era biubiu na tamata mai na koro sa vakacacani

Nodra Dro na Kaivesu, mai vei James Tissot kei na so tale

11–17 ni Julai

2 Tui 17–25

“Sa Vakararavi ko Koya vei Jiova na nodra Kalou na Isireli”

Ni o tuvalaka na itaviqaravi ni vuli me baleti ira na gone sobu, mo nanuma ni itaviqaravi nodra na gone sobu ena ituvatuva oqo e rawa ni moici me ganiti ira na gone qase cake, se kena veibasai.

Vola na Veika o Vakauqeti Kina

ivakatakilakila ni veiwasei

Sureta na Veiwasei

Vola na yacadra yadua na gone ena dua na tiki ni pepa, ka biuta na pepa ena dua na koniteina. Ena itekivu ni kalasi, me ra veivukevuke na gone ena kena digitaki e dua na yaca. Ni digitaki e dua na yaca ni gone, sureta na gone oya me wasea e dua na ka se qai vulica oti ga oqo me baleta na kosipeli se o Jisu Karisito. Me caka tikoga me yacova ni ra sa vakaitavi kece na gone ena veiwasei.

ivakatakilakila ni veivakavulici

Vakavulica na iVunau: Gone Sobu

2 Tui 18:3, 5

Au rawa ni vakararavi vua na Tamada Vakalomalagi kei Jisu Karisito.

Na ivakaraitaki nei Esekaia ena 2 Tui 18:3, 5 e rawa ni vukei ira na gone o vakavulica me ra vakararavi vua na Kalou.

iTaviqaravi e Rawa ni Caka

• Cavuta e vica na ka e rawa ni cakava e dua na tui vinaka kei na so na ka e rawa ni cakava e dua na tui ca. Kerei ira na gone me ra tucake ka marautaka na veika vinaka ka dabe sobu ena veika ca. Vakamacalataka vei ira na gone ni o Isireli a levu na kena tui, eso era a ivalavala dodonu ka so e sega. Sureti ira na gone me ra vakarogoca se cava a vakavuna me tui vinaka kina ko Esekaia ni o wilika na 2 Tui 18:3, 5. Vukei ira me ra vakasamataka na sala eso eda rawa ni vakaraitaka kina na noda vakararavi vua na Turaga me vaka a cakava ko Esekaia.

• Vukei ira na gone me ra kila vinaka na ibalebale ni nuitaka e dua. Tukuna na veika baleti ira na tamata o nuitaka, ka me ra vakayacora talega vakakina o ira na gone. Vakaraitaka e dua na iyaloyalo kei Jisu Karisito. Na cava na vuna e rawa ni da nuitaki Jisu Karisito kina? Vakaraitaka na nomu veivakabauti ni lomani keda o Jisu Karisito ka na vukei keda meda lesu tale ka bula tawamudu vata kei na Tamada Vakalomalagi.

2 Tui 22:8–11; 23:2

Na ivolanikalou era sa vu ni veivakalougatataki.

E dina ga ni ra sega ni rawa ni wilika se kila na veika kece ena ivolanikalou na gone sobu, e rawa ni ra vakalougatataki ena kaukauwa ni ivolanikalou. Na cava o rawa ni cakava mo vukei ira kina me ra gadreva me ra vakalougatataki ena vosa ni Kalou?

iTaviqaravi e Rawa ni Caka

• Vunia e dua na ilavelave ni ivolanikalou ena dua na vanua ena loma ni rumu, ka sureti ira na gone me ra vakasaqara. Vakamacalataka ni ena gauna nei Josaia na tui, e vuqa vei ira na tamata era a sega ni vuli mai na ivolanikalou me yacova ni a kunei ira e dua na bete ena valetabu (raica na 2 Tui 22:8–11). Na cava na ivolanikalou? Na cava eda gadreva kina na ivolanikalou? Tukuna vei ira na gone na vuna o marautaka kina ni tiko vei keda na ivolanikalou ni kua, ka vakatara me ra wasea na nodra nanuma me baleta na ivolanikalou.

• Wilika na 2 Tui 23:2 vei ira na gone, ka kerei ira mera vakarogoca na ka a cakava na tui ki na ivolanikalou. Na cava a bibi kina vei ira kece me ra rogoca na veika a volai tu ena ivolanikalou? Lagata e dua na sere me baleta na ivolanikalou, me vaka na “Vaqaqra ka Masu” (iVolanisere ni Gonelalai, 66), ka kerei ira na gone me ra veitalanoataka na veika era vakila ni ra rogoca na ivakavuvuli kei na italanoa mai na ivolanikalou.

  e vulica tiko na ivolanikalou na matavuvale

  Na ivolanikalou e rawa ni vukea me vagolei na lomada vua na Turaga.

ivakatakilakila ni veivakavulici

Vakavulica na iVunau: Gone Qase Cake

2 Tui 18:3–6; 19:14–19

Au rawa ni vakararavi vei Tamada Vakalomalagi kei Jisu Karisito.

Ni ra mai vakarerei Jerusalemi na kai Asiria, sa gole na tui buladodonu ko Esekaia vua na Turaga ena vakabauta. Na ivakaraitaki nei Esekaia ena rawa ni vukei iko kei ira na gone me veivosakitaki na sala e rawa ni da vakaraitaka kina na noda vakabauta na Turaga, ena gauna mada ga e bolei kina na vakabauta o ya.

iTaviqaravi e Rawa ni Caka

• Ena vakayagataki ni mape 3 ni iVolatabu, “Nodra Tatawasewase na Yavusa e 12,” vakamacalataka vakalekaleka vei ira na gone ni a vakamalumalumutaki na Matanitu ena Vualiku kei Isireli mai vei ira na tamata era vakatokai na kai Asiria. Vakamacalataka ni ra a qai tovolea e muri na kai Asiria me vakamalumalumutaki Juta na Matanitu ena Ceva. Sureti ira na gone me ra raitayaloyalotaka na veika era na vakila ke ra a bula tiko e Juta ka kila ni ra sa lako tiko mai na kai Asiria me vakarusa na siti. Kerei ira na gone me ra wilika na 2 Tui 18:3, 5–6 me ra raica na vuna a yaloqaqa kina ko Esekaia, na tui Juta, ni ra sa yaco yani na kai Asiria.

• Sureti ira na gone me ra wilika na 2 Tui 19:14–19, ka vakaraica na veika a vakayacora ko Esekaia ni ra veivakarerei ki na nona matanitu na kai Asiria. E vakaraitaka vakacava na nona vakayacora na veika oqo ni vakararavi tiko vua na Turaga? Na cava e rawa ni da cakava me da vakaraitaka kina na noda vakararavi vua na Turaga ni da gadreva na veivuke?

2 Tui 22:8–13; 23:2–3

E vakavulica vei keda na ivolanikalou na sala me da muri Jisu Karisito kina.

Ni oti e vica na yabaki ni butobuto vakayalo, era a vakavouya na Jiu na nodra yalodina vua na Turaga. A yaco oqo baleta ni o Josaia na tui a mai kunea tale na ivola ni lawa ka wilika vei ira na tamata. Na itukutuku oqo e rawa ni vukei ira na gone me ra kila na vuna e yaga sara kina vakalevu na ivolanikalou.

iTaviqaravi e Rawa ni Caka

• Tukuna vei ira na gone ni a tukuna vei ira na nona tamata o Josaia na tui me ra vakavinakataka na valetabu, ia ni ra sa vakayacora vakakina, era sa kunea e dua na ka e yaga sara vakalevu. Sureti ira na gone me ra wilika na 2 Tui 22:8–11 me kila kina se cava na ka o ya. Vakamacalataka ni ivola era a kunea e tu kina na veiyalayalati kei na ivakaro era a sega tu ni kila na luvei Isireli. Na cava beka ena yaco vei keda ke sega vei keda na ivolanikalou? Taroga vei ira na gone na vuna era vakavinavinakataka kina ni tiko vei ira na ivolanikalou. Na cava na vuna ena dredre kina meda muria na iVakabula kevaka e sega vei keda na ivolanikalou?

• Solia vei ira yadua na gone e dua na tiki ni pepa, ka kerei ira me ra basuka. Vakamacalataka ni ena gauna nei Tui Josaia, era dau basuka na tamata ena so na gauna, se “dresulaka,” na nodra isulu ni ra rarawa. Kerei ira na gone me ra vakasaqara na vosa “dresulaka” ena 2 Tui 22:11. Na cava e rawa ni a rarawa kina o Josaia? Vukei ira na gone me ra kunea e dua na isaunitaro ena tikina e 13. Na cava na vuna e bibi kina vei keda meda wilika na ivolanikalou e veisiga?

• Wilika vata na 2 Tui 23:2–3 ka kerei ira na gone me ra vakaraica na kena a vukei Josaia kei ira na nona tamata na ivolanikalou. Wasea vei ira na gone e dua na ivolanikalou ka sa vakauqeti iko mo “muri Jiova” (tikina e 3), ka sureti ira na gone me ra wasea na ivolanikalou ka a vukei ira. Lagata vata “I Will Walk with Jesus” (ChurchofJesusChrist.org).

2 Tui 23:3

Au na maroroya na noqu veiyalayalati kei na Kalou.

Ni ra vulica o Josaia kei ira na nona tamata na ivakaro ni Kalou, era sa vakayacora e dua na veiyalayalati me ra bulataka. E rawa ni o vukei ira na gone o vakavulica me ra gadreva me ra yalodina tikoga ki na veiyalayalati era a vakayacora ena papitaiso.

iTaviqaravi e Rawa ni Caka

• Sureti ira na gone me ra wilika na 2 Tui 23:3 ka vaqara na vosa se malanivosa e vakaraitaka na nodra nanuma na tamata me baleta na ivakaro ni Turaga. Sureti ira me ra tucake ka veivosakitaka na cava e rawa ni kena ibalebale me da “[tutaka] na veiyalayalati.” Sureti ira mera taubale ena vanua era duri tu kina ka veivosakitaka se cava e rawa ni ibalebale “ni ra na muri Jiova.” Sureti ira me ra biuta na ligadra e utodra ka vakatura na sala eso e rawa ni da muria kina na ivakaro “ena [lomada] taucoko.”

• Vukei ira na gone me ra cakava e dua na lisi ni yalayala era a vakayacora ena papitaiso (raica na Mosaia 18:10; Vunau kei na Veiyalayalati 20:37, 77, 79). Na cava e yalataka vei keda na Kalou kevaka eda maroroya na noda veiyalayalati? Na cava eda vulica mai na 2 Tui 23:3 me baleta na ivakarau ni noda maroroya na noda veiyalayalati?

ivakatakilakila ni vuli

Vakauqeta na Vuli e Vale

Sureti ira na gone me ra wasea vua e dua na lewe ni matavuvale e dua na tiki ni ivolanikalou se dua na italanoa mai na ivolanikalou ka sa vakalougatataki ira.

Vakatorocaketaki ni Noda Veivakavulici

Tara cake na nodra yalodei na gone. E dua na sala me vukei ira na gone ena nodra rawata na yalodei sai koya me ra vakacaucautaki ni ra vakaitavi ena kalasi. Yalataka vei ira na gone ni na vukei ira na Yalo Tabu ni ra vuli tiko.

tabana ni itaviqaravi: Na ivolanikalou era vu ni veivakalougatataki