Na droini kei Josefa mai Ijipita e valeniveivesu, mai vei Jeff Ward

7–13 ni Maji

Na iVakatekivu 37–41

“A Sa Tiko Kei Josefa ko Jiova”

E sega ni kena inaki mo na vakavulica kece na itaviqaravi ena ituvatuva oqo. Ni ko vakavakarau mo veivakavulici, masuta ni na vukei iko na Yalo mo kila na itaviqaravi cava (ke tiko eso) ena idusidusi oqo ena sotava vakavinaka na gagadre ni nomu kalasi.

Vola na Veika o Vakauqeti Kina

Sureta na Veiwasei

Me ra vakayaloqaqataki na lewe ni kalasi me ra wasea na veika era sa vulica ena nodra vuli yadua kei na vakamatavuvale, sa rawa mo sureti ira me ra raica e dua na malanivosa e Na iVakatekivu 37–41 e vakamacalataka e dua na lesoni se ivakavuvuli era nanuma ni sa rui bibi.

Vakavulica na iVunau

Na iVakatekivu 37:1–28; 39; 40:1–19; 41:9–45

“A sa tiko kei Josefa ko Jiova” ena nona gauna ni dredre.

• Me vakataki Josefa, o ira na lewe ni nomu kalasi era rairai sotava tiko na veivakatovolei dredre. Me vukea na kalasi mera kunea na veivakauqeti mai na ivakaraitaki nei Josefa, o rawa ni wasei ira ki na tolu na ilawalawa ka kerea na veiwasewase yadua me ra railesuva e dua vei ira na tikini ivolanikalou oqo: Na iVakatekivu 39; 40:1–19; se 41:9–45. Mera qai wasea na ilawalawa yadua na sala a tiko vata kina kei Josefa na Turaga ena nona gauna ni dredre. Ni veiganiti, mera qai wasea na lewe ni kalasi na veika era sotava ena gauna a tiko kina kei ira na Turaga ena gauna ni dua na veivakatovolei dredre. Eda rawa vakacava ni vulica meda raica vakavinaka cake kina ni sa tiko na Turaga e na noda bula?

• Na lesoni vakaibalebale oqo ena rawa ni veivuke me vakaraitaka na sala eda rawa ni uabaleta kina na veika dredre: biuta e dua na ka e mamada toka, me vaka e dua na polo palasitika lalai, ena boto ni dua na vokete e sinai veimama tu ena raisi se bini mamaca. Sureta e dua me kuretaka toka vakamalua na koniteina me yacova ni sa vude mai ki cake na polo. E tautauvata vakacava o Josefa ki na polo oqo? Sa rawa mera wasea na kalasi na ivakaraitaki ni Turaga ena Nona a vukei Josefa me lako tani rawa mai na veika dredre mai Na iVakatekivu 37:5–11; 39; 40:1–19; 41:9–45. Sa rawa mera wasea talega na gauna a vukei ira kina na Turaga ena sala vata oqo.

• Sa rawa mo kerea na lewe ni kalasi mera lagata se wilika na qaqani dua na serenilotu me baleta na digidigi dodonu, me vaka na “Dina Tu Ga” (Serenilotu, naba 143). Sa qai rawa mera vakaraica na lewe ni kalasi na veivakararamataki se malanivosa e tiko e Na iVakatekivu 37:1–28; 39; 40:1–19; 41:9–45 e vakamatatataka na itukutuku ni serenilotu. A vakalougatataki vakacava o Josefa, se cava ga na veika dredre, ni sa cakava na veika e dodonu? Ena gauna cava a vakalougatataki keda kina na Turaga ena veigauna dredre ni da cakava na ka dodonu?

Na iVakatekivu 37:5–11; 40; 41:1–38

Kevaka eda sa yalodina tiko, ena dusimaka ka vakauqeti keda na Turaga.

• E dina ga ni sega ni tamata kece ena ciqoma na ivakatakila yadua ena tadra, era tu na veika eda rawa ni vulica me baleta na ivakatakila mai na veika a sotava o Josefa, na dauveiqaravi nei Fero, kei Fero. E rawa ni o sureti ira na lewe ni kalasi me ra railesuva Na iVakatekivu 37:5–11; 40:5–8; 41:14–25, 37 – 38 ka wasea na veika era sa vulica me baleta na ivakatakila. Sa rawa talega mo sureti ira me ra wasea na veika sa vukei ira ena nodra vakavakarau me ra ciqoma, kila, ka cakacakataka na ivakatakila.

  

  Joseph Interpreting the Butler and Baker’s Dreams, (E Vakadewataka tiko o Josefa na Nodrau Tadra o Daucaka Mena kei Dauvavavi), maivei François Gérard

Na iVakatekivu 39:1–20

Ena veivuke ni Turaga, eda rawa ni drotani mai na veitemaki.

• Sa rawa mo taroga na lewe ni kalasi me ra wasea na veika era sa vulica me baleta na vorati ni veitemaki ni ra wilika Na iVakatekivu 39 ena macawa oqo. Na cava a cakava o Josefa me vorata kina na veitemaki? (raica na tikina e 7–12). — Sa rawa mo tarogi ira na lewe ni kalasi me ra tuva na veika eda rawa ni cakava meda rawata na kaukauwa ni Kalou ena gauna eda sotava kina na veitemaki. (Na lewe ni kalasi e rawa nira kunea na vakasama eso ena Maciu 4:1–11 se ena vei ivolanikalou ka toqai e ruku ni “Vakatovolei, Veivakatovolei” ena iDusidusi ki na iVolanikalou [scriptures.ChurchofJesusChrist.org].)

• O na vakayagataka vakacava na ivakaraitaki nei Josefa me ra vukei na lewe ni kalasi mera vorata rawa na veitemaki ki na ivalavala ca ni veiyacovi? Me ikuri ni kena railesuvi Na iVakatekivu 39:1–20, sa rawa ki na lewe ni kalasi mera ChurchofJesusChrist.org) se railesuva na “Bula Savasava ni Veiyacovi” (ena Me iSakisaki ni iTabagone [2011], 35–37). Sa rawa mera wasea na veika era sa vulica me baleta na kena vorati na vakanananu, vosa, kei na ivalavala e veimuataki ki na ivalavala ca ni veiyacovi. Railesuva na “Veivutuni” (ena Me iSakisaki ni iTabagone, 28–29) ena rawa ni vukei ira na lewe ni kalasi me ra kila deivaki na madigi e solia o Jisu Karisito vei keda meda veivutuni.

Na iVakatekivu 41:15–57

E dodonu meda vakavakarau ki na kena rawa ni yaco mai na veika dredre.

• Sa rawa mo kerea e dua na lewe ni kalasi me vakamacalataka na tadra nei Fero (raica Na iVakatekivu 41:15–24) kei na dua tale me na wasea na ivakavakadewa nei Josefa (raica na tikina e 25–32). Na cava a vakatura o Josefa me cakava? (raica na tikina e 33–36, 47–49). Na lesoni cava e tukuna tiko na itukutuku oqo me baleta na noda gauna? (raica na ivakasala nei Peresitedi Gordon B. Hinckley ena “iKuri ni iVurevure”).

iKuri ni iVurevure

Vakavakarau me baleta na gauna ni leqa.

E kaya o Peresitedi Gordon B. Hinckley: “Au vakamasuti kemuni mo ni yalomatuataka na nomuni vakayagataki ilavo; lewai kemuni vakamatau ena nomuni volivoli me levei kina na dinau. Bokoca na nomu dinau ena kena totolo o rawata rawa. … Me tiko e dua na ilavo maroroi, kevaka mada ga e lalai” (“To the Boys and to the Men, ” Ensign, Nove. 1998, 54).

Vakatorocaketaki ni Noda Veivakavulici

Na vakarorogo sa ivakaraitaki ni loloma. “Kerea na Tamada Vakalomalagi me vukei iko mo kila vinaka na cava era kaya tiko na nomu lewe ni kalasi. Ni ko sa wanonova matua na veika era kaya tiko kei na veika era na sega beka ni kaya, ko na qai kila vinaka cake na nodra gagadre” (Veivakavulici ena iVakarau ni Turaga, 34).