E tucake tu o Ilaija e yasa ni icabocabo ni soro kama

Veisaqasaqa o Ilaija kei Ira na Bete nei Peali, mai vei Jerry Harston

27 ni June–3 ni Julai

1 Tui 17–19

“Kevaka sa Kalou ko Jiova, Mo Ni Muri Koya”

E levu na gone era dau taleitaka na italanoa. Vukei ira na gone me ra raica na dina ena italanoa ka kunei ena 1 Tui 17–19 ka na vaqaqacotaka na nodra vakabauti Jisu Karisito.

Vola na Veika o Vakauqeti Kina

ivakatakilakila ni veiwasei

Sureta na Veiwasei

Vakaraitaka vei ira na gone na iyaloyalo ena ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale. Kerei ira me ra wasea na veika era kila me baleta na italanoa e vakaraitaki tiko ena iyaloyalo. Na cava eda vulica mai na italanoa eso oqo?

ivakatakilakila ni veivakavulici

Vakavulica na iVunau: Gone Sobu

1 Tui 17

Na Turaga e vakalougatataki ira era vakabauta.

Na1 Tui 17 e tukuni tiko kina e vica na ivakaraitaki ni vakabauta cecere. Me isau ni vakabauta cecere, o Ilaija a vakani mai vei ira na reveni ena gauna ni dausiga, e dua na yada kei na luvena tagane sa vakalevutaki na kedrau kakana, ka qai vakabula tale o Ilaija na luvena tagane na yada mai na mate.

iTaviqaravi e Rawa ni Caka

• Vakaraitaka na iyaloyalo se iyaya e salavata kei na italanoa ena 1 Tui 17, me vaka na manumanu vuka, madrai, se dua na gonetagane. Talanoataka na italanoa oqo vei ira na gone (“Ilaijia na Parofita” ena iTalanoa ni Veiyalayalati Makawa e rawa ni veivuke), ka sureti ira me ra vaqara na iyaloyalo se iyaya e salavata kei na italanoa yadua. Vakabibitaka ni o Ilaija kei na yada e rau vakabauti Jisu Karisito ka ciqoma na veivakalougatataki cecere.

• Vukei ira na gone me ra vakasamataka na sala eso e rawa ni ra vakaraitaka kina ni ra vakabauta na Tamada Vakalomalagi kei Jisu Karisito, ka kena ibalebale ni ra vakabauti Rau ka vakararavi vei Rau. Lagata vata kei ira e dua na sere me baleta na vakabauta, me vaka “I Know My Father Lives” (Children’s Songbook, 5).

1 Tui 18:17–39

Au rawa ni digitaka meu muri Jisu Karisito.

A vakauqeti ira na Isireli o Ilaija me ra cakava e dua na vakatulewa me ra muri Jisu Karisito. Vukei ira na gone me ra raica ni rawa ni ra cakava na digidigi vata oqo.

iTaviqaravi e Rawa ni Caka

• Vakamacalataka vei ira na gone ni o ira na tamata ena gauna i Ilaija era a sega ni vakadeitaka kevaka era vinakata me ra muria na Turaga. Wasea na italanoa ni sala a sureti ira kina o Ilaija me ra digitaka me ra muria na Turaga, me vaka e tiko ena 1 Tui 18:17–39 (raica talega o “Ilaijia kei na Bete nei Peali” ena iTalanoa ni Veiyalayalati Makawa). Tukuna vei ira na gone na vuna o digitaka kina mo muri Jisu Karisito, ka taroga na vuna era digitaka kina mera muri Koya.

• Wilika vei ira na gone na veika a tukuna o Ilaija vei ira na tamata: “Kevaka sa Kalou ko Jiova, mo ni muri Koya” (1 Tui 18:21). Na cava na kena ibalebale me muri Jisu Karisito? Vukei ira na gone me ra vakasamataka na veika vakatabakidua era na cakava me ra muri Jisu Karisito, ka sureti ira me ra droinitaka na kedra iyaloyalo ni ra cakava tiko na veika oqori.

  cauravou lailai

  E rawa ni da digitaka me da muri Jisu Karisito.

1 Tui 19:9–12

Sa dau vosa vei au na Yalo Tabu ena domo lailai e vinaka.

Ena veituberi eso, era na kila kina na gone na veivakauqeti ni Yalo Tabu ena nodra bula. Vakasamataka vakatitobu na sala e rawa ni o vukei ira kina.

iTaviqaravi e Rawa ni Caka

• Vakalekalekataka vei ira na gone na italanoa e kune ena 1 Tui 19:9–12, ka wilika na tikina e 11–12. Sureti ira me ra matanataka na cagi kaukauwa, na uneune, kei na bukawaqa. Mo qai sureti ira mera dabe ka kua sara ni yavala ka wilika na itinitini ni tikina e 12 ena domo malumu: “ni sa oti na bukawaqa, sa qai rogo mai e dua na domo e lailai ka vinaka.” Kerei ira me ra tovolea me ra vosa ena dua na domo malumu, lailai. Talanoataka vei ira na veigauna eso o sa sotava kina e dua na veivakauqeti mai vua na Yalo Tabu.

• Vukei ira na gone me ra kila na gauna era a rairai vakila kina na veivakauqeti ni Yalo Tabu. Me ivakaraitaki, vakatagitakitaka se lagata e dua na sere ni vakarokoroko me baleti Jisu, ka taroga na veika era vakila ni ra vakasamataki Koya. Tarogi ira se cava era vakila ena itaviqaravi ni vakarokoroko tale eso, me vaka na masu kei na nodra matavuvale se na vakayagataki ni sakaramede. Vakamacalataka ni veika oqo e lako mai vua na Yalo Tabu. Tukuna vei ira na gone na sala sa vakalougatataka kina na nomu bula na kaukauwa ni Yalo Tabu.

ivakatakilakila ni veivakavulici

Vakavulica na iVunau: Gone Qase Cake

1 Tui 17:8–16

Ni kerei au na Turaga meu solibula, au rawa ni talairawarawa ena vakabauta.

Na yada ni Sarifaci a vakararavi vua na Turaga kei na Nona parofita, e dina ga ni a kerei me cakava e dua na solibula cecere. Na italanoa oqo e rawa ni vukei ira na gone ena gauna e kerei ira kina na Turaga me ra solibula.

iTaviqaravi e Rawa ni Caka

• Wilika vei ira na gone na 1 Tui 17:8–16. Sureti ira me ra matanataka na italanoa ni o wilika ena ikarua ni gauna. Cegu ena veitikina eso ka taroga na cava era na vakila ke a o ira o Ilaija se na yada. Sureti ira mera wasea na veika era sa vulica mai na veitikina oqo.

• Sureta e dua na gone me droinitaka ena papa e dua na iyaloyalo ni veika a kerea na Turaga vua na yada me solia vei Ilaija (raica na 1 Tui 17:12–13). Sureta e dua tale na gone me droinitaka na ka a ciqoma na yada me kena i sau (raica na 1 Tui 17:15–16). Na cava eso na ka e kerea vei keda na Tamada Vakalomalagi me da solibula kina? Sureti ira na gone mera wasea na sala era sa vakalougatataki kina ni ra solibula.

1 Tui 18:17–39

Au rawa ni digitaka meu muri Jisu Karisito.

Era a lomalomarua na Isireli me ra muria na Turaga. Vakasamataka vakatitobu na sala e rawa ni o vakauqeti ira kina na gone me ra yalodina ki na nodra bula vakatisaipeli.

iTaviqaravi e Rawa ni Caka

• Lesi ira yadua na gone me ra wilika e vica na tikina mai na 1 Tui 18:17–39 ka droinitaka e dua na iyaloyalo ni veika e vakamacalataka na nona tikina. Vukei ira na gone me ra kila vakamatata sara na veitikina oqori kevaka e gadrevi. Me ra qai vakayagataka na nodra iyaloyalo me ra talanoataka kina na italanoa. Na cava e vakavulica vei iko na italanoa oqo me baleta na Turaga?

• Kerei ira na gone me ra veivosakitaka na gauna era a vakatulewa kina ena rua na ka duidui. Na cava a vukei ira ena nodra vakatulewa? Vukei ira mera vakasamataka na ituvaki eso era na rawa beka ni gadreva mera vakatulewataka mera muri Jisu Karisito se sega. Na dina cava soti mai na italanoa ena 1 Tui 18:17–39 e rawa ni vukei ira ena nodra vakatulewa?

1 Tui 19:9–12

Sa dau vosa vei au na Yalo Tabu ena domo lailai e vinaka.

Sa sinai tu o vuravura ena rorogo e veivagolei tani ka dau dredre kina me rogoci na domo malua, lailai ni Yalo. O na vukei ira vakacava na gone me ra rogoca?

iTaviqaravi e Rawa ni Caka

• Kerei ira na gone me ra vakarorogo vakavinaka ni o wilika na 1 Tui 19:11–12 vei ira ena domo malumu. Sureti ira me ra vakasaqara na 1 Tui 19 me ra vaqara kina na tikina o a wilika ka vulica kina na veika a cakava tiko o Ilaija. Veivosakitaka na veika a dodonu me ra cakava me ra rogoca kina na veika o a tukuna tiko, ka vukei ira me ra vakatauvatana oqo ki na veika e dodonu me da cakava me da rogoca kina na “domo lailai e vinaka” ni Yalo. Me ra veivukevuke na gone ena kena wiliki lo eso tale na tikina mai na 1 Tui 19 ka so tale na gone mera vaqara na veitikina oqori ena ivolanikalou.

• Wasea vei ira na gone eso na ikuri ni ivolanikalou ka vakamacalataka na sala e dau veivosaki kina kei keda na Yalo (raica na iDusidusi ki na iVolanikalou, “Uqeti, Veivakauqeti,” scriptures.ChurchofJesusChrist.org). Kerei ira na gone me ra veivosakitaka na gauna eso era a vakila kina na veituberi se ivakadinadina ni Yalo Tabu vei ira. Na cava era a cakava tiko? Na cava e rawa ni vagolei keda tani mai na noda kila na Yalo? Wilika vata na Moronai 4:3, ka vakauqeti ira na gone me ra digitaka e dua na ka era na cakava me rawa ni “tikoga kei ira na Yalona.”

ivakatakilakila ni vuli

Vakauqeta na Vuli e Vale

Sureti ira na gone mera vakasamataka eso na ka era vinakata mera cakava ena vuku ni veika era sa vulica ni kua. Me kena ivakaraitaki, e rawa ni ra vakarautaka e dua na takete vakayalo, vakasama, vakayago, se na ivakarau ni veimaliwai me ra vakataki Jisu Karisito vakalevu cake.

Vakatorocaketaki ni Noda Veivakavulici

Vukei ira na gone mera vakila na Yalo. “E dua na ka bibi duadua o rawa ni cakava ni ko qasenivuli o ya mo vukei ira o vakavulica mera kila na veivakauqeti ni Yalo Tabu. … Vukei [ira na gone] me ra semata vata na nodra nanuma vakayalo kei na veivakayarayarataki ni Yalo Tabu.” (Veivakavulici ena iVakarau ni iVakabula, 11.)

tabana ni itaviqaravi: Ena gauna e kerei au kina na Turaga meu solibula, au rawa ni talairawarawa ena vakabauta