Pebrero 28–Marso 6

Genesis 28–33

“Pudno Unay a ni Jehova Adda Ditoy a Disso”

Bayat panagsaganam a mangisuro, ibilangmo no ania kadagiti pagbatayan iti Genesis 28–33 ti mabalin a kangrunaan a makatulong kadagiti miembro ti klase. Dagiti sumaganad a kapanunotan ti mangnayon ti bukod a panagadal ken inspirasionmo.

Isuratmo dagiti Impresionmo

Yawis ti Panagbibinninglay

Maysa a bendision ti panaguummong iti klase iti Sunday School ket ti makapagtitinnulong dagiti miembro a mangsapul iti kaipapanan kadagiti nasantuan a kasuratan. Allukoyem dagiti miembro ti klase a mangibinglay iti maysa a tao nga agtugtugaw iti asideg no ania ti insuro ti Espiritu Santo kadakuada bayat ti panagadalda kadagiti nasantuan a kasuratan iti daytoy a lawas. Mabalin a maawis ti sumagmamano a mangibinglay iti klase no ania ti napaglilinnawaganda. Mabalin a daytoy ti mangparnuay iti naimbag a pangrugian a lugar para iti panaglilinnawagyo iti klase.

Isuro ti Doktrina

Genesis 28:10–22

Iti templo agaramidtayo kadagiti katulagan iti Dios.

• Kasano a makatulongka kadagiti miembro ti klase a mangsapul iti kaipapanan iti padas ni Jacob iti Betel, kas nailadawan iti Genesis 28:10–22? Mabalinda nga irugi babaen ti panangrebyu iti Genesis 27:41–45; 28:1–5 ken panangibilang iti biag ni Jacob iti dayta a panawen. Kasano ti mabalin a panagrikna ni Jacob? Kalpasanna mabalin a sukisoken dagiti miembro ti klase ti Genesis 28:10–22. Kasano a nangbendision ken ni Jacob daytoy a padas? Kasano ti mabalin a pannakaliwliwa kenkuana? Kasano a makaparegta kadatayo ti padas ni Jacob bayat ti panagdaydayawtayo iti templo? Mabalin pay a kantaen, basaen, wenno dengggen ti klase ti “Nearer, My God, to Thee,” a naibatay kadagitoy a bersikulo iti (Hymns, no. 100). Mabalinda nga ibinglay dagiti ragup ti balikas manipud iti kanta wenno manipud iti Genesis 28:10–22 a mangipalagip kadakuada iti padpadasda iti panangikarigatan nga umas-asideg iti Mangisalakan.

• Ti agdan a nakita ni Jacob iti tagtagainepna ket masansan a maidilig kadagiti katulagan iti templo. Mabalin a kayatmo ti mangipakita wenno mangidrowing iti ladawan ti maysa nga agdan ken maysa a templo. Mabalin nga irebyu dagiti miembro ti klase ti Genesis 28:10–22 ket pagsasaritaan no ania ti isuro kadatayo ti agdan iti tagtagainep ni Jacob maipapan iti templo. Ania pay ti masarakantayo kadagitoy a bersikulo a mangipalagip kadatayo maipapan kadagiti bendision nga awatentayo gapu kadagiti katulagantayo iti templo? (Kitaen iti “About the Temple Endowment” ken “About a Temple Sealing” [temples.ChurchofJesusChrist.org].)

• Tapno matulongan dagiti miembro ti klase a mangutob kadagiti kari ti katulagan ni Abraham, a pinabaro ti Apo ken ni Jacob, mabalinmo nga awisen ida a mangbasa iti Genesis 28:10–15 ken pagsasaritaan no kasano a makaawattayo kadagitoy a bendision iti agdama (kitaen met iti Genesis 12:2–3). Mabalinda pay a basaen ti palawag ni Presidente Russell M. Nelson iti “Dagiti Nainayon a Resources,” a mangsapsapul kadagiti bendision a sumangbay manipud iti panagaramid ken panagtungpal kadagiti katulagan. Kasano a nabendisionan ni Jacob babaen ti panangawatna kadagiti kari a masarakan iti Genesis 28:10–15? Ania dagiti koneksion a makitatayo iti nagbaetan dagiti pasamak kadagitoy a bersikulo ken dagiti pasamak iti Genesis 29 ken 30 (ti panagkallaysa ni Jacob ken dagiti pannakaipasngay dagiti annakna)? Kasano a bendisionannatayo ti Apo no agaramid ken agtungpaltayo kadagiti sagrado a katulagan?

Ladawan da Jacob ken Esau nga agin-innarakup, ni Robert T. Barrett

Genesis 32–33

Makatulong kadatayo ti Mangisalakan a mangparmek iti sinnupiat kadagiti pamiliatayo.

• Mabalin a makaparegta tiGenesis 32–33 kadagiti miembro ti klase nga agtarigagay a mangsapul iti pannakapaimbag dagiti panaglilinnangen iti pamilia. Mabalin a makatulong a pagupgop biit iti maysa a miembro ti klase dagiti pasamak a naisurat iti Genesis 27. Ti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia ket mangiraman kadagiti saludsod nga utoben bayat ti panagadal iti Genesis 32–33. Nalabit a mabalin a pilien dagiti miembro ti klase ti maysa kadagitoy a saludsod ken mangsapul kadagiti sungbat kadagitoy a kapitulo. Mabalin nga agtallugodda pay a mangibinglay kadagiti padasda idi iti panangpapigsa kadagiti nadadael a panaglilinnangen iti pamiliada. Allukoyem ida a mangisarita no kasano a tinulongan ida ti Nailangitan nga Ama.

Dagiti Nainayon a Resources

Annaknakayo ti katulagan.

Insuro ni Presidente Russell M. Nelson:

“Iti panagbuniag makitulagtayo nga agserbi iti Apo ken agtungpal kadagiti bilinna. No makiranudtayo iti sakramento, pabaruentayo dayta a katulagan ken ipakdaartayo ti kinatallugodtayo nga umawat iti bagbagitayo iti nagan ni Jesucristo. Iti kastoy naadaptartayo kas annakna a lallaki ken babbai ken maawagantayo nga agkakabsat a lallaki ken babbai. Isu ti ama ti baro a biagtayo. Kangrunaanna, iti nasantuan a templo, makapagbalintayo a makipagtawid kadagiti bendision ti agnanayon a pamilia, kas naikari idin kada Abraham, Isaac, Jacob, ken iti kaputotanda. Iti kastoy, ti celestial a kallaysa ti katulagan ti pannakaitan-ok.

“No mautobtayo nga annaktayo ti katulagan, ammotayo no asinotayo ken no ania ti namnamaen ti Dios kadatayo. Naisurat ti lintegna iti puspusotayo. Isu ti Diostayo ket datayo dagiti taona. Agtalinaed dagiti naikari nga annak ti katulagan a natibker, uray iti panawen ti rigat. No siuuneg a naimula ti doktrina iti puspusotayo, uray no maep-ep ti saem ti patay ken mapapigsa ti naespirituan a kiredtayo” (“Covenants,” Liahona, Nob. 2011, 88).

Panangpadur-as iti Panangisurotayo

Tulongam dagiti agad-adal nga agtignay a maibatay kadagiti pannignay [promptings]. Ti pudno a pannakapasurot wenno kumbersion ket saan laeng a panangrikna iti Espiritu a mangpatpatalged iti kinapudno kadagiti kararuatayo: nasken pay nga agtignaytayo a maibatay kadagita a kinapudno. Malaksid iti panangisuro kadagiti agad-adal a mangrikna ken mangbigbig iti Espiritu, tulongan ida nga agtignay a maibatay kadagiti pannignay nga awatenda” (Panangisuro iti Wagas ti Mangisalakan, 10).