28 ni Feperueri–6 ni Maji

Nai Vakatekivu 28–33

“Sa Tiko Vakaidina ko Jiova e na Yasana Oqo”

Ni ko vakavakarau mo veivakavulici, vakasamataka ena masumasu na ivakavuvuli cava ena Nai Vakatekivu 28–33 e rawa ni veivuke vakalevu vei ira na lewe ni nomu kalasi. Na veivakasama oqo e kena inaki me ra vakuria na nomu vuli vakai iko kei na veivakauqeti.

Vola na Veika o Vakauqeti Kina

Sureta na Veiwasei

E dua na veivakalougatataki ni laki soqoni vata ena dua na kalasi ni Matawilivola ni Siga Tabu o ya ni rawa vei ira na lewenilotu me ra veivukei vakai ira mera kunea na inaki e tiko ena ivolanikalou. Vakayaloqaqataki ira na lewe ni kalasi me ra wasea vua e dua e dabe tikiva na cava sa vakavulica vei ira na Yalo Tabu ni ra vulica na ivolanikalou ena macawa oqo. Me qai digitaki e vica vei ira me ra wasea ki na kalasi na veika era sa veivosakitaka. Oqo ena rawa ni tauyavutaka e dua na gauna vinaka ni itekitekivu me baleta na nomu veivosaki vakalasi.

Vakavulica na iVunau

Nai Vakatekivu 28:10–22

Ena valetabu eda cakava na veiyalayalati vata kei na Kalou.

• Ena rawa vakacava mo vukea na lewe ni kalasi mera kunea na inaki ni veika a sotava o Jekope mai Peceli, me vaka e vakamacalataki e Nai Vakatekivu 28:10–22? Sa rawa me ra tekivu ena nodra railesuva Nai Vakatekivu 27:41–45; 28:1–5 ka vakasamataka na bula nei Jekope ena gauna o ya. Na cava beka a rairai vakila tiko o Jekope? Sa rawa vei ira na lewe ni kalasi me ra vakadikeva Nai Vakatekivu 28:10–22. A vakalougatataki Jekope vakacava na veika a sotavi oqo? A rairai vakacegui beka vakacava o koya? Ena vakauqeti keda vakacava na veika a sotava o Jekope ni da laki sokalou e valetabu? Sa rawa talega ki na kalasi me lagata, wilika, se vakarorogo ki na “Au Toro Yani Tu,” ka yavutaki tiko ena veitikina oqo (Sere ni Lotu, naba 53). Sa rawa mera wasea na veimalanivosa mai na sere se mai Nai Vakatekivu 28:10–22 ka vakavotuya vei ira na veika era sa sotava ena nodra sasaga me ra toro voleka vua na iVakabula.

• Na kabakaba a raica o Jekope ena nona tadra sa dau vakatauvataki vakawasoma tiko ki na veiyalayalati ni valetabu. Sa rawa mo vakaraitaka se droinitaka e dua na iyaloyalo ni dua na kabakaba kei na dua na valetabu. Sa rawa ki na lewe ni kalasi me ra railesuva Nai Vakatekivu 28:10–22 ka veivosakitaka na cava e vakavulica vei keda na ikabakaba a tadra o Jekope me baleta na valetabu. Na cava soti tale eda sa kunea ena veitikina oqo e vakavotuya vei keda na veivakalougatataki eda sa ciqoma ena vuku ni noda veiyalayalati ni valetabu? —

• Me vukei ira na lewe ni kalasi me ra vakasamataka vakatitobu na vosa ni yalayala ni veiyalayalati vaka-Eparaama, a vakavouia na Turaga vata kei Jekope, sa rawa mo sureti ira me ra wilika Nai Vakatekivu 28:10–15 ka veivosakitaka na sala meda rawata kina na veivakalougatataki oqo nikua (raica talega na Nai Vakatekivu 12:2–3). Sa rawa talega mera wilika na itukutuku nei Peresitedi Russell M. Nelson ena “iKuri ni iVurevure,” mera raica kina na veivakalougatataki e yaco mai ni vakayacori ka maroroi na veiyalayalati. A vakalougatataki vakacava o Jekope ena nona ciqoma na vosa ni yalayala e Nai Vakatekivu 28:10–15? Na isema cava eda raica ena veika sa yaco ena veitikina oqo kei na veika sa yaco e Nai Vakatekivu 29 kei na 30 (Na nona vakawati o Jekope kei na nodra sucu na luvena)? E sa vakalougatataki keda vakacava na Turaga ni da sa vakayacora ka maroroya na veiyalayalati tabu?

Droini ni nodrau veimokomoko o Jekope kei Iso, maivei Robert T. Barrett

Nai Vakatekivu 32–33

Sa rawa ni vukei keda na iVakabula meda valuta rawa na veileti ena noda matavuvale.

• Nai Vakatekivu 32–33 e rawa ni veivakauqeti vei ira na lewe ni kalasi era vinakata me ra kunea na veivakabulai ena nodra veimaliwai vakamatavuvale. Ena rawa ni veivuke mo kerea e dua na lewe ni kalasi me vakamacalataka vakalekaleka na veika a yaco e Nai Vakatekivu 27. Na ituvatuva ena macawa oqo ena Lako Mai, Mo Muri Au—Baleta na Tamata Yadua kei na Matavuvale era oka kina na taro me vakasamataki vakatitobu ni vulici tiko na Nai Vakatekivu 32-33. Sa rawa ki na lewe ni kalasi me ra digitaka e dua na taro oqo ka vakasaqara na kena isau ena wase. Sa rawa talega mera wasea na veika era sa sotava ena kena vaqaqacotaki na veimaliwai sa luluqa tiko ena nodra matavuvale. Vakayaloqaqataki ira mera veivosakitaka na sala e dau vukei ira kina na Tamada Vakalomalagi.

iKuri ni iVurevure

Eda sa gone ni veiyalayalati.

E vakatavulica o Peresitedi Russell M. Nelson:

“Ena gauna ni papitaiso eda sa yalataka kina me da qarava na Turaga ka muria na Nona ivakaro. Ni da vakayagataka na sakaramede, eda vakavouia na veiyalayalati oya ka vakadeitaka na noda sa tu vakarau me da taura na yaca i Jisu Karisito. O koya eda sa vakubeci kina me da Luvena tagane kei na yalewa ka da kilai me da veitacini ka veiganeni. O Koya na tama ni noda bula vou. Ka kena ilutua, ena loma ni valetabu, sa rawa ni yaco me da vakaivotavota vata ena veivakalougatataki ni matavuvale tawamudu, me vaka a yalataki ena dua na gauna vei Eparaama, Aisake, kei Jekope, kei ira na nodratou kawa. Oqori na vuna, e veiyalayalati kina ni bula vakacerecerei na vakamau vakaselesitieli.

“Ena gauna eda kila kina ni da sa gone ni veiyalayalati, eda sa kila o cei o keda kei na veika e namaka vei keda na Kalou. Sa volai tu e yaloda na Nona lawa. O Koya e noda Kalou ka da sa Nona tamata. O ira na gone ni veiyalayalati yalodina era na tudei, ena loma sara mada ga ni veika dredre. Ni sa tei vakatitobu ki yaloda na ivunau oqori, na batigaga sara mada ga nei mate ena vakamanoataki ka qaqaco cake na noda igu vakayalo” (“Veiyalayalati,” Liaona, Nove. 2011, 88).

Vakatorocaketaki ni Noda Veivakavulici

Vukei ira na vuli mera cakacakataka na veivakauqeti. “Na saumaki dina e sega walega ni kena kilai vakalevu cake na Yalo ni vakadeitaka na dina ki lomada; ia meda cakacakataka talega na dina oqori. Me ikuri ni nodra vukei o ira na vuli mera vakila ka kila na Yalo, mo vukei ira mera na cakacakataka na veivakauqeti era ciqoma” (Veivakavulici ena iVakarau ni iVakabula, 10).