Na ivakaraitaki nei Josefa mai Ijipita e valeniveivesu, mai vei Jeff Ward

7–13 ni Maji

Na iVakatekivu 37–41

“Sa Tiko Vata kei Josefa na Turaga.”

Ni o wilika Nai Vakatekivu 37–41, masuta me vukei iko na Yalo Tabu mo raica na kena semati ki na nomu bula na ivolanikalou. Vola na veivakauqeti cava ga o ciqoma.

Vola na Veika o Uqeti Kina

Ena so na gauna dau yaco na ka ca vei ira na tamata vinaka. E vakavulica vakamatata vei keda na lesoni oqori na bula, e vakakina na bula nei Josefa, na luvei Jekope. Sa vakaivotavota talega o koya ena veiyalayalati a cakava na Kalou vei ira na nona qase, ia eratou a cati koya na tacina ka mani volitaki yani vakabobula. A sega ni vinakata me vakalailaitaka nona bula dokai ni vinakati koya na wati Potifa ka bala kina ki valeniveivesu. E kena irairai ni levu ga ni nona yalodina, na levu ni dredre a sotava. Ia na dredre kece oqori e sega ni ivakatakilakila ni nona sega ni veivakadonui na Kalou. Na ka dina, ena veigauna kece oqori, “sa tiko vata kaya ko Jiova” (Nai Vakatekivu 39:3). Na bula nei Josefa e dua na ivakadinadina ni dina bibi oqo: ena sega ni laivi keda na Kalou. “Ena sega ni kauta laivi mai vei iko na nomu veivakatovolei taucoko na nomu muria na iVakabula,” a vakavulica o Peresitedi Dieter F. Uchtdorf. “Ia, ena vagalalataka na itatao ena kemudrau maliwa o iko kei na veivuke e via solia vei iko na Tamada Vakalomalagi. E na tiko vata kei iko na Kalou” (“Na Gagadre ki Vale,” Liaona, Nov. 2017, 22).

Vakasama ni Vuli iVolanikalou ni Tamata Yadua

Nai Vakatekivu 37:1–28; 39; 41:9–45

“Sa tu Vata kei Josefa ko Jiova” ena nona gauna ni dredre.

Ena veigauna eso, sa vaka e dau biuti Josefa na veika vinaka, ia na Turaga e sega vakadua. Ni o wilika na italanoa kei Josefa, vakasamataka vakatitobu na taro vakaoqo: na cava a cakava o Josefa me tiko volekata kina na Turaga ena nona gauna ni vakatovolei? A tiko vakacava “vata kei koya” na Turaga ? (Nai Vakatekivu 39:2–3, 21, 23).

De o na taroga talega na mataqali taro vata oya baleta nomu bula. Na ivakadinadina cava o sa raica ni sega ni biuti iko na Turaga ena nomu gauna ni veivakatovolei? Vakasamataka na sala e rawa ni o wasea kina na veika o sotava vata kei ira na lewe ni matavuvale kei ira na itabatamata ni mataka (raica na 1 Nifai 5:14). Na cava o rawa ni cakava oqo mo vakarau kina mo yalodina tiko ena gauna o sotava kina na veivakatovolei ena veisiga ni mataka?

Raica talega na Joni 14:18; Roma 8:28; Alama 36:3; Vunau kei na Veiyalayalati 121:7–8; D. Todd Christofferson, “Na Nodra Reki na Yalododonu,” Liaona, Nove. 2019, 15–18.

Nai Vakatekivu 37:5–11; 40; 41:1–38

Kevaka au sa yalodina, ena veidusimaki ka vakauqeti au na Turaga.

E vakavulica o Elder David A. Bednar, “Dau soli na ivakatakila ena vuqa na sala, oka kina, me kena ivakaraitaki, na tadra, raivotu, veivosaki kei ira na italai vakalomalagi, kei na veivakauqeti” (“Na Yalo ni iVakatakila,” Liaona, Me 2011, 88). A vakayagataka na Turaga na tadra me vakaraitaka na dina vei Josefa, na daucaka mena gunu ka dauvavavi nei Fero vata kei Fero. A vakatakila talega na Turaga vei Josefa na sala ni kena vakadewataki na veitadra oqori. Na cava o rawa ni vulica mai Nai Vakatekivu 37:5–11; 40:5–8; 41:14–25, 37–38 me baleta na ciqoma ka kila vakavinaka na ivakatakila mai vua na Turaga? Me kena ivakaraitaki, na cava o rawa ni vulica mai na ivakaraitaki nei Josefa ena gauna e vaka me dredre toka mo kila na ivakatakila? (raica Nai Vakatekivu 40: 8; 41:16).

Joseph Interpreting the Butler and Baker’s Dreams, mai vei François Gérard

Vakasamataka vakatitobu na sala e vakatakila tiko kina vei iko na Lomana na Turaga. Na cava o sa cakava tiko mo cakacakataka kina na ivakatakila sa solia vei iko na Turaga? O sa vakasaqara tiko vakacava na ikuri ni veidusimaki mai Vua?

Raica talega na Russell M. Nelson, “iVakatakila me Baleta na Lotu, na iVakatakila me Baleta na Noda Bula,” Liaona, Me 2018, 93–96; O Michelle Craig, “Kaukauwa Vakayalo,” Liaona, Nove. 2019, 19–21.

Nai Vakatekivu 38; 39:7–20

Ena veivuke ni Turaga, au rawa ni drotaka na veitemaki.

Ni o temaki, e rawa ni vakayaloqaqataki iko ka vakaukauwataki iko na ivakaraitaki nei Josefa. Ni o wilika me baleta na veika a sotava ena Nai Vakatekivu 39, raica na veika e cakava o Josefa me vorata kina na veitemaki. Me ivakaraitaki:

• A “besetaka” na veisagai nei wati Potifa (tikina e 8).

• E kila ni ivalavala ca ena vakacudruya na Kalou kei na so tale (tikina e 8–9).

• A “sega ga ni rogoca” ko koya na veitemaki, dina ga ni caka tiko “ena veisiga kecega” (tikina e 10).

• A “laiva na nona isulu ka dro, ka curu yani ki tautuba” (tikina e 12).

Ni o nanuma tiko na ivakaraitaki nei Josefa, vakasamataka mo tuva e dua na ituvatuva ka drotaka na veitemaki. Me kena ivakaraitaki, e rawa ni o vakasamataka e dua na veivakatovolei o sotava, vola na veika me levei kina, ka cakava e dua na ituvatuva mo vakararavi vua na Tamada Vakalomalagi ni yaco mai na veitemaki (raica na 2 Nifai 4:18, 27–33).

Veitemaki

Na veika me levei:

iTuvatuva me dolei:

Na italanoa oqo ni igu nei Josefa ni sotava na veitemaki e kena ikau mai e dua na italanoa duatani sara baleta na tuakana o Juta, ka kune e Nai Vakatekivu 38. Na cava eratou vakavulica vei iko na wase 37, 38, kei na 39, ni ratou tauri vata me baleta na bula savasava?

Raica talega na 1 Korinica 10:13; 1 Nifai 15:23–24; 3 Nifai 18:17–18.

Vakasama baleta na Vuli iVolanikalou Vakamatavuvale kei na Lotu Vakamatavuvale

Nai Vakatekivu 37.Kevaka o iko e dua na tuakai Josefa, na cava beka e rawa ni o cakava me kakua kina ni vakamalumalumutaka na kemu isema vua? E vukea vakacava meda “[veivosaki vinaka” vakataki keda? (tikina e 4).

Nai Vakatekivu 39.Na vidio “The Refiner’s Fire” kei na “After the Storm” (ChurchofJesusChrist.org) e sema ki na veika era sotava na tamata era kunea na igu ena nodra vuki vua na Turaga ena gauna ni nodra vakatovolei. De rawa ni o sarava e dua vei rau ka tukuna na veika beka ena tukuna ko Josefa kevaka me a cakava e dua na vidio ni veika a sotava. E rawa ni o ni lagata vata na “Meu Na Muri Jisu Tu” (iVolanisere ni Lalai, 40) ka vakaraica na ivakasala e rawa ni wasea vei Josefa na nomu matavuvale ni sotava na nona veivakatovolei.

Nai Vakatekivu 39:7–12.Ni wiliki na veitikina oqo ena rawa kina e dua na madigi me veivosakitaki na lawa ni bula savasava kei na nomu matavuvale. Oqo e so na ivurevure ka na rawa ni veivuke ena veivosaki oqo: Jekope 2:28; Alama 39:3 9; “Tiko savasava” (ena Me iSakisaki ni iTabagone [2011], 35–37); “Sexual Intimacy Is Sacred and Beautiful” (ena Help for Parents [2019], AddressingPornography.ChurchofJesusChrist.org).

Na iVakatekivu 41:15–57.Na cava eda vulica mai na veitikina oqo me baleta nona vakalougatataki ira na tamata i Ijipita na Turaga mai vei Josefa? Na cava eda rawa ni vulica me baleta na vakavakarau ki na veileqa tubukoso ni veisiga ni mataka? Veivosakitaka na cava dou rawa ni cakava mo dou vakavakarau vakavinaka vakamatavuvale. Me baleta na vakasama eso, raica na Gospel Topics, “Emergency Preparedness,” topics.ChurchofJesusChrist.org.

Me ikuri ni tukutuku ni vakavulici ni gone, raica na idusidusi ni macawa oqoena Lako Mai, Mo Muri Au—Me Baleta na Lalai.

Sere vakaturi: “Jisu sa Wekada ga,” iVolanisere ni Gonelalai, 37.

Vakavinakataki ni Vuli Yadudua

Vakatautauvatataka na ivolanikalou ki na nomu bula Ni o wiliwili, vakasamataka e rawa ni yaga vakacava ki na nomu bula na italanoa kei na ivakavuvuli ni volanikalou. Me kena ivakaraitaki, ena vakauqeti iko beka vakacava na yalodina nei Josefa mai Ijipita mo yalodina tiko vua na Turaga se cava ga na veika dredre?

Na ivakaraitaki ni nodratou kauta tani tiko na tuakai Josefa na nona kote, mai vei Sam Lawlor