28 ni Feperueri–6 ni Maji

Nai Vakatekivu 28–33

“Sa Tiko Vakaidina ko Jiova ena Yasana Oqo”

Ni o wilika Nai Vakatekivu 28–33, vakasamataka vakatitobu na veika o sa vulica mai na ivakaraitaki nei Jekope kei na nona matavuvale. Vola na veika o uqeti kina.

Vola na Veika o Uqeti Kina

Wase 28 kei na 32 ni Nai Vakatekivu e tukuna e rua na veika vakayalo a sotava na parofita o Jekope. A yaco ruarua ena lekutu ia e duidui sara na ituvaki. Ena imatai ni ka e sotava, a lako tiko o Jekope ki na vanua nei tinana me raica e dua na watina, ena nona ilakolako, a davo sobu ena dua na ilokoloko vatu ena bogi. A sega beka ni namaka me kunea na Turaga ena dua na vanua vakaoya, ia vakatakilai koya na Kalou vei Jekope ena dua na tadra ka veisautaka na bula, ka kaya kina o Jekope, “Sa tiko vakaidina ko Jiova ena yasana oqo; ia kau a sega ni kila” (Nai Vakatekivu 28:6). Ena vica na yabaki i muri, a kunei koya tale o Jekope ena loma ni lekutu. Ena gauna oqo, sa lesu tiko ki Kenani, ki na dua na veisotari e rawa ni vakarerevaki kei na tuakana ka cudruvi koya tu ko Iso. Ia e kila ko Jekope ni gauna e gadreva kina e dua na veivakalougatataki, sa rawa ni vakasaqara na Turaga, ena loma sara mada ga ni lekutu (raica Nai Vakatekivu 32).

Ena rawa beka ni o kunei iko ena nomu loma ni lekutu ka gadreva tu e dua na veivakalougatataki mai vua na Kalou. E rairai nomu lekutu beka e dua na isema vakamatavuvale dredre, me vakataki Jekope. E rawa beka ni o vakila ni o yawa tani mai vua na Kalou se vakila ni o gadreva e dua na veivakalougatataki. Ena so na gauna e sega ni namaki na yaco mai ni veivakalougatataki; ena so na gauna e qai yaco mai ni oti e dua na veiqalisominiwai. Se cava ga na nomu gagadre, o rawa ni raica ni nomu lekutu sara mada ga, “sa tiko na Turaga ena yasana oqo.”

Vakasama ni Vuli iVolanikalou ni Tamata Yadua

Nai Vakatekivu 28; 29:1–18

Sa yalataki vei au ena loma ni valetabu na veivakalougatataki nei Eparaama.

Ena nona ilakolako ki Karana me kunea e dua na watina, a tadra ko Jekope e dua na ikabakaba ni dodo tu mai vuravura ki lomalagi, ka tucake tu e cake na Kalou. Ena tadra, a vakavouya kina na Kalou vei Jekope na veiyalayalati vata ga a cakava vata kei Eparaama kei Aisake (raica Nai Vakatekivu 28:10–17; raica talega Nai Vakatekivu 2:2–3; 26:1–4). A wasea o Peresitedi Marion G. Romney na vakasama oqo me baleta na ka e rawa ni matataka na ikabakaba: “A kila rawa ko Jekope ni veiyalayalati a cakava e kea vata kei na Turaga sai koya na kauvakababa yadua ni ikabakaba me na kabata sara ga ko koya me rawata kina na veivakalougatataki yalataki—na veivakalougatataki ena rawa kina me curu ki lomalagi ka duavata kei na Turaga. Na valetabu, kivei keda taucoko e tautauvata kei Peceli vei Jekope” (“Temples—The Gates to Heaven,” Ensign, Maji 1971, 16).

Na vosa kei na malanivosa cava tale e Na iVakatekivu 28:10–22 e vakatura vei iko e dua na isema ni veika a sotava o Jekope kei na veivakalougatataki ni valetabu? Ni o wilika na veitikina oqo, vakasamataka na veiyalayalati ko sa vakayacora; na veivakauqeti cava so e yaco mai vei iko?

Ni o wilika Nai Vakatekivu 29:1–18, vakasamataka vakatitobu na vuna e bibi kina ena veiyalayalati a vakavouya na Kalou vei Jekope mai Peceli ena nona vakawatitaki Rejieli o Jekope e (“vale ni Kalou”; Raica Na iVakatekivu 28:10–19). Nanuma tiko na veika e sotavi oqo ni o tomana nomu wilika baleta na bula nei Jekope ena Nai Vakatekivu 29–33. Sa vakavolekataki iko tiko vakacava vua na Kalou na vale ni Turaga?

Yoon Hwan Choi, “Kakua ni Veiraiyaki, Rai Cake! Liaona, Me 2017, 90–92.

Nai Vakatekivu 29:31–35; 30:1–24

E dau nanumi au na Turaga ena noqu gauna ni vakatovolei.

E dina ga ni rau a bula o Rejieli kei Lia ena dua na gauna kei na itovo e duidui sara mai vei keda, e rawa ni da ciqoma eso na vakanananu e dau yaco vei ira. Ni o wilika Nai Vakatekivu 29:31–35 kei na 30:1–24, vakaraica na vosa kei na malanivosa e vakamacalataka na loloma ni Kalou vei Rejieli kei Lia. Vakasamataka vakatitobu na sala sa “kunea dina na [nomu] rarawa” ka “nanumi” iko kina na Kalou (iVakatekivu 29:32; 30:22).

Sa bibi talega mo nanuma tiko ni dina ga ni dau rogoci keda na Kalou, ena Nona yalomatua e sega ni dau solia vei keda na veika sara ga eda kerea. Vakasamataka mo vulica na itukutuku nei Elder Brook P. Hales “Na iSau ni Masu” (Liaona, Me 2019, 11–14) me ra vulica na sala duidui e dau rogoci keda mai kina na Tamada Vakalomalagi.

Ena so tale na ka me baleta na itovo vakavanua e wavolita na italanoa oqo, raica na iVolavakarau ni Gonevuli: Nai Vakatekivu–2 Samuela (2003), 86–88.

Na ivakaraitaki nodrau veimokomoko o Jekope kei Iso, mai vei Robert T. Barrett

Nai Vakatekivu 32–33

Na iVakabula e rawa ni vukei keda me vakamalumalumutaki na veileti ena noda matavuvale.

Ni lesu ki Kenani o Jekope, a “sa rere vakalevu, a sa kidroa” me baleta na ivakarau ena ciqomi koya kina o Iso (Nai Vakatekivu 32:7). Ni ko wilika Nai Vakatekivu 32–33 me baleta na nodrau sota o Jekope kei Iso kei na nona nanuma ni se bera tiko mai na gauna oya, o na vakananuma beka na kemu isema vakamatavuvale—e gadrevi beka me vakabulai. De rawa ni vakauqeti iko na italanoa oqo mo dolele yani vua e dua. Na taro vaqo e rawa ni dusimaki nomu wiliwili:

• A vakarautaki koya vakacava o Jekope me sotavi Iso?

• Na cava e votu mai vakaukauwa vei iko me baleta na masu nei Jekope ka kunei e Nai Vakatekivu 32:9–12?

• Na cava o vulica me baleta na veivutuni mai na ivakaraitaki nei Iso?

• Ena vukei keda vakacava na iVakabula me da vakabula na isema vakamatavuvale?

Raica talega na Luke 15:11–32; Jeffrey R. Holland, “Na Veiqaravi ni Veivakaduavatataki,” Liaona, Nove. 2018, 77–79.

Vakasama baleta na Vuli iVolanikalou Vakamatavuvale kei na Lotu Vakamatavuvale

Nai Vakatekivu 28–33.Vakayagataka na “Jekope kei na Nona Matavuvale” (ena iTukuni ni Veiyalayalati Makawa) me ra vukei na gone mera kila vakavinaka na veika a yaco ena veiwase ni ivola oqo. De rawa ni ra cegu vakalailai na lewe ni matavuvale ena iyaloyalo yadua ka raica se cava e vakavulici kina, me vaka na bibi ni vakamau, veiyalayalati, cakacaka, kei na veivosoti.

Nai Vakatekivu 28:10–22.Sa rawa mo vakayagataka e dua na ikabakaba (se dua na kena iyaloyalo) me veitalanoataki kina se tautauvata vakacava kei na dua na ikabakaba na noda veiyalayalati. Na veiyalayalati cava eda sa cakava, ka na kauti keda vakacava me da voleka yani vua na Kalou? Era na marautaka beka na lewe ni matavuvale me ra droinitaka na tadra nei Jekope, e vakamacalataki ena Nai Vakatekivu 28:10–22.

Na sere ni lotu “Au Toro Yani Tu” (Sere ni Lotu, naba 53) a vakauqeti mai na tadra nei Jekope. E rawa ni dou lagata ka veivosakitaka ena nomu matavuvale na veika e vakavulici ena veitikina yadua.

Nai Vakatekivu 32:24–32.Ena tiko beka eso na lewe ni nomudou matavuvale era dau taleitaka na qito veibo. Na cava na vuna e sala vinaka me vakamacalataki kina noda vaqara na veivakalougatataki ni Turaga na “veibo?” Na cava e vakaturi ena Inosi 1:1–5; Alama 8:9–10 baleta na ibalebale ni “veimulomulo kei na Kalou”?

Nai Vakatekivu 33:1–12.Ni oti e vuqa na yabaki ni yaloca, erau sa qai duavata o Jekope kei Iso. Kevaka e rawa ni rau vosa vei keda nikua o Jekope kei Iso, na cava beka e rawa ni rau kaya me vukei keda ni yaco na veileti ena noda matavuvale?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Sa Voleka na Kalou,” Sere ni Lotu, naba 49.

Vakavinakataki ni Vuli Yadudua

Vakaraici Jisu Karisito. Na Veiyalayalati Makawa e vakadinadinataki Jisu Karisito mai na kena italanoa kei na ivakatakarakara eso. Vakasamataka mo vola se makataka na tikina era dusia na iVakabula ka ra vakaibalebale vakalevu vei iko.

Jacob’s Dream at Bethel, mai vei J. Ken Spencer