Na Vanua Ga Ko Sa Lako Kina mai vei Sandy Freckleton Gagon

6–12 ni Jiune

Ruci; 1 Samuela 1–3

“Sa Reki na Yaloqu ena vuku i Jiova”

Ni o vulica na bula nei Ruci, Naomi, Ana, kei ira tale eso ena macawa oqo, vakarorogo vakavoleka sara ki na Yalo ka vola e dua na veivakauqeti o ciqoma. Na cava o sa vakauqeti mo cakava?

Vola na Veika o Uqeti Kina

Ena so na gauna eda dau vakananuma ni dodonu me vakamuria e dua na sala matata mai na vakatekivu ki na ivakataotioti na noda bula. Na sala lekaleka duadua ena maliwa ni rua na tikina e dua na laini dodonu. Ia na bula e dau vakasinaiti ena kena vakaberaberataki kei na goletani e dau kauti keda ki na veimatanicagi duidui. Eda na raica beka ni sa duatani sara na noda bula mai na veika eda nanuma ni dodonu me vakakina.

Erau kila vinaka sara o Ruci kei Ana na ka oqo. E sega ni kawa vaka-Isireli o Ruci, ia a vakamautaka e dua, ni gauna sa mate kina o watina, sa dua na digidigi me na cakava. Ena lesu beka ki na nona matavuvale kei na bula sa matau kina ni gauna e liu, se me na ciqoma na vakabauta vaka-Isireli kei na dua na itikotiko vou kei na vugona? (raica na Ruci 1:4–18). Na ituvatuva nei Ana me baleta na nona bula me vakasucu gone, kei na “rarawa ni yalona” ni sa sega ni yaco me vakakina (raica na 1 Samuela 1:1–10). Ni o wilika na veika baleti Ruci kei Ana, vakasamataka na vakabauta a tu vei ira me rawa kina ni ra biuta na nodra bula ena liga ni Turaga ka lakova na nodra sala sega ni namaki. Mo na qai vakasamataka ga na nomu ilakolako. Ena rairai duidui beka mai na nei Ruci kei Ana—kei na tamata kecega. Ia ena gauna taucoko ni veivakatovolei kei na veivakidacalataki eke ki na nomu iyacoyaco tawamudu, sa rawa ni o vulica mo kaya vata kei Ana, “Sa reki na yaloqu ena vuku i Jiova” (1 Samuela 2:1).

Me baleta na kena raici vakararaba na iVola i Ruci kei na 1 Samuela, raica na “Ruci” kei na “Samuel, books of” ena Bible Dictionary.

Vakasama ni Vuli iVolanikalou ni Tamata Yadua

Ruci

E rawa ni vukica na leqa na Karisito me qaqa.

Ni mate na wati Ruci, na leqa oqo sa kauta mai vua na revurevu ka bibi cake mai na ka e rawa ni sotava e dua na yada nikua. Ena ivalavala vakavanua ni Isireli ena gauna oya, na marama e sega na watina se luvena tagane e sega na nona dodonu ki na iyaubula ka sega tale na ivurevure me rawata kina nona bula. Ni o wilika na italanoa nei Ruci, raica na sala e dau vukica kina na Turaga na rarawa ki na veivakalougatataki cecere. Na cava o na raica me baleti Ruci ka rairai a vukei koya beka? Na cava na itavi nei Poasa me vueti Ruci kina mai na ituvaki ni bula dredre? (raica na Ruci 4:4–7). Na ituvaki Vakarisito cava o sa raica vei Ruci kei Poasa?

Ruci; 1 Samuela 1

Au rawa ni nuitaka ni na tuberi au ka vukei au na Kalou se cava ga na noqu ituvaki.

E rawa beka ni o raici iko ena italanoa kei Ruci, Naomi, kei Ana? O na sotava beka e dua na lusi levu, me vakataki Ruci kei Naomi (raica na Ruci 1:1–5). Se, vakataki Ana beka, o gadreva na veivakalougatataki o se bera ni ciqoma (raica na 1 Samuela 1:1–10). Vakasamataka vakatitobu na itukutuku o rawa ni vulica mai na nodra ivakaraitaki na marama yalodina oqo. Erau vakaraitaka vakacava o Ruci kei Ana na vakabauta na Kalou? Na veivakalougatataki cava era a ciqoma? Mo vakamuria vakacava na nodra ivakaraitaki? Vakasamataka na nomu “lako mai mo vakararavi” vua na Turaga (Ruci 2:12) ena gauna mada ga sa dredre kina na bula.

Raica talega na Reyna I. Aburto, “Veidraki Kece, Turaga, Mo ni Tiko ga Kei Au!” Liaona, Nove. 2019, 57–60.

Gone Oqo Au a Masu Kina, mai vei Elspeth Young

1 Samuela 2:1–10

E rawa ni reki na yaloqu vua na Turaga.

Ni sa kauta ko Ana na gone o Samuela ki na valetabu, a cavuta na vosa totoka ni veivakacaucautaki vua na Turaga, ka volai ena 1 Samuela 2:1–10. Na veivosa oqo era sa rui veilauti vakalevu ni o vakasamataka ni dua ga na gauna lekaleka sa oti a “sa rarawa na yalona, ka tagi vakalevu” (1 Samuela 1:10). Ni o vulica na veitikina oqo, na itukutuku cava o raica ni na vakalevutaka na nomu vakila na veivakacaucautaki kei na vakavinavinaka vua na Turaga? Ena vakauqeti iko beka na sere nei Ana mo kunea e dua na sala vou mo vakaraitaka kina na nomu vakavinavinaka vua na Turaga—dua na sere, dua na droini, dua na ivalavala ni veiqaravi, se dua na ka e tukuna tiko vua na nomu nanuma.

E dina sara, e sega ni saumi taucoko na masu vagumatua ena sala sa saumi kina na masu nei Ana. Na cava o raica ena nona itukutuku o Peresitedi Dieter F. Uchtdorf “Vakavinavinaka ena iTuvaki Cava Ga” ka na rawa ni vukei iko ni sega ni saumi na nomu masu ena ivakarau o nuitaka? (Liaona, Me 2014, 70–77).

 Samuela 3

Au rawa ni rogoca ka talairawarawa ki na domo ni Turaga.

Me vakataki keda kece, sa dodonu me vulica ko Samuela na sala me kila kina na domo ni Turaga ni rogoca. Ni o vulica na 1 Samuela 3, na cava o vulica mai vua na cauravou oqo me baleta na rogoca ka talairawarawa ki na domo ni Turaga? Na cava soti o sa sotava me baleta na rogoca na Domona? Na madigi cava soti e tu vei iko, me vakataki Ilai, mo vukei ira na tani me ra kila na gauna e vosa tiko kina vei ira na Turaga? (raica na 1 Samuela 3:7).

Raica talega na Joni 14:14–21; David P. Homer, “Rogoca na Domona,” Liaona, Me 2019, 41–43.

Vakasama baleta na Vuli iVolanikalou Vakamatavuvale kei na Lotu Vakamatavuvale

Ruci 1:16–18; 2:5–8, 11–12.E rawa ni ra vakasaqara na nomu matavuvale na ivakaraitaki ni yalovinaka kei na yalodina ena veitikina oqo. Eda na vakaraitaka vakacava na yalovinaka vei ira na noda matavuvale kei ira na tamata, kei na yalodina vei Jisu Karisito? Na wase “Ruci kei Naomi” (ena italanoa ni Veiyalayalati Makawa) ena rawa ni vukea na nomu matavuvale mera vuli mai na ivakaraitaki nei Ruci.

1 Samuela 1:15.E rawa beka mo sova e dua na ka mai na dua na koniteina me vukei ira na lewe ni matavuvale ena nodra raitayaloyalotaka na ibalebale ni vosa nei Ana, ena nona kaya, “au sa sovaraka na yaloqu ena mata ni Turaga.” Na cava e dua kina na sala vinaka oqo me vakamacalataki kina na ivakarau ni noda masu? Eda na vakatorocaketaka vakacava na noda masu vakai keda yadua kei na matavuvale?

1 Samuela 2:1–10.Na serekali ni vakacaucau nei Ana vua na Turaga ena rawa ni muataki iko mo vakasamataka na sere o vakayagataka mo vakacaucautaka kina na Turaga. E rawa ni o ni lagata vata eso. Sa rawa talega vei ira na lewe ni nomu matavuvale mera vakasamataka eso tale na sala mera vakaraitaka kina na nodra nanuma baleti Jisu Karisito. Me kena ivakaraitaki, e rawa ni ra droinitaka na iyaloyalo e vakaraitaka na vuna era lomana kina na iVakabula.

1 Samuela 3:1–11.Ena rawa ni ka ni lasa me matanataki na kena italanoa na Turaga ni kacivi Samuela, se rawa ni sarava na nomu matavuvale na vidio “Samuel and Eli” (ChurchofJesusChrist.org). Sa rawa mera veivosakitaka na lewe ni matavuvale na gauna era a vakila kina na Turaga ni vosa tiko vei ira kei na sala era cakacakataka kina na Nona vosa.

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Rarama na Yaloqu,” Sere ni Lotu, naba 135.

Vakatorocaketaki ni Vuli ni Tamata Yadua

Me dusimaki iko na Yalo ena nomu vuli. Masulaka me dusimaki iko na Yalo Tabu ki na veika o gadreva mo kila. Mo dau kidava na Nona vakasolokakana, kevaka sara mada ga e muataki iko mo wilika e dua na ulutaga o sega ni namaka se vulica ena dua tale na sala.

Droini kei Samuela ni rogoca tiko na Turaga, mai vei Sam Lawlor