O Josefa mai Ijipita ena valeniveivesu

Na iyaloyalo kei Josefa mai Ijipita e valeniveivesu, mai vei Jeff Ward

7–13 ni Maji

Nai Vakatekivu 37–41

“A sa Tiko kei Josefa ko Jiova”

Na dina cava mai na Nai Vakatekivu 37–41 era gadreva na gone ena nomu kalasi mera kilamatata cake? Vakarorogo ki na veivakauqeti e yaco mai vei iko ni ko vakavakarau mo veivakavulici.

Vola na Veika o Vakauqeti Kina

ivakatakilakila ni veiwasei

Sureta na Veiwasei

Solia vei ira na gone e vica na miniti me ra droinitaka e dua na ka era sa vulica baleta na kosipeli mai vale se ena lotu. Kerei ira na gone me ra wasea ka veivosakitaka na nodra droini.

ivakatakilakila ni veivakavulici

Vakavulica na iVunau: Gone Sobu

Nai Vakatekivu 37

Au rawa ni lomavinaka ki na noqu matavuvale.

Era vuvutaki Josefa na tuakana ka ra lomaca ena nodra ivalavala vua. E rawa vakacava mo vukei ira na gone mera kilamatata na bibi ni lomavinaka vei ira tale eso, vakabibi na lewe ni matavuvale?

iTaviqaravi e Rawa ni Caka

• Mo tukuna na italanoa kei Josefa kei ira na tuakana mai na Nai Vakatekivu 37, sa rawa mo vakayagataka na iyaloyalo ena Lako Mai, Mo Muri Au—Baleta na Tamata Yadua kei na Matavuvale se “O Josefa mai Ijipita” (ena iTukuni ni Veiyalayalati Makawa). Mera veivuke na gone ena nodra wasea na veika era kila me baleta na italanoa. Tarogi ira ena taro me vaka, “Era a lomaca vakacava vei Josefa na tuakana?” Vukei ira na gone me ra vakasamataka na veika e rawa ni ra cakava na tuakai Josefa me vakaraitaka ni ra lomana. Na cava e dodonu meda cakava ni da vakila na cudru vei ira na lewe ni noda matavuvale?

• Vakaraitaka e dua na iyaloyalo ni dua na matavuvale (raica na Gospel Art Book, naba 112), se sureti ira na gone me ra droinitaka na iyaloyalo ni nodra matavuvale. Kerei ira mera wasea na sala eso e rawa mera lomavinaka kina vei ira na lewe ni nodra matavuvale.

• Lagata vata e dua na sere baleta na Yalo Tabu, vaka na “A Happy Family” (Children’s Songbook,198). Na cava e rawa ni da cakava me vukei ira na noda matavuvale mera marau?

• Mera rokataka na gone na tabana ni itaviqaravi ena macawa oqo ka, ena vanua sa vakarautaki tu, droinitaka e dua na iyaloyalo ni lewe ni matavuvale e lomavinaka tiko.

Nai Vakatekivu 37:18–28; 39:20–23

E rawa ni vukei au na Kalou ni yaco na veika ca.

E vuqa na veika ca e yaco vei Josefa, ia a digitaka me talairawarawa ki na ivakaro ka a tiko vata kei koya na Turaga. Era rawa ni vulica na gonelalai mai na ka oqo ni vinakata na Kalou me vukei ira ena gauna ni dredre ni nodra bula.

iTaviqaravi e Rawa ni Caka

• Vakamacalataka eso na veika dredre a yaco vei Josefa (raica na Nai Vakatekivu 37:23–28; 39:20; se “O Josefa kei na Nona Tadra” kei na “Josefa mai Ijipita,” ena iTukuni ni Veiyalayalati Makawa). Ni sa oti nomu tukuna vei ira na gone me baleta na dredre yadudua a sotava o Josefa, sureti ira mera cavuta, “Na Turaga e tiko vata kei Josefa” (Nai Vakatekivu 39: 2).

• Wasea na iyaloyalo ni iVakabula ni vukei ira tiko na tamata era sotava tiko na ibolebole (raica na Gospel Art Book, naba 40–43). Sureti ira na gone mera wasea na sala e vukei ira tiko kina na tamata na iVakabula. Wasea na nomu ivakadinadina ni Turaga e rawa ni vukei keda ni yaco na veika ca vei keda.

• Lagata vata e dua na sere baleta na loloma veikauwaitaki ni Vakabula, me vaka na “Jesus Is Our Loving Friend” (Children’s Songbook, 58). Wasea na ka o a sotava ka o vakila kina na loloma ni Kalou ena dua na gauna ni bolebole. Vakaraitaka na iyaloyalo kei Jisu, ka sureti ira na gone me ra wasea na lomadra baleti Koya.

Nai Vakatekivu 41:15–36, 47–57

E rawa ni vakaroti au me baleta na veika rerevaki.

Na Kalou e vukei Josefa me kilamatata ni na tadra nei Fero e ivakasala me vakavakarau ki na gauna dredre sa roro tiko mai muri. Vukei ira na gone mera kilamatata ni Kalou ena rawa ni vakaroti ira ki na veika rerevaki, oka kina na veika rerevaki vakayalo.

O Josefa ni vakadewataka na tadra ena valeniveivesu

O Josefa ni Vakadewataka tiko na Tadra nei Daucakagunu kei na Dauvavavi, mai vei François Gérard

iTaviqaravi e Rawa ni Caka

• Veibiuyaka na iyaloyalo ni kakana ena loma ni rumu, ka sureti ira na gone mera vakasoqoni ira ka “maroroya” ena dua na itawatawa. Vakayagataka na itaviqaravi oqo mo tukuna kina vei ira na gone me baleta na Kalou ni a vakaroti Fero mera vakavakarau ki na dua na gauna ni sega ni kakana (raica na Nai Vakatekivu 41:15–36, 47–57). Mera droinitaka na gone eso na iyaloyalo ni veika e tadra ko Fero ka mera qai vakayagataka na nodra iyaloyalo me ra vakavulica na nodra matavuvale.

• Vakaraitaka e dua na itaba ni parofita edaidai. Tukuna vei ira na gone me baleta na ivakavuvuli se ivakaro sa solia vei keda na Kalou mai vua. Vakamacalataka ni da na vakalougatataki ka taqomaki ena noda muria na parofita. Sureti ira na gone mera matanataka na veika e rawa ni ra cakava mera muria kina na ivakasala ni parofita.

ivakatakilakila ni veivakavulici

Vakavulica na iVunau: Gone Qase Cake

Nai Vakatekivu 39:1–3, 20–23; 41:38

Kevaka au yalodina, ena vukei au na Kalou ena loma ni gauna dredre.

Dina ga ni a sotava o Josefa e vuqa na veivakatovolei dredre, e yalodina tikoga ka “sa tiko vata kaya ko Jiova” (Nai Vakatekivu 39: 3). Na veika a sotava e rawa ni vukea mera vakila na gone na nuidei ni na vukei ira na Kalou ena gauna ni vakatovolei.

iTaviqaravi e Rawa ni Caka

• Kerei ira na gone mera vaqara na veivosa se matavosa e tiko ena Nai Vakatekivu 39:1–3, 20–23; 41:38 ka vakaraitaka ni sa tiko vata kei Josefa na Kalou ena nona gauna dredre. Ke rawa, sureti ira na gone me ra cakava e dua na ivakatakilakila lailai e vakaraitaka tiko e dua na matavosa era kunea. Vakayaloqaqataki ira mera kauta na nodra vei ivakatakilakila ki vale me vakananumi ira ni na tiko vata kei ira na Turaga ena gauna ni nodra vakatovolei.

• Sureti ira na gone me ra wasea na cava era nanuma ni ibalebale ni matavosa “a sa tiko kei Josefa ko Jiova” (Nai Vakatekivu 39:2). Sureti ira mera wasea na veika era sotava ni ra a vakila ni a tiko na Turaga vata kei ira se na nodra matavuvale ena dua na gauna dredre. Wasea na veikasotavi vakakina mai na nomu bula.

Nai Vakatekivu 37:3–28

Au rawa ni marau ena veika vinaka e yaco vei ira na tani.

Na yalovuvu e muataki ira na tuakai Josefa mera kitaka na digidigi rerevaki. Na nodra digidigi cala e mosi vei Josefa ka voroka na yaloi tamadratou. Na italanoa oqo e rawa ni vukei ira na gone mera digitaka mera marau ni ra vakalougatataki ira na tani mai vua na Turaga.

iTaviqaravi e Rawa ni Caka

• Sureti ira na gone me ra railesuva na Nai Vakatekivu 37:3–11 ka droinitaka na iyaloyalo ni kote nei Josefa Simici kei na nona tatadra e rua. E vakacava tu na lomadra na tuakai Josefa baleti Josefa? E rawa beka vakacava mera a veisautaki nodra itovo? Veivosakitaka na vuna e bibi kina meda marau ni yaco na veika vinaka vei ira tale eso.

• Kerei ira na gone me ra wasea eso na gauna e rawa ni vuvutaka kina e dua na tamata e dua tale. Lagata vata e dua na sere baleta na vakaraitaki ni loloma vei ira tale eso, me vakataka na “Love One Another” (Children‘s Songbook, 136–37). Dau vakabibitaka ni Tamada Vakalomalagi ena rawa ni vukea meda vakaisosomitaka na yalo ni vuvu ena yalo ni loloma.

Nai Vakatekivu 39:7–12

Ena veivuke ni Turaga au rawa ni drotaka kina na veivakatovolei.

Ni ra sotava na gone o vakavulica na veivakatovolei ena nodra bula taucoko, e rawa ni tubu na nodra kaukauwa mai na ivakaraitaki nei Josefa ni drotaka na veitemaki.

iTaviqaravi e Rawa ni Caka

• Vakaraitaka na iyaloyalo kei Josefa kei na wati Potifa (raica na Gospel Art Book, naba 11), ka wasea na italanoa e tiko ena Nai Vakatekivu 39:7–12. A vorata vakacava o Josefa na veitemaki? Vukei ira na gone mera kunea na vosa ena Nai Vakatekivu 39:7–12 ka sauma na taro oqo—me ivakaraitaki, e kila o Josefa ni tiko vata kei na wati Potifa e “ivalavala ca vua na Kalou” (tikina e 9).

• Sureti ira na gone mera vakasamataka eso na ituvaki era na temaki kina na gone ena nodra yabaki ni bula mera digidigi cala. Kerei ira mera matanataka na sala mera muria kina na ivakaraitaki nei Josefa ena ituvaki vakaoqo—me ivakaraitaki, na sala cava soti eda rawa ni nanuma kina na Kalou ni da temaki?

• Vakaraitaka e rua na makeneta, ka matataka na Kalou kei Setani, kei na dua na iyaya kaukamea lailai me vaka e dua na ivako ni pepa, koya e matataki keda. Vakayagataka na makeneta me vakaraitaka ni nomu voleka ga vua na Kalou, na kaukauwa cake ni Nona idre vei keda, ka dina vakakina ni da toro voleka yani vei Setani. Na cava eda rawa ni cakava meda toro voleka kina vua na Kalou? E rawa vakacava mena vukei keda na Yalo Tabu?

ivakatakilakila ni vuli

Vakauqeta na Vuli e Vale

Sureti ira na gone mera wasea na sala mera vakacavara kina na yatuvosa oqo: “Au na rawa ni vakataki Josefa niu .” Kerei ira mera wasea ki na nodra matavuvale na sala era sa vakacavara kina na iyatuvosa.

Vakatorocaketaki Noda Veivakavulici

Sureta na veiwasei. Ni o ni veivosakitaka na ivakavuvuli vakosipeli, kerei ira na gone mera wasea na nodra vakasama, lomadra, kei na veikasotavi. O na kunea ni tu e vuqa na nodra raimailoma vakaibalebale.

tabana ni itaviqaravi: au rawa ni lomavinaka vei ira na noqu matavuvale.