ibulubulu qara vatu kei na vatu vaqiqici tani mai katuba

iYaloyalo ni ibulubulu lala mai vei Maryna Kriuchenko

11–17 ni Epereli

Siganimate

“Ena Vakaotiya Sara na Mate Ko Koya”

Ni ko vakavakarau mo veivakavulici, tugana na sala e rawa ni o vukei ira kina na gone mera kilamatata vakatitobu na ivakadinadina ni Veisorovaki i Jisu Karisito.

Vola na Veika o Vakauqeti Kina

ivakatakilakila ni veiwasei

Sureta na Veiwasei

Kerei ira na gone na cava era cakava na nodra matavuvale me ra marautaka kina na Siganimate. Na cava era dau cakava me ra nanuma kina na Tucaketale nei Jisu Karisito?

ivakatakilakila ni veivakavulici

Vakavulica na iVunau: Gone Sobu

Sa noqu iVakabula o Jisu Karisito.

Na Sigatabu ni Siganimate e dua na gauna vinaka me vakavulici ira kina na gone me baleta na Veisorovaki ni iVakabula mai Kecisemani kei na Nona mate ena kauveilatai. Oqo ena vukea mera vakila na loloma nei Jisu.

iTaviqaravi e Rawa ni Caka

• Vakaraitaka na iyaloyalo ni iVakabula mai na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale se so tale na iyaloyalo ni solibula ni iVakabula (raica na Gospel Art Book, naba. 56, 57, 58) ka laivi ira na gone me ra wasea vata kei iko na veika era kila me baleta na veika yaco e vakaraitaki ena iyaloyalo. Tukuna vei ira na gone baleta na rarawa nei Jisu mai Kecisemani kei na kauveilatai (raica na Maciu 26:36–46; 27:35–50; Luke 22:39–46; Joni 19:16–30; “Wase 51: Vosota na Rarawa o Jisu ena Were o Kecisemani,” ena iTukuni ena Veiyalayalati Vou, 129–32). Wasea na nomu ivakadinadina ni o Jisu e tu vakarau me vakararawataki ka mate ena vukuda baleta ni lomani keda oKoya. Sureti ira na gone me ra wasea na nodra vakila baleti Jisu Karisito.

• Wilika na Joni 10:9 vei ira na gone, ka vakabibitaka na vosa i Karisito “Oi au na katuba.” Baleta ni vakararawataki o Jisu ena vuku ni noda ivalavala ca, mate, ka sa tucake tale, a sa cakava o Koya me rawa vei keda yadudua meda na laki bula tale vata kei na Kalou. Vakayagataka na katuba ni rumu ni nomu kalasi mo vakavulica ni o Jisu sai koya me vaka e dua na katuba me vakatarai keda me da lesu tale vua na Tamada Vakalomalagi.

• Wilika na Aisea 53:6 vei ira na gone, ka vakaraitaka vei ira e dua na iyaloyalo se droini ni dua na sipi. Laiva e dua vei ira na gone me biuta na iyaloyalo o ya ena dua na tutu ni rumu. Vakamacalataka ni gauna eda digidigi cala kina, eda sa lakosese tani mai vei Tamada Vakalomalagi me vaka e dua na sipi lako sese. Qai sureta na gone me kauta lesu mai na sipi, ka wasea na nomu ivakadinadina me baleta ni ko Jisu Karisito ea vakararawataki ka mate me baleti keda, sa rawata o Koya me kauti keda lesu vei Tamada Vakalomalagi. (Mo na vakaraitaka beka e dua na iyaloyalo i Jisu me vaka e dua na ivakatawa, me vaka na iyaloyalo 64 ena Gospel Art Book.)

• Lagata vata kei ira na gone e dua na sere baleti Jisu Karisito, me vaka na “I Feel My Savior’s Love” (iVolanisere ni Lalai, 74–75). Vukei ira mera kila e dua na vakila ni vakacegu kei na loloma e yaco ni ra lagasere tiko. Dusia talega na vosa cava ena sere e vakamacalataka na loloma ni iVakabula? E rawa vakacava ni da wasea na Nona loloma vei ira tale eso?

E mate ka tucaketale o Jisu me baleti au.

E rawa vakacava mo vukei ira na gone me ra kila ni ena vuku ni Tucaketale i Jisu Karisito, eda na tucake tale ena dua na siga kei ira na noda daulomani?

O Karisito ena kauveilatai

Siga Rugurugua e Kolikoca, mai vei J. Kirk Richards

iTaviqaravi e Rawa ni Caka

• Tukuna vei ira na gone me baleta na mate i Jisu kei na Tucaketale (raica na Marika 15–16). Vakayagataka na iyaloyalo ena ituvatuva ni macawa oqo, iyaloyalo 57–60 ena Gospel Art Book, se “Wase e 54: Sa Tucake o Jisu” ena iTukuni ni Veiyalayalati Vou (tabana e 139–44) me vukei ira na gone mera raitayaloyalotaka na italanoa.

• Vukei ira na gone mera kilamatata ni tucaketale e kena ibalebale ni da sa mate eda na bula tawamudu tale kei na yago vinaka sara ka na sega tale ni mate. Wasea na nomu ivakadinadina me baleta na Tucaketale, ka laivi ira na gone mera cakacaka ena tabana ni itaviqaravi ena macawa oqo. Sureti ira na gone me ra vakayagataka me ra wasea vata kei ira na nodra matavuvale na italanoa ni Tucaketale nei Jisu.

• Wilika na Alama 40:23 vei ira na gone. Vakaraitaka vei ira na ligamu e loma e dua na qaniliga. Tukuna vei ira ni ligamu e vaka e dua na yalo kei na qaniliga sa vaka e dua na yago. Luvata na qaniliga me vakaraitaka ni gauna eda mate kina, na yaloda ena biuta na yagoda. Daramaka lesu na qaniliga me matataka na Tucaketale.

• Lagata vata e dua na sere ni Tucaketale nei Jisu Karisito, vaka na “Did Jesus Really Live Again?” se “Jesus Has Risen” (iVolanisere ni Lalai, 64, 70). Wasea na nomu ivakadinadina ena vukui Jisu Karisito eda na bula tale ka na uasivi sara na yagoda ni oti na noda mate.

ivakatakilakila ni veivakavulici

Vakavulica na iVunau: Gone Qase Cake

E vakararawataki o Jisu me baleti au.

Ni ko vulica tiko na Veisorovaki ni iVakabula, tugana na ivakarau mo vukei ira kina na gone mera kilamatata na sala e rawa ni vakalougatataki ira ka vaqaqacotaki ira kina na iVakabula.

iTaviqaravi e Rawa ni Caka

• Wasei ira na gone ki na tolu na ilawalawa, ka solia ki na ilawalawa yadua e dua vei ira na tikini ivolanikalou oqo: Aisea 53:4–12; Alama 7:11–13; kei na Vunau kei na Veiyalayalati 19:16–19. Sureti ira na gone me ra vakasaqara na vosa kei na matavosa e vakamacalataka na veika e colata o Jisu Karisito ena vukuda. Kerei ira mera vola na nodra isau ni taro ena papa ka wasea na nodra vakila me baleta na iVakabula ni oti na wiliki ni ivolanikalou eso oqo.

• Vakarautaka na tikitiki ni pepa. Ena tikina veimama vola na tiki ni ivolanikalou mai na Veiyalayalati Makawa ka parofisaitaki Jisu Karisito. Ena tikina veimama ka dua, vola na ivolanikalou mai na Veiyalayalati Vou e veisotari ka baleta na vakayacori ni parofisai eso oqori.. (iTuvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale volalisi ena so na kena ivakaraitaki.) Sureti ira na gone mera wilika na veitikina, ka vakasotara vata na parofisai kei na kedra vakayacori.

• Vukei ira na gone me ra cavuqaqataka na ikatolu ni yavu ni vakabauta. Na cava e vakavulica vei keda na tiki ni ivolanikalou oqo me baleta na Veisorovaki i Jisu Karisito kei na ituvatuva nei Tamada Vakalomalagi vei ira na Luvena?

• Tarogi ira na gone era na vakamacalataka beka vakacava na Veisorovaki i Jisu Karisito ki vua e dua. Vakayaloqaqataki ira mera vakayagataka na ivolanikalou, serenilotu, se na iyaloyalo me vakaraitaka na cava e kena ibalebale na solibula veisorovaki ni iVakabula vei ira. Eda vakalougatataki vakacava ena vuku ni Veisorovaki ni iVakabula?

E mate ka tucaketale o Jisu me baleti au.

Na dina taucoko ni Tucaketale nei Jisu Karisito e rawa ni kauta mai vei keda na vakanuinui cecere kei na reki—vakabibi ni da dau sotava na mate ni dua eda lomana. E rawa vakacava mo vukei ira na gone mera kunea na vakacegu ena Tucaketale?

iTaviqaravi e Rawa ni Caka

• Vakaraitaka na iyaloyalo 57–59 mai na Gospel Art Book. Kerei ira na gone me ra vakasotara vata na iyaloyalo kei na veitikina oqo: Maciu 27:29–38; Maciu 27:59–60; kei na Joni 20:10–18. Mo qai sureti ira na gone me ra tukuna na italanoa ni mate nei Jisu, bulu, kei na Tucaketale ena nodra vosa ga.

• Wilika na Jope 14:14 vata kei ira na gone. Sureti ira na gone me ra wasea era na sauma vakacava na taro i Jope. Vukei ira mera kunea na ivolanikalou e vakadinadinataka na Tucaketale (raica na iDusidusi ki na iVolanikalou, “Tucaketale,” na ivolanikalou. ChurchofJesusChrist.org).

• Wilika Mosese 1:39 vata kei ira na gone. Tarogi ira kevaka era kila na kedrau duidui na “tawa mate rawa” kei na “bula tawamudu.” Sureti ira me ra vaqara na kena isau ena imatai ni parakaravu ni “Bula tawamudu” (Gospel Topics, ni ulutaga. ChurchofJesusChrist.org). Ko cei ena ciqoma na tawa mate rawa? Na cava e gadrevi me da rawata kina na bula tawamudu? Wasea na nomu ivakadinadina ni isolisoli talei ruarua oqori sa rawa ena vuku ni Veisorovaki i Jisu Karisito.

• Lagata vata e dua na sere se na serenilotu ni Siganimate, me vaka na “He Sent His Son” (iVolanisere ni Lalai, 34–35) se “Sa Tucake!” (Serenilotu, naba. 114). Sureti ira na gone me ra wasea na nodra vakila ni ra lagata na sere oqori. Na cava e vakavulica vei keda na ivunau oqo me baleta na Tamada Vakalomalagi kei Jisu Karisito? Sureti ira na gone me ra vola na nodra ivakadinadina me baleta na iVakabula mera laki wasea e vale vata kei na nodra matavuvale.

ivakatakilakila ni vuli

Vakauqeta na Vuli e Vale

Me vukei ira na gone me ra wasea vei ira na nodra matavuvale na veika era sa vulica ena kalasi, vakayaloqaqataki ira mera lagata e dua na sere e vale ena macawa oqo me baleta na Veisorovaki i Jisu Karisito.

Vakatorocaketaki Noda Veivakavulici

O ira na gone e rawa ni ra kila na veivakayarayarataki ni Yalo Tabu. Vakavulici ira na gone ni yalo era vakila ena nodra vosa se lagata baleti Jisu Karisito kei na Nona kosipeli e lako mai vua na Yalo Tabu, ia oqo e rawa ni taracake na nodra ivakadinadina.

tabana ni itaviqaravi: sa tucaketale o Jisu me baleti au