Rau taubale vata o Atama kei Ivi

Adam and Eve, mai vei Douglas Fryer

10–16 ni Janueri

Na iVakatekivu 3–4; Mosese 4–5

Na Lutu Nei Atama kei Ivi

Ni ko vulica Na iVakatekivu 3–4 kei na Mosese 4–5, vakasamataka na cava e gadreva tiko na Turaga me vakavulica vei iko. Vola na dina eso oqo kei na nomuni veivakauqeti vakayalo, ka vakananuma lesu tiko ena loma ni macawa.

Vola na Veika o Uqeti Kina

Taumada, a vaka me dua na leqa levu na italanoa ni Lutu nei Atama kei Ivi. Erau a vakasavi tani mai na Were totoka o Iteni o Atama kei Ivi. Erau a viritaki sobu ki na dua na vuravura e dau tu ga kina na mosi, rarawa, kei na mate (raica Nai Vakatekivu 3:16–19). Ka rau sa tawasei tani mai vua na Tamadrau Vakalomalagi. Ia ena vuku ni dina sa vakalesuimai vua na Parofita o Josefa Simici ena iVola i Mosese, eda sa kila ni italanoa kei Atama kei Ivi e dua na inuinui—kei na dua na tiki bibi ni ituvatuva ni Kalou baleti ira na Luvena.

E totoka na Were o Iteni. Ia ko Atama kei Ivi erau gadreva e dua na ka levu cake mai na veika totoka e wavoliti rau. Erau gadreva—ka da gadreva taucoko—e dua na madigi ni tubu. Na biubiu mai na were ko Iteni na imatai ni ikalawa gadrevi me baleta na lesu tale vua na Kalou ka yaco me vakataki Koya. Kena ibalebale na sotavi ni veisaqasaqa, caka cala, ka vulica me veivutuni, ka vakanuinui vua na iVakabula, o koya ena rawa ena Nona Veisorovaki na toso ki liu kei na “reki ni noda sereki” (Mosese 5:11). O koya ni o wilika na Lutu nei Atama kei Ivi, kakua ni vakanamata ena leqa levu ia ena veika ena rawa—sega ena parataisi sa yali mai vei rau o Atama kei Ivi ia ena lagilagi eda na rawata mai na nodrau digidigi.

ivakatakilakila ni vuli ni tamata yadua

Vakasama ni Vuli iVolanikalou ni Tamata Yadua

Nai Vakatekivu 3:1–7; Mosese 4; 5:4–12

Na lutu e tiki yaga sara ni ituvatuva ni Kalou me sereki ira na Luvena.

Na nodrau lutu o Atama kei Ivi sa kauta mai na mate vakayago kei na mate vakayalo ki vuravura. E kauta talega mai na veika dredre, rarawa, kei na ivalavala ca. Na veika kece oqo e vaka me vu ni kena veivutunitaki na lutu. Ia na lutu e tiki ni ituvatuva nei Tamada Vakalomalagi me vakabulai ira ka vakacerecerei ira na Luvena mai nai “soro ni Le Duabau ga nei Tamada” (Mosese 5:7). Ni ko vulica tiko Nai Vakatekivu 3:1–7; Mosese 4; 5:4–12, na dina cava soti o kunea e vukei iko mo kila na Lutu kei na sala e uabaleta kina na Veisorovaki i Karisito? Ena veivuke beka na mataqali taro vaqo:

• A tarai rau vakacava o Atama kei Ivi na Lutu? Na sala cava e tarai au kina?

• Na cava na vuna erau vakacabo isoro kina o Atama kei Ivi? Na cava beka e vakatakarakarataka na vakacabo isoro oya? Na cava au rawa ni vulica mai na nona vosa na agilosi ena veitikina oqo?

• Na cava na vuna erau a “reki” kina o Atama kei Ivi ni oti na nodrau Lutu? Na cava au vulica mai na itukutuku oqo me baleta na ituvatuva ni Kalou me sereki au ena vukui Jisu Karisito?

Me baleta na iVola i Momani kei na so tale na ivakatakila edaidai, sa tiko e dua na ivakarau ni rai duatani me baleta na Lutu. Me kena ivakaraitaki, vakasamataka na veika a vakavulica na parofita o Liai ki na nona matavuvale me baleti Atama kei Ivi ena 2 Nifai 2:15–27. E vakamatatataka vakacava na ivakavuvuli nei Liai na veika a yaco ena Were ko Iteni ka vukei keda me da kila na vuna e bibi kina?

Raica talega na 1 Korinica 15:20–22; Mosaia 3:19; Alama 12:21–37; Vunau kei na Veiyalayalati 29:39–43; Yavu ni Vakabauta1:3; Dallin H. Oaks, “Na iTuvatuva Cecere,” Liaona, Me 2020, 93–96; Dallin H. Oaks, na “Veibasai ni ka Kecega,” Liaona, Me 2016, 114–17; Jeffrey R. Holland, “Lewa Dodonu Loloma,” Liaona, Me 2015, 104–6.

Taura tu o Ivi na vuanikau

Leaving Eden, mai vei Annie Henrie Nader

Nai Vakatekivu 3:16; Mosese 4:22

Na cava beka na kena ibalebale me “lewai” Ivi o Atama?

Na mala ni ivolanikalou oqo sa dau tauri cala ena vuqa na gauna me kena ibalebale ni donu tu kevaka e dau voravora na itovo ni tagane vua na watina. Ena noda gauna, era sa vakavuvulitaka na parofita ni Turaga ni dodonu vua na tagane vakawati me vakatulewa ena buladodonu e vale, me raica na watina ni rau veitokani tautauvata (raica na “Na Matavuvale: Ai Vakaro ki Vuravura Raraba” [ChurchofJesusChrist.org]). Erau a vakamacalataka o Elder Dale G.Renlund kei Sisita Ruth Lybbert Renlund ni dua na tagane vakawati bula dodonu “ena vakasaqara me veiqaravi; ena vakadinadinataka na cala ka kere veivosoti; ena totolo me veivakacaucautaki; ena dau kauwaitaka na veika era vinakata na lewe ni matavuvale; ena vakila na bibi ni itavi me vakarautaka na veika ni bula ka veitaqomaki ki na nona matauvale, ena doka ka rokova sara na watina. … E na vakalougatataka na nona matavuvale” (The Melchizedek Priesthood: Understanding the Doctrine, Living the Principles [2018], 23).

Mosese 5:4–9, 16–26

Ena vakadonuya na Kalou na noqu solibula kevaka au solia ena yalomalumalumu ka talairawarawa.

Erau kila ko Atama kei Ivi ni vakacabo isoro manumanu sa ivakatakilakila ni isoro ni veivakaduavatataki nei Karisito, ka ra vakatakila oqo “vei ira na luvedrau tagane kei na luvedrau yalewa” (Mosese 5:12). Ni o vulica na Mosese 5:4–9, 16–26, vakasamataka mada na nodrau ivakarau ni vakasama duidui e rua na luvedrau tagane, ko Keni kei Epeli, me baleta na solibula. Na cava na vuna e ciqoma kina na Turaga na isoro nei Epeli ka sega na nei Keni?

Na solibula cava soti e kerea vei iko na Turaga? E dua beka na ka ena Mosese 5:4–9, 16–26 e veisautaka na nomu nanuma me baleta na solibula?

Raica talega na Same 4:5; 2 Korinica 9:7; Omanai 1:26; 3 Nifai 9:19–20; Moronai 7:6–11; Vunau kei na Veiyalayalati 97: 8; Jeffrey R. Holland, “Raica na Lami ni Kalou,” Liaona, Me 2019, 44–46.

ivakatakilakila ni vuli vakamatavuvale

Vakasama baleta na Vuli iVolanikalou Vakamatavuvale kei na Lotu Vakamatavuvale

Nai Vakatekivu 3; Mosese 4.Na cava o rawa ni cakava mo vukei ira nomu matavuvale mera kila vakavinaka cake na Lutu nei Atama kei Ivi? Sa rawa mo lavetaka na iyaloyalo mai na “Atama kei Ivi” (ena ITukuni ni Veiyalayalati Makawa) ka kotiva laivi mai. Qai sasagataka mo tuva vakadodonu na iyaloyalo ni o ni veitalanoataka na veika e sotava o Atama kei Ivi. Na cava na vuna e gadrevi kina ena yavu ni veivakabulai nei Tamada Vakalomalagi na Lutu Tani? Sarava na vidio “The Fall” (ChurchofJesusChrist.org) me veivuke ena kena saumi na taro oqo.

Mosese 4:1–4.Na cava eda sa vulica baleta na Kalou, Jisu Karisito, kei Setani mai na veitikina oqo? Na cava e rui bibi sara kina na ituvatuva ni Kalou me vinakata kina o Setani me vakarusa?

Mosese 5:5–9.Na cava e vakarota na Kalou me rau cakava ko Atama kei Ivi me rau vakananuma kina na iVakabula? Na cava sa solia vei keda na Kalou me vukea na noda dau vakananuma na iVakabula?

Mosese 5:16–34.Na cava na kena ibalebale ni da “ivakatawa i tacida”? Eda na dau veikauwaitaki vakavinaka cake beka vakacava vakataki keda ena matavuvale?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Digitaka na Dodonu,” iVolanisere ni Gonelalai, 82

Vakavinakataki ni Vuli Yadudua

Vakayagataka na veivuke ni vulici ni ivolanikalou. Ni ko vulica na ivolanikalou, vakayagataka na ivakamacala e ra, iDusidusi Vakaiulutaga, Bible Dictionary, iDusidusi ki na iVolanikalou, kei na ivukevuke tale eso ni vuli.

na agilosi e sikovi Atama kei Ivi

Similitude, mai vei Walter Rane