“Pebrero 14–20. Genesis 18–23: ‘Narigat Kadi Unay ti Ania Man a Banag para iti Apo?’” Umaykayo, Sumurot Kaniak—Para iti Sunday School: Baro a Tulag 2022 (2021)
“Pebrero 14–20. Genesis 18–23,” Umaykayo, Sumurot Kaniak—Para iti Sunday School: 2022
Da Sara ken Isaac, ni Scott Snow
Pebrero 14–20
Genesis 18–23
“Narigat Kadi Unay ti Ania Man a Banag para iti Apo?”
Bayat ti panagsaganam a mangisuro, laglagipem a nalabit nga addaan napapateg a bukod a padas dagiti miembro ti klase bayat ti panangbasada iti Genesis 18–23. Ania ti mabalin nga aramidem tapno maallukoymo ida a mangibinglay kadagitoy a padas ken nalawag a pannakaammo ken pannakaawat? Ibilang ti panangpaimpluensia kadagita a nalawag a pannakaammo ken pannakaawat iti panaglilinnawag iti klase.
Isuratmo dagiti Impresionmo
Yawis ti Panagbibinninglay
Masansan nga agbalin dagiti padas ken pannuboktayo a kanito a mangeddeng iti napapateg a pagbanagan iti biagtayo. Iladawan tiGenesis 18–23 ti sumagmamano a kasta a kanito iti biag da Abraham ken Lot. Nalabit a mabalin nga ibinglay dagiti miembro ti klase ti maysa a bersikulo a nasarakanda kabayatan ti bukodda a panagadal iti daytoy a lawas a mangiladawan iti posible a kanito a mangngeddeng iti napateg a pagbanagan ti biag ken ni Abraham. Kalpasanna mabalinda nga ibinglay no ania ti nasursuroda manipud iti daytoy.
Isuro ti Doktrina
Ipatungpalto ti Apo dagiti karina iti bukodna a panawen.
-
Ti pakaammuan kadagitoy a bersikulo mabalin a makaparegta kadagiti miembro ti klase a masdaaw no maipatungpalto dagiti kari ti Dios kadakuada. Tapno mairugi ti panaglilinnawag, mabalin a makatulong a mangawis kadagiti miembro ti klase a mangrebyu a kadua ti maysa a tao iti klase iti pakaammuan maipapan kadagiti kari ti Dios kada Abraham ken Sara iti Genesis 17:4, 15–22; 18:9–14 ken ti pannakaipatungpal dagita a kari iti Genesis 21:1–7. Ania kadagitoy a bersikulo ti kasla kapatgan kadagiti miembro ti klase? Ania dagiti kinapudno a maalatayo manipud iti padas da Abraham ken Sara tapno ibinglay iti maysa a gayyem a mapukpukawan iti namnama nga ipatungpalto ti Dios dagiti karina? Ania dagiti dadduma pay a nasantuan a kasuratan wenno bukod a padas a maibinglaytayo? (kitaen, kas pagarigan iti Taga Roma 8:28; Hebreo 11; Mormon 9:19–21; Doktrina ken Katulagan 88:64). Ania dagiti padas a maibinglay dagiti miembro ti klase a nangipatungpalan ti Dios kadagiti karina iti biagda? Kasano a maaywanantayo ti pammatitayo no dagiti naikari a bendision mabalin a saan a maawat iti daytoy a biag? (kitaen iti Hebreo 11:8–13).
Kas disipulo ni Jesucristo, nasken nga adaywantayo ti kinadangkes ket saan a pagbabawian ti panangisuko iti daytoy.
-
Ania dagiti adalen a mariknam a masursuro dagiti miembro ti klase manipud iti pakaammuan ti pamilia ni Lot a mangliblibas iti Sodom ken Gomorra? Naisingasing ti maysa a mabalin nga adalen iti palawag ni Elder Jeffrey R. Holland iti “Dagiti Nainayon a Resources.” Nalabit a mabalinmo nga ibinglay daytoy iti klase kalpasan ti pananggupgop kadagiti pasamak a nailadawan iti Genesis 19:15–26. Iti ania a wagas wenno iti ania a situasion a no dadduma ket “[tumaliaw]tayo iti nalikudan[tayo]” (bersikulo 26) no nasken a mangpadpadaantayo nga addaan pammati iti Mangisalakan? Nalabit a mabalin nga ibinglay dagiti miembro ti klase dagiti padas a mangipakita iti kinapateg ti saan nga itataliaw iti naglikudan. Ania ti inayon ti Lucas 9:62 iti pannakaawattayo iti daytoy a konsepto?
LadawanLadawan ni Lot ken ti pamiliana a mangliblibas iti Sodom ken GomorraPananglibas iti Sodom ken Gomorra, ni Julius Schnorr von Carolsfeld
Ti panagtallugod ni Abraham a mangisakripisio ken ni Isaac ket maipada iti Dios ken ti Anakna.
-
Ti pakaammuan maipapan iti panangidiaya ni Abraham iti anakna kas maysa a sakripisio ket makaisuro kadatayo maipapan iti sakripisio ti Nailangitan nga Ama iti Anakna. Maysa a wagas tapno masukisok daytoy a pakaammuan ket mangdutok iti kagudua ti klase a mangutob iti Genesis 22:1–14 manipud kadagiti pannirigan ni Abraham ken ti Dios Ama, idinto nga utoben ti sabali pay a kagudua ti klase daytoy a pakaammuan manipud kadagiti pannirigan ni Isaac ken ni Jesucristo. Paibinglay kadagiti miembro ti klase dagiti nalawag a pannakaammo ken pannakaawatda [insights]. Malaksid iti dadduma pay, ania ti masursuro dagiti miembro ti klase a nangpauneg iti panagyamanda iti Nailangitan nga Ama ken ni Jesucristo? Kas paset daytoy a panaglilinnawag, mabalinmo nga i-display ti ladawan ni Abraham a Mangal-ala ken ni Isaac tapno Maisakripisio (Libro ti Arte iti Ebanghelio, no. 9) wenno ipabuya ti video “Akedah (The Binding)” (ChurchofJesusChrist.org).
Dagiti Nainayon a Resources
“Kanayon a nakatudo ti pammati iti masakbayan.”
Insuro ni Elder Jeffrey R. Holland:
“Posible a timmaliaw ti asawa ni Lot nga addaan iti sakit ti nakem iti Apo iti panagidawatna kenkuana a tallikudanna. … Ngarud saan a basta laeng timmaliaw isuna; timmaliaw a sitatarigagay. Iti ababa a pannao, ti pammategna iti napalabas ti nangrimbaw iti panagtalekna iti masakbayan. …
“… Ipakaasik kadakayo a saanyon a lagipen dagidi nga aldaw a napalabas wenno pagtarigagayan dagiti awan kaes-eskanna a naglabas nga aldaw, nupay nagbalin a nasayaat dagidi nga aldaw. Nasken nga agbalin nga adal ti napalabas ngem saan a pagbiagan. Taldiapentayo ti naglikudan tapno umawat iti beggang manipud kadagiti agrimrimat a padas ngem saan a kadagiti dapo. Ken no nasursurotayon no ania ti nasken a masursurotayo ken nangyeg kadatayo ti kasayaatan dayta a napadasantayon, ngarud agtultuloytayo ket laglagipen a ti pammati ket kanayon a nakatudo iti masakbayan. …
“… Awan ti pammati ti [asawa ni Lot]. Nagduadua isuna iti kabaelan ti Apo a mangted kenkuana iti maysa a banag a nasaysayaat ngem iti addan kenkuana. Silalawag nga, impagarupna nga awan ti agur-uray a banag a mabalin a posible a kapadpada ti kinapintas ti taltalikudanna idi. …
“… Ti pananglagip iti biag iti napalabas, agraman kadagiti napalabas a biddut, saan a nasayaat! Saan a daytoy ti ebanghelio ni Jesucristo” (“The Best Is Yet to Be,” Ensign, Ene. 2010, 24, 26–27).
Panangpadur-as iti Panangisurotayo
Dagiti naikari a bendision. No awisem dagiti sursuruam nga agtignay a mayannurot iti masursuroda, paneknekam pay dagiti bendision nga inkari ti Dios kadagiti mangaramid iti kastoy. (Kitaen met iti Panangisuro iti Wagas ti Mangisalakan,35.)