27 ni Tiseba–2 ni Janueri

Mosese 1; Eparama 3

“Oqo na iNaki kei na Lagilagi ni Noqu Cakacaka”

Ni o wilika na veika e kaya na Kalou vei Mosese kei Eparama, vakananuma vakatitobu na ka e rawa ni tukuna tale tikoga vei iko.

Vola na Veika o Uqeti Kina

Na iVolatabu e tekivu ena vosa “Ena ivakatekivu sa bulia na lomalagi kei vuravura na Kalou” (Nai Vakatekivu 1:1). Ia na cava a tu e kea ni bera “na ivakatekivu”? Ka cava na vuna e bulia kina na Kalou na veika kece oqo? Mai vua na parofita o Josefa Simici, sa veivakararamataki na Turaga ena vuku ni taro oqori.

Me kena ivakaraitaki, a solia vei keda na ivolatukutuku ni dua na raivotu a raica kina ko Eparama na noda a bula tu vakayalo “ni bera ni buli na vuravura” (raica na Eparama 3:22–28). Sa solia talega vei keda na Turaga e dua na ivakavakadewa veivakauqeti se raicilesu ni imatai ni ono na iwase ni Nai Vakatekivu, ka vakatokai na iVola i Mosese—ka sega ni tekivu ena “mai na ivakatekivu.” Ia, a tekivu ena dua na ka a sotava o Mosese ka lewena na italanoa kilai levu ni Veibuli. O koya sa vanua vinaka me tekivu kina noda vulica na Veiyalayalati Makawa na ivolanikalou ni gauna oqo baleta ni veivosakitaki kina eso na taro bibi ka rawa ni suitu ni noda wilika: O cei na Kalou? O cei o keda? Na cava na cakacaka ni Kalou, kei na cava na noda tikina e kea? Na iwase idola ni Nai Vakatekivu e rawa me laurai ni nona sauma na Turaga na kerekere nei Mosese: “Oi kemuni na Kalou mo ni lomana na nomuni tamata, ka tukuna mai vei au na veika e baleta na vurarvura oqo, kei ira na lewena, kei na lomalagi talega” (Mosese 1:36).

Vakasama ni Vuli iVolanikalou ni Tamata Yadua

Mosese 1

Me vaka niu luve ni Kalou, e tiko e dua na noqu icavacava vakalou.

E vakavulica o Peresitedi Dieter F. Uchtdorf, “E vuqa na veilecayaki eda sotava ena bula oqo e vu mai na noda sega ni kila vakavinaka o cei o keda” (“The Reflection in the Water” [yasanibuka ni iVakarau ni Vuli ena Lotu baleti ira na itabagone qase, 1 ni Nove., 2009], ChurchofJesusChrist.org). E kila tu na Tamada Vakalomalagi na ka oqo, ka vakakina o Setani. Na imatai ni itukutuku ni Kalou vei Mosese e okati kina na dina “ko iko na luvequ” ka “ko sa tautauvata kei koya na noqu Le Duabau ga” (Mosese 1:4, 6). Ena kena veibasai, e vosa kina o Setani vei Mosese me vaka ga e dua na “luve ni tamata” (Mosese 1:12). Ena duatani beka vakaivei na nomu bula kei na nomu vakatulewa kevaka o raici iko me vaka e vinakata o Setani, me vaka o iko e dua na “luvena tagane [se yalewa] na tamata”? Sa vakalougatataka vakacava na nomu bula na nomu kila ka nanuma tiko ni o iko e dua na luve ni Kalou?

Na veitikina se na malanivosa cava ena Mosese 1 e solia vei iko e dua na yalo ni kemu yaga vakalou?

Christ and the Creation, (Karisito kei na Veibuli), mai vei Robert T. Barrett

Mosese 1:12–26

Au rawa ni vorata na veivakayarayarataki nei Setani.

Me vaka e vakaraitaka vakamatata na Mosese 1, na veigauna vakayalo qaqa eda dau sotava e sega ni vakuwai keda mai na veitemaki. Na ka dina, e dua na iwalewale nei Setani sa ikoya me temaki keda me da vakatitiqataka na veika a sotavi oqori se na ka eda vulica mai kina. Ni o wilika na isaunivosa nei Mosese vei Setani e na tikina e 12–26, na cava o vulica e rawa ni vukei iko mo dinata tikoga na ivakadinadina o sa ciqoma? Na cava e vukei iko mo vorata na veitemaki tale eso nei Setani? (raica, me kena ivakaraitaki, tikina e 15 kei na 18).

Mai na veika o sa vulica, o rawa ni cakava e dua na ituvatuva me baleta na vorati ni veitemaki. Me kena ivakaraitaki, e rawa ni o vakacavara na itukutuku ni “Niu sa temaki meu , au na .”

Raica talega na Maciu 4:1–11; Ilamani 5:12; Gary E. Stevenson, “Kakua ni Mai Vakatovolei Au,” Liaona, Nove. 2019, 93–96; “Au Luve ni Kalou” (vidio), ChurchofJesusChrist.org.

Mosese 1:27–39; Eparama 3

Na cakacaka kei na lagilagi ni Kalou sai koya me vukei au meu rawata na bula tawamudu.

Ni oti nona raica na raivotu ni nona bulika na Kalou, a kerekere vua na Turaga o Mosese: “tukuna vei au … na ibalebale ni veika kece oqo” (Mosese 1:30). Na cava e tarai iko me baleta na nona vosa na Turaga ena Mosese 1:31-39?

A sotava talega o Eparama e dua na raivotu, ka volai ena Eparama 3. Na cava beka o kunea ena tikina e 22–26 ka na rawa ni sauma na kerekere nei Mosese?

Vakasamataka mo vola na dina tale eso erau a vulica o Mosese kei Eparaama ena nodrau raivotu: me baleta na Kalou, me baleti rau, ka vakakina me baleta na inaki ni nona veibuli na Kalou. Na cava beka e cakava na dina eso oqo ena ivakarau o raici iko kina kei na vuravura e wavoliti iko tu?

Raica talega na Dieter F. Uchtdorf, “O Sa Rui ka Bibi Vua,” Liaona, Nove. 2011, 19–22; Ulutaga Vakosipeli, “Premortality,” topics.ChurchofJesusChrist.org.

Eparama 3:22–23

Eso tale beka, sega ni wili kina o Eparaama era a “digitaki ni bera ni [ra] sucu”?

“Ena vuravura ni yalo taumada, a lesia na Kalou eso na yalo me qarava eso na ilesilesi digitaki ena gauna ni nodra bula vakayago oqo. Qo e vakatokai me tabaki taumada. … Na ivunau ni veitabaki taumada o ya e baleti ira kece na lewe ni Lotu, sega walega ni baleta na iVakabula kei ira na nona parofita” (Ulutaga Vakosipeli,“Foreordination,” topics.ChurchofJesusChrist.org).

A rawa mai vakacava vei keda na ivola i Mosese kei Eparama?

Na ivola i Mosese sai koya na imatai ni iwase ni ivakadewa vakauqeti ni iVolatabu nei Josefa Simici. A vakatakilai vei Josefa Simici na iVola i Eparama ena gauna ni nona cakacaka ena ivolagasau ni Ijipita. Na ivola oqo, ka na kunei nikua ena Mataniciva Talei, e vakarautaka e levu na itukutuku me baleti Mosese, Eparama, kei na so tale na parofita era sega ni kunei ena Veiyalayalati Makawa. Mo vulica eso tale na ka me baleta na sala eda rawata kina na ivola oqo, raica na “iVakadewa nei Josefa Simici ni iVolatabu” (Church History Topics, ChurchofJesusChrist.org/study/history/topics) kei na “Translation and Historicity of the Book of Abraham” (Ulutaga Vakosipeli, topics.ChurchofJesusChrist.org).

Vakasama baleta na Vuli iVolanikalou Vakamatavuvale kei na Lotu Vakamatavuvale

Mosese 1:2–6; Eparaama 3:11–12.Sa rawa mo sureta na lewe ni matavuvale me ra vaqara na malanivosa mai na sere “Au Luve ni Kalou” (iVolanisere ni Lalai, 2) e sema tiko ki na dina e vakatavulici ena ivolanikalou oqo.

Mosese 1:4, 30-39.Era na marautaka beka na nomu matavuvale me ra raica eso “na cakacaka ni liga ni [Kalou]”? (tikina e 4). Ena rawa beka ni o wilika na tikina eso oqo ena dua na rara ni gade se ena ruku ni kalokalo ena bogi. Oti mo qai tukuna na nona bulia na vuravura na Kalou kei na noda vakaitavi ena Nona “cakacaka kei na [Nona] lagilagi” (tikina e 39).

Mosese 1:18.Na ivakasala cava e rawa ni da wasea me da veivukei kina vakataki keda me da “kila na kedrau duidui” na Kalou kei Setani? (Raica talega na Moroni 7:12–18; Vunau kei na Veiyalayalati 50:23–24.)

Eparama 3:24–26.E rawa ni solia vei ira na lewe ni matavuvale e dua na cakacaka lasa ia veibolei toka me ra vakadinadinataka kina ni rawa ni ra muria na idusidusi, me vaka na kena lobi na waqavuka pepa se vakamuri e dua na icakacaka ni kakana. E tautauvata vakacava na itaviqaravi kei na inaki ni noda bula oqo me vaka e vakamacalataki ena veitikina oqo?

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Baleta na Lalai.

Sere e vakaturi: “Au Luve ni Kalou,” Nodra Sere na Lalai, 2.

Vakatorocaketaki ni Vuli ni Tamata Yadua

Vakasaqara na dina vakosipeli. Ena ivolanikalou, ena so na gauna na dina ni kosipeli e dau tukuni vakadodonu; ena so na gauna era dau vakaibalebaletaki ena dua na italanoa se ivakaraitaki. Tarogi iko mada, “Na dina tawamudu cava e vakatavulici ena veitikina oqo?”

Moses Overcomes Satan, mai vei Joseph Brickey