Ko Tepora vata kei na mataivalu

iYaloyalo kei Tepora ni liutaka na mataivalu i Isireli, © Lifeway Collection/laiseni mai na goodsalt.com

30 ni Me–5 ni June

Na Dauveilewai 2–4; 6–8; 13–16

“Sa Vakatubura e dua nai Vakabula ko Jiova”

E vuqa na italanoa veivakauqeti e kune e Na Dauveilewai 2–4; 6–8; 13–16. Vakasamataka vakatitobu na sala e rawa ni o vakayagataka kina na vei italanoa oqo me vukei ira na gone me ra toro voleka yani vua na iVakabula ka gadreva me ra muri Koya.

Vola na Veika o Vakauqeti Kina

ivakatakilakila ni veiwasei

Sureta na Veiwasei

Sureti ira yadua na gone me ra wasea e dua na italanoa mai na ivolanikalou era se qai vulica oti ga. Kerei ira mera wasea na veika era sa vulica mai na vei italanoa oqori.

ivakatakilakila ni veivakavulici

Vakavulica na iVunau: Gone Sobu

Na Dauveilewai 3:9

Sa noqu iVakabula o Jisu Karisito.

Ni ra masu na Isireli vua na Turaga, a vakatubura cake o Koya e dua na i vakabula vei ira. Vukei ira na gone me ra raica ni o Jisu Karisito sai koya na iVakabula sa vakatubura na Kalou vei keda.

iTaviqaravi e Rawa ni Caka

• Vakamacalataka vei ira na gone ni gauna era a muduka kina na nodra muria na ivakaro ni Kalou o ira na Isireli, era sa vakayalia na Nona veitaqomaki ka ra vakadrukai mai vei ira na nodra meca. Wilika mai Na Dauveilewai 3:9 na malanivosa “ia ni ra sa tagi vei Jiova ko ira na Isireli.” Na cava era a cakava na Isireli ena gauna era gadreva kina na veivuke? Wasea e dua na gauna o masulaka kina na veivuke ka sauma mai na nomu masu na Kalou.

• Wilika mai Na Dauveilewai 3:9 na malanivosa “sa vakatubura vei ira ko Jiova e dua nai vakabula,” ka sureti ira na gone me ra cavuta vakavica vata kei iko. Vakamacalataka ni dauveisereki e dua e vakabulai keda. Vakaraitaka vei ira na gone e vica na iyaloyalo ni tamata, oka kina e dua na iyaloyalo kei Jisu Karisito, ka biuta sobu vakatoboicu na iyaloyalo ena vuloa. Me ra veivukevuke na gone ena kena vukici na iyaloyalo, kunea na iyaloyalo kei Jisu, ka dulaki cake. Vakadinadinataka ni o Jisu Karisito na iVakabula ka sa vakatubura cake na Kalou me vakabulai keda mai na ivalavala ca kei na mate.

O Kitioni kei na mataivalu

Sa nuitaka na Turaga ko Kitioni. © Lifeway Collection/laiseni mai na goodsalt.com

Na Dauveilewai 6:11–16; 7:1–8

E rawa ni vakayagataka na Turaga na veika lalai me cakava kina na cakacaka cecere.

Sa raici koya ko Kitioni ni sa dravudravua ka sega ni kilai, ia na Kalou sa raica ni sa “tamatai valu qaqa” (Na Dauveilewai 6:12). Vukei ira na gone me ra raica kevaka era vakila ni ra tawayaga, sa rawa vua na Kalou me cakacaka ena vukudra me ra vakayacora na veika yaga (raica na Alama 37:6–7).

iTaviqaravi e Rawa ni Caka

• Tukuna vei ira na gone ni a gadreva e dua na Turaga me vukei Koya me vakabulai ira na Isireli mai vei ira na nodra meca, na kai Mitiani, ka qai digitaki Kitioni o Koya. Wilika Na Dauveilewai 6:15 vei ira na gone, ka tarogi ira se cava a vakila kina o Kitioni ni sega ni rawa ni cakava na ka a vinakata na Turaga. Wilika na tikina e 16, ka taroga vei ira se o cei a kaya na Turaga ni na vukei Kitioni. Talanotaka vei ira na gone me baleta e dua na gauna, a kerei iko kina na Turaga mo cakava e dua na ka dredre mo qaravi Koya kina, ka o vakila ni a tiko vata kei iko.

• Vakaraitaka na kedra iyaloyalo na gone se itabagone era cakava tiko na veika cecere ena veiqaravi vua na Kalou (raica na iVola ni iYaloyalo Vakosipeli, naba 19, 23, 90, 102), se tukuna na ivakaraitaki eso o sa raica. Vukei ira na gone me ra vakasamataka na sala eso e rawa ni ra vakaitavi kina ena cakacaka ni Kalou, ka sureti ira me ra droinitaka na kedra iyaloyalo ni ra cakava tiko na veika oqo.

• Vakayagataka na tabana ni itaviqaravi ni macawa oqo mo vakavulica kina vei ira na gone, na sala a vakayacora kina na Turaga na mataivalu i Isireli me ra lewe lailai, me ra kila kina na Isireli ni Nona kaukauwa ga a vakabulai ira mai na nodra meca. Wasea na ivakaraitaki eso ni veika lalai e caka kina e dua na cakacaka cecere, me vaka na oni ni ra vakasoqona vata na suka me caka kina na oni. Wasea na nomu ivakadinadina ni rawa ni vukei keda na Kalou meda cakava e dua na cakacaka cecere, ena gauna mada ga eda vakila kina ni da tawayaga.

ivakatakilakila ni veivakavulici

Vakavulica na iVunau: Gone Qase Cake

Na Dauveilewai 3:7–9, 12–15

Ko Jisu Karisito na noqu Vakabula.

Na Dauveilewai 3 e vakamacalataka e dua na ivakarau ka rawa ni o vakayagataka mo vakavulica kina vei ira na gone ni Kalou e sereki keda mai na ivalavala ca ena vuku ni iVakabula o Jisu Karisito.

iTaviqaravi e Rawa ni Caka

• Vola na veika oqo ena papa ni volavola: “kitaka na ka ca,” “tagi vei Jiova,” ka “vakatubura e dua nai Vakabula.” Sureta eso na gone me ra raica na veimalanivosa oqo e Na Dauveilewai 3:7–9, ka sureta eso tale me ra raici ira e Na Dauveilewai 3:12–15. Vakamacalataka vei ira na gone ni o ira na Isireli ena kedrai tukutuku na Dauveilewai era sa “kitaka na ka ca” vakaveitarataravi. Ia, ni ra sa valuti mai vei ira na nodra meca, era sa “tagi vei Jiova,” a sa qai “vakatubura cake e dua nai vakabula” ko Jiova me vukei ira. Na cava eda vulica baleta na Turaga mai na veitikina oqo?

• Lagata vata e dua na sere ka na vukei ira na gone me ra kila ni o Jisu Karisito sa nodra Dauveivueti ka Dauniveisereki, me vaka na “Tala Mai Na Luvena” (iVolanisere ni Gonelalai, 20). Sureti ira na gone me ra wasea na nodra nanuma me baleta na veika sa cakava na iVakabula me sereki keda mai na ivalavala ca, na veivakatovolei, na rarawa, kei na mate.

Na Dauveilewai 4:1–15

Au rawa ni yalodina vua na Turaga kevaka mada ga era sega ni vakakina na tani.

E dina ga ni vuqa vei ira na Isireli era a lutu tani mai vua na Turaga, eso era a dina tiko ga vua ka rawa me ra vukea e vuqa tale mera lesu tale ki na buladodonu. E rawa vakacava ni o vakayaloqaqataki ira na gone me ra dina tiko vua na Turaga se mani vakacava na veika era cakava tiko eso?

iTaviqaravi e Rawa ni Caka

• Tukuna vei ira na gone ni dua na gauna era a ivalavala ca kina na Isireli, e dua na marama yalododonu ka yacana o Tepora kei na iliuliu ni mataivalu ni Isireli, o Peraki, e rau a sereki ira na Isireli mai vei ira na nodra meca (raica Na Dauveilewai 4:1–15). Wilika vata Na Dauveilewai 4:14, ka kerei ira na gone me ra vaqara e dua na ka e tukuna o Tepora ka vakaraitaka na kaukauwa ni nona vakabauta na Turaga. Qai kerei ira me ra wilika na Vunau kei na Veiyalayalati 84:88 me ra kunea kina e dua na ivakavuvuli e tiko talega e Na Dauveilewai 4:14. Vakauqeti ira mera wasea nai balebale ni yalayala ni Turaga “Niu na liu e matamudou” vei ira.

• Lagata e dua na sere me baleta na talairawarawa ki na ivakaro, me vaka na “Digitaka Na Dodonu” (Sere ni Lotu, naba 142) se “Digitaka na Dodonu” (iVolanisere ni Gonelalai, 82). E rawa vakacava ni da tutaka na buladodonu ka talairawarawa ki na ivakaro kevaka sara mada ga era sega ni vakayacora vakakina o ira na tu wavoliti keda?

Na Dauveilewai 7

Na nona sala na Kalou e duidui mai na sala vaka vuravura.

A kerei Kitioni na Turaga me cakava na veika a rairai sega ni vakaibalebale taumada vei koya ena gauna o ya. Na cava e veivakauqeti vei iko me baleta na kena italanoa? O vakila vakacava ni na rawa ni vakalougatataki ira na gone o vakavulica?

iTaviqaravi e Rawa ni Caka

• Kerei ira na gone me ra raitayaloyalotaka ni gadrevi vei ira me ra vakasoqona vata e dua na mataivalu me ra laki vala. Ena vica beka na tamata era na vinakata ena nodra mataivalu? Vakayagataka Na Dauveilewai 7:4–7, me ra sureti kina na gone me ra matanataka na sala a vukei Kitioni kina na Turaga me digitaka na mataivalu ka na sereki ira na Isireli mai vei ira na kai Mitiani. Na cava na vuna e vinakata kina na Turaga me ra lewe lailai ga na mataivalu i Kitioni? (raica Na dauveilewai 7:2). Na cava beka e vaka me a dau dredre kina vei Kitioni kei na nona mataivalu me muria na ivakaro ni Turaga? Sureti ira na gone me ra wasea na veika era dau sotava ena nodra vulica me ra vakararavi vua na Turaga, ka dina ga ni dau dredre na kena vakayacori.

• Sureti ira na gone me ra droinitaka na iyaloyalo ni dua na iseleiwau, isasabai, davui, cina, kei na bilo. Tarogi ira na gone se na iyaya cava vei ira oqo era na kauta vata kei ira ni ra lako ki na dua na ivalu. Sureti ira mera wilika Na Dauveilewai 7:16 mera vulica kina na veika era a kauta vata kei ira na mataivalu i Kitioni. Na cava na vuna e a gadrevi kina na yalo doudou me caka kina na ka oqo? Wilika vata Na Dauveilewai 7:19–21 me vulici kina na sala era vakayagataka kina na mataivalu na biukila kei na bilo me ra vakadrukai ira na kai Mitiani. Na cava eda vulica baleta na Turaga mai na italanoa oqo?

ivakatakilakila ni vuli

Vakauqeta na Vuli e Vale

Sureti ira na gone me ra wasea vata kei na dua na lewe ni matavuvale e dua na ka era sa vulica ni kua era vinakata kina me ra muria na ivakaro.

Vakatorocaketaki Noda Veivakavulici

Moica na itaviqaravi me sotava na gagadre. Kakua ni nanuma na vei ituvatuva oqo me idusidusi e dodonu mo na muria. Ia, me vakayagataka mera ivurevure ni veivakasama eso me vakavurea vei iko na veivakauqeti ni o vakasamataka vakatitobu na nodra gagadre na gone o vakavulica. Ena so na gauna, o na vakauqeti mo moica na itaviqaravi me baleti ira na gone sobu me vakavulici vei ira na gone qase cake, se na kena veibasai.

tabana ni itaviqaravi: Na Turaga e rawa ni vakayagataka na veika lalai me cakava kina na cakacaka cecere