli mai na ivakaraitaki ni vakabauta nei Ruci?

iTaviqaravi e Rawa ni Caka

• Vakaraitaka e dua na iyaloyalo kei Ruci kei Neomai (raica na ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale). Qai vola e tolu na ulutaga ena vava ni volavola: Veivakatovolei, iValavala, Veivakalougatataki. Sureti ira na gone me ra wilika na Ruci 1:3–5, 8, 16; 2:1–3, 8–12; 4:13–17, ka vola ena ruku ni ulutaga na veika era kunea ena veitikina oqo. E vakaraitaka vakacava o Ruci na nona vakabauta na Turaga? Wasea e dua na ivakaraitaki ni sala o sa vakalougatataki kina baleta ni o vakabauti Jisu Karisito, ka me ra qai wasea na gone na veika era dui sotava.

• Me lagati vata e dua na sere me baleta na vakabauta, me vaka na “Noqu Rarama Na Turaga” (Sere ni Lotu, naba 45) se “Vakabauta” (iVolanisere ni Gonelalai, 50). Na cava e vakavulica vei keda na sere oqo baleta na vakararavi vua na Turaga? E rawa vakacava niu vakabauti Jisu Karisito ena gauna sara mada ga ni dredre?

1 Samuela 1

Sa dau rogoca ka sauma na Tamada Vakalomalagi na noqu masu.

Ko Ana ni “sa rarawa na yalona,” a sa vuki ko koya vua na Tamada Vakalomalagi ena masu (1 Samuela 1:10). E rawa vakacava ni o vakauqeti ira na gone o vakavulica me ra vakayacora vakakina?

iTaviqaravi e Rawa ni Caka

• Me vukei ira na gone me ra vulica na veika baleti Ana mai na 1 Samuela 1, solia vei ira yadua na gone e vica na tikina me ra wilika mai na iwase (se vakaraitaka na vidio “Hannah’s Faith,” ChurchofJesusChrist.org). Ni oti o ya, viritaka e dua na polo se dua na iyaya lalai vua e dua na gone ka sureti koya me talanoataka e dua na tiki ni italanoa ni bera ni solia yani na polo vua na gone ka tarava me talanoataka e dua tale na tiki ni italanoa. Ni sa talanoataki oti na italanoa, kerei ira na gone me ra wasea e dua na ka era sa vulica mai na ivakaraitaki nei Ana.

• Wilika vata na 1 Samuela 1:15, ka veivosakitaka na cava e kena ibalebale me da sovaraka na yaloda ena mata ni Turaga. Cakava vata kei ira na gone e dua na ituvatuva ni veika e rawa ni da veivosakitaka vata kei na Kalou ni da masu. Lagata vata e dua na sere baleta na masu, me vaka na “A Child’s Prayer” (Children’s Songbook, 12–13). Vakadinadinataka na loloma ni Kalou vei ira na Luvena kei na Nona gagadre me rogoca ka sauma na nodra masu.

• Kerei ira na gone mera vola (vakayadudua se vakailawalawa) na ivakaraitaki eso ni tamata ena ivolanikalou era a masuta na Tamada Vakalomalagi. (Kevaka era gadreva na veivuke, sa rawa mo dusia vei ira na Luke 22:41–43; Inosi 1:2–6; Josefa Simici—Ai Tukutuku 1:14–17.) Kerei ira mera wasea na veika era sa vulica mai na vei italanoa oqo.

1 Samuela 3:1–10

Au rawa ni rogoca ka talairawarawa ki na domo ni Turaga.

Ni se cauravou lailai o Samuela, a rogoca o koya na domo ni Turaga ia a sega ni kila taumada ni domona. O na vukei ira vakacava na gone o vakavulica mera rogoca ka cakacakataka na veivakauqeti era ciqoma?

iTaviqaravi e Rawa ni Caka

• Sureta e dua na gone me matataki Samuela kei na dua tale me matataki Ilai ni o wilika na 1 Samuela 3:1–10 (se vakaraitaka na vidio “Samuel and Eli,” ChurchofJesusChrist.org). Na cava eda rawa ni vulica mai vei Samuela me baleta na ivakarau ni vakarorogo ki na domo ni Turaga? Eda vakaraitaka vakacava ni sa lomada meda vakarorogo ena gauna e vosa kina vei keda na Turaga?

• Sureti ira na gone me ra vakasamataka na sala era na vakamacalataka kina vua e dua tale na sala e dau vosa kina vei ira na Turaga. Sureti ira me ra vaqara na isau ni taro ena dua se sivia na ivolanikalou oqo: Vunau kei na Veiyalayalati 6:22–23; 8:2–3; 9:7–9.

ivakatakilakila ni vuli

Vakauqeta na Vuli e Vale

Vakauqeti ira na gone me ra vakasamataka e dua se dua na ka e rawa ni ra masulaka ena macawa oqo. Solia vei ira na madigi ena veisiga ni mataka mera wasea na sala a sauma kina na Tamada Vakalomalagi na nodra masu.

Vakatorocaketaki ni Noda Veivakavulici

Gone era vakaleqai vakayago. Yalovinaka sikova na disability.ChurchofJesusChrist.org mo raica na sala e rawa ni o sotava kina vakavinaka na nodra gagadre na gone era vakaleqai tu vakayago.

tabana ni itaviqaravi: Sa dau rogoca ka sauma na noqu masu na Tamada Vakalomalagi