Vakaraitaka o Ilaisa na qiqi bukawaqa vei ira na dauveiqaravi

iYaloyalo kei Ilaisa ni vakaraitaka tiko vei ira na nona dauveiqaravi na qiqi bukawaqa, © Review & Herald Publishing/laiseni mai na goodsalt.com

4–10 ni Julai

2 Tui 2–7

“Ni Sa Dua na Parofita e Isireli”

Na itaviqaravi ena ituvatuva oqo e kena inaki me vakavurea na nomu vakasama ni bulibuli ka. Ena vuli masumasu, sa rawa mo ciqoma na veivakauqeti mo sotava na nodra gagadre na gone o vakavulica.

Vola na Veika o Vakauqeti Kina

ivakatakilakila ni veiwasei

Sureta na Veiwasei

Me ra vakayaloqaqataki na gone me ra wasea na veika era kila me baleta na parofita o Ilaisa, sureti ira me ra droinitaka na iyaloyalo ni dua ka a cakava.

ivakatakilakila ni veivakavulici

Vakavulica na iVunau: Gone Sobu

2 Tui 4–5

Na Kalou e rawa ni cakacaka mana ena noqu bula.

Na Turaga a vakalougatataka e vuqa na tamata ena sala veivakurabuitaki eso, mai vua na parofita o Ilaisa. Vukei ira na gone me ra kila rawa na cakamana ni Turaga ena nodra bula.

iTaviqaravi e Rawa ni Caka

• Wasea e dua se sivia na cakamana e volai tu ena 2 Tui 4–5 (raica na “Ilaisa na Parofita” kei na “Sa Vakabulai Neamani o Ilaisa” ena iTalanoa ni Veiyalayalati Makawa). Sureti ira na gone me ra wasea na veika era taleitaka baleta na italanoa eso oqo. Kerei ira me ra veitalanoataka tale vakai ira na italanoa.

• Vakadinadinataka ni sa rawa vua na Turaga me vakayagataka na Nona kaukauwa me vakayacora na veika lelevu me vukei keda. Eda vakatoka na veika oqo me cakacaka mana. Wasea na sala sa vakaraitaka kina na Turaga na nona loloma vei iko ena vei sala lelevu se lalai. Lagata kei ira na gone e dua na sere ni veibuli ni Kalou, vaka na “Rogoca na Sere ni Manumanu” (iVolanisere ni Gonelalai, 16). Kerei ira na gone me ra wasea na sala era kila vakacava kina ni lomani ira na Kalou.

2 Tui 5:1–15

Au rawa ni digitaka meu cakava na ka e vakarota na Kalou mai vua na nona parofita.

A sotava o Neamani e dua na gauna dredre me talairawarawa ki na ka a tukuna vua o Ilaisa na parofita baleta na sala me na vakabulai kina mai na vukavuka. Vakasamataka vakatitobu na sala e rawa ni o vukei ira kina na gone me ra kila na veivakalougatataki e lako mai ni da talairawarawa.

iTaviqaravi e Rawa ni Caka

• Talanoataka na italanoa kei Neamani (raica na 2 Tui 5:9–14; “Sa vakabulai Neamani o Ilaisa” ena iTalanoa ni Veiyalayalati Makawa; raica talega na iyaloyalo kei Neamani ena ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale). Vakabibitaka ni a sega ni vinakata taumada o Neamani me sili ena Uciwai na Joritani, e dina ga ni a tukuna vua o Ilaisa ni oqo ena vakabula na nona tauvimate. Talanoataka e dua na gauna o a sega ni vakadeitaka kina ni o vinakata mo cakava na ka dodonu, ka vukei ira na gone me ra vakasamataka na gauna eso a yaco kina vei ira. Qai wasea ni vakalougatataki vakacava o Neamani ni vakayacora na digidigi dodonu.

• Wilika na 2 Tui 5:13 vei ira na gone, ka vakamacalataka ni o ira na italai nei Neamani era vukei koya me vakatulewataka na nona talairawarawa vua na parofita o Ilaisa. Vukei ira na gone me ra vakasamataka na sala eso e rawa ni ra vukei ira kina na nodra itokani se lewe ni matavuvale me ra vakarorogo ka talairawarawa vua na parofita.

2 Tui 6:8–17

Na Turaga e wanonovi au tiko.

Ni sa raica na dauveiqaravi nei Ilaisa na mataivalu ni Siria ni ra vakavolivoliti rau tu, a sa rere vakalevu sara. Ia, a tukuna vua o Ilaisa me “kakua ni rere” baleta ni sa tiko vata kei rau na Turaga (2 Tui 6:16).

iTaviqaravi e Rawa ni Caka

• Wilika na 2 Tui 6:15 vei ira na gone, se vakayagataka na malanivosa eso me matata kina vei ira. Sureti ira na gone me ra raitayaloyalotaka ni ra vakavolivoliti mai na dua na mataivalu ose kei na qiqi ni ivalu levu, me vaka a yaco vua na dauveiqaravi nei Ilaisa. Na cava era na vakila? Na cava era na cakava? Kerei ira me ra bobo ni o wilika na 2 Tui 6:16–17 vei ira. Ni o sa yacova na vosa “dolava na matana,” Kerei ira na gone me ra dolava na matadra. Vakamacalataka vei ira na ka a raica na tamata dauveiqaravi ni taqomaki koya tu kei Ilaisa. Wasea na sala o kila kina ni sa wanonovi keda tiko na Turaga.

• Me lagati vata e dua na sere me baleta na nona kauwaitaki keda na Kalou, me vaka na imatai ni qaqa ni “Sa Voleka Na Kalou” (Sere ni Lotu, naba 49). Vakaisosomitaka na vosa ena sere kei na yacadra na gone me ra vakabibitaka ni sa wanonovi ira tiko na Kalou.

ivakatakilakila ni veivakavulici

Vakavulica na iVunau: Gone Qase Cake

2 Tui 4–5

Na Kalou e rawa ni cakacaka mana ena noqu bula.

O Ilaisa a vakabulai ira ka vakalougatataki ira e vuqa na tamata ena gauna ni nona veiqaravi. Ena rawa vakacava ni vukei ira na luvedra na Tamada Vakalomalagi na cakamana ena 2 Tui 4–5 me ra raica rawa kina na ligana ki na nodra bula?

iTaviqaravi e Rawa ni Caka

• Sureti ira na gone me ra vola ena vava ni volavola na levu ni cakacaka mana e rawa ni ra nanuma mai na ivolanikalou. Qai solia vei ira na gauna me ra railesuva kina na 2 Tui 4–5 ka kuria ki na nodra lisi (raica na 2 Tui 4:1–7, 14–17, 32–35, 38–41, 42–44; 5:10–14). Na cava era vakavulica na ivolanikalou oqo me baleta na loma ni Tamada Vakalomalagi baleti keda?

• Kerei ira na gone me ra veivosakitaka se na cava na cakamana. Kevaka era gadreva na veivuke, e rawa ni ra raicalesu na “Cakacaka Mana” ena iDusidusi ki na iVolanikalou (scriptures.ChurchofJesusChrist.org). Sureti ira mera wasea eso na cakamana a vakayacora o Jisu. Tukuna na sala o sa raica oti kina na kaukauwa ni Kalou ena nomu bula. E rawa ni o okata na cakamana ni veisiga me vaka na yalo vakacegu, na isolisoli ni bula e veisiga, se veivuke ena cakacaka ni veisiga. Sureti ira na gone me ra veivosakitaka na cakamana ena nodra bula, na veika lelevu kei na veika lalai.

2 Tui 5:1–15

Au rawa ni digitaka meu yalodina, yalomalumalumu, ka talairawarawa.

E a vinakata o Neamani me vakabulai mai na vukavuka, ia e sega ni namaka na veidusimaki rawarawa a solia vua o Ilaisa: “Mo ni laki sili vakavitu ena Joritani” (2 Tui 5:10). Vakasamataka na sala mo vakayagataka kina na italanoa oqo mo vakavulici ira kina na gone me baleta na vakabauti Jisu Karisito, na yalomalumalumu, kei na talairawarawa.

iTaviqaravi e Rawa ni Caka

• Vola na vakabauta, yalomalumalumu, kei na talairawarawa ena papa, ka tarogi ira na gone se cava na ibalebale ni veivosa oqo (raica na Tudei ena Vakabauta, 54–56, 86–87, 108–9). Sureti ira na gone me ra wilika na 2 Tui 5:9–14. E rawa ni ko vakaraitaka e tiki ni vidio ni “Naaman and Elisha” (ChurchofJesusChrist.org). E vakaraitaka vakacava o Neamani na vakabauta na Turaga, yalomalumalumu, kei na talairawarawa? Na cava e bibi kina vei au me tiko vei au na itovo rakorako eso oqo?

• Kerei ira na gone me ra talanoataka e dua na gauna a vukei ira kina e dua na itokani me ra digitaka na dodonu. Wasea talega e dua na ka o sa sotava vakai iko. Wilika vata na 2 Tui 5:10–13 me ra vulica kina na sala era a vukei Neamani kina na nona dauveiqaravi me talairawarawa vua na parofita. Na cava e rawa ni da cakava me da veivukei vakai keda me da muria na noda parofita ni kua?

• Sureti ira na gone me ra vakacavara na tabana ni itaviqaravi ka wasea vata kei na dua na lewe ni matavuvale se itokani e dua na ka era vulica mai na italanoa kei Neamani ena 2 Tui 5:1–15.

2 Tui 6:8–17

Au sega ni tu duadua.

O ira na gone o vakavulica era na vakila beka ena so na gauna ni ra vaka na italai nei Ilaisa–era sega ni kila na sala me sotavi kina na bolebole eso ka tu e matadra. E rawa ni o vakayagataka na itukutuku ena 2 Tui 6:8–17 me vakavulici ira me ra “kakua ni rere” baleta ni sega ni biuti ira taudua tu na Turaga.

iTaviqaravi e Rawa ni Caka

• Wilika vata na 2 Tui 6:15–17. Sureta e dua vei ira na gone me matataka na dauveiqaravi nei Ilaisa kei ira na vo ni gone mera taroga na veika a sotava, me vaka na ka a vakila ena gauna era sa wavolita kina na siti na mataivalu ni Siria se a vakacava sara mada na kena raici na mataivalu ni Kalou. Veitalanoa kei ira na gone baleta na gauna era galili kina ni ra tovolea me ra bulataka na kosipeli. E vukei keda vakacava na Turaga meda kila ni da sega ni tu duadua voli?

• Lagata e dua na sere me baleta na vakararavi vua na Turaga, me vaka na “Ni Tudei Na Vakabauta” (Sere ni Lotu, naba 70). Na cava e vakavulica vei keda na sere oqo baleta na vakararavi vua na Turaga?

ivakatakilakila ni vuli

Vakauqeta na Vuli e Vale

Sureti ira na gone me ra wasea na veika era sotava kei na nodra matavuvale ena nodra raica na liga ni Kalou ena nodra bula. Vakauqeti ira me ra kerea na lewe ni nodra matavuvale me wasea na veika vata vakaoqori.

Vakatorocaketaki Noda Veivakavulici

Era vuli na gone ena vuqa na sala. “Nomu sasaga mo vakavulici ira na gone ena mana vakalevu sara ni o vakayagataka e vica na iwalewale ni veivakavulici,” oka kina na italanoa, iyaloyalo, kei na sereivakatagi (Veituberi ena iVakarau ni iVakabula, 25).

tabana ni itaviqaravi: Au rawa ni digitaka meu cakava na ka sa vakarota na Kalou vei ira na Nona parofita