Esiteri, mai vei James Johnson

25–31 ni Julai

Esiteri

“De Ko sa Yaco Beka … ena Vuku ni Gauna Oqo”

Na ivolanikalou taucoko e vakadinadinataki Jisu Karisito. Vakasamataka vakatitobu na sala o na vukei ira kina na gone me ra raica na veivakayarayarataki ni iVakabula ena italanoa kei Esiteri.

Vola na Veika o Vakauqeti Kina

Sureta na Veiwasei

Pasitaka wavoki vei ira na gone e dua na iyaloyalo kei Esiteri (raica na ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale. Ni ra taura tu na gone na iyaloyalo, sureti ira me ra wasea e dua na ka era kila me baleta na italanoa kei Esiteri.

Vakavulica na iVunau: Gone Sobu

Esiteri 2:5–7

Au rawa ni qarava na noqu matavuvale.

Ni rau sa mate na itubutubu nei Esiteri, sa qai susugi koya o Moatekai na tavalena. E rawa ni o vakayagataka na veika era sotava me madigi ni veitalanoataki na veika baleta na nodra qaravi na lewe ni noda matavuvale.

iTaviqaravi e Rawa ni Caka

• Ena papa ni volavola, droinitaka na iyaloyalo eso e matataki Esiteri, na nona itubutubu, kei Moatekai na tavalena. Vakamacalataka ni nodrau mate na itubutubu nei Esiteri, sa gadrevi kina e dua me susugi koya. Wilika na Esiteri 2:7 vei ira na gone, ka kerei ira na gone mera vakarogoca na ka a vakayacora o Moatekai. Vukei ira na gone me ra vakasamataka na gagadre eso ka rawa ni tiko vei ira na lewe ni nodra matavuvale ka rawa ni ra veivuke kina na gone.

• Sureta eso na gone me ra matanataka e dua na ka e rawa ni ra cakava ena yalololoma me ra qarava kina e dua ena nodra matavuvale, ka kerei ira na vo ni gone me ra vakilakila se cava era cakava tiko. Sureti ira me ra veivosakitaka na veika era dau cakava me ra vakalougatataka kina na nodra matavuvale, ka tukuna eso na ka o dau cakava.

• Lagata e dua na sere baleta na veivuke ena noda matavuvale, me vaka na “Ni Da Dau Veivuke Tu” (iVolanisere ni Gonelalai, 108b). Wasea na nomu ivakadinadina ni noda vukei ira na noda matavuvale ena vakamarautaki keda.

Esiteri 4:15–16

Au rawa ni yaloqaqa.

Era na sotava na gone o vakavulica na ituvaki eso era na gadreva kina na veivuke ni Turaga me yaloqaqa. O na vukei ira vakacava mera vuli mai na ivakaraitaki ni yaloqaqa nei Esiteri.?

iTaviqaravi e Rawa ni Caka

• Era kila beka na gone o vakavulica na ibalebale ni yaloqaqa? Wasea e dua na kena ibalebale rawarawa, me vaka na “Yaloqaqa sai koya na vakayacori ni veika dodonu ena gauna mada ga o rere kina.” Wasea na italanoa kei Esiteri (raica na “Ranadi o Esiteri” ena iTalanoa ni Veiyalayalati Makawa), ka vukei ira na gone me ra raica na nona yaloqaqa o Esiteri. Me ra vakayagataka na gone na droini ena tabana ni itaviqaravi ni macawa oqo mera talanoataka tale kina na italanoa.

• Vakaraitaka e dua na iyaloyalo kei Esiteri (raica na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale). Lagata e dua na sere vata kei ira na gone me baleta na yaloqaqa, me vaka na “Meu Dina Tu” (iVolanisere ni Gonelalai, 85). Dusia na vosa kei na malanivosa ena sere e vakamacalataki Esiteri, ka vakadinadinataka ni sa rawa ni vukei ira na gone na iVakabula me ra yaloqaqa.

• Tukuna vei ira na gone na gauna a yaloqaqa kina o Jisu Karisito; me kena ivakaraitaki, ena gauna a vakararawataki kina ena vuku ni noda ivalavala ca, mai Kecisemani kei na kauveilatai (raica na Maciu 26:36–39; 27:33–35). Kerei ira na gone me ra talanoataka e dua na gauna era a yaloqaqa kina (vakasamataka mo veitaratara taumada kei na nodra matavuvale me rawa ni ra tarogi ena so na ivakaraitaki). Na cava a vukei ira mera yaloqaqa? Tukuna vei ira na gone na sala sa vukei iko kina na Turaga mo yaloqaqa ni ko a rere.

  

  Esiteri e Matana na Tui, mai vei Minerva Teichert

Vakavulica na iVunau: Gone Qase Cake

Esiteri 4:14

E rawa niu iyaya ni cakacaka ena liga ni Kalou.

Ni sa rere o Esiteri, a vakayaloqaqataki koya o Moatekai ena nona vakavulica vei koya de rairai a vakavuna vua me ranadi na Turaga “ena vuku ni gauna oqo” (Esiteri 4:14). Vakasamataka vakatitobu na sala e vakarautaki ira tiko kina na gone o vakavulica na Turaga ena nodra madigi me vakalougatataki ira na tani.

iTaviqaravi e Rawa ni Caka

• Sureta e dua me qiria e dua na sere vei ira na gone ena dua na iyaya ni vakatagi, se vakaraitaka e dua na iyaloyalo ni dua e qiria tiko e dua na iyaya ni vakatagi. Veivosakitaka se cava na kena ibalebale meda dua na iyaya ni cakacaka ena liga ni Kalou. Railesuva vata kei ira na gone na italanoa kei Esiteri (raica na “Ranadi o Esiteri” ena iTalanoa ni Veiyalayalati Makawa), ka sureti ira me ra veivosakitaka na sala a iyaya ni cakacaka kina o Esiteri vua na Turaga me rawati na Nona inaki. E rawa vakacava me da iyaya ni cakacaka vua na Turaga?

• Ni oti na kena railesuvi na italanoa kei Esiteri, vakabira e dua na kadi kei na yacana e dua mai na italanoa ena daku ni gone yadua. Sureti ira na gone me ra tovolea me ra kila se yaca i cei ka tiko e dakudra ena nodra tarogi ira na vo ni gone ena taro me vaka “E a tamata ivalavala dodonu beka o koya?” se “E a yalewa beka o koya?” Qai veivosakitaka na sala erau a iyaya ni cakacaka kina vua na Turaga o Moatekai kei Esiteri me vakabulai ira na Jiu.

Esiteri 3:1–11; 4:10–17

E dau vukei au na Tamada Vakalomalagi meu yaloqaqa niu dau rere.

Na gauna cava o sa bau raici ira kina na gone o vakavulica me ra yaloqaqa? Na veika cava o sa sotava e rawa mo wasea ena gauna o a gadreva kina na veivuke ni Turaga me yaloqaqa?

iTaviqaravi e Rawa ni Caka

• Vola ena papa O Moatekai a vakaraitaka na yaloqaqa ena … kei Esiteri a vakaraitaka na yaloqaqa ena … Sureta eso na gone me ra wilika na Esiteri 3:1–11 kei na so tale me ra wilika na Esiteri 4:10–17. Kerei ira mera vakayagataka na veika era sa wilika mera vakacavara kina na yatuvosa ena vava ni volavola. Mo qai vola Au na yaloyaloqaqa niu … ka sureti ira na gone me ra vola na veika e vinakata na Tamada Vakalomalagi me ra cakava ka na gadrevi kina na yaloqaqa. E rawa vakacava ni da vakataki Moatekai kei Esiteri?

• Sureti ira na gone me ra vakasamataka na ituvaki eso era sotava ka na dredre kina na cakava na ka dodonu. Vola ena vava ni volavola na vosa ni yaloqaqa nei Esiteri “Ia kau na qai lako ga vua na tui, … ia kevaka kau sa mate, au na mate ga” (Esiteri 4:16). Vukei ira na gone me ra vakayagataka na vosa nei Esiteri ena nodra vakaisosomitaka na “lako vua na tui” kei na dua na digidigi dodonu ia e dredre e rawa ni ra na cakava. Mo qai sureti ira mera vakaisosomitaka na “mate” kei na dua na ka e sega ni vinaka ka na rawa ni yaco ni vakayacori na ka dodonu. Na cava na vuna e vinaka cake kina me da cakava na ka dodonu, kevaka sara mada ga ena dredre na kena revurevu?

• Vakaraitaka na vidio “Choose the Harder Right” (ChurchofJesusChrist.org), ka sureti ira na gone me ra vakatulewa ena “dodonu dredre” ni nodra bula era na digitaka. Veiwaseitaka ni ivakaraitaki vinaka vakacava ni ivakavuvuli oqo o Jisu Karisito. 

Esiteri 4:1–3, 10–17

Na Lolo e rawa ni vukei au ka vakalougatataki ira na tani.

Ena gauna ni leqa, era a lolo o Esiteri kei ira na Jiu. O rawa ni vukei ira vakacava na gone o vakavulica me ra kila vakavinaka na veivakalougatataki vakayalo ni lolo?

iTaviqaravi e Rawa ni Caka

• Sureti ira na gone me ra vola e dua na ituvatuva ni veika e rawa ni ra lolovaka (kevaka e gadrevi, e rawa ni ra raica na “Lolo kei na iSolisoli ni Lolo” ena Tudei ena Vakabauta, 66–69). Qai kerei ira mera wilika na Esiteri 4:1–3, 10–17 mera raica kina na vuna era a lolo kina o ira na Jiu kei Esiteri. Vakauqeti ira na gone me ra vakasamataka e dua na vuna era na gadreva beka kina na veivuke digitaki mai vua na Turaga, ka vakatura me ra cakava na inaki o ya me tiki ni nodra lolo ena Sigatabu ni lolo ka tarava.

• Sureti ira na gone me ra matanataka ni ra vakamacalataka tiko vua e dua na itokani na vuna era lolo kina. Na cava mera na kaya? Dusimaki ira ki na iDusidusi ki na iVolanikalou, “Lolo” (scriptures.ChurchofJesusChrist.org) kevaka era gadreva na veivuke. Wasea e dua na gauna o a lolo kina mo ciqoma na veivuke ni Turaga. Sureti ira na gone me ra wasea na veika eso era sa sotava ena lolo.

Vakauqeta na Vuli e Vale

Lagata vata e dua na sere me baleta e dua na ivakavuvuli o vulica ena kalasi nikua (raica na ituvatuva ni ulutaga ena nodra iVolanisere ni Gonelalai me baleta na vakasama eso). Sureti ira na gone me ra lagata vata kei na nodra matavuvale na sere.

Vakatorocaketaki Noda Veivakavulici

Bulataka na ka o vakavulica. Ena mana cake nomu ivakavuvuli kevaka e rawa ni o vakadinadinataka mai na veika o sa sotava na veivakalougatataki ni kena bulataki na kosipeli. Ena nomu digitaka na ivakavuvuli me na vakavulici vei ira na gone, vakananuma na sala e rawa mo bulataka vakavinaka cake kina na ivakavuvuli oqori. (Raica na Veivakavulici ena iVakarau ni iVakabula, 13–14.)