Na iVakatekivu 42–46

Josefa kei na Dausiga

Na nona madigi e dua vei iratou na veitacini me vakaduavatataka nona matavuvale

E viakana na matavuvale nei Jekope ena vuku ni dausiga. Sa mani talai iratou na luvena tagane o Jekope ki Ijipita me ratou laki voli kakana. O koya e a maroroi Penijamini toka ga e vale, na luvena tagane gone duadua. A taqaya o koya de na vakayali i Penijamini me vaka a vakayali Josefa na luvena tagane ena vuqa na yabaki sa oti. A sega ni kila ni o iratou na luvena tagane qase eratou a volitaki Josefa vakabobula.

Nai Vakatekivu 42:1–4

Ena gauna oqo, sa iliuliu levu tu e Ijipita o Josefa. A liutaka tiko o koya na volitaki ni kakana ena gauna ni dausiga. Eratou a sota vata kei Josefa na tuakana ka kere kakana vua. Eratou a sega ni kilai koya.

Nai Vakatekivu 42:5–8

A kilai ira tu o Josefa, ia a vakalecaleca tu me vaka ni sega ni kilai iratou. A taroga me baleta na nodratou matavuvale me kila se rau se bula tiko na tamana kei na tacina o Penijamini.

Na iVakatekivu 42:10–14

Sa qai solia o Josefa vei iratou na tuakana na kakana. A tukuna vei iratou me ratou kakua ni lesu tale mai me kau kakana vakavo kevaka eratou kauti Penijamini mai na tacidratou gone duadua vata kei iratou.

Nai Vakatekivu 42:15–20

Ni sa oti na kakana vakamatavuvale, sa kila o Jekope ni dodonu me na talai Penijamini vata kei iratou na luvena tagane tale eso ki Ijipita. Se rere tikoga o Jekope me laivi Penijamini me lako. Ia o Juta, e dua vei iratou na veitacini, a yalataka ni na taqomaki Penijamini.

Na iVakatekivu 43:1–15

Ni ratou sa lesu tale na veitacini ki Ijipita, a cakava o Josefa me vaka ni a butakoca o Penijamini e dua na bilo siliva. A vinakata me raica se ratou sa veisau na tuakana. A vakamasuti Josefa o Juta me kakua ni totogitaki Penijamini ia me totogitaki koya ga.

Na iVakatekivu 44

A marau o Josefa ni raica ni ratou sa veisau na tuakana. Eratou a lomani Penijamini vakalevu ka taqomaki koya. E muri, sa qai tukuna vei iratou o Josefa se o cei dina o koya.

Nai Vakatekivu 42:21–24; 45:1–4

A vosoti iratou na tuakana o Josefa ena nodratou a volitaki koya vakabobula. E kaya o Josefa ni a sala ni Turaga me vukea na nodratou matavuvale me ratou vakabulai mai na dausiga.

Nai Vakatekivu 45:5–8

Eratou lesu tale na tuakai i Josefa vei tamadratou, o Jekope, ka tukuna vua na veika kece sa yaco. A tokitaka o Jekope na nona matavuvale taucoko ki Ijipita.

Nai Vakatekivu 45:24–28; 46:1–26

E kidavaka na matavuvale nei Jekope o Fero. A solia vei iratou na vanua kei na manumanu me rawa ni levu kina na kedratou kakana. E ratou a tiko vakacegu na matavuvale nei Jekope me dua na gauna balavu.

Nai Vakatekivu 45:16–23