Moses and the Burning Bush, (O Mosese kei na Vunikau Kama), mai vei Harry Anderson

21–27 ni Maji

Na Lako Yani 1–6

“Ia Kau Sa Nanuma Na Noqu Vosa Ni Yalayala”

Ni ko sa wilika Na Lako Yani 1–6, mo dau nanumi ira o vakavulica. Na dina cava ena wase oqo era sa na rairai vakaibalebale cake vei ira? O na vukei ira vakacava mera kila na dina oqo?

Vola na Veika o Vakauqeti Kina

Sureta na Veiwasei

E dua na vakasama me vakayaloqaqataki ira na lewe ni kalasi me ra wasea na veika era sa vulica tiko o ya me ra vola e dua na taro vakaoqo ena vava ni volavola: Ni o wilika Na Lako Yani 1–6, na cava o sa raica rawa o a sega ni raica e liu? Sureti ira na lewe ni kalasi me ra wasea na nodra isau ni taro.

Vakavulica na iVunau

Na Lako Yani 1–2

Ko Jisu Karisito na noda Dauveisereki.

• E dina ga ni sega ni cavuti na yacana na iVakabula ena Na Lako Yani 1–2, na itukutuku oqo e rawa ni vukei ira na lewe ni kalasi mera tara cake na nodra vakabauta na Nona ilesilesi me sereki keda mai na tiko vakavesu. Sa rawa ki na lewe ni kalasi mera raica na vosa se malanivosa e Na Lako Yani 1–2 e vakamacalataka na dredre era a sotava na Isireli. Era sa tautauvata vakacava na ivakamacala oqo ki na tiko vakavesu vakayalo se na veika dredre eda sa dau sotava? Era a vakasaqara vakacava na luvei Isireli mera sereki, kei na cava a cakava mai na Kalou kivei ira? (raica talega Na Lako Yani 2:23–25; 3:7–8). Eda na rawata vakacava na kaukauwa ni Kalou ni da gadreva na veisereki? E dau sauma mai vakacava na Kalou na noda kere veivuke? Sa rawa ki na lewe ni kalasi mera vakasaqara na ikuri ni vakasama ena itukutuku nei Peresitedi Russell M. Nelson “Vagoleya Mai na Mana nei Jisu Karisito Ki na Noda Bula” (Liaona, Me 2017, 39–42).

  

  Moses in the Bulrushes, (Ko Mosese ena Veikuta), © Providence Collection/licensed from goodsalt.com

Na Lako Yani 3–4

Ni da vakayacora na cakacaka ni Turaga, sa rawa me noda na kaukauwa ni Turaga.

• Na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale e vakatura meda vakasaqaqara e Na Lako Yani 3–4 me kilai na sala a sauma kina na Turaga na lomaleqa i Mosese me baleta na itavi ni nodra sereki na Isireli mai na veivakabobulataki. Kevaka era cakava mai vale na nomu lewe ni kalasi na itaviqaravi oqo, sureti ira me ra wasea na veika era sa vulica. Se o rawa ni cakava na itaviqaravi oqo vakalasi. Vakabibi, mera vakasaqaqara na lewe ni kalasi e Na Lako Yani 3:11–18; 4:1–17, mera raica na kauwai nei Mosese kei na veika yadua a cakava mai na Turaga. Ena rawa vakacava me vukei keda na veika e cakava mai na Turaga ena gauna eda lomatarotaka kina na noda rawa ni cakava na Nona cakacaka?

Na Lako Yani 3:5

E dodonu meda vakaraitaka na noda rokova na veika kei na veivanua tabu.

• O na vakayagataka vakacava na ivakaraitaki nei Mosese me vakauqeta na kena veivosakitaki na sala e dodonu meda rokova kina na veika tabu? Me kena ivakaraitaki, ni wiliki oti vata Na Lako Yani 3:5 mo qai vakaraitaka na veiyaya tabu se na iyaloyalo ni veika tabu (me vakataka na ivolanikalou se na valetabu) kei na veiyaya se na iyaloyalo e kilai levu (me vaka na ivola ni veika vakavuravura se na veivale tudei). Sa rawa ki na lewe ni kalasi mera veivosakitaka na veika tale eso era nanuma ni ra sa ka tabu ka wasea na sala era rokova kina na veika tabu oqori (raica talega Na Vunau ni Soro 19:30; Vunau kei na Veiyalayalati 6:10–12). Na cava na vuna e vinakata kina na iVakabula meda dau rokova kina na veika tabu?

Na Lako Yani 5:4–9, 20–23; 6:1–13

Na inaki ni Turaga ena vakayacori ena Nona gauna ga.

• Ena rawa ni veivakayalolailaitaki ena gauna e dau vaka me sega ni caka rawa na noda sasaga yalodina—ni dau sega ni malele mai e dua na itokani ki na noda sasaga ni veiqaravi se vaka me sega ni saumi mai na noda masulaka e dua na gone sa lakosese. Na kena vulici na veika vata oqo a sotava o Mosese, sa rawa ki na lewe ni kalasi mera wilika Na Lako Yani 5:4–9, 20–23. A veivuke vakacava na Turaga vei Mosese me qaqa mai na nona yalolailai? (raica Na Lako Yani 6:1–13). Sa rawa ki na lewe ni kalasi me ra wasea na gauna era a sega ni raica kina me vakavotukana totolo na macala ni nodra sasaga ni qarava na Turaga. Na cava e vakavulica vei keda na veika a sotava o Mosese me baleta na veika meda na cakava ena ituvaki vata oqori? (Raica talega na “iKuri ni iVurevure.”)

iKuri ni iVurevure

Eda veiqaravi ira na tamata ena vuku ni Turaga.

A talanoataka o Peresitedi Joy D. Jones na nodrau veiqaravi yalodina vakaveiwatini ena dua na ilesilesi ni veiqaravi ia rau a sega ni raica e dua na rawa-ka mai na nodrau sasaga o ya. Rau a vakasama vakatitobu na veiwatini ka masulaka na veidusimaki. Ena nona tukuna tiko na isau ni nodrau masu, e kaya kina o Peresitedi Jones:

“Keirau vakila ni keirau a segata tiko ena yalodina me keirau veqaravi kina matavuvale oqo ka veiqaravi vua na neirau bisopi, ia me keirau tarogi keirau kevaka keirau a veiqaravi dina tiko ena dela ni loloma vua na Turaga. A vakamatatataka na duidui oqo na Tui o Penijamini ena nona kaya: ‘Raica au sa kaya vei kemuni me vaka na noqu a kaya vei kemuni niu a sa qaravi kemuni ena noqu veisiga kece, au sega ni gadreva meu dokadoka kina, niu a qarava tiko ga kina na Kalou’ [Mosaia 2:16; vakamatatataki].

“O cei dina beka a qarava tiko na Tui o Penijamini? Na Tamada Vakalomalagi kei na iVakabula. Noda kila o cei kei na vuna me da veiqaravi ira kina vei ira na tani ena vukea noda kila ni ivakaraitaki cecere duadua ni loloma sai koya na yalodina vua na Kalou” (“Me Baleti Koya,” Liaona, Nove. 2018, 50).

Vakatorocaketaki ni Noda Veivakavulici

Wasea na veika vakayalo eda sotava. Dua na sala mo sureta na veivakauqeti ni Yalo ki na nomu kalasi o ya mera vakayaloqaqataki na lewe ni kalasi me ra wasea na veika sa vakavulica vei ira na Yalo Tabu ni ra vulica na ivolanikalou ena macawa oqo.