Droini kei Josefa mai Ijipita, maivei Robert T. Barrett

14–20 ni Maji

Nai Vakatekivu 42–50

“Ia sa Nakita na Vinaka na Kalou”

E kaya o Elder David A. Bednar, “Na kila vinaka vakayalo sa vakalougatataki kina o iko kei au me daru ciqoma … e sega ni rawa me soli wale tu ga vua e dua tale” (“Seek Learning by Faith,” Ensign, Sept. 2007, 67). O na vukei ira vakacava na lewe ni kalasi mera rawata na kila vinaka vakayalo me baleti ira?

Vola na Veika o Vakauqeti Kina

Sureta na Veiwasei

Me soli vei ira na lewe ni kalasi e dua na madigi me ra wasea e dua na ka era raica ni vakaibalebale ena nodra vulica yadudua se vakamatavuvale na ivolanikalou, sa rawa mo taroga vakaoqo ena itekitekivu ni kalasi: Na tikina cava ena wase oqo e mua kina na yalomu? Na tikina cava soti o sa vakila ni ko sa baci wilika tale? Na tikina cava o sa wasea vua e dua? Na tikina cava a veimuataki ki na dua na veivosaki veivakararamataki vata kei na nomu matavuvale se itokani?

Vakavulica na iVunau

Nai Vakatekivu 45:1–15; 50:15–21

Na veivosoti e kauta mai na vakacegu.

• Ni bera ni o tekivuna e dua na veivosaki me baleta na veika e vakavulica na veika a sotava o Josefa me baleta na veivosoti, ena rawa me veivuke me dua e tukuna vakalekaleka na italanoa e tiko ena Nai Vakatekivu 37; 39–45. Na cava beka na vuna a rairai dredre kina vei Josefa me vosoti iratou na tacina? Na veika cava a sotavi se na ivakarau ni bula cava a rairai solia vei Josefa na kaukauwa me veivosoti kina? (raica, me kena ivakaraitaki, Nai Vakatekivu 45:1–15 se 50:15–21). Ena rawa vakacava me vukei keda na ivakaraitaki i Josefa me da na veivosoti vakalevu cake kina?

  — E vukei keda vakacava na iVakabula meda dau vosoti ira na tamata?

• Na veivakalougatataki cava e lako mai ena veivosoti nei Josefa vei iratou na tacina? Ena ka taleitaki me veidutaitaki na veiwekani ena matavuvale nei Jekope ena itekivu ni italanoa (raica, me kena ivakaraitaki, Nai Vakatekivu 37:3–11) vata kei na nodra itutu ni bula ena kena icavacava (raica Nai Vakatekivu 45:9–15; 50:15–21). Na itavi cava sa cakava na veivosoti ena veisau sa yaco ena matavuvale nei Josefa? A rairai rawa ni duatani vakacava na veika sa yaco kevaka a sega ni lomai Josefa me veivosoti? Sa rawa mo sureta na lewe ni kalasi me ra vakatututaka na sala e rawa ni vukei ira kina na matavuvale nikua na italanoa oqo me vakamalumalumutaka na veiqati kei na vuvu.

Na iVakatekivu 45:5–11; iVakadewa i Josefa Simici, Na iVakatekivu 50:24–38 (ena iDusudusi ki na iVolanikalou)

Na cakacaka nei Josefa, Mosese, kei Josefa Simici e vakadinadinataka na ilesilesi nei Jisu Karisito.

• Ni sema vata kei na ikuri ni rarama ni kosipeli vakalesuimai, eda kila ni o Josefa, a vakabulai iratou na nona matavuvale mai na dausiga, a parofisaitaka talega ni levu na veivakalougatataki ena yaco mai ena dua na siga maivei Mosese kei Josefa Simici. Kei ira kece na parofita oqo e dusimaki keda ki na noda Dauveisereki cecere, o Jisu Karisito. Me vukei ira na lewe ni kalasi me ra raica na iVakabula ena nodra ilesilesi vakalotu na lewe tolu na parofita oqo, sa rawa mo vola e dua na ituvatuva ena vava ni volavola e tautauvata ki na kena e tiko ena “iKuri ni iVurevure.” Sa rawa ki na lewe ni kalasi me ra cakacaka vata me vakaleweni. Sa qai rawa me ra kuria na kolomu me vakamacalataka na cakacaka nei Josefa mai Ijipita, Mosese, kei Josefa Simici, me ra vakayagataka na veika era sa vulica mai Nai Vakatekivu 45:5–11 kei na iVakadewa i Josefa Simici, Nai Vakatekivu 50:24–38 (ena iDusidusi ki na iVolatabu). E vakadinadinataka ka dusi tiko vakacava na nodra veiqaravi vakalotu na parofita oqo ki na ilesilesi ni iVakabula? (Me baleta eso na ivakaraitaki ni kena tautauvata na bula nei Josefa mai Ijipita kei na nona bula na iVakabula, raica na Nai Vakatekivu 37:3 kei na Maciu 3:17; Nai Vakatekivu 37:26–28 kei na Maciu 26:14–16; Nai Vakatekivu 45:5–7 kei na Luke 4:18; kei na Nai Vakatekivu 47:12 kei na Joni 6:35; raica talega na Mosese 6:63.)

  

  Droini kei Josefa mai Ijipita, mai vei Paul Mann

Nai Vakatekivu 50:19–21

Na Kalou e rawa ni vukei keda me da kunea na ibalebale ni noda vakatovolei.

• E dina ga ni sega beka ni matata sara nona sa lako curuma tiko na nona veivakatovolei dredre sara, a qai rawa vei Josefa me raicalesu na nona veika dredre mai Ijipita ka raica ni “Sa nakita na vinaka na Kalou” (Nai Vakatekivu 50:20). Kevaka beka meda a rawa ni sikovi Josefa ena gauna a tiko kina ena loma ni qara se ena valeniveivesu, eda na laki vakacegui koya beka vakacava? Ena vukei keda vakacava na vakasama e tukuni tiko e Nai Vakatekivu 50:19–21 ena gauna ni noda vakatovolei? Sa rawa ki na lewe ni kalasi me ra na veivosakitaka na sala sa vakalougatataki ira kina na Kalou, ena gauna mada ga ni veika dredre era sa sotava. — Na cava e kuria na Vunau kei na Veiyalayalati 122 meda kila vakavinaka kina na ivakavuvuli?

iKuri ni iVurevure

Na nodra bula na parofita era vakadinadinataki Jisu Karisito kei na Nona ilesilesi.

Na bula nei Josefa mai Ijipita, Mosese, kei Josefa Simici e rawa ni vakavotui Jisu Karisito vei keda. Sa rawa ki na lewe ni kalasi mera vakalewena na ituvatuva ka qai vakuria na kolomu baleti Josefa mai Ijipita (raica Nai Vakatekivu 45:5–11), Mosese (raica na iVakadewa i Josefa Simici, Nai Vakatekivu 50:24, 29, 34–36 [ena iDusidusi ki na iVolanikalou]), kei Josefa Simici (raica na iVakadewa i Josefa Simici, Nai Vakatekivu 50:26–28, 30–33 [ena iDusidusi ki na iVolanikalou]).

	Jisu Karisito
O cei era a sereki?
Na cava era a sereki mai kina?
Na cava a vakayacori mera sereki rawa kina?

Vakatorocaketaki ni Noda Veivakavulici

Taroga na taro e sureta na soli ivakadinadina. Na kena tarogi na taro e vakayaloqaqataki ira na vuli mera wasea na nodra ivakadinadina sa sala mana ni kena sureti na Yalo. Me vakataka, ni vakavulici Nai Vakatekivu 45:1–15, sa rawa mo taroga e dua na taro vakaoqo “Na veivakalougatataki cava soti o sa sotava ena vuku ni nomu vosota e dua?” (raica na Veivakavulici ena iVakarau ni iVakabula, 32).