na valetabu i Serupapeli

Droini ni valetabu i Serupapeli, mai vei Sam Lawlor

18–24 ni Julai

Esera 1; 3–7; Niemaia 2; 4–6; 8

“Au Sa Kitaka Tiko e dua na Cakacaka Levu”

Ni o vuli tiko, vakasamataka se na itukutuku cava nei Esera kei Niemaia e gadrevi vakalevu sara o ira na gone o vakavulica. Cakava e dua na ituvatuva ni veivakavulici ka oka kina na veivakauqeti o ciqoma mai vua na Yalo Tabu.

Vola na Veika o Vakauqeti Kina

ivakatakilakila ni veiwasei

Sureta na Veiwasei

Vola ena papa Serupapeli, Esera, kei na Niemaia. Droinitaka se vakaraitaka eso na iyaloyalo ka sema ki vei ira na tamata oqo, me vaka e dua na valetabu, na ivolanikalou, kei na bai kei Jerusalemi. Vukei ira na gone me ra vakasotara vata na yaca kei na iyaloyalo, ka laiva me ra wasea na veika era kila me baleta na veika era a cakava na tamata oqo.

ivakatakilakila ni veivakavulici

Vakavulica na iVunau: Gone Sobu

Esera 3:8–13

Na valetabu e rawa ni kauta mai vei au na reki.

Na itukutuku kei Serupapeli kei ira na Jiu e na taraicake tale ni valetabu e rawa ni vukei ira na gone o vakavulica me ra rekitaka na veivakalougatataki e yaco mai ena vuku ni vale ni Turaga.

iTaviqaravi e Rawa ni Caka

• Sureti ira na gone mera veivosakitaka na veika e dau vakamarautaki ira. Vakaraitaka e dua na iyaloyalo ni dua e matadredredre tu e mata ni dua na valetabu (me vaka na iyaloyalo ena ituvatuva oqo), ka tarogi ira na gone se cava na vuna e marau kina vakalevu na tamata o ya. Vakadinadinataka ni valetabu sa vale ni Turaga, ka talanoataka e dua na gauna o a vakila kina na marau ena vuku ni valetabu.

• Wilika vei ira na gone na iotioti ni tikina ena Esera 3:12, ka vakamacalataka ni gauna era a vakadavora kina na Jiu na yavu ni valetabu, “e lewe vuqa era a kaila vakadomoilevu ena marau.” Sureti ira na gone me ra kaila ena marau. Vukei ira me ra vakasamataka eso na vuna e rawa me da marau kina ena vuku ni valetabu. Me ivakaraitaki, ena loma ni valetabu eda vakayacora na veiyalayalati vata kei na Kalou me vakatara ki na noda matavuvale me tiko vata me tawamudu.

• Lagata vata kei ira na gone e dua na sere baleta na valetabu, me vaka na “Raica na Valetabu” (iVolanisere ni Gonelalai, 99). Ni oti e dua na laini, cegu mo kerea e dua na gone me wasea e dua na ka e taleitaka me baleta na valetabu.

  matavuvale e taubale tiko e lomanibai ni valetabu

  Na valetabu e rawa me dua na ivurevure ni reki ki na noda bula.

Niemaia 2:17–20; 6:1–9

Na Turaga ena vukei au meu vakayacora na Nona cakacaka.

Ni sa vakavinakataka tiko mai o Niemaia na bai kei Jerusalemi, era a tovolea na nona meca me ra tarova, ia a yalodina tikoga ki na nona itavi. Na cava eso na ka bibi e vinakata na Turaga vei ira na gone me ra cakava, kei na sala e rawa ni o vakauqeti ira kina me ra yalodina tiko ga ki na cakacaka o ya?

iTaviqaravi e Rawa ni Caka

• Wasea vei ira na gone na italanoa kei Niemaia (raica na Niemaia 2:17–20; 6:1–9; Dieter F. Uchtdorf, “We Are Doing a Great Work and Cannot Come Down,” Liahona, May 2009, 59–62).). Tukuna vei ira na gone na ka a kaya o Niemaia ni ra vakalialiai koya na tamata ni vinakata me vakavinakataka na bai kei Jerusalemi: “Na Kalou kei lomalagi, ena vakayacora na ka keimami sa cakava; o koya keimami na viri bai koi keimami na nona tamata” (Niemaia 2:20). Sureti ira na gone me ra tucake ka vakatotomuria me veivuke ena vakavinakataki ni bai kei Jerusalemi.

• Kauta mai eso na buloko ki na kalasi, ka me ra vakayagataka na gone me ra vukei iko ni tara e dua na bai (se droinitaka e dua na bai ena papa). Vukei ira na gone me ra vakasamataka eso na ka bibi e rawa ni kerei ira kina na Tamada Vakalomalagi me ra cakava, me vaka na vulici ni iwalewale ni kena wiliki na ivolanikalou. Ena vei vakasama yadua era wasea, sureti ira me ra vakuria e dua na buloko ki na bai. Vakamacalataka ni gauna a cakava tiko kina o Niemaia na cakacaka bibi ni kena vakavinakataki na bai kei Jerusalemi, era a tovolea na tamata me ra tarovi koya. Wilika na Niemaia 6:9, ka sureti ira na gone me ra laveta na ligadra ni o wilika na “mo ni vakaukauwataka na ligaqu.” Tukuna vei ira na gone me baleta e dua na gauna o a vakila kina ni Kalou a vakaukauwataka na ligamu mo cakava na Nona cakacaka.

Niemaia 8:1–12

Na ivolanikalou era sa vu ni veivakalougatataki.

E rawa ni o vakayagataka na italanoa kei Esera ni wilika tiko na lawa me vukei ira na gone me ra vakasamataka na noda sa vakalougatataki me tu vei keda na ivolanikalou.

iTaviqaravi e Rawa ni Caka

• Tukuna vei ira na gone ni o Esera a wilika na ivolanikalou vei ira na tamata. Wilika e cake eso na malanivosa mai na Niemaia 8:2–3, 5–6, 8–9, 12 e vakamacalataka na veika era cakava na tamata ni ra rogoca na ivolanikalou, ka sureti ira na gone me ra matanataka na veimalanivosa oqo. Na cava na vuna eda vakavinavinaka kina ni tu vei keda na ivolanikalou?

• Sureti ira na gone mera rokataka na tabana ni itaviqaravi ni macawa oqo. Ni ra cakava oqo, wasea vei ira na gone na sala sa kauti iko vakavoleka mai kina vua na iVakabula na nomu dau wilika na ivolanikalou.

ivakatakilakila ni veivakavulici

Vakavulica na iVunau: Gone Qase Cake

Esera 3:8–13; 6:16–22

E solia vei au na valetabu na vuna eso meu marau kina.

Ni o railesuva vata kei ira na gone na italanoa kei Serupapeli kei ira na Jiu ena tarai cake tale ni valetabu, raica na sala eso mo vakadinadinataka kina na reki e yaco mai vei keda baleta ni tu na noda valetabu ni kua.

iTaviqaravi e Rawa ni Caka

• Sureti ira na gone me ra cakacaka vata me vaqarai na veimalanivosa ena Esera 3:10–13 e vakaraitaka na cava era a vakila na Jiu ni sa mai tara cake tale na valetabu e Jerusalemi. E rawa vakacava ni da vakaraitaka na noda reki ena kena sa tu na veivaletabu e vuravura nikua? Vukei ira na gone mera vakasamataka na sala eso era rawa ni vakavakarau kina me ra gole ki na valetabu ena dua na siga.

• Wasea vei ira na gone na veika o vakila me baleta na valetabu. E sa vukei iko vakacava na valetabu mo vakila ni o voleka vua na Tamada Vakalomalagi kei na iVakabula? Na cava na vuna eda marautaka kina ni sa vakatabui e dua na valetabu? Solia na gauna vei ira na gone me ra vola na veika era vakila me baleta na valetabu, ka vakauqeti ira me ra wasea na veika era vola vata kei na nodra matavuvale.

Niemaia 2; 4; 6

Ena vakaukauwataki au na Turaga meu cakava “e dua na cakacaka levu.”

Sa tiko e dua na cakacaka bibi ni Turaga vei ira na gone o vakavulica. Na cava e rawa ni ra vulica mai vei Niemaia me baleta na vosota tiko ena cakacaka oya ena gauna mada ga era sotava kina na veisaqasaqa?

iTaviqaravi e Rawa ni Caka

• Railesuva vata kei ira na gone na italanoa kei Niemaia ena nona vakavinakataka na bai e vakavolivoliti Jerusalemi, oka kina na veisaqasaqa a sotava. Wilika vata na Niemaia 2:19, ka kerei ira na gone me ra wasea na ituvaki eso e rawa ni dredrevaki keda kina e dua ni da cakava tiko na ka dodonu. Me vaka na Niemaia 2:20, na cava a vakayacora lesu o Niemaia? Na cava eda na cakava ni ra dredrevaki keda se vakalewai keda na tamata ni da cakava tiko na ka dodonu?

• Wilika vata na Niemaia 6:1–9. Na sala cava a dau tovolea kina vakavuqa na meca i Niemaia me tarova na nona cakacaka ena bai, ka cava a qai vakayacora o koya? Na cakacaka cava e vinakata na Kalou meda cakava? (raica, me ivakaraitaki, na Mosaia 18:8–10). E rawa vakacava ni da muria na ivakaraitaki i Niemaia ena tikina e 9 ni sa dredre me da cakava na ka e kerea vei keda na Kalou?

Niemaia 8:1–12

Au sa vakalougatataki niu vulica na ivolanikalou.

O ira na tamata e Jerusalemi era a sega ni rogoca tu na vosa ni Kalou ena dua na gauna balavu ni bera ni qai mai wilika vei ira o Esera. Na italanoa kei Esera e vakananumi keda ena kena bibi vei keda na ivolanikalou.

iTaviqaravi e Rawa ni Caka

• Sureti ira na gone me ra vaqara ena Niemaia 8:1–12 na vosa se malanivosa e vakaraitaka na nodra nanuma na tamata ni ra rogoca na vosa ni Kalou. Kerei ira na gone me ra wasea na veika era vakila ni ra wilika na ivolanikalou, ka wasea talega na nomu nanuma.

• Sureta e dua na gone me wilika na Niemaia 8:8, ka taroga vei ira na gone se cava e vukei ira mera kila vakavinaka na ivolanikalou. Vakaraitaka vei ira na iwalewale ni kena vakayagataki na veivuke ni vuli ivolanikalou me vaka na iDusidusi ki na iVolanikalou kei na Ulutaga Vakosipeli (ChurchofJesusChrist.org). Sureti ira na gone me ra wasea e dua na ka era sa vulica me baleta na iVakabula mai na ivolanikalou.

ivakatakilakila ni vuli

Vakauqeta na Vuli e Vale

Sureti ira na gone me ra digitaka e dua na ka era sa vulica ni kua ka na vinakata me ra wasea ki na nodra matavuvale.

Vakatorocaketaki ni Noda Veivakavulici

Vakavakarau vakayalo. “Na veivakatavulici kaukauwa ni kosipeli e sega ni kena ibalebale walega na vakarautaki ni lesoni ia meda vakarautaki keda. … O ira na qasenivuli mana ni kosipeli—ni bera ni ra vakasamataka na vakaleweni ni gauna ni kalasi—era vakanamata ki na nodra vakasinaita na yalodra ena Yalo Tabu” (Veivakavulici ena iVakarau ni iVakabula, 12).

tabana ni itaviqaravi: Na ivolanikalou era sa vu ni veivakalougatataki