“Josua na Parofita,” iTalanoa eso mai na Veiyalayalati Makawa (2022)
“Josua na Parofita,” iTalanoa eso mai na Veiyalayalati Makawa
Nai Vakarua 10; 31; 34; Josua 1; 3–6; 10–11; 21; 24
Josua na Parofita
Na iotioti ni veivakatovolei ni bera ni curumi na vanua yalataki
A kacivi Josua na Turaga me parofita vou ni sa kau o Mosese na parofita ki lomalagi. Ni ra keba na Isireli volekata na Uciwai na Joritani, a kaya na Turaga ni sa kena gauna me ra toki ki na vanua yalataki.
Nai Vakarua 34:1–9; Josua 1:1–4; Alama 45:19
A tiko mai Kenani na vanua yalataki, ia era a bula tiko e kea na tamata daucaka ca. A kaya na Turaga vei Josua me kaukauwa ka qaqa. Ena veivuke ni Turaga, era na rawa ni rawata na Isireli na vanua ko Kenani.
A vakasoqona o Josua e dua na mataivalu. A tukuna vei ira na Turaga me ra kauta na peleti vatu ni iVunau e Tini kei na so tale na ivolanikalou. Era kauta voli na bete na veika tabu oqo ena dua na kato ka vakatokai na kato ni veiyalayalati. Oti era sa qai vakavakarau na mataivalu me ra kosova na Uciwai na Joritani. A titobu ka kui vakaukauwa na uciwai.
Nai Vakarua 10:5; 31:25–26; Josua 1:10–11; 3:1–11
A yalataka o Josua vei ira na Isireli ni na vukei ira na Turaga me ra kosova na uciwai.
E a kerea o Josua vei ira e 12 na bete me ra colata na kato ni veiyalayalati ka lako yani ki loma ni wai. Ena gauna ga era butu yani kina ki uciwai na bete, e a tawase na wai.
Era kosova na uciwai na Isireli ena vanua mamaca. A kerei ira na Isireli o Josua me ra taura e 12 na vatu mai na vanua mamaca e loma ni uciwai. A tuva na vatu me vakananumi ira kina na Isireli ena cakamana ni Turaga ena siga o ya.
A liutaka o Josua na mataivalu ni Isireli ki na vanua ko Kenani. Era yaco yani ki na dua na korolevu ka vakatokai o Jeriko. A kaukauwa sara na koro ka cere ki cake na kena bai. Sa tukuna na Turaga vei Josua na sala me na rawai Jeriko kina. E kaya o Koya ni dodonu vei ira na Isireli me ra tayabe wavokiti Jeriko e veisiga me ono na siga. A talairawarawa o Josua vua na Turaga.
A tukuna vei ira na bete o Josua me ra colata na kato ni veiyalayalati e matadra na Isireli. Ena veisiga yadua, era lako wavokiti Jeriko na mataivalu, ka ratou uvuca tiko na nodratou davui e vitu na bete. Na kena vo kece ni Isireli era a lako vakanomodi.
Ena ikavitu ni siga, e a tayabe wavokiti Jeriko vakavitu na mataivalu. Ni ra uvuca tiko na bete na nodra davui, a tukuna vei ira na Isireli o Josua me ra kaila. A kasauru vakasauri na bai kei Jeriko ki na qele, ka ra taura na korolevu na mataivalu nei Josua.
A vukei ira na Isireli na Turaga, me vaka a yalataka o Koya. Sa tomana tiko ga na mataivalu nei Josua me rawa na vanua ko Kenani, ka ra tekivu me vakaitikotiko e kea na Isireli. A vakananuma vei ira o Josua na cakamana kei na yalayala ni Turaga. A kerei ira na Isireli me ra digitaka me ra qarava na Turaga.