“Na Mate Veitauvi e Ijipita,” iTalanoa ni Veiyalayalati Makawa (2022)
“Na Mate Veitauvi e Ijipita,” iTalanoa ni Veiyalayalati Makawa
Na Lako Yani 4–5; 7–12
Na Mate Veitauvi e Ijipita
Na digidigi veisaqasaqa nei Fero vua na Turaga
Sa vakabauta na Turaga o Mosese ka lesu tale ki Ijipita. O Mosese kei na tuakana o Eroni erau a lako vei Fero ka kerea me laivi ira na Isireli me ra sereki ka biuti Ijipita. E cudru sara o Fero ka sega ni vinakata. E vakasaurarataki ira na Isireli me ra cakacaka vakaukauwa sara.
Baleta ni a sega ni vakarorogo vua na Turaga o Fero, era sa cudruvi na kai Ijipita ena mate veitauvi vakarerevaki sara. iMatai, na wai kece e Ijipita e vuki me dra. Ea kerei Fero tale o Mosese me laivi ira na Isireli me ra lako, ia ea kaya o Fero me kua.
Tarava, sa vakauta mai na Turaga na boto ki Ijipita. Era tu e veivanua kecega. Ea kaya o Fero ni na laivi ira na Isireli me ra lako ke ra lako tani na boto. Ea cakava na Turaga me ra lako tani na boto, ia ea sega ni laivi ira na Isireli me ra lako o Fero. Sa qai tala mai na Turaga na kutu kei na yavusa lago.
Tarava, era sa mate kece na manumanu maroroi, ia e sega ni mate na nodra manumanu na Isireli. Era sa qai bo mosimosi lelevu na yagodra na kai Ijipita.
Ea yaco talega e dua na cagi levu ena uca cevata kei na bukawaqa ki Ijipita. Oqo e vakavuna na veivakarusai rerevaki.
Se sega tikoga ni laivi ira na Isireli me ra lako o Fero. Sa qai tala mai na vodre na Turaga, ka ra kania kece na kedra kakana.
Sa qai yaco e tolu na siga ni butobuto. Ena vuqa na mate veitauvi, ea yalataka o Fero me laivi ira na Isireli me ra lako kevaka e mudu na mate, ia ea lasu ena veigauna kece sara.
Ni oti e ciwa na mate veitauvi duidui, ea se sega tikoga ni laivi ira na Isireli me ra lako o Fero. Sa qai kaya na Turaga vei Mosese e dua tale na mate veitauvi rerevaki ena yaco mai. E tuberi ira ka taqomaki ira na Isireli na Turaga ena nodra waraka na nodra galala.