O Atama kei Ivi ni rau taubale vata tiko

Atama kei Ivi, mai vei Douglas M. Fryer

10–16 ni Janueri

Na iVakatekivu 3–4; Mosese 4–5

Na Lutu Nei Atama kei Ivi

Vakasamataki ira mada na gone o vakavulica ena nomu vulica Na iVakatekivu 3–4 kei na Mosese 4–5. Vakarorogo ki na veiyavalati kei na veivakauqeti o ciqoma; era na rawa ni mua ki na iwalewale vou ni veivakavulici.

Vola na Veika o Vakauqeti Kina

ivakatakilakila ni veiwasei

Sureta na Veiwasei

Vakaraitaka e dua na iyaloyalo i Atama kei Ivi (raica na ituvatuva ena macawa oqo ena Lako Mai Mo Muri Au—Baleta na Tamata Yadua kei na Matavuvale), ka kerei ira na gone me ra tucake ka wasea na ka era raica ena iyaloyalo se nanuma me baleta na italanoa.

vakatakilakila ni veivakavulici

akavulica na iVunau: Gone Sobu

Na iVakatekivu 3; Mosese 4

Erau muria ko Atama kei Ivi na ituvatuva nei Tamada Vakalomalagi.

Vukei ira na gone me ra kilamatata na cava ea yaco mai na were ko Iteni ka veivuke vakacava me vakayacori na yavu ni veivakabulai ni Kalou. Na veivakalougatataki cava soti e noda ena vuku ni nodrau digidigi o Atama kei Ivi?

iTaviqaravi e Rawa ni Caka

• Me vakalekalekataka na italanoa ni Lutu nei Atama kei Ivi, vakayagataka na “O Atama kei Ivi” (ena ITukuni ni Veiyalayalati Makawa). Vukei ira na gone me ra kilamatata ni digidigi nei Atama kei Ivi me rau kania na vuanikau e tiki ni ituvatuva nei Tamada Vakalomalagi.

• Solia vei ira yadua na gone e dua na iyaloyalo ka matataka e dua na ka mai na italanoa nei Atama kei Ivi (me vaka e dua na vunikau, e dua na gata, e dua na iteitei, se o Jisu Karisito). Kerei ira me ra dulaka cake na nodra iyaloyalo ena gauna donu ni ko tukuna vei ira na italanoa ka wilika kina na matavosa mai na Mosese 4. E rawa ni veivuke talega na tabana ni itaviqaravi ena macawa oqo.

  E taura tiko na vuanikau o Ivi.

  Biu tu ko Iteni, mai vei Annie Henrie Nader

Mosese 4:1–4

Au rawa ni digitaka na dodonu.

Ena Mosese 4:3, eda vulica kina ni o Setani ea “segata me voroka na galala ni digidigi kau sa solia vua na tamata, koi au na Turaga na Kalou.” O na vukei ira vakacava na gone me ra taleitaka na rawata me ra digitaka na dodonu kei na cala?

iTaviqaravi e Rawa ni Caka

• Vosa vei ira na gone me baleta eso na digidigi o cakava nikua, ka vukei mera vakasamataka me baleta na digidigi era cakava. Wiliwili vei ira mai na Mosese 4:3: “Na galala ni digidigi kau sa solia vua na tamata, koi au na Turaga na Kalou.” Vakamacalataka ni tikina oqo e vakavulica vei keda ni sa solia vei keda na Kalou na kaukauwa me da digidigi. Vakaraitaka na nomu vakavinavinaka ni ko rawa ni digitaka na dodonu, ka vakadinata ni ra rawa talega ni digitaka na gone me cakava na ka e dodonu.

• Wasea e vica na ivakaraitaki rawarawa ni dua na gone e cakava na digidigi donu se cala, ka kerei ira na gone me ra vakaraitaka kevaka na digidigi e dodonu se cala (era na tucake, taura cake na ivakatakilakila, se laveta na ligadra). Wasea na nomu ivakadinadina ni na vukei keda na Tamada Vakalomalagi meda digitaka na dodonu, ka sureti ira na gone me ra wasea talega na lomadra.

• Vukei ira na gone me ra vakasamataka na digidigi vinaka e rawa ni ra cakava me ra muri Jisu Karisito. Lagata vata e dua na sere ni caka digidigi vinaka, me vaka na “Choose the Right Way” (Children’s Songbook, 160–61). Tukuna vei ira na gone me baleta e dua na gauna o vakayacora kina e dua na digidigi vinaka, ka vakamacalataka na veika o vakila baleta na nomu digidigi.

Mosese 5:4, 8

Au rawa ni masu vei Tamada Vakalomalagi.

Na cava era gadreva me ra kila na gone o vakatavulica me baleta na masu? Na cava o sa kunea ena veitikina oqo ka na rawa ni vukei ira?

iTaviqaravi e Rawa ni Caka

• Wilika na Mosese 5:4 vei ira na gone. Vukei ira mera kilamatata ni gauna erau sa biuta kina na were o Iteni o Atama kei Ivi, erau sa sega ni rawa tale ni ttiko kei na Tamada Vakalomalagi, ia erau na rawa ni masu Vua. Vakamacalataka ni da masu vua na Tamada Vakalomalagi ena yaca ni Luvena, o Jisu Karisito (raica na Mosese 5:8). Na cava eso na ka eda rawa ni tukuna vua na Tamada Vakalomalagi ena noda masu?

• Kerei ira na gone me ra vakaraitaka vei iko na ka era cakava ni ra masu. E rawa talega mo vakaraitaka e dua na iyaloyalo ni dua e masu tiko (raica na Gospel Art Book, naba 111–12) me vakavulici ira na gone ni da vakacuva na uluda, roqota na ligada, ka bobo na matada e vukei keda meda vakarokoroko ni da masu.

• Wasea e dua na ka e yacovi iko ena masu se na nomu ivakadinadina me baleta na masu. Lagata vata kei ira na gone e dua na sere baleta na masu, me vaka na “A Child’s Prayer” (Children’s Songbook, 12–13).

ivakatakilakila ni veivakavulici

Vakavulica na iVunau: Gone Qase Cake

Na iVakatekivu 3; Mosese 4; 5:10–11

Na Lutu nei Atama kei Ivi a tiki ni yavu nei Tamada Vakalomalagi.

Kevaka me a tiko o Atama kei Ivi mai na were o Iteni, ke rau a sega ni vakaluveni ka sega ni tubu me laki vakataki Tamada Vakalomalagi. Eda sa vakavinavinaka ki na nodrau digidigi me kania na vuanikau baleta ni digidigi oqo e rawati kina na noda bula vakayago kei na noda madigi ni bula tawamudu.

iTaviqaravi e Rawa ni Caka

• Sureti ira na gone me ra cakacaka vata me talanoataka na lutu nei Atama kei Ivi ena nodra vosa ga. Wasea na veitikina mai na iVakatekivu 3 me vukei ira.

• Vukei ira na goneme kunea ena Mosese 4:22–25, 29; 5:10–11 na vua ni nodrau kania o Atama kei Ivi na vuanikau (raica talega na 2 Nifai 2:19–25). Na cava na vuna e veivakalougatataki kina vei keda na nodrau digidigi? E vukei keda vakacava na iVakabula meda ulabaleta na ivalavala ca kei na mate?

Mosese 4:1–4

Sa tu vei au na kaukauwa meu digidigi.

Era kidava beka na gone o vakavulica na kena talei na isolisoli me rawa ni digitaka na dodonu kei na cala? E rawa ni vukei ira vakacava na italanoa kei Atama kei Ivi mera marautaka na isolisoli oqo?

iTaviqaravi e Rawa ni Caka

• Navuca e dua na lesoni vakaraitaki me vaka e muri oqo me vakaraitaka na bibi ni noda dui digidigi: Sureti ira na gone me ra rokataka na itaviqaravi ena tabana ni macawa oqo, ia solia vei ira e dua bau na roka mera vakayagataka. Na cava na vuna ena vinaka cake kina me ra digidigi ena gauna vakaoqo? Wilika vata na Mosese 4:1–4 me veitalanoa kina ena vuna e bibi kina na digidigi ena ituvatuva ni Kalou.

• Sureti ira na gone mera wasea na veika era sotava yadua ni ra digitaka na vinaka kei na ca. Laiva me ra veitalanoataka na cava e rawa ni vua ni digidigi yadudua.

Mosese 5:4–15

Ena vukui Jisu Karisito, au rawa ni veivutuni ka laki bula tale vata kei na Kalou.

Na Tamada Vakalomalagi sa talai Jisu Karisito mai me vueti keda mai na revurevu ni Lutu. Mai na Nona solibula veisorovaki, ea cakava o Jisu me rawa kina vei keda meda tucake tale ni da sa mate ka vosoti na noda ivalavala ca ni da sa veivutuni.

iTaviqaravi e Rawa ni Caka

• Vola e rua na ulutaga ena papa: Ena vukui Atama kei Ivi kei na Ena vukui Jisu Karisito. Vukei ira na gone mera raica na revurevu ni Lutu ni kemuni wilika vata na Mosese 4:25; 6:48; Roma 5:12; 2 Nifai 2:22–23. Me ra vola na veika era sa vulica ena imatai ni ulutaga. Mo qai vukei ira mera raica rawa na sala ea ulabaleta kina o Jisu Karisito na ivalavala ca kei na mate ni o ni wilika vata na Mosese 5:8–11, 14–15; 6:59; Alama 11:42. Me ra vola na veika era sa vulica ena ikarua ni ulutaga. Na cava na vuna eda vakavinavinaka kina baleti Jisu Karisito?

• Vakaraitaka e dua na vidio me baleta na Veisorovaki ni iVakabula, me vaka na “Because of Him” (ChurchofJesusChrist.org). Sureti ira na gone me ra wasea na lomadra baleti Jisu Karisito.

• E vica na siga ki liu, kerea eso na gone mera digitaka e dua na ivolanikalou se na sere me baleta na Veisorovaki ni iVakabula me ra wasea ena kalasi. Vakayaloqaqataki ira me ra tukuna na cava na vuna era taleitaka kina. Lagata vata e dua se rua na sere.

iivakatakilakila ni vuli

Vakauqeta na Vuli e Vale

Sureti ira na gone me ra wasea na tabana ni itaviqaravi ena macawa oqo kei na nodra matavuvale ka veivosakitaka na veivakalougatataki eda taukena ena vuku ni Lutu nei Atama kei Ivi.

Vakatorocaketaki Noda Veivakavulici

Vakasaqara na nomu veivauqeti vakai iko. Kakua ni raica na veituvatuva oqo me ivakaro e dodonu mo muria ni o veivakavulici. Ia, vakayagataka me ra ivurevure ni vakasama me udreva na vauqeti vakai iko ni o tugana tiko na nodra gagadre na gone o vakavulica. (Raica na Veivakavulici ena iVakarau ni iVakabula,7.)

tabana ni itaviqaravi: na Lutu nei Atama kei Ivi ea tiki ni yavu nei Tamada Vakalomalagi.