Droini kei Eparaama kei Sera mai vei Dilleen Marsh

7–13 ni Feperueri

Nai Vakatekivu 12–17; Eparaama 1–2

“Ni’u Dua Koi Au Ka Dau Segata na Bula Dodonu”

Na cava e sa vakavulica vei iko na Yalo Tabu ena macawa oqo ni ko vulica Nai Vakatekivu 12–17 kei na Eparaama 1–2? Raica mo solia vei ira na lewe ni kalasi na gauna me ra wasea kina na veika sa vakavulica vei ira na Yalo Tabu.

Vola na Veika o Vakauqeti Kina

Sureta na Veiwasei

Mo solia vei ira na lewe ni kalasi na madigi mera wasea na veika era sa vulica mai Nai Vakatekivu 12–17 kei na Eparaama 1–2, mera na qai digitaka na tamata yadua e dua na tamata e tukuni tiko ena wase oqo ka vakacavara e dua na iyatuvosa me vakaoqo: “A vakavulica vei au o Eparaama ” se “A vakavulica vei au o Sera .”

Vakavulica na iVunau

Nai Vakatekivu 15:1–6; 17:15–22; Eparaama 1:1–19

Ena vakalougatataki keda na Kalou ena vuku ni noda vakabauta kei na gagadre dodonu.

• Na veika rau a sotava o Eparaama kei Sera e volaitukutukutaki tiko e Nai Vakatekivu 15; 17; Eparaama 1 ena rawa ni vukei ira na lewe ni kalasi mera maroroya na vakabauta ka yaco na nodra gagadre dodonu me na yaco ena nona gauna na Turaga. Ena rawa vakacava mo tekivuna e dua na veivosaki me baleta na ivakavuvuli oqo? E dua na vakasama o ya me sureti na kalasi mera vakasaqaqara e Nai Vakatekivu 15:1–6 kei na Eparaama 1:1–19 ka vakamacalataka na gagadre nei Eparaama kei na ituvaki dredre. Rau a vakaraitaka vakacava o Eparama kei Sera na nodrau vakabauta ena gauna ni dredre? (raica na Iperiu 11:8–13). A qai yaco rawa vakacava na nodrau gagadre dodonu? (raica na Nai Vakatekivu 17:15–22; 21:1–3; Vunau kei na Veiyalayalati 132:29; Eparaama 1:31). Eda na vakaraitaka vakacava na noda vakabauta ni se bera mada ni yaco na noda gagadre dodonu me vaka ni da sa vinakata mera yaco vakakina? Sa rawa vei ira na lewe ni kalasi me ra wasea na sala a tokoni ira kina na iVakabula ena ituvaki vakaoqo.

• Eso na lewe ni nomu kalasi e rairai lailai na nodra tokoni mai na nodra matavuvale ni ra sasaga vakaukauwa tiko mera bulataka na kosipeli—ka rawa talega mera sotava na veisaqasaqa. Na cava eda rawa ni da vulica mai na ivakaraitaki nei Eparaama ena Eparaama 1:1–19 e rawa ni vukei ira era sasagataka tiko mera bula dodonu vagumatua ena ituvaki vakaoqo?

• Sa rawa mo kerea na lewe ni kalasi mera wilika na iVakadewa i Josefa Simici, Nai Vakatekivu 14:36–40 (ena iDusidusi ki na iVolanikalou) ka veiwaseitaka na veika era sa vulica baleta na vakabauta kei na gagadre nei Eparaama. Era rawa talega ni ra wasea na sala era sa vakalougatataki kina ena nodra a cakacakataka na nodra vakabauta me ra sauma na nodra ikatini.

Eparaama 2:6–11

Na veiyalayalati vaka-Eparaama ena vakalougatataki keda kece sara.

• Me vukei ira na lewe ni kalasi me ra kila vinaka na cava na veiyalayalati vaka-Eparaama, sa rawa mo wasea na itukutuku nei Peresitedi Russell M. Nelson ena “iKuri ni iVurevure” (raica talega na Gospel Topics, “Abrahamic Covenant,” topics.ChurchofJesusChrist.org). Era sa rairai vulica na lewe ni kalasi na veika e baleta na veiyalayalati vaka-Eparaama mai na Eparaama 2:6–11, me vaka e vakaturi tiko ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale. Sa rawa vei ira na lewe ni kalasi mera wasea na veika era sa vulica, se mera vulica vata na kalasi na veitikina oqo. Na vosa ni yalayala kei na ilesilesi cava eda sa ciqoma mai na veiyalayalati vaka-Eparaama? Na vidio “—” ena rawa ni veivuke me saumi na taro oqo (ChurchofJesusChrist.org/media-library/video/2011-04-18-special-witness-president-nelson). Na cava e gadrevi meda cakava meda ciqoma kina na veivakalougatataki ni veiyalayalati oqo? Ena rawa vakacava, vei keda na kawa i Eparaama, meda vakalougatataki ira “na veimatavuvale kece sara ni vuravura”? (Eparaama 2:11).

Nai Vakatekivu 14:18–19; iVakadewa i Josefa Simici, Nai Vakatekivu 14:25–40

“O Melikiseteki e dua na tamata vakabauta.”

• Ena vuku ni kena Vakalesui mai na kosipeli, e vuqa na lewe ni Lotu era kila vakavinaka tu na Matabete i Melikiseteki, ia eso era sega ni kila na turaga o Melikiseteki. Me vukei na kalasi mera vulica na veika e baleti koya, sa rawa mo sureti ira mera raitayalotaka mada ni ra sa kerei me ra vakaveikilaitaki koya vua e dua e sega ni kilai koya ka vola ena vava ni volavola na veika era na kaya. Era na rawa me yavutaka na veika oqo ena veika era sa wilika ena iVakadewa i Josefa Simici, Nai Vakatekivu 14:26–27, 33–38 (iDusidusi ki na iVolanikalou); Alama 13:13–19; kei na Vunau kei na Veiyalayalati 107:1–4. Na cava eda sa vulica baleta na Matabete i Melikiseteki mai na veitikina oqo?

  

  Sa Vakalougatataki Eparama o Melikiseteki, mai vei Walter Rane.

iKuri ni iVurevure

Na Veivakalougatataki ni veiyalayalati vaka-Eparaama.

E vakatavulica o Peresitedi Russell M. Nelson:

Na veiyalayalati a cakava na Kalou vata kei Eparaama ka qai vakadeitaka tale e muri vei Aisake kei Jekope e cecere sara na kena bibi. … A rairai mai na Turaga ena veisiga e muri oqo me vakavouya na veiyalayalati vaka-Eparaama. … Ena kena vakavoui oqo, eda sa ciqoma kina, me vakataki ira ena gauna makawa, na matabete tabu kei na kosipeli tawayalani. Sa tu vei keda na dodonu me da ciqoma na taucoko ni kosipeli, marautaka na veivakalougatataki ni matabete, ka rawata me noda na nona veivakalougatataki cecere duadua ni Kalou—sai koya na bula tawamudu” (“Veiyalayalati,” Liaona, Nove. 2011, 87–88).

“Era sa vakatikori na veivakalougatataki cecere duadua ni Veiyalayalati vaka-Eparaama ena valetabu savasava. Na veivakalougatataki oqo e vakatarai keda me da lako vata mai ena iMatai ni Tucaketale mai na mate ka rawata na itikotiko vakaturaga, na veimatanitu, na kaukauwa, na veivanua vakatui, kei na lewa, me noda na ‘bula vakacerecerei kei na lagilagi ena ka kecega’ [Vunau kei na Veiyalayalati 132: 19] “(”Special Witnesses of Christ, “ Ensign, Epe. 2001, 7).

Vakatorocaketaki ni Noda Veivakavulici

Wasea wasoma nomu ivakadinadina. Na nomu ivakadinadina, rawarawa ka dina baleta na dina vakayalo sa rawa me veivakauqeti kaukauwa vei ira o vakavulica. Me kena ivakaraitaki, sa rawa ni o wasea e dua na ivakadinadina rawarawa me baleta na sala sa vakalougatataka kina na nomu bula na veiyalayalati.