“Beberuare 14–20. Karikani Bwai 18–23: ‘Iai te Bwai Teuana ae Aki Kokonaki iroun Iehova?’” Nakomai, Iriirai—Ibukin te Reirei n Tabati: Te O Tetemanti 2022 (2021)
“Beberuare 14–20. Karikani Bwai 18–24,” Nakomai, Iriirai—Ibukin te Reirei n Tabati: 2020
Taara ao Itaaka, iroun Scott Snow
Beberuare 14–20
Karikani Bwai 18–23
“Iai te Bwai Teuana ae Aki Kokonaki iroun Iehova?”
Ngkai ko katauraoi n anga reirei, katikua inanom bwa angiina kaain te kiraati a kona n tia n rinanon bwaai aika a nano ibon irouia ngkai a wareka Karikani Bwai 18–23. Tera ae ko kona ni karaoia ni kaungaia bwa a na tibwai taneiai aikai ao iango? Iangoia bwa iango akanne a na kaira te maroro n te kiraati.
Korei Am Namakin
Kaunga te Tibwatibwa
Kataakira ao karawawatakira n tainako a riki bwa taai ni kaitikai inanon maiura. Karikani Bwai 18–23 kabwarabwarai tai akanne inanon maiun Aberaam ao Rota. Tao kaain te kiraati a kona n tibwai kibu ake a kunei n tain aia kamatebwai ibuon irouia n te wiiki aei are e kabwarabwara te tai ni kaitiakaki iroun Aberaam. A kona imwiina n tibwatibwa n te bwai are a reiakinna mai iai.
Reirei te Reirei
Te Uea e Kakoroa bukin Ana Berita N Oin ana tai.
-
Te rongorongo inanon kibu aikai a kona ni kaungaia kaain te kirati ngkana a titiraki ngkana ana berita te Atua nakoia a na kona ni koro bukiia. Ni waakina te maroro, e kona n ibuobuoki kaoakiia kaain te kiraati ni manga rinanona ma temanna riki n te kiraati rongorongon ana berita te Atua nakon Aberaam ao Taara inanon Karikani Bwai 17:4, 15–22; 18:9–14 ao kakoroan bukin berita akanna inanon Karikani Bwai 21:1–7. Tera ae e katereaki inanon kiibu aikai nakoia kaain te kiraati? Tera koaua aika ti kona ni karekei man te bwai are a rinanona Aberaam ao Taara bwa tina tibwaia ma te rao ae e a kabua te kantaninga ni kakoroan nanon Ana berita ma te Atua? Tera tabeua koroboki aika a tabu ke taneiai ibon iroum ae ti kona ni tibwaia? (taraa, ibukin te katoto, I-Rom 8:28; Ebera 11; Moomon 9:19–21; Reirei ao Berita aika Tabu 88:64). Tera taneiai ae a kona kaain te kiraati n tibwa ana berita te Atua ake a kakoroaki bukiia inanon maiuia? Tina kanga ni kateimatoa ara onimaki ngkana kakabwaia aika a taekinaki n te berita a kona n aki reke n te maiu aei? (taraa Ebera 11:8–13).
Ngkai ana reirei Iesu Kristo, ti riai ni birinako man te buakaka ao n aki tanrikaaki.
-
Tera te reirei ae ko namakinna bwa kaain te kiraati a reiakinaki mai rongorongon ana utu Rota ni birinako mai Totom ao Komora? Teuana te reirei are e taekinaki n ana rongorongo Unimwaane Jeffrey R. Holland inanon “Bwaai ni Ibuobuoki riki Tabeua.” Tao ko kona n tibwai ma te kiraati ni kakimototoa kabwarabwaraan te bwai are e riki n Karikani Bwai 19:15–26. N te aro raa ke n te aro ra ae n tabetai ti “[tan] rikaaki” (kibu 26) ngke ti na tara moaa ma te onimaki iroun te Tia Kamaiu? Tao kaain te kiraati a kona n tibwa te taneiai are e kabwarabwara kakaawakin te aki tanrikaaki. Tera ae raonaki n Ruka 9:62 nakon otam n te koaua aei?
Fleeing Sodom and Gomorrah, iroun Julius Schnorr von Carolsfeld
Ana tatauraoi Aberaam n anga Itaaka titebo ma aron te Atua ao Natina.
-
Rongorongon Aberaam n anga natina bwa te karea e kona n reireiniia ibukin Tamara are i Karawa n anga Natina. Teuana te kawai n neweaba te rongorongo aei bon katabeaia iteran te kiraati bwa a na iangoa Karikani Bwai 22:1–14 man ana taratara Aberaam ao te Atua te Tama, ngkai iteran te kiraati a iangoa te rongorongo aei man ana taratara Itaaka ao Iesu Kristo. Butiia kaain te kiraati bwa a na tibwauai iango ake a tia n reiakin. Riki, tera ae a reiakinna kaain te kiraati ae e kakorakora aia kakaitau ibukin Tamara are i Karawa ao Iesu Kristo? Ni mwakoron te maroro aei, ko kona ni katoka tamnein Aberaam ngke e Uota Itaaka bwa E na Kareanna (Gospel Art Book, no. 9). ke kaota te tamnei ae “Akedah (The Binding)” (ChurchofJesusChrist.org).
Bwaai n Ibuobuoki Riki Tabeua
“Te onimaki n tainako e koteakanoan taai aika a na roko.”
Unimwaane Jeffrey R. Holland e reirei:
“E kona n ae buun Rota e tanrikaaki n rawa n tara te Uea n te bwai are E tuangnga bwa e na katikui imwiina. … Ngaia are e aki tii tanrikaaki; ma e tanrikaaki ma nanona. Ni kauarerekeana, ana katikitiki nakon are mai imwaiina e karawawata mwengaraoina ibukin taai aika a na roko. …
“… I bubuti ngkami bwa kam na aki maeka ni boong aika tia n nako ke n tanginiwenei bwain ngkoananoa, n anne bwaai aika a raraoi akanne a tia n riki. N reiakinaki man bwaai aika a tia n reiakini ma tiaki ae kona maiu inanona. Ti tanrikaaki n taui mannanging taneiai ake ti rikirake mai iai ma tiaki nakon te mannang. Ao ngkana ti kan reiakina ae ti riai n reiakinna ao ni kaira te tamaroa are ti a tia n rinanona, ngkanne ti taraa are imwaira ao ti uringnga te onimaki n tainako e kotei kanoan taai aika a na roko. …
“… [Buun Rota] akea ana onimaki. E nanououa n ana konabwai te Uea n anganna te bwai ae tamaroa riki nakon are e a tia ni karekea. Ae ataaki, e iangoia bwa akea te bwai ae kona riki n tamaroa n te bwai are e a katikui imwiina. …
“… Maiuakinan te maiu are ngkoa, n raonaki ma te kairua, bon tiaki te bwai ae eti! Bon tiaki n ana euangkerio Iesu Kristo” (“The Best Is Yet to Be,” Ensign, Jan. 2010, 24, 26–27).
Kanakoraoan Ara Anga reirei
Kakabwaia aika a beritanaki. Ngkai ko kaoia naake ko reireiniia bwa a na karaoa are a tia n reiakinna, kakoaua naba n kakabwaia are e berita ibukina te Atua nakoia ake a karaoia. (Taraa naba Teaching in the Savior’s Way, 35.)