3–9 ni Janueri

Nai Vakatekivu 1–2; Mosese 2–3; Eparama 4–5

“Ena iVakatekivu a Bulia na Lomalagi kei Vuravura na Kalou”

Kevaka mada ga o sa wilika oti me baleta na Veibuli, se levu tu ga na ka mo vulica mai na ivolanikalou. Masuta na veidusimaki mai vua na Yalo Tabu me vukei iko mo kila na veika vou.

Vola na Veika o Uqeti Kina

Ni sa rui totoka tu ka vakaturaga na vuravura e wavoliti keda tu, sa dredre kina me da raitayaloyalotaka na vuravura ni se “sega ni vakacokotaki, ka lala tu,” “e lala tu ka lala didi” (Nai Vakatekivu 1:2; Eparama 4:2). E dua na ka e vakavulica vei keda na italanoa ni Veibuli sai koya ni Kalou e rawa ni cakava e dua na ka vakasakiti mai na dua na ka e yakusurasura tu. Ena veivuke kevaka eda nanuma tiko oqori ena gauna e vaka me yakusurasura mai kina na bula. Oi Rau na Tamada Vakalomalagi kei Jisu Karisito erau Dauveibuli, ka se bera ni oti na Nodrau buli keda tiko. E rawa ni Rau vakawaqaca na rarama ena veigauna butobuto ni noda bula. E rawa ni Rau vakacokotaka na vanua mamaca ena wasawasa voravora ni noda bula. E rawa ni Rau vakarota na veivunika, ka kevaka eda talairawarawa ki na Nodrau vosa me vakataki ira na veivunika, e rawa ni Rau veisautaki keda ki na veibulibuli totoka eda a nakiti me vakakina. Oqori e tiki ni veika e kena ibalebale ni da buli ena ivatuka ni Kalou, me da ucui Koya (raica Nai Vakatekivu 1:26). Eda rawa ni yaco me vakataki Koya: kabula vakacerecerei, lagilagi vaka-silesitieli.

Me laurai vakararaba na ivola ni iVakatekivu, raica na “Genesis” ena Bible Dictionary.

Vakasama ni Vuli iVolanikalou ni Tamata Yadua

Nai Vakatekivu 1:1–25; Mosese 2:1–25; Eparama 4:1–25

Ena veidusimaki ni Tamada Vakalomalagi, a bulia kina o Jisu Karisito na vuravura.

O Elder D. Todd Christofferson e kaya, “se vakacava na ivakamacala ni ivalavala ni veibuli, eda kila ni a sega ni ka vakacalaka ia ni a sa vakaturi mai vua na Kalou na Tamada ka sa cakacakataka o Jisu Karisito” (“Na Cava na Vuni Vakamau, Na Cava na Vuni Matavuvale,” Liaona, Me 2015, 51). Ni levu sara na ka eda sega ni kila me baleta na ivakarau ni kena buli na vuravura, vakananuma mada vakatitobu na veika o sa vulica me baleta na Veibuli mai na veika sa vakatakila mai na Kalou e Nai Vakatekivu 1:1–25; Mosese 2:1–25; kei na Eparaama 4:1–25. Na cava o raica ena itukutuku eso oqo e tautauvata? Na cava o raica ni duidui? Na vakanananu cava e yaco vei iko me baleta na Tamada Vakalomalagi kei Jisu Karisito ni ko wilika me baleta na Veibuli?

Raica talega na Vunau kei na Veiyalayalati 101:32–34.

Creation, mai vei Joan Hibbert Durtschi

Nai Vakatekivu 1:27–28; 2:18–25; Mosese 3:18, 21–25; Eparaama 5:14–19.

Nodrau vakamau e dua na tagane kei na yalewa sa ilesilesi ni Kalou.

“Erau a semati vata o Atama kei Ivi ena vakamau me baleta na gauna oqo kei na veigauna tawamudu kecega ena lewa ni matabete tawavakaiyalayala” (Russell M. Nelson, “Lessons from Eve,” Ensign, Nove. 1987, 87). Na cava na vuna e bibi kina me kilai na ka dina oqo? Vakasamataka oqo ena nomu wilika na Ai Vakatekivu 1:27–28; 2:18–25; Mosese 3:18, 21–25; kei na Eparaama 5:14–19. Kevaka o vinakata mo vulica eso tale na ka me baleta na vakamau ena loma ni ituvatuva ni Kalou, wilika ka vakasamataka vakatitobu na ivurevure eso e ra. Na cava era uqeta na ivurevure eso oqo mo cakava mo vakavinakataka kina nomu bula vakamau se mo vakarautaki iko ki na vakamau ena veisiga ni mataka?

Raica talega na Maciu 19:4–6; 1 Korinica 11:11; Linda K. Burton, “Meda Torocake Vata,” Liaona, Me 2015, 29–32; “Na Matavuvale: Ai Vakaro ki Vuravura Raraba,” ChurchofJesusChrist.org.

Nai Vakatekivu 2:2–3; Mosese 3:2–3; Eparaama 5:2–3

A vakalougatataka ka vakatabuya na Kalou na siga ni Vakacecegu.

A vakatabuya na Kalou na siga ni Vakacecegu ka kerei keda meda vakatabuya tikoga. E vakavulica o Elder David A. Bednar, “Na Siga ni Vakacecegu e gauna ni Kalou, e gauna tabu lesi vakatabakidua ki na Nona lotuvaki kei na kena ciqomi ka nanumi na Nona vosa ni yalayala e levu sara ka talei” (“Vosa ni Yalayala e Levu Sara ka Talei,” Liaona, Nove. 2017, 92). O na vakayagataka vakacava na itukutuku oqo kei Nai Vakatekivu 2:2–3; Mosese 3:2–3; se Eparaama 5:2–3 mo vakamacalataka vua e dua se cava o digitaka kina mo rokova na siga ni Vakacecegu? Sa vakalougatataki iko vakacava na Turaga ena nomu vakatabuya tikoga na Nona siga?

Raica talega na Aisea 58:13–14; Vunau kei na Veiyalayalati 59:9–13; “Sabbath is a Delight” (vidio), ChurchofJesusChrist.org.

Vakasama baleta na Vuli iVolanikalou Vakamatavuvale kei na Lotu Vakamatavuvale

Nai Vakatekivu 1:1–25; Mosese 2:1–25; Eparaama 4:1–25.Na cava e rawa ni o cakava me ka ni lasa ki na nomu matavuvale na vulici ni Veibuli? Sa rawa mo kauta na nomu matavuvale mo dou vakasaqara e tautuba na veika era a caka ena veigauna ena italanoa ni Veibuli, me vaka na kalokalo, vunikau se manumanu. E rawa talega ni o vakaraitaka na iyaloyalo ni veika buli ena veigauna yadua ni veibuli ka sureti ira na lewe ni matavuvale me ra tuva vakadodonu na iyaloyalo ni ra wilika vata tiko na italanoa ni Veibuli. Na cava e vakavulica vei keda baleti Tamada Vakalomalagi kei Jisu Karisito na veika buli oqo?

Na iVakatekivu 1; Mosese 2; Eparaama 4.Dua na sala meda raica kina na italanoa ni Veibuli sai koya mo sureta nomu matavuvale me ra vaqara na levu ni gauna e vakatoka kina na veika sa bulia na Kalou ni sa “vinaka.” e Nai Vakatekivu 1 se Mosese 2 . Na cava e vakatura oqo me baleta na sala e dodonu meda raica kina na ibulibuli ni Kalou—oka kina o keda? Na cava eda vulica mai na kena vakavosataki na veika a yaco oqo ena Eparaama 4?

Nai Vakatekivu 1:26–27; Mosese 2:26–27; Eparaama 4:26–27.Na cava na vuna e bibi kina me da kila ni da a buli me da ucuya na Kalou? E tara vakacava na ivakarau ni noda rai baleti keda, ira na tani, kei na Kalou?

Kevaka era tiko na gone lalai, sa rawa mo ni wilika vata na Mosese 2:27. ka qitotaka e dua na qito rawarawa: vakaraitaka e dua na kedrau iyaloyalo na Tamada Vakalomalagi kei Jisu Karisito, me vakataka na iyaloyalo 90 ena iVola ni iYaloyalo Vakosipeli (2009), ka kerei ira na lewe ni matavuvale me ra veivukevuke ena dusini dua na tiki ni yagoi Tamada Vakalomalagi se o Jisu. Oti me ra qai dusia na vo ni lewe ni matavuvale na tikina vata oqori e yagodra.

Nai Vakatekivu1:28; Mosese2:28; Eparaama 4:28.Se dei tikoga na ivakaro ni Kalou vei ira na Luvena me ra tubu me lewe levu ka vakatawai vuravura” (“Na Matavuvale: Ai Vakaro ki Vuravura Raraba,” ChurchofJesusChrist.org). E rawa ni ra matanataka na lewe ni matavuvale na ivakarau me da vakamacalataka kina na noda vakabauta me baleta na ivakaro oqo vei ira era sega tu ni kila na dina oqo se duatani nodra vakabauta.

Nai Vakatekivu1:28; Mosese2:28; Eparaama 4:28.Na cava na kena ibalebale me “lewa … ka bula kecega sa qasi voli e delai vuravura”? (raica talega na Vunau kei na Veiyalayalati 59:16–21). E rawa vakacava ki na noda matavuvale me vakayacora na noda itavi me da maroroya na vuravura?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Rogoca na Sere ni Manumanu,” iVolanisere ni Gonelalai, 16

Vakatorocaketaki ni Noda Veivakavulici

Bulataka na ivolanikalou ena noda bula. Ni wiliki oti e dua na malanivosa ni ivolanikalou, sureti ira na lewe ni matavuvale mera vakayagataka ena nodra bula. Taura mada, e yaga vakacava na Mosese 3:1–3 ena noda rokova na siga ni Vakacecegu ena veimacawa? (Raica na Veivakavulici ena iVakarau ni iVakabula, 21.)

The Creation, mai vei Annie Henrie Nader