na cauravou o Tevita kei na irabo

Tevita kei Koliaci, mai vei Steve Nethercott

13–19 ni June

1 Samuela 8–10; 13; 15–18

“Ni sa Lewa Na iValu ko Jiova”

E dina ga ni sa tuvanaki tu na itaviqaravi oqo me baleti ira na gone sobu se gone qase cake, ia sa rawa mo moica e dua vei ira me sotava na nodra gagadre o ira o vakavulica.

Vola na Veika o Vakauqeti Kina

ivakatakilakila ni veiwasei

Sureta na Veiwasei

Vakaraitaka na iyaloyalo kei Tevita kei Koliaci mai na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale. Sureti ira na gone me ra wasea na veika era kila me baleta na italanoa, ka taroga na taro me vukei ira me ra nanuma tiko na tiki ni italanoa era a sega ni wasea.

ivakatakilakila ni veivakavulici

Vakavulica na iVunau: Gone Sobu

1 Samuela 16:1–13

Sa kila tu na Turaga na nanuma ni lomaqu.

Na wasei ni italanoa ni sala a tukuna kina na Turaga vei Samuela me digitaki Tevita me tui, e rawa ni vukei ira na gone me ra kila ni Turaga sa kilai keda vakayadudua.

iTaviqaravi e Rawa ni Caka

• Wasea na sala a tukuna kina na Turaga vei Samuela ni na yaco me tui ni Isireli o Tevita (raica na 1 Samuela 16:1–13). Ni o tukuna tiko na italanoa, sa rawa mo laiva e dua na gone me matataki Samuela. Sa rawa vua me solia e dua na isala vakatui pepa ki vua na gone, ka matataki Tevita. Wasea na nomu ivakadinadina ni kila na Turaga na gagadre ni lomai Tevita ka sa kilai keda yadua o koya.

• Wasea e dua na gauna o a vakila kina ni sa kauwaitaki iko na Turaga. Lagata vata e dua na sere e vakavulica ni iVakabula e kilai keda ka lomani keda, me vaka na “Jisu Sa Wekada Ga” (iVolanisere ni Gonelalai, 37).

1 Samuela 17:10–54

Na Vakabauti Jisu Karisito ena rawa ni vukei au meu yaloqaqa.

Era dau nanumi Tevita vakarawarawa sara na gone baleta ni dina ga ni a tamata lailai o Tevita, a uabaleta o koya e dua sara na bolebole levu. Vukei ira me ra raica ni ivurevure ni nona yaloqaqa kei na kaukauwa sai koya na nona vakabauti Jisu Karisito.

iTaviqaravi e Rawa ni Caka

• Railesuva na italanoa kei Tevita kei Koliaci vata kei ira na gone, (raica na “Tevita kei Koliaci” ena iTalanoa ena Veiyalayalati Makawa), ka kerei ira me ra veivukevuke ena kena dramataki na italanoa. Vakauqeta na gone ka matataki Koliaci tiko me cavuta, “Solia mada mai vei au e dua na tamata me keirau vala kaya” (1 Samuela 17:10). Vakauqeta na gone ka matataki Tevita tiko me kaya, “Kau sa lako mai vei iko ena yaca i Jiova” (1 Samuela 17:45). Vakadinadinataka ni gauna eda vakabauta kina na Turaga, ena vukei keda o Koya meda yaloqaqa me vakataki Tevita.

• Vakayagataka na tabana ni itaviqaravi ni macawa oqo me vakaraitaka na balavu kei Koliaci ni vakatauvatani kei na dua na cauravou gone me vakataki Tevita. Vakamacalataka ni mataivalu ni Isireli a rerevaki Koliaci. Kerei ira na gone me ra matanataka ni vaka era rere. Qai vakaraitaka e dua na iyaloyalo kei Jisu Karisito, ka tukuna vei ira na gone ni nona vakabauta na Turaga, o Tevita, a rawa kina vua me yaloqaqa. Kerei ira me ra tucake vakadodonu, me vaka era tamata yaloqaqa.

• Sureti ira na gone me ra lako vakataki Tevita me laki veivala kei Koliaci ni lagati tiko e dua na sere me baleta na yaloqaqa, me vakataka na “I Will Be Valiant” (Children’s Songbook, 162).

1 Samuela 18:1–4

Na itokani vinaka e rawa me vuni veivakalougatataki vei au.

Na veitokani nei Jonacani kei Tevita e dua na ivakaraitaki cecere ni veivakalougatataki e rawa ni yaco mai vei ira na itokani vinaka.

iTaviqaravi e Rawa ni Caka

• Droinitaka e rua na iyaloyalo ena papa, e dua me matataki Tevita kei na kena ikarua me matataki Jonacani. Wilika vei ira na gone e vica na malanivosa mai na 1 Samuela 18:1–4 ka vakamatatataka na nodrau veilomani na veitokani e rua oqo. Solia vei ira yadua na gone e dua na uto pepa, ka taroga na sala e rawa ni ra vakaraitaka kina na loloma vua e dua na itokani. Ni oti na nona wasea e dua na gone e dua na vakasama, sureta sara me vakabira na uto pepa ki na papa.

• Tukuna vei ira na gone me baleta e dua na itokani vinaka e vukei iko tiko mo bulataka na kosipeli se tara cake na nomu vakabauti Jisu Karisito, ka sureti ira na gone me ra wasea se o cei e vukei ira tiko. Sureti ira na gone me ra matanataka ni ra cakava tiko e dua na ka vinaka vua e dua na itokani.

ivakatakilakila ni veivakavulici

Vakavulica na iVunau: Gone Qase Cake

1 Samuela 8:6; 9:15–17; 10:1–24; 16:1–13

O ira era veiqaravi ena Lotu era kacivi mai vua na Kalou.

Na italanoa ni nona digitaki Saula kei Tevita na Kalou me rau tui, e rawa ni vukea na nomu kalasi me kila vakavinaka na sala era sa kacivi kina na tamata, me ra veiqaravi ena Lotu ni kua. Na itukutuku oqo e rawa ni tara cake na vakabauta ni veikacivi e lako mai vua na Kalou, mai vei ira na Nona italai vakadonui.

Ko Samuela e lumuti Saula tiko

iYaloyalo kei Samuela ni lumuti Saula tiko, © Lifeway Collection/laiseni mai na goodsalt.com

iTaviqaravi e Rawa ni Caka

• Ena veitikini pepa eso, vola kina na veivosa kei na vei ivolanikalou oqo: era vinakata na tamata e dua na tui (1 Samuela 8:6); a kaya na Turaga vei Samuela ni na tui ko Saula (1 Samuela 9:15–17); Sa lumuti Saula ko Samuela (1 Samuela 10:1); Sa vakaraitaki Saula vei ira na tamata ko Samuela (1 Samuela 10:24). Kerei ira na gone me ra wilika na veitiki ni ivolanikalou ka biuti ira ena kedra ituvatuva dodonu.

• Vulica vata na ikalima ni yavu ni vakabauta. Tukuna vakalekaleka vei ira na gone nai valavala ni nomu ciqoma na nomu kaci ni veivakavulici ena Lalai. O kila vakacava ni o a kacivi mai vua na Kalou? Vakadinadinataka ni Kalou e vakauqeti ira na iliuliu me ra kacivi ira na tamata me ra veiqaravi.

1 Samuela 16:1–13

“Sa Raica na Yalo ko Jiova”

E itovo vakatamata me ra lewai na tani ena veika eda raica i tuba, ia e tiki ni noda yaco me vakataki Jisu vakalevu cake sai koya na vulici ni sala me da raica me vaka sa raica ko Koya—ena noda “raica na yalo” (1 Samuela 16:7).

iTaviqaravi e Rawa ni Caka

• Sureti ira na gone me ra raitayaloyalotaka ni ra a kerei me ra digitaka e dua me tui. Na ituvaki cava ni tamata era na vakasaqara? Wilika vata na 1 Samuela 16:6–7 me kilai kina na ka a kaya na Turaga vei Samuela ena nona vakasaqara tiko e dua na tui vou kei Isireli. Na cava eda sa vulica mai na ivakaro ni Turaga?

• Tuvana e dua na lesoni vakaraitaki me vakaraitaka vei ira na gone ni vakatulewa eda cakava ka yavutaki tiko e “na raica na ka esau” (tikina e 7) ena sega beka ni dodonu. Me ivakaraitaki, e rawa ni o vakaraitaka vei ira eso na kakana se dua na ivola, ka sega ni veisotari na kena iolo se waqana kei na lewena e loma. Na cava e vakatura tiko na 1 Samuela 16:7 kei na lesoni vakaraitaki oqo me baleta na ivakarau me da raici keda kina kei ira na tamata tale eso?

• Wasea e dua na ka o sotava ko a vulica kina mo “raica na yalo,” ka sega “ na ka esau” (tikina e 7). Vakauqeti ira na gone mera wasea na veika vata oqori era sa sotava. Lagata e dua na sere ka vakabibitaka na ivakavuvuli oqo, me vaka na “Meu Lako Tu kei iKo” se “We Are Different” (iVolanisere ni Gonelalai, 78, 263).

1 Samuela 17:20–54

E rawa ni vukei au o Jisu Karisito meu rawa na i bolebole.

E rawa ni ra sotava tiko na gone eso na bolebole ka tautauvata na kena dredre kei na vakadrukai ni dua na tuwawa me vakataki Koliaci. Na ivakaraitaki nei Tevita e rawa ni solia vei ira na vakanuinui ni Turaga ena veivuke me vala ena nodra ivalu.

iTaviqaravi e Rawa ni Caka

• Lesi ira na gone me ra droinitaka na iyaloyalo ni so na tiki ni italanoa duidui ena 1 Samuela 17:20–54. Vakaraitaka na iyaloyalo ena kedra ituvatuva dodonu ena papa ni volavola, ka sureti ira na gone me ra wasea na italanoa ena nodra talanoataka na iyaloyalo yadua era droinitaka. Na cava e vinakata na Turaga meu vulica mai na italanoa oqo?

• Vukei ira na gone me ra cakava e dua na lisi ni so na veibolebole dredre ena papa, ka na rawa ni sotava e dua na tamata. Sureti ira mera raica na veika a kaya o Tevita ka na rawa ni vakayaloqaqataka e dua e sotava tiko na veibolebole vakaoqo (raica na 1 Samuela 17:26, 32, 34–37, 45–47). Tukuna vei ira na gone na sala a vukei iko kina o Jisu Karisito ena gauna ni bolebole.

ivakatakilakila ni vuli

Vakauqeta na Vuli e Vale

Tarogi ira na gone ena dua na taro me baleta e dua na ka era sa vulica nikua. Vola na taro, ka solia e dua na ilavelave vei ira yadua na gone me ra kauta i vale ka veivosakitaka kei na nona matavuvale.

Vakatorocaketaki ni Noda Veivakavulici

Vukei ira na gone mera raitayaloyalotaka na veika e vakayacori tiko ena ivolanikalou. Era dau vakatudaliga vakalevu cake na gone ki na dua na lesoni ni ra rawa ni raica na iyaloyalo e semati ki na italanoa kei na veivakavulici. Tovolea mo vakayagataka na iyaloyalo ena iVola ni iYaloyalo Vakosipeli se ena ChurchofJesusChrist.org.

tabana ni itaviqaravi: Na vakabauti Jisu Karisito e rawa ni vukei au meu yaloqaqa