24 Sa kaya ko Josefa vei iratou na tuakana, au na mate, ka lako vei ira na noqu qase, kau na lako sobu ki na noqu ibulubulu ena reki. Me tiko vata kei kemudou na Kalou nei tamaqu ko Jekope, me vueti kemudou tani mai na veisiga ni nomudou vakabobulataki; ni sa sikovi au na Turaga, kau sa rawata na nona yalayala na Turaga, ni na vakatubura mai na vua ni toloqu ki vei kemudou na Turaga na Kalou e dua na tabana buladodonu, ka sa vakatoka na tamaqu ko Jekope ko Isireli, e dua na parofita; (e sega ni Mesaia sa vakatokai ko Sailo;) ia na parofita oqo ena sereki ira tani na noqu tamata mai na vanua ko Ijipita ena veisiga ni nomudou vakabobulataki.

25 Ia ena qai yaco ni ra na qai veiseyaki tale; ka na qai tamusuki tani tale e dua na tabana, ka na kau yani ki na dua na vanua vakayawa; ia era na dau nanumi tikoga ena veiyalayalati ni Turaga, ni sa lako mai na Mesaia; ni na qai vakatakilai yani vei ira ko koya ena veisiga mai muri, ena Yalo ni kaukauwa; ka na kauti ira tani mai na butobuto ki na rarama; mai na butobuto vuni, kei na vesuki ki na galala.

26 Ena vakatubura na Turaga na noqu Kalou e dua na daurairai, ena daurairai digitaki vei ira na vua ni toloqu.

27 Sa kaya vakaoqo vei au na Turaga na nodra Kalou na noqu qase, au na vakatubura mai na vua ni tolomu e dua na daurairai digitaki, era na rai cake ki vua na vua ni tolomu; ia au na solia vua na ivakaro ni na vakayacora ko koya e dua na cakacaka ena vukudra na vua ni tolomu, na wekana.

28 Ia ena kauti ira ko koya me ra kila na veiyalayalati kau a cakava vei ira na nomudou qase, ka na cakava ko koya na cakacaka kecega au sa vakarota vua.

29 Ia au na vakacerecerei koya e mataqu, ni na vakayacora ko koya na noqu cakacaka; ia ena cecere ko koya me vakataki koya au sa tukuna niu na vakatubura vei kemudou, me sereki ira na noqu tamata, ko ira na mataqali i Isireli mai na vanua ko Ijipita; ia ka’u na vakatubura e dua na daurairai me sereki ira na noqu tamata mai na vanua ko Ijipita; ia ena vakatokai ko Mosese. Ia ena yaca oqori ena kila kina ko koya ni sa lewe ni nomudou mataqali; ni na qaravi koya na luvena yalewa na tui, ka na vakatokai me luvena.

30 Ka vakakina, niu na vakatubura mai na vua ni tolomu e dua na daurairai, kau na solia vua na kaukauwa me kauta yani na noqu vosa ki na vua ni tolomu; ia e sega ni kena kau walega yani ni noqu vosa, sa kaya na Turaga, ia ena kena rawai na yalodra ena vuku ni noqu vosa, ka sa lako oti yani ki na kedra maliwa ena veisiga e muri;

31 Ia era na volavola na vua ni tolomu, ka ra na volavola na vua ni toloi Juta; ia na veika era na vola na vua ni tolomu, ka vakakina na veika era na vola na vua ni toloi Juta, era na tubu vata ka vakamalumalumutaka na ivakavuvuli lasu, ka vakadavora na veileti ka tauyavutaka na sautu ena kedra maliwa na vua ni tolomu, ka ra na kilai ira kina na nodra qase ena veisiga e muri; ka vakatalega kina me ra kila na noqu veiyalayalati, sa kaya na Turaga.

32 Ia mai na veika malumalumu ena vakaukauwataki kina ko koya, ena veisiga ko ya ena kau yani kina na noqu cakacaka ena kedra maliwa na noqu tamata kece sara, ka na vakalesui ira, o ira na mataqali i Isireli, ena veisiga e muri.

33 Ia na daurairai oqori kau na vakalougatataka, ia ko koya sa segata me vakarusai koya ena vakamalumalumutaki; niu sa solia vei iko na yalayala oqori; niu na dau nanumi iko mai na itabatamata ki na itabatamata; ia na yacana ena vakatokai ko Josefa, ka rau na veiyacani kei tamana; ka na vakataki iko ko koya; ni veika ena vakayacora na Turaga mai ligana era na vakabulai kina na noqu tamata.

34 Ka sa yalataka vei Josefa na Turaga ni na maroroya me sega ni mudu na nona kawa, ka kaya kina, au na vakatuburi Mosese cake, ka na tu e ligana e dua na ititoko, ena vakasoqoni ira na noqu tamata ko koya, ka na liutaki ira ko koya me vaka e dua na qele ni sipi, ka na mokuta na wai ni Wasa Damudamu ena nona ititoko.

35 Ka na tu vua na kaukauwa me veilewai, ka na vola na vosa ni Turaga. Ia ena sega ni tukuna e levu na vosa, niu na vola ki vua na noqu lawa ena iqaqalo ni ligaqu. Kau na cakava e dua me gusu ni nona vosa, ia na yacana ena vakatokai ko Eroni.

36 Ia ena vakayacori talega vei kemudou ena veisiga mai muri, me vaka au sa bubuluitaka. O koya sa kaya kina ko Josefa vei iratou na tuakana, ena talevi kemudou vakaidina na Kalou, ka na kauti kemudou tani mai na vanua oqo, ki na vanua sa bubuluitaki tu vei Eparaama, kei Aisake kei Jekope.

37 Sa vakadeitaka ko Josefa e vuqa tale na ka vei iratou na tuakana, ka bubului vei ira na luvei Isireli, ka kaya vei ira, ena talevi kemudou vakaidina na Kalou, ia dou kauta tani mai ke na suiqu.

38 Sa mani mate kina ko Josefa ni sa yabaki duanadrau katini; a ra sa vakasosoga na yagona ena ka boi vinaka, ka kotora ena loma ni dua na kato mai Ijipita; ka ra sa sega ni buluti koya na luvei Isireli, me na qai kau cake ka vakotori ena bulubulu qara vatu vata kei tamana. Ia era sa nanuma kina na bubului era sa vakayacora vua.