Rebeca

Ladawan ni Rebeca, ni Dilleen Marsh

Pebrero 21–27

Genesis 24–27

Napabaro ti Katulagan

Bayat ti panangbasam iti Genesis 24-27, agkararagka tapno maammuan no kasano a maallukoymo dagiti miembro ti klase a maaddaan iti bukodda a padas nga agsursuro manipud kadagiti nasantuan a kasuratan.

Isuratmo dagiti Impresionmo

icon iti panagbibinninglay

Yawis ti Panagbibinninglay

Tapno maallukoy dagiti miembro ti klase a mangibinglay kadagiti nalawag a pannakaammo ken pannakaawatda manipud iti Genesis 24–27, mabalinmo nga awisen ida a mangpili iti naipangruna a binatog a nangparegta kadakuada ken isurat dagitoy iti bassit a papel. Kolektaem dagiti papel, ket pumili iti sumagmamano a basaen ken paglilinnawagan kas maysa a klase.

icon iti panangisuro

Isuro ti Doktrina

Genesis 24

Kasapulan ti kallaysa iti katulagan iti agnanayon a plano ti Dios.

• Ti pateg nga adda ken ni Abraham iti panagsapul iti maysa nga asawa para ken ni Isaac ket mangted iti gundaway a mangilawlawag iti kinapateg ti kallaysa iti katulagan iti plano ti Dios para kadatayo. Tapno mairugi ti panaglilinnawag, mabalin a basaen biit dagiti miembro ti klase ti Genesis 24 ket ibinglay dagiti banag nga inaramid ti Apo a nangtulong iti panagkaykaysa da Isaac ken Rebeca iti panagkallaysa. Apay a napateg ti kallaysa iti Apo? Tapno matulongan dagiti miembro ti klase a mangilawlawag iti daytoy a saludsod, mabalinmo nga ibinglay ti palawag ni Elder D. Todd Christofferson iti “Dagiti Pangsuporta Resources.” Kasano a makatulongtayo a mangsigurado a maipatungpal dagiti panggep ti Dios para iti kallaysa?

• Saludsoden kadagiti miembro ti klase no ania dagiti kababalin a nakitadan iti asawa, nagannak, wenno dadduma pay a nagkallaysa nga agassawa a nakatulong iti napudno, naragsak a panagdenna kas agassawa. Ipakita ti pakaammuan iti Genesis 24 dagiti kababalin a makatulong iti tao a mangparnuay iti ragsak iti panagasawa—ken iti dadduma pay nga aspeto ti biag. Kas pagarigan, iti bersikulo 12 masursurotayo maipapan iti pannakatarabay babaen iti panagkararag, ken iti bersikulo 19 masursurotayo maipapan iti panangted iti nayon a panagkagumaan iti panagserbi. Ania dagiti dadduma pay a pagbatayan a masarakan kadagitoy a kapitulo? Mabalin pay dagiti miembro ti klase ti agsapul iti “Ti Kaamaan: Maysa a Waragawag iti Lubong” (ChurchofJesusChrist.org).

Genesis 25:29–34

Makapagpilitayo iti nagbaetan ti apagbiit a pannakapnek ken dagiti banag a dakdakkel ti pategna.

• Kasano a matulongam dagiti miembro ti klasem a mangsarak kadagiti bukod nga adal manipud kadagiti padas da Jacob ken Esau? Maysa a kapanunotan ket mangawis kadakuada a mangaramid iti dua a listaan iti pisarra—maysa ti listaan dagiti agnanayon a bendision a kayat nga ited ti Dios kadatayo ken sabali pay ti listaan dagiti nailubongan a banag a mangsinga kadatayo manipud kadagita a bendision. Kalpasanna mabalin a basaen dagiti miembro ti klase ti Genesis 25:29–34, a mangsukat iti “kinainauna [birthright]” iti maysa a banag manipud iti umuna a listaan ken ti “guisado [pottage]” iti maysa a banag manipud iti maikadua a listaan. Kasano a padasen a kumbinsiennatayo ti kabusor a mangisukat kadagiti bendision ti Dios kadagiti banag a basbassit ti pategna? Ibilang ti panangawis kadagiti miembro ti klase a mangted iti tunggal maysa iti balakad maipapan no kasano ti agpokus iti Mangisalakan ken dagiti agnanayon a bendision nga idiayana kadatayo.

Genesis 26:18–25, 32–33

Ni Jesucristo ti bubon ti nabiag a danum.

• Dakamaten tiGenesis 26 ti sumagmamano a gundaway a nasken nga agkali kadagiti bubon ni Isaac ken ti sangakabbalayanna tapno mangkita iti danum, ken masansan nga agkasapulan daytoy iti dakkel a panagkagumaan. Makatulong kenka daytoy a kinapudno iti panangisurom kadagiti miembro ti klase maipapan iti panagkagumaan a kasapulan tapno mayeg ti “danum a nabiag” ti Mangisalakan iti biagtayo (kitaen iti Juan 4:10). Nalabit a mabalinmo nga iladawan daytoy babaen panangidrowing iti pisarra ti maysa a paggapuan ti danum a nakaluban iti napuskol a rugit. Mabalin nga agsisinnublat dagiti miembro ti klase iti panangikkat iti sumagmamano a rugit bayat ti panangiladawanda no kasano a masarakanda ti danum a nabiag ti Mangisalakan. Allukoyem ida a mangusar iti Pangiwanwan iti Nasantuan a Kasuratan a mangsarak kadagiti bersikulo a mainaig kadagiti banag nga ibinglayda.

  maysa a nagkauna a bubon

  Maysa a bubon iti Beer-seba, a nagkalian da Abraham ken Isaac kadagiti bubon.

dagiti nainayon a resources icon

Dagiti Nainayon a Resources

Pinarsua ti Dios ti panagkallaysa ken pamilia.

Nangted ni Elder D. Todd Christofferson iti sumagmamano a gapu no apay a napateg unay ti panagkallaysa ken pamilia iti plano ti Dios:

“Ti pamilia a nabangon iti panagkallaysa ti lalaki ken babai ket mangted iti kasayaatan a lugar para iti plano ti Dios a pagdur-asan—ti lugar a pakayanakan dagiti ubbing, a sumangbay iti kinatarnaw ken kinainosente nga aggapu iti Dios, ken ti aglawlaw para iti panagsursuro ken panagsagana a kasapulandanto para iti naballigian a mortal a biag ken agnanayon a biag iti umay a lubong. Ti dakkel a grupo dagiti pamilia a nabangon iti kakasta a kallaysa ket napateg para kadagiti kagimongan tapno agbiag ken rumang-ay. …

“… Ngem dagiti kiddawtayo para iti akem ti panagasawa ken pamilia ket saan nga agpannuray iti siensia ti kagimongan no di iti kinapudno nga isuda ket pinarsua ti Dios. Isu nga idi punganay pinarsuana da Adan ken Eva iti ladawanna, lalaki ken babai, ken pinagtiponna ida kas agassawa tapno agbalin a ‘maysa a lasag’ ken tapno agpaadu ken mangpunno iti daga. Ikutan ti tunggal tao ti nadiosan a ladawan, ngem adda iti panagtipon iti kallaysa ti lalaki ken babai kas maymaysa tapno magun-odtayo ti nalabit a naan-anay a kaipapanan ti pannakaparsuatayo iti ladawan ti Dios—lalaki ken babai. … Ti kasta a panagkallaysa … ket kangrunaan a paset ti plano ti ragsak a kas iti Pannakatnag ken Pannubbot” (“Why Marriage, Why Family,” Liahona, Mayo 2015, 52).

Panangpadur-as iti Panangisurotayo

Ipamaysam ti panangisurom iti doktrina. Bayat ti panangawismo kadagiti miembro ti klase nga agibinglay, penkem nga agtultuloyka a mangisubli iti panaglilinnawag iti doktrina kadagiti nasantuan a kasuratan. Mabalinmo nga aramiden daytoy babaen ti panangidawat kadagiti miembro ti klase a basaenda dagiti binatog iti nasantuan a kasuratan iti klase, panagsaludsod maipapan iti no ania ti ibaga dagiti nasantuan a kasuratan, ken panangawis kadagiti miembro ti klase a mangibinglay kadagiti pammaneknekda maipapan iti doktrina a maisursuro.