3 Ka sa yaco, ni sa bale vakatoboicu ko Eparama, ka kaciva na yaca ni Turaga.

4 Sa veivosaki vata kei koya na Kalou, ka kaya, era sa lako sese na noqu tamata mai na noqu ivakavuvuli, ka sega ni maroroya na noqu veicakacaka vakalotu, kau sa solia vei ira na nodra qase;

5 Era sa sega ni rokova na noqu veilumuti, kei na noqu buluti, se papitaiso ka’u a vakaroti ira kina;

6 Ia era sa vuki tani mai na ivakaro, ka taura vei ira na nodra savai na gonelalai, kei na dra me sevuraki;

7 Ka sa kaya ni a vakadavei na dra dodonu nei Epeli me baleta na ivalavala ca eso; ka ra sega ni kila ni ra na saumi taro kina vei au.

8 Ia ena vukumu, Au na cakava na noqu veiyalayalati vata kei iko, ia ko na tamadra e vuqa na veimatanitu.

9 Ia na veiyalayalati oqo kau sa vakayacora, ko ira na luvemu era na kilai ena veimatanitu kecega. Sa na sega talega ni vakatokai na yacamu ko Eparama, ia sa na vakatokai na yacamu ko Eparaama; baleta niu sa buli iko mo tamadra e vuqa na veimatanitu.

10 Kau na cakava mo vua vakalevu, kau na cakava mai vei iko na veimatanitu, ka ra na vu mai vei iko na tui, vakakina mai na nomu kawa.

11 Kau na cakava kina vata kei iko e dua na veiyalayalati ni veicilivi, ka na noqu veiyalayalati vei iko vata kei au, kei ira na nomu kawa mai muri, ena nodra dui tabatamata; mo na kila tiko kina me sega ni mudu ni ra na sega ni saumi taro vei au ena vuku ni nodra ivalavala na gonelalai me yacova ni ra sa yabaki walu.

12 Ia mo qarauna mo muria na noqu veiyalayalati kece sara au sa veiyalayalati kina kei ira na nomu qase; ia mo maroroya sara na ivakaro au sa solia vei iko mai na gusuqu, ia kau na qai nomu Kalou vata kei ira na nomu kawa era na qai muri mai.

23 Sa bale vakatoboicu ko Eparaama ka reki, ka kaya e lomana, ena sucu e dua na gone ki vua sa yabaki dua na drau, ia ko Sera sa yabaki ciwasagavulu ena bukete.

24 Ka sa kaya ko Eparaama vua na Kalou, Isa me bau lako mada ga vakadodonu e matamuni ko Isimeli!