25 Ka sa tabalaka cake na domona ko Melikiseteki ka vakalougatataki Eparama.

26 Ia sa tamata tudei ena vakabauta ko Melikiseteki, ka dau vakayacora na ka e dodonu; ia ni se gone sa dau rerevaka na Kalou, ka tarova na gusudra na laione, ka bokoca na bukawaqa.

27 Ia ni sa vakadonui koya na Kalou, sa tabaki me bete levu me vaka na ivakarau ni veiyalayalati sa cakava vei Inoki na Kalou,

28 Ia sa vaka na ilesilesi ni Luve ni Kalou; ia na ivakarau oqo sa yaco mai, e sega mai vua na tamata, se me vaka na loma ni tamata; se mai vua na tamana se na tinana; sa sega ni vakatekivu na nona gauna, se oti na nona bula; ia sa mai vua na Kalou;

29 Ka a soli yani vei ira na tamata ena veikacivi ni domona, me vaka na nona lewa, ki vei ira kecega era sa vakabauta na yacana.

30 Ia na Kalou ni sa yalataka oti vei Inoki vata kei ira na nona kawa ena nona bubului ga ki vua, ni ko ira kece era sa tabaki oti ki na ivakarau kei na ilesilesi oqo sa tu vei ira na kaukauwa, ena vakabauta, me ra talaraka na veiulunivanua, me ra wasea na veiwasawasa, me ra vakamamacataka na wai, ka vagolea tani na drodro ni wai;

31 Me vorata na sasaga ni mataivalu ni veimatanitu, me wasea na vuravura, me tamusuka na ivesu kecega, me tu ena iserau ni Kalou; me cakava na ka kecega me vaka na nona lewa, me vaka na nona ivakaro, me vakamalumalumutaka na veimatanitu kei na kaukauwa; ia oqo me vaka na nona lewa na Luve ni Kalou o koya sa tu ni se bera na tauyavutaki ni vuravura

32 Ia na tamata sa tu vua na vakabauta oqo, ka sa rawata na kena ivakarau oqo ni Kalou, era sa vakamataliataki ka kau cake ki lomalagi.

33 Ia, ko Melikiseteki e dua na bete ena kena ivakarau oqo; o koya sa rawata kina na bula sautu mai Selemi, ka sa vakatokai kina me Ravouvou ni sautu.

34 Era dau vakayacora na ka e dodonu na nona tamata, ka rawata na lomalagi, ka vakasaqara na koro i Inoki ka a kauta cake na Kalou ena dua na gauna e liu, sa tawasea tani kina mai vuravura, ka maroroya tu me baleta na veisiga mai muri, se na ivakataotioti kei vuravura;

35 Ka a kaya, ka yalataka ena bubului, ni na duavata ko lomalagi kei vuravura; ka ra vakatovolei na luve ni Kalou me vaka ena bukawaqa.

36 Ia ko Melikiseteki oqo, ni sa conaka vakaoqo na buladodonu, sa vakatokai mai vei ira na nona tamata me tui ni lomalagi, se, ena dua tale na kena vosa, na Tui ni sautu.

37 Sa tabalaka cake na domona, ka sa vakalougatataki Eparama, ni sa bete levu, ka ivakatawa ni lololo ni Kalou;

38 O koya sa lesia na Kalou me dau ciqoma na ikatini me baleti ira na dravudravua.

39 O koya sa dau sauma kina vua ko Eparama na ikatini ni veika kece sara e tu vua, na iyau kece e taukena, na veika sa solia vakalevu cake kina vua na Kalou ka sa sivia na veika e gadreva.

40 Ka sa yaco, ni sa vakalougatataki Eparama na Kalou, ka solia vua na iyau, kei na rokovi, kei na qele me taukena ka tawamudu; me vaka na veiyalayalati sa vakayacora, ka vaka na veivakalougatataki sa vakalougatataki koya kina ko Melikiseteki.