O Atama kei Ivi e taudaku ni Were o Iteni

Vinaka Cake mai vei Parataisi, mai vei Kendal Ray Johnson

17–23 ni Janueri

Nai Vakatekivu 5; Mosese 6

“Vakatavulica Raraba yani na Veika Oqo Vei Ira na Nomudou Kawa”

Na nomu vakavakarau mo veivakatavulici e tekivu ena nomu vulica na iVakatekivu 5 kei na Mosese 6. Ni o vakayacora oya, vakarogoca na veivakauqeti mai vua na Yalo Tabu me baleta na veika era gadreva na gone me ra vulica.

Vola na Veika o Vakauqeti Kina

ivakatakilakila ni veiwasei

Sureta na Veiwasei

Vola ena so na tikinipepa, na vosa bibi eso e rawa ni vukei ira na gone mera nanuma e dua na ka era sa vulica mai vale ena macawa oqo se ena dua na lesoni ni Lalai sa oti. Mera veivuketaka na gone me digitaka vakailoa e dua na vosa. Ni sa digitaki e dua na vosa, sureta e dua vei ira na gone mera wasea na veika era sa vulica baleta na vosa o ya.

ivakatakilakila ni veivakavulici

Vakavulica na iVunau: Gone Sobu

Mosese 6:27, 31–34

E rawa ni vukei au na Kalou meu cakava na veika dredre.

Ena gauna e kacivi kina o Inoke me vunautaka na kosipeli, a leqataka okoya ni na druka. Ia na Kalou e vukei koya me vakayacora na veika lelevu.

iTaviqaravi e Rawa ni Caka

• Kerei ira na gone mera wasea e dua na gauna era a kerei kina mera cakava e dua na ka e dredre se vakarerevaki vei ira. Wasea na italanoa ni nona kacivi o Inoke me dua na parofita, e kunei ena Mosese 6:27, 31–34 (raica talega na “Inoke na Parofita,” ena ITukuni ni Veiyalayalati Makawa). Dau vakabibitaka ni dina ga ni ko Inoki e vakila ni sega ni tu vakarau me dua na parofita, sa yalataka na Kalou me na vukei koya. Vukei ira na gone mera kilamatata eso na sala e vukei keda kina na Kalou ena gauna eda kerei kina meda cakava na veika dredre.

• Wasea eso na ivakaraitaki vakaivolanikalou ni vukei ira na tamata na Kalou mera cakava na veika dredre—me kena ivakaraitaki, o Noa ni tara tiko na waqa, o Tevita ni vala kei Kolaiaci, o Amoni ni taqomaka tiko na nona qele ni manumanu na tui, se o Samuela na Lemanaiti ni vunau tiko. (Me baleta na iyaloyalo kei na tiki ni ivolanikalou, raica na Gospel Art Book, naba 7, 19, 78,81) Wasea e dua na ka sotavi ni a vukei iko na Turaga mo cakava e dua na ka dredre.

Mosese 6:52

E vakavulici au na kosipeli meu na lesu vakacava vei Tamada Vakalomalagi.

E vakavulici Atama na Kalou ena ka eda gadreva meda cakava meda lesu kina Vua—meda vakabauta, veivutuni, papitaisotaki, ka ciqoma na isolisoli ni Yalo Tabu. O na rawa ni vukei ira vakacava na gone mera vulica vakalevu cake na veika oqo?

iTaviqaravi e Rawa ni Caka

• Mo kunea se droinitaka na iyaloyalo me matataka na vakabauta, veivutuni, papitaiso, kei na isolisoli ni Yalo Tabu (raica na tabana ni itaviqaravi ena macawa oqo). Biuta na iyaloyalo ena dua na laini ka mua ki na dua na iyaloyalo kei Jisu Karisito. Wilika na Mosese 6:52 vei ira na gone, ka kerei ira mera tucake veitikivi kei na iyaloyalo dodonu ni ra rogoca na vosa e matataka na iyaloyalo (ena tikina oqo, na vosa “vakabauta” e taurivaki).

• Lagata na sere e vakavulica na ivakavuvuli ena Mosese 6:52, me vaka na “Vakabauta,” “Help Me, Dear Father” (verse 2), “Niu sa Papitaiso,” kei na “The Holy Ghost” (Children’s Songbook, 96–97, 99, 103, 105). Vukei ira na gone me ra kilamatata ni da cakava na veika e vakavuvulitaki ena sere ena vukei keda meda lesu rawa vei Tamada Vakalomalagi.

Mosese 6:58

E vinakati ira na itubutubu na Tamada Vakalomalagi me ra vakavulici ira na luvedra.

Mai na gauna nei Atama kei Ivi, sa dau vakaroti na itubutubu me ra vakavulici ira na luvedra ena kosipeli. E rawa vakacava mo vakayaloqaqataki ira na gone me ra vakarorogo ka muria na nodra ivakavuvuli dodonu na nodra itubutubu?

iTaviqaravi e Rawa ni Caka

• Wilika na Mosese 6:58 vei ira na gone, ka vakaraitaka na iyaloyalo ni matavuvale nei Atama kei Ivi ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale. Vukei ira na gone me ra taleya na matavosa “vakatavulica raraba yani na veika oqo vei ira na luvemudou.” Vakamacalataka ni Kalou e gadreva na itubutubu kece me muria na ivakaraitaki nei Atama kei Ivi ena nodra vakavulici ira na luvedra baleti Jisu Karisito kei na Nona kosipeli. Tarogi ira na gone ena cava era rawa ni cakava ni ra vakavulica vei ira na kosipeli na nodra itubutubu se eso tale.

• Vukei ira na gone me ra vakasotara vata na kedra iyaloyalo vei ira na nodra itubutubu se na kedra iyaloyalo na luve ni manumanu ki na manumanu qase sara. Era vukei ira vakacava na luvedra na itubutubu? Na cava era vakavulica vei ira? Kerei ira na gone me ra droinitaka na iyaloyalo ni nodra matavuvale ena so na gauna ni vakavulici ira na itubutubu, me vakataka na wilika vata na ivolanikalou, masu vata, se na nodra kana vata.

  na matavuvale e vuli ivolanikalou

  Na itubutubu e sa dodonu me rau vakavulica na kosipeli vei ira na luvedrau.

vakatakilakila ni veivakavulici

Vakavulica na iVunau: Gone Qase Cake

Mosese 5:26–34

Na Kalou e rawa ni vukei au meu cakava na veika dredre.

E dina ga ni a vakila ni sega ni rawaka o Inoki, e vukei koya na Kalou me vakayacora na Nona veikacivi vaka parofita. Na Kalou e rawa talega ni vukei ira na gone o vakatavulica mera cakava na veika dredre.

iTaviqaravi e Rawa ni Caka

• Wilika na Mosese 7:26–34 vata kei ira na gone. Na cava e nanuma kina o Inoki ni na sega ni rawa ni vunautaka na kosipeli? (raica Mosese 6:31). E vukei Inoki vakacava na Kalou? (raica na Mosese 6:32–34; 7:13).

• Sureti ira na gone me ra tukuna eso na ka dredre ka ra dau cakava na nodra yabaki vata (me vaka na vakacavara e dua na ilesilesi ni vuli, lomavinaka vua e dua e sega ni vinaka, se tukuna na ka dina ni ra cakava e dua na cala). Vukei ira na gone me ra vaqara na matavosa mai na Mosese 6:32–34 ka rawa ni vukei ira. Kerei ira na gone me ra wasea e dua na gauna ka vukei ira kina na Kalou mera cakava e dua na ka dredre. Wasea talega na veika o sa sotava.

Mosese 6:50–62

Na vakabauta, veivutuni, papitaiso, kei na ciqomi ni Yalo Tabu ena vakarautaki au meu lesu tale vua na Kalou.

O Atama kei Inoki erau vakavuvulitaka vei ira na nodrau tamata na imatai ni ivakavuvuli kei na cakacaka vakalotu ni kosipeli: na vakabauta, veivutuni, papitaiso, kei na ciqomi ni isolisoli ni Yalo Tabu (raica talega yavu ni Vakabauta 1:4). Na cava o rawa ni cakava mo vukei ira kina na gone mera kilamatata na bibi ni ivakavuvuli kei na cakacaka vakalotu oqo ena nodra bula?

iTaviqaravi e Rawa ni Caka

• Kerei ira na gone me ra wilika na Mosese 6:52, 57 me kunei kina na ivakavuvuli kei na cakacaka vakalotu ni kosipeli e tukuni tiko ena ikava ni yavu ni vakabauta.

• Vola ena papa na ikava ni yavu ni vakabauta, ka sureti ira na gone me ra wilika. Ka qai bokoca e dua se rua na vosa, ka kerea me ra wilika tale, ka vakalewena na vosa era yali tiko mai na vakanananu. Tokaruataka na ikalawa oqo me yacova ni ra sa vulica na gone na yavu ni vakabauta.

• Sureti ira na gone me ra vola e dua na vosa lekaleka me baleta na vakabauta, veivutuni, papitaiso se na ciqomi ni isolisoli ni Yalo Tabu—e dua na ka era rawa ni wasea vei ira na nodra matavuvale. Na vosa yadua e rawa ni oka kina e dua na ivolanikalou, e dua na ka sotavi, ka dua na ivakadinadina. Na vosa e rawa talega ni vakamacalataka ena vukei keda vakacava na ivakavuvuli meda lesu rawa vei Tamada Vakalomalagi.

Mosese 6:57–58

Sa nodra itavi na itubutubu me ra vakavulici ira na luvedra.

Na Kalou e nuitaki ira na itubutubu me ra qasenivuli taumada ni kosipeli ena nodra matavuvale. E rawa vakacava mo vakayaloqaqataki ira na gone me ra tokoni ira na nodra itubutubu ena itavi oqo?

iTaviqaravi e Rawa ni Caka

• Kerea e dua na gone me wilika na Mosese 6:58. Na ivakaro cava e solia na Tamada Vakalomalagi vei ira na itubutubu ena tikina oqo? Vakaraitaka e dua na iyaloyalo kei Atama kei Ivi ni rau vakavulici ira tiko na luvedrau (raica na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale, ka laivi ira na gone me ra wasea na veika era raica ena iyaloyalo. Vakayaloqaqataki ira mera veivosakitaka na veidina bibi vakosipeli era sa vulica mai na nodra matavuvale.

• Vukei ira na gone me ra vola nodra vakavinavinaka vei ira na nodra itubutubu se tuvanaka eso na sala rawarawa mera vakaraitaka na nodra vakavinavinaka vei ira na nodra itubutubu. Lagata e dua na sere me baleta na matavuvale, me vakataka na “Love Is Spoken Here” (Children‘s Songbook, 190 – 91). Eda rawa vakacava ni vukei ira na noda itubutubu me rau tauyavutaka e dua na draki ni veilomani ena noda itikotiko?

ivakatakilakila ni vuli

Vakauqeta na Vuli e Vale

E rawa vakacava mo vukei ira na gone mera tomana na vuli ena taudaku ni kalasi? E rawa ni o vakayaloqaqataki ira me ra nanuma tiko na italanoa kei Inoki ena gauna era sotava kina e dua na ka dredre ena macawa oqo.

Vakatorocaketaki Noda Veivakavulici

Vakayagataka na tabana ni itaviqaravi. Ni ra rokarokataki tiko na gone ena tabana ni itaviqaravi, railesuva na ivakavuvuli mai na lesoni. Wilika vei ira na gone na vosa ena draunipepa kevaka e gadrevi vakakina.

tabana ni itaviqaravi: na kosipeli e vakavulici au meu lesu vakacava vei Tamada Vakalomalagi