Veisaqa o Ilaija kei ira na Bete i Peali, mai vei Jerry Harston

27 ni June–3 ni Jiulai

1 Tui 17–19

“Kevaka sa Kalou ko Jiova, Muri Koya”

Ni o wilika na ivolanikalou, o sa cakacakataka tiko na vakabauta, ka vakarautaka na yalomu kei na nomu vakasama mo rogoca na “domo lailai” ni Yalo (1 Tui 19:12).

Vola na Veika o Vakauqeti Kina

Era sa veiseyaki na yavusa i Isireli Sa oti edua na gauna balavu nodrau veivakaduavatataki o Tevita kei Solomoni, e vuqa vei era sa yawaki ira mai na nodra veiyalayalati kei na Turaga Sa tawase na Matanitu o Isireli, e tini na mataqali era sa vakaduria na Matanitu ena Vualiku o Isireli ka rua na mataqali erau vakaduria na Matanitu ni Ceva o Juta. Erau yamekemeke vakayalo na matanitu ruarua, ka ra liutaki mai vei ira na tui era voroka na nodra veiyalayalati kei na Turaga ka vakayarayarataki ira eso tale me ra cakava vakakina (raica na 1 Tui 11–16). Ia sa kaukauwa cake sara vakalevu na vukitani ena Matanitu ena Vualiku, na vanua e vakayaloqaqataki Isireli kina na Tui o Eapi me qarava na kalou lasu o Peali.

Ena ituvaki oqo a kacivi kina o Ilaija na parofita me vunau. Na itukutuku ni nona veiqaravi vakalotu e vakamatatataka ni vakabauta yadua vua na Turaga e rawa ni buroro ena kedra maliwa na yalododonu ena veivanua ca sara mada ga. Ena so na gauna e dau sauma na Turaga na vakabauta vakaoqo ena cakacaka mana lelevu, me vaka na lutu ni bukawaqa mai lomalagi. Sa dau cakava talega o Koya na veicakacaka mana malua vakatamata yadua, me vaka na sotavi ni nona gagadre e dua na yada yalodina kei na luvena tagane. Ka vakavuqa ni vuqa na Nona cakamana era ka vakatamata yadua ka o ni na kila duadua ga o kemuni—me ivakaraitaki, ni sa vakatakilai koya na Turaga kei na lomana ena “domo lailai” (1 Tui 19:12).

Ena veika tale eso me baleti Ilaija, raica na “Elijah” ena Bible Dictionary.

Vakasama ni Vuli iVolanikalou ni Tamata Yadua

1 Tui 17: 1–16

Na veisureti ni solibula sa madigi ni kena cakacakataki na noqu vakabauta.

Taumada ena dredre beka ni da ciqoma na vuna a kerea kina na parofita o Ilaija vua na yada mai Sarifaci me solia vua na kakana kei na wai ni bera ni qai vakani rau kei na luvena tagane sa walokai tu ena viakana. Ia na kerekere nei Ilaija e rawa talega ni laurai me veivakalougatataki ki na matavuvale lailai oqo. Era gadreva na veivakalougatataki ni Turaga, ka ni solibula e dau kauta mai na veivakalougatataki—oka kina na veivakalougatataki ni vakabauta e kaukauwa cake.

Ni o wilika na italanoa oqo, biuti iko ena nona itutu na yada vakasakiti oqo. Na cava o taleitaka me baleti koya? Vakasamataka na madigi eso mo cakacakataka kina na nomu vakabauta—oka kina na madigi ni solibula. Ena rawa vakacava mo vakataka vakalevu cake na yada oqo?

Raica talega na Maciu 6:25–33; Luke 4:24–26; Lynn G. Robbins, “iKatini—e Dua na iVakaro Vei Ira Sara Mada Ga na Dravudravua,” Liaona, Me 2005, 34–36.

1 Tui 1–13

“Kevaka sa Kalou o Jiova, Muri Koya.”

Era a rairai nanuma beka na Isireli ni tu vei ira na iulubale vinaka me ra qaravi Peali e dina ga ni a vakarota na Turaga, “Me kakua vei iko na Kalou tani” (Lako Yani 20:3). A kilai tu o Peali me Kalou ni cava kei na uca, ka ni oti e tolu na yabaki ni lauqa, era a gadreva vakalevu sara ga e dua na cava. Sa ciqomi vakavinaka ka vakadonui mai vei rau na tui kei na ranadi na qaravi Peali. Ni o wilika na 1 Tui 18, vakasamataka e dua na ituvaki ni nomu bula e rawa ni vakatauvatani kei na ituvaki era a tiko kina na Isireli. O dau raici iko beka ni o lomalomarua ena muria na Turaga baleta ni vakaibalebale ka veisureti na veika duatani tale eso? (raica na 1 Tui 18:21). Ena veika e yaco ena wase oqo, na cava o nanuma a saga tiko na Turaga me vakavulica vei ira na tamata me baleti Koya kei na veika baleti Peali? Na veika cava o sa sotava sa vakavulica vei iko na dina vata oqori?

Ena taleitaki beka me kilai na veika a tukuna ka cakava o Ilaija ena iwase oqo ka vakaraitaka na nona vakabauta na Turaga. Na cava o sa vulica mai vei Ilaija me baleta na vakabauta?

Raica talega na Josua 24:15; 2 Nifai 2:26–28; D. Todd Christofferson, “Digidigi kei na Yalayala” (Lotu e vuravura raraba ni itabagone qase cake, 12 ni Janu., 2020), ChurchofJesusChrist.org.

E dua na ivakatakilakila ivakataakarakara ni 1 Tui 19:11–12. Na Parofita, © Robert Booth Charles/Bridgeman Images

1 Tui 19:1–18

E vakavuqa ni dau vosa na Turaga ena sala malua, ka rawarawa.

Ena gauna e rogoca kina o Ranadi Jesipeli na veika a yaco vei ira na nona bete ena ulunivanua ko Kameli, a sega ni saumaki mai—ia a cudru. Ni rere me baleta na nona bula, a dro ki na lekutu o Ilaija ka laki vuni ena dua na qaravatu. E kea, ni sotava na galili kei na yalolailai, a sotava e dua na ka vata kei na Turaga ka duidui sara mai na ka a yaco ena ulunivanua o Kameli. Na cava e vakavulica vei iko na veika a sotava o Ilaija ena 1 Tui 19:1–18 me baleta na sala ena veitaratara kina kei iko na Turaga ena nomu gauna ni leqa? Vakasamataka vakatitobu na veigauna ena nomu bula o sa vakila kina na Domona. Na cava mo cakava mo ciqoma kina vakawasoma na Nona veidusimaki?

Vakasamataka vakatitobu na vosa kei na malanivosa e vakayagataki ena veitikina oqo ka vakamacalataka na sala e dau veivosaki kina kei keda na Turaga: ilamani 5:30; 3 Nifai 11:3–7; Vunau kei na Veiyalayalati 6:22–23; 8:2–3; 9:8–9; 11:12–14; 36:2.

Raica talega na Same 46:10; 1 Nifai 17:45; Russell M. Nelson, “Rogoci Koya,” Liaona, Me 2020, 88–92.

1 Tui 19:19–21

Na veiqaravi vua na Turaga ena liu mai na veiogaoga ni vuravura.

Ni taukena tu o Ilaisa e 12 na yadru vakaivua e vakaraitaka ni rairai e dua beka na tamata vutuniyau o koya. Na cava e vakauqeti iko me baleta na nona ivalavala e volai ena 1 Tui 19:19 – 21? Mo vakamuria vakacava na ivakaraitaki nei Ilaisa?

Raica talega na Maciu 4:18–22.

Vakasama baleta na Vuli iVolanikalou Vakamatavuvale kei na Lotu Vakamatavuvale

1 Tui 17:1–16.Na vidio “Elijah and the Widow of Zarephath” (ChurchofJesusChrist.org) kei na iyaloyalo ena ituvatuva oqo e rawa ni vukea na nomu matavuvale ena kena raitayaloyalotaki na itukutuku ena 1 Tui 17:1–16. Ni wiliki oti na veitikina ka raici na ivurevure eso oqo, sa rawa vei ira yadua na lewe ni matavuvale me ra vola na ivakarau ni bula vinaka e tu vua na yada. Na cava e kerea tiko na Turaga meda cakava meda vakaraitaka kina na noda vakabauta?

1 Tui 18.“O Ilaija kei ira na bete i Peali” (ena italanoa ni Veiyalayalati Makawa) ena rawa ni vukea na nomu matavuvale mera vulica na italanoa ena 1 Tui 18. E tiko beka eso na ka e tarovi keda meda yalodina tiko vua na Turaga? E rawa vakacava ni da vakaraitaka na noda lomasoli me da digitaki Koya? (raica na tikina e 21).

1 Tui 19:11–12Na cava ena vukea na nomu matavuvale me kila vakavinaka na bibi ni vakarorogo ki na “domo lailai”? E rawa ni o ni wilika vata na 1 Tui 19:11–12 ena dua na domo malumu se lagata vakamalua e dua na sere me baleta na Yalo, me vaka na “The Holy Ghost” (Nodra iVolanisere na Gonelalai,105). Sa rawa mo kuria eso na domo veivagolei tani eso me vakaraitaka na sala dau tovolea kina o Setani me tarova noda rogoca na domo malua, lailai. Ena rawa beka ni ra wasea na lewe ni matavuvale na veika era dau cakava mera rogoca kina na veivakauqeti ni Yalo.

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “The Holy Ghost,” Nodra iVolanisere na Gonelalai,105

Vakatorocaketaki ni Vuli ni Tamata Yadudua

Vola na veika o vakauqeti kina Ni o vakila na vosa ni Yalo vei iko, vakasamataka mo vola na veika o vakila ni tukuna tiko vei iko. Na vakanananu ena rawa kina mo vakavosataka na veivakauqeti oqo e rawa ni vukei iko mo vakasamataka vakatitobu ka vakamareqeta.

Yada mai Sarifaci, mai vei Rosi Datoc Dall